I've made up my mind...

Jæja. Ég hef alltaf verið á báðum áttum varðandi kynjakvóta en nú er ég búin að komast að afdráttarlausri niðurstöðu! Ég lít ennþá á kynjakvóta sem síðasta úrræði en eins og kynjakvóti er praktíseraður núna innan flokkana myndi ég frekar vilja sjá hann aflagðan. Af hverju? Jú, mér sýnist að kynjakvótinn í núverandi mynd sé að tryggja körlum áframhaldandi meirihluta á þingi. Ég heyrði smá brot úr Silfri Egils um helgina þar sem Einar Mar var í viðtali að tala um fylgi kynjanna við flokkana. Karlar styðja Sjálfstæðisflokkinn í meira mæli en konur og konur styðja frekar vinstri flokkana. Vinstri flokkarnir, þ.e. VG og Samfylkingin eru með nokkurs konar kynjakvóta í einhverri mynd. En... reyndin virðist sú að þar sem konur aðhyllast frekar þessa flokka er ofgnót af konum í framboði fyrir þessa flokka í sumum kjördæmum og á öðrum stöðum er kynjakvótinn ekki þannig að hann tryggi konum aðgang að þingi, sbr NV kjördæmið þar sem eingöngu er tryggt að bæði kyn séu í fyrstu 3 sætum listans - sem dugar skammt þegar konan sem situr á þingi hlýtur ekki kosningu nema í 3. sætið! Í öðrum flokkum gæti kynjakvótinn orðið til þess að mjög frambærilegar konur komist ekki að, þ.e. að þær þurfi að eftirláta sitt sæti til karla. Á meðan eru flokkar eins og Sjálfstæðisflokkurinn ekki með kynjakvóta og þar eru karlarnir kosnir í miklum meirihluta. Þannig leiðir kynjakvótinn í raun til þess að konur komast aldrei í jafna stöðu á þingi.

Sem sagt - mín niðurstaða er sú að ef við ætlum að hafa kynjakvóta þá verða þeir að gilda yfir alla flokka og þingið í heild, ekki einstaka lista þar sem konur eru í meirihluta eða svo fá þingsæti að hann dugar ekki til neins þar sem karlar eru hvort eð er í efsta sætinu - sem er kannski eina sætið sem nær kosningu inn á þing!

Haustþingið

Jæja.... ákvað af einhverri furðulegri ástæðu að ná mér í tveggja daga sjálfssköpuð veikindi og missa þar með af 2 merkisviðburðum sem mig langaði á. Sit núna og hlusta á beina útsendingu frá haustþingi Framtíðarlandsins. Þar er greinilega rífandi stemning :) Mig langar að vera þar en hlusta í staðinn á beina útsendingu frá þinginu. Getið kíkt á www.framtidarlandid.is til að sjá hvernig á að tengjast!

Ætlar þú að kjósa?

Prófkjörin eru að hefjast, vei, vei, vei. Ætlar þú að kjósa? Það var verið að benda mér á að svo gæti farið í Norð-vestur kjördæmi að engin kona kæmist á þing!!! Smá sjens að Samfylkingin komi konu inn en það er líka sjens að karlarnir fái það góða kosningu að þeir verði í 2 fyrstu sætunum - sem eru þau sæti sem eru nokkuð örugg inn á þing. Skilst að enn verri sögu sé að segja úr hinum flokkunum, að konur eigi bara ekki möguleika á þingsæti. Arg og garg - hvar er þetta helv#%"& lýðræði? Verst að ég get ekki kosið þar.

Annars er þetta búinn að vera skemmtilegur dagur. Fundurinn með handhöfum Bleiku steinanna var vel lukkaður. Sama marki brenndur og allir aðrir Bleiku steina fundir - það mættu fáir en fundurinn gríðargóður. Algjör synd að það láti ekki fleiri sjá sig því þessir fundir eru alltaf vel þess virði. Fór í Smáralindina áðan til að kaupa mér föt. Var gífurlega dugleg og fjárfesti í einu pari af skóm, kjól og gallabuxum! Sjaldan sem ég er svona dugleg enda fátt leiðinlegra en að versla föt... en gaman þegar það er búið.

Prófkjörsfundurinn í gær var líka vel lukkaður - og fámennur að sama skapi. Ætli þetta sé einkenni góðra funda? Eva María var einstaklega góð í að tala um fjölskyldu málin. Vona að það heyrist meira í henni með þau mál á opinberum vettvangi. Svo er alltaf hægt að velkjast um það hversu hlutlaus talskona Femínistafélagsins á að vera í að lýsa yfir stuðningi við einstaka frambjóðendur. Ég segi enn og aftur - ég er afskaplega þverpólitísk - en ég styð femínista í öllum flokkum og Bryndís er femínisti! Ég er reyndar ekki nógu vel að mér til að geta greint út and-femínistana. Eina sem ég er algjörlega viss um að er andfemínisti - og ég mun ekki kjósa - er Sigríður Andersen. Bendi öllum sem vilja mótmæla því að ég styðji ekki allar konur í framboði á grein eftir hana á www.tikin.is. Þó ég geri ekki endilega kröfu um að konur í framboði séu femínistar til að ég geti kosið þær - þá geri ég kröfu um að þær vinni ekki leynt og ljóst gegn jafnrétti kynjanna. En ég mun að sjálfsögðu ekki taka karl sem er jafnslæmur eða verri framyfir hana.

Þó ég styðji ekki Sigríði er ekki þar með sagt að hún eigi ekki flokkssystur sem gott er að kjósa. Ég t.d. ætla að kjósa Guðfinnu Bjarnadóttur, Ástu Möller og fleiri í hennar flokki. Sömuleiðis fannst mér gífurlega fínt að fá símtal frá manni á kosningaskrifstofu Daggar Pálsdóttur sem minnti mig á að kjósa hana - og á eftir því fylgdi "ert þú kannski konan sem var að brillera í Kastljósinu áðan?" Þetta kalla ég að taka eftir - og kunna að fiska atkvæði ;)

Bleikir steinar

Morgunverðarfundurinn með handhöfum bleika steinsins er í fyrramálið. Eins skrýtið og það nú er hafa fyrri fundir með handhöfunum verið frekar lítið sóttir. Samt hafa þetta alltaf verið rosalega góðir fundir sem ég hefði engan veginn viljað missa af. Nú sjáum við til hvernig þetta verður í fyrramálið! Endilega mættu ef þú hefur tök á. Staður og stund: kl. 8, föstudagur 27. sept, Blómasal Hótel Loftleiða. Kostar ekkert inn en svangir gestar geta keypt morgunmat á 1500!

Nú er ég að græja mig fyrir framboðsfundinn með Bryndísi. Fyrsti framboðsfundurinn minn! Gaman, gaman. Veit ekki alveg hvernig ég að koma því frá mér á 10 mín sem ég vil sjá gerast í jafnréttismálum.

Þó Femínistafélagið sé ekki með mikið af viðburðum í Femínisavikunni sem þarf að mæta á þá er ég búin að vera á fullu öll kvöld vikunnar. Kíkti á afmæli kynjafræðinnar á þriðjudaginn. Það var meiriháttar gaman. Missti því miður af flestum erindunum :( - sem ég frétti að hefðu verið ógisslega skemmtileg - en ég náði hinum frábæru tónlistaratriðum og að hitta alla skemmtilegu femínistana :) Í gær var það svo Kastljósið. Hringdu í mig kl. rúmlega 4 til að athuga hvort ég gæti ekki mætt til þeirra um kvöldið. Ég sagði auðvitað já - því konur mega ekki segja nei við viðtölum. Vinsamlegast leggið það á minnið og notið næst þegar þið heyrið einhvern verja skort á kvenkynsviðmælendum í fjölmiðlum á þeirri forsendu að konur séu ekki fáanlegar í viðtöl. Við segjum sko víst já - meira að segja þó fyrirvarinn sé stuttur. Það vildi mér til happs að ég er nýbúin að vera kenna í Inngangi að kynjafræði um kven- og karlímyndir í samtímamenningu plús að vera með erindi á Konunni. Þetta var því frekar ferskt í kollinum. Linkur á viðtalið er inn á Femínistavikuheimasíðunni (sjá hér fyrir neðan). Þar er líka linkur á viðtal við Steinunni og Hjálmar.

Ég ætlaði að setja með mynd með vísun á heimasíðuna sem staðalímyndahópur setti upp með kynjuðu fréttunum. En myndakerfið í blogger er greinilega í kaffi þessa stundina svo myndin verður að koma seinna. Linkurinn er www.stadalryni.blogspot.com. Mæli með henni - og fundinum í fyrramálið :)

Ég á framboðsfundi

Ok ég fór ekki í framboð en ég fæ samt að tala á framboðsfundi, sjá hér: http://www.bryndisisfold.com/

Ætla að tala eins og ég sé í framboði. Sjá hvernig fílingur það er ;)

Til hamingju með daginn

Þá er Femínistavikan formlega hafin :) Yes! Verð í bleiku skapi það sem eftir er vikunnar. Smellið á myndina til að skoða vikuna.

Búið að vera frekar mikið að gera og það skýrir fáar færslur undanfarið. Á eftir að blogga um hvernig var á Konunni á laugardaginn!!! Í stuttu máli þá verð ég að segja eins og er að ég er hálf klofin út af þessari sýningu. Markaðssetningin gekk allt of mikið út á tísku og förðun sýnist mér. Veit að það fældi fullt af konum frá, allavega hafa margar lýst því yfir við mig að þeim hafi litist afskaplega vel á kynninguna í byrjun en svo hafi þetta leiðst út í of mikla útlitsdýrkun. Ég get svo sem tekið undir það en... Ég fór þarna á laugardaginn þar sem ég var með erindið. Byrjaði á að mæta rétt fyrir 9 í útvarpsviðtal hjá Erlu á Rás 2. Við vorum 4 í viðtali. Auk mín var Aðalheiður hjá Kaffitár, Þorbjörg sem er með grunnreglurnar 10 og Selma sem var stílisti fyrir sýninguna. Þetta var meiriháttar gaman og ég hefði alveg getað setið með þeim í marga klukkutíma í viðbót að fjalla um hin og þessi málefni. En ég varð víst að drífa mig heim og græja mig fyrir erindið mitt. Það mættu um 20 á fyrirlesturinn minn. Mættu 40 á fyrirlesturinn á undan og eftir - sem voru báðir tengdir sjálfsstyrkingu. Ég fór á fyrirlesturinn sem var á eftir mínum. Missti reyndar af byrjuninni en var viðstödd seinni hlutann. Líkaði ágætlega það sem ég heyrði en varð samt sorgmædd yfir hversu margar konur þurfa á þessu að halda. Það er greinilegt að sífellt er verið að ráðast á sjálfsmynd kvenna í þessu samfélagi með tilheyrandi afleiðingum. Þess vegna borgar baráttan sig! Reyna að stöðva þetta brjálæði.

Stemningin á sýningunni var líka ágæt. Mér fannst gaman að kíkja á Heimilisiðnaðarskólann, sjá íslenska hönnun og svo fannst mér afskaplega krúttlegt fyrirtækið sem selur allt til brjóstsykursgerðar í gegnum netverslun. Hins vegar líkar mér ekki að aðgreina kynin alltaf hreint - en mér líkar kvennasamstaðan og andrúmsloftið sem skapast í góðra kvenna hópi. Jamm svona er þetta - eilíf togstreita. Mér skilst að sýningin eigi að verða að föstum viðburði og ég vona að næstu sýningar verði þverskurður af konum, þ.e. fjölbreyttari flóra.

Að lokum - er ekki kominn tími til að allar konur fari í langt verkfall og neiti að gera nokkurn skapaðan hlut þar til búið verður að útrýma launamun kynjanna? Mér finnst það...

Myrkrið er yndislegt

Ég væri til í svona myrkvun á höfuðborginni aftur fljótlega. Síðast voru engar stjörnur - sem var bömmer - en engu að síður var gott og friðsælt að fara út í myrkrið. Undanfarið hafa oft verið stjörnubjart og í hvert skipti hugsa ég "oh hvað það væri frábært ef allt væri slökkt núna." Síðast voru okkar nágrannar (og við auðvitað) dugleg að slökkva öll ljós.
Anyways - datt þetta bara sí svona í hug því ég er þreytt og vantar smá dekur. Held það sé ekki arfavitlaus hugmynd að skipta súkkulaðinu út sem dekri og setja stjörnurnar inn í staðinn.

Spennandi framundan

Á laugardaginn ætla ég að hætta mér inn á óþekkt svæði og spyrja hvenær kvenleikinn týndist á sýningunni Konan! Verður örugglega ógisslega gaman - þ.e.a.s. ef ég næ að skrifa erindið mitt fyrir laugardaginn ;)

Þann 24. hefst svo Femínistavika Femínistafélagasins. Vei. Byrjum á að hvetja allar konur til að biðja um launahækkun og alla atvinnurekendur að jafna launin.

Þann 29. er svo haustþing Framtíðarlandsins. Verður megaflott!

Annars er helst í fréttum að ég var fundarstjóri á kynningu á niðurstöðum úr rannsókn á klámnotkun unglinga. Margt áhugavert sem þar kom fram. Hefði samt gjarnan viljað hafa endað fundinn áður en spurningin um hvort klám gæti ekki dregið úr barnamisnotkun kom úr salnum. Ef einhver er í vafa þá er svarið nei.

Kæra dagbók

Sá í fréttum á RUV áðan að allir Bretar eru hvattir til að halda vefdagbók í dag. Ákvað að vera memm þó ég sé ekki bresk svo hér kemur fyrri partur dags.

Vaknaði við útvarpið á slaginu kl. 7. Náði nú samt að dorma í gegnum Morgunvaktina til rúmlega 8 en þá fór ég á fætur, fékk mér lýsi og drakk þennan dýrindis Smoothie sem Grétar gerði handa okkur. Gluggaði í Fréttablaðinu á meðan og sá að eina ferðina enn eru konur hér um bil fjarverandi af forsíðunni. Efst í vinstra horninu sést glitta í pínkulitla mynd af Sigríði Andersen sem segir að líkamsrækt sé lykillinn að velgengni. Ég vitlaus - hélt það væri menntun, gáfur, dugnaður, tengslanet, aðgangur að fjármagni og svo framvegis.... Ákvað í snarhasti að fjölmiðlar yrðu teknir fyrir í pistli dagsins, nánar tiltekið Fréttablaðið. Dundaði mér sem sagt í morgun við að telja og greina forsíðumyndir Fréttablaðsins síðustu viku. Náði að skila pistlinum rétt fyrir 2 en þá var ég búin að afreka að hella upp á kaffi, snara í mig hádegismat, spjalla í hálftíma við Betu kláru í símann og rölta um lóðina með bróðir hennar mömmu sem var svo vænn að lána mér laufryksuguna sína svo ég gæti gert tilraun til að fjarlægja steininguna af lóðinni. Framundan er svo kennsla í Hagnýtum jafnréttisfræðum hjá HÍ, ráðsfundur og halda áfram að undirbúa kennslu fyrir morgundaginn. Sé svo líka fram á að þurfa að redda nýrri mynd fyrir Konuna - en þar verð ég með erindið "Hvenær týndist kvenleikinn?" á laugardaginn. Myndin sem ég sendi er víst ekki í nógu góðum gæðum.

Eitt meiriháttar afrek það sem af er degi! Náði að skila 2 hugleiðingum fyrir dagbókina sem Salka ætlar að gefa út :)

Vona að það verði ekki fleira að frétta af mér í dag.

Ef ég væri gamblari...

Fjölmiðlar eru mér afar hugleiknir þessa dagana. Skilaði pistlinum í Viðskiptablaðið í hádeginu en hann fjallar einmitt um 100% karla sem álitsgjafa og fjarveru kvenna úr fjölmiðlum. Á póstlistanum eru síðan miklar umræður um Sunnudagskastljósið þar sem margir höfðu búist við að Eva María færi á kostum. Í staðinn hefur hún sýnt á sér mjög svo andlega gagnkynhneigða hlið og rætt við 5 karla og 1 konu, mörgum til mikilla vonbrigða. Ég játa að ég er svekkt því ég hlakkaði til að fá Evu Maríu aftur á skjáinn - en ekki undir þessum formerkjum. Miðað við þessa þróun held ég að það væri næstum óhætt að veðja á að næsti kvenkynsviðmælandinn verði fyrrverandi fegurðardrottningin sem var að skila af sér kórónunni í Póllandi!

Fréttir helgarinnar

Tvennt stórmerkilegt í Fréttablaðinu um helgina. Á laugardaginn var fjallað um "pole fitness" sem snýst um konur sem taka þátt í klámvæðinginni og eru óðar og uppvægar að gangast upp í því hlutverki að vera kynlífshjálpartæki fyrir karla. Það þykir víst efla sjálfstraustið til muna...

Á sunnudaginn var síðan yfirlit yfir helstu álitsgjafa þjóðarinnar. Þeir eru víst allir karlkyns. Verður einhver ennþá pissed þegar sagt er að hér ríkir karlaveldi?

ps. Hér er kvótið í mig um pole fitnessið:

Súludansiðnaðurinn byggir á hlutgervingu kvenna þar sem konur eru smættaðar niður í kynlífshjálpartæki sem karlar geta keypt sér aðgang að. Þessu hlutverki er síðan hampað í gegnum aðra miðla þannig að svo virðist sem það eftirsóknarverðasta sem konur hafi fram að færa sé að vera fáklæddar í eggjandi stellingum án nokkurra vitsmunalegra eiginleika. Með alla þessa pressu er ekki skrýtið að sumum konum finnist skemmtilegt eða spennandi að uppfylla hlutverkið og öðlast þannig samþykki sem eftirsóknarverðar verur. Við viljum jú öll vera dýrkuð og dáð. Vandamálið við súludans er hins vegar að hann byggir ekki á kynfrelsi og viðurkenningu á kynhvöt kvenna heldur þátttöku í kúgun sem heldur konum niðri á öllum sviðum. Ef konur vilja í raun og sann öðlast kynfrelsi þá er lausnin ekki fólgin í að vera þátttakendur í einum ljótasta iðnaði sem til er, iðnaði sem lítur á konuna sem söluvöru aðgengilega fyrir alla. Það eru til ótalmargar betri leiðir til að halda sér í formi og dansa sem felast ekki í að læra að bugta sig og beygja eins og undirgefnar og þægar konur.

Gaman og ekki gaman

Ég er ennþá undir áhrifum eftir Hittið á þriðjudaginn. Hrikalega var þetta gaman. Það var hrein unun að sitja út í sal og hlusta á þær Rúnu, Þorgerði, Kristínu, Gyðu og Steinunni viðra sínar skoðanir á stefnu, áherslum og aðgerðum. Hittið varð allt öðruvísi en ég og fleiri bjuggumst við - en ég held miklu skemmtilegra. Eins og svo oft áður eru engin einhlít svör eða ein uppskrift en svakalega tókst þeim að fá heilabúið til að synda af stað og spá og spekúlera í framtíðinni. Ef einhver heldur að baráttan sé leiðinleg - think again! Fátt er eins gefandi og spennandi og að brjóta heilann um hvað þarf til að fá þá veröld sem við viljum. Ég skrifaði allt samviskusamlega niður og nú er bara að vinna úr öllu þessu...

Svo er fleira gaman í gangi. Sóley er á landinu :) Veit ekki hvort ég næ að hitta hana eitthvað meira áður en hún fer út en ég er hvort sem er á leiðinni að heimsækja hana fljótlega... ætla að droppa við hjá henni á leiðinni heim frá Finnlandi.

Svo er líka sitthvað leiðinlegt í gangi. Nenni ekki að blogga um það :( Er samt orðin ansi heit fyrir breytingum á heilbrigðiskerfinu - en ekkert einkavæðingarkjaftæði samt. Það alversta sem við gætum gert er að einkavæða heilbrigðiskerfið.

Ertu búin að skrá þig?

Bríet 150 ára

Bríet Bjarnhéðinsdóttir átti 150 ára fæðingarafmæli í síðustu viku. Sem betur fer skellti ég mér á Bríetarþingið sem haldið var á föstudaginn. Það var hrikalega skemmtilegt og fróðlegt - fyrir utan að það vantaði hlé. Keypti bókinna Strá í hreiðrið sem fjallar um Bríeti. Er aðeins búin að glugga í bókina um helgina. Það er alveg magnað að lesa um æviskeið hennar og hvernig hún upplifði hlutina.
Bríet áttaði sig snemma á kynjamisrétti. Það sá hún bæði í því að stelpur fengu ekki að mennta sig í sama mæli og strákar og eins í verkaskiptingu á heimilinu. Þar sést glöggt að það voru ekki karlmennirnir sem unnu lengstan vinnudag - því þó þeir púluðu og strituðu allan liðlangan daginn þá gátu þeir komið heim og hvílt sig á kvöldin og á sunnudögum. En þá puðuðu stelpurnar líka. Þurftu til dæmis að draga af karlmönnunum stígvélin og sokkana.
Þar sem Bríet var mjög fróðleiksþyrst var hún dugleg að útvega sér bækur til að lesa. Hún kenndi í smá tíma - fyrir mun minni laun og meiri vinnuskyldi en karlmaðurinn sem var ráðinn á eftir henni í starfið. Okkur hefur miðað fram á við á mörgum þessum sviðum - sérstaklega hvað varðar lagalegt jafnrétti en það er merkilegt hvað við erum enn að glíma við mörg af sömu vandamálum, s.s. launamun og verkaskiptingu. Textar Bríetar eru sérlega skemmtilegir og sumt af því er hægt að nota í baráttunni enn þann dag í dag - óbreytt! Mér skilst að Kvennablaðið (sem Bríet gaf út) sé aðgengilegt á www.timarit.is - ætla að skoða það í nánustu framtíð.

Eins gott...

Í dag var mælt með að allir yrðu í svörtu í tilefni þess að byrjað var að hleypa vatni í Hálsalón. Í dag var líka fjallað um nauðgunartilraun í Big brother sem "kynlífsskandall". Síðan hvenær er nauðgun kynlíf? Í Fréttablaðinu í dag voru vændisauglýsingar (sem og aðra daga) og á Skjá 1 auglýsingar frá stað sem selur konur. Hvar er valfrelsið og jafnréttið? Eins sem virðist vera til staðar er bræðralagið. Ég mæli með að það verði lagt niður og systkynalag tekið upp í staðinn! Og by the way - það sáust engar stjörnur. Eins gott að ég var í svörtu í dag.

Ég verð að læra dönsku!!!!

Hvað gerir kona þegar hún kemst að því kl. rúmlega 6 að hópurinn sem hún ætlar að halda kynningu um Femínistafélagið á ensku fyrir er ekki sérlega sleipur í enskunni? Jú, hún hringir í karlmann til að bjarga sér!!!! Gísli talar ljómandi góða dönsku svo þetta reddaðist nú allt. Reyndar var móttakan í gær bara ansi skemmtileg. 15 Danir sem vinna að því að samþætta jafnréttissjónarmið á sínum vinnustað mættu galvösk á Hallveigarstaði. Þar var Þorbjörg Inga með kynningu á Hallveigarstöðum og KRFÍ, Gísli með kynningu á FÍ og Hrönn kynnti verkefnið Stöðvum barnaklám á netinu. Forsprakki Danana hélt síðan stutta kynningu á þeim og ástæðunni fyrir því að koma til Íslands. Rauðvín og ostar rann ljúflega ofan í gesti á meðan og á eftir voru fjörlegar umræður. Þess á milli barst röddin hans Ómars inn um gluggann því útifundurinn var á sama tíma. Ég vona að ég hafi náð að halda andlitinu þegar ein konan sagði við mig að það væri synd að þetta tvennt væri á sama tíma! Já, reyndar en það er líka gaman að hitta ykkur.... :) Sem það reyndar var. Þau voru líka ánægð með kvöldið. Voru ánægð með að hafa afslappað og óformlegt andrúmsloft en fá fullt af upplýsingum í leiðinni. Ég held þó að við hápunktur ferðarinnar hjá þeim hafi verið að fá að hitta frú Vigdísi - enda er hún ein af 3 góðum ástæðum fyrir því að þau völdu að koma til Íslands að kynna sér jafnréttisbaráttuna.

Göngum lengra - hættum við!

http://kjosa.is/gongum-lengra/

Ég vona að þið ætlið öll að mæta í gönguna. Ég verð að taka á móti dönskum hópi jafnréttisfulltrúa í kvöld svo ég get ekki verið dropi eða sandkorn í göngunni :( Væruð þið nokkuð til í að kippa með ykkur staðgengli fyrir mig??? :)

Vei....

Ég er komin með vinnuaðstöðu :)

Ofbeldi án refsingar

Fréttablaðið í dag - eftir yours truly:

Ofbeldi án refsingar

Björn Bjarnason dómsmálaráðherra hefur kynnt í ríkisstjórn frumvarp um breytingar á kynferðisbrotakafla hegningarlaga. Meðal breytinga er að refsiákvæði um að stunda vændi er afnumið og lagt er bann við að auglýsa vændi. Báðar breytingarnar eru spor í rétta átt en það vantar mikilvægasta skrefið sem er að gera kaup á vændi refsivert. Skoðanir fólks eru skiptar um hvaða leið er best að fara, hvort sem fólk er hlynnt vændi eða ekki. Því miður líta sumir enn svo á að vændi eigi að flokkast með frjálsum viðskiptum manna á milli en slík afstaða viðheldur völdum karlmanna yfir konum. Þau sem eru andsnúin vændi greinir líka á um leiðir en kvennahreyfingin hér á landi hefur sameinast um afdráttarlausa afstöðu, að fara sænsku leiðina.

Meirihluti þeirra sem eru seld í vændi og mansal eru konur en flestir kaupenda eru karlar. Kynjavinkillinn er skýr þar sem karlmönnum er í raun tryggður aðgangur að líkömum kvenna og þeirra karla sem lenda neðst í valdapíramídanum. Afleiðingar vændis eru svipaðar afleiðingum kynferðisofbeldis og skömmin og niðurlægingin er hvergi meiri en hjá þeim sem eru í vændi. Þessar manneskjur þarfnast félagslegra úrræða til að komast út úr erfiðum aðstæðum. Rétt eins og við refsum fólki ekki fyrir sjálfsmorðstilraunir eða aðrar sjálfsmeiðingar heldur réttum þeim hjálparhönd þurfum við koma eins fram við þau sem eru í vændi. Hvað varðar kaupendur er staðan allt önnur. Hver einasti kaupandi á að vita að hann er að skaða aðra manneskju og beita hana ofbeldi. Kaupandinn á að vita um háa tíðni kynferðisofbeldis í fortíð vændiskvenna, tenginguna við fíkniefni, neyð og mansal. Hann á einnig að vita að ef svo ólíklega vill til að hann lendi á hinni hamingjusömu hóru að þá tryggir hann með kaupunum að hamingjan endist ekki lengi þar sem afleiðingarnar verða á endanum eins og í öðru kynferðisofbeldi. Það er því með ólíkindum að samfélag sem kallar sinn samtíma upplýsingaöld nýtir ekki þá þekkingu sem til er með því að gera kaup á vændi refsivert.

Dramatísk framkvæmdasaga...

Ég er viss um að það er allsherjarsamsæri að eina hádegisviðal NFS í vikunni sem ekki er aðgengilegt á VefTV er viðtalið við yours truly þar sem vændi er viðfangsefnið... aha! Brot úr viðtalinu er hins vegar í kvöldfréttum á fimmtudaginn - sem önnur frétt reyndar - þvert á allar samsæriskenningar.

Vikan annars búin að vera fín. Ég á góða vini (eins og Erla) en á mánudaginn var ég að bruna upp Ártúnsbrekkuna klukkan hálf-átta þegar Betan hringir og býður mér á Pina Bausch, sem átti að byrja hálftíma seinna. Ég auðvitað þáði það og sá ekki eftir því. Sýningin var æðisleg og auðvitað mun skemmtilegra að hún er ádeila og inniheldur boðskap. Á efri árum kann ég mun betur að meta svoleiðis heldur en innihaldslausa skemmtun... Við komumst samt að þeirri niðurstöðu að sýningin hafi ekki verið eins róttæk og margir bjuggust við.

Svarta gólfinu var síðan bjargað í vikunni :) :) :) :) :) Mér til mikils léttis... Þar sem Valla Matt ætlar að hætta með Veggfóður er ég viss um að dyggir lesendur bloggsins kunna að meta ítarlegar lýsingar á framkvæmdum á mínu heimili. Björgunaraðgerðir fóru sem sagt svona fram:

Grétar fékk að ráða og hann vildi prófa bronsleiðina frekar en bæsleiðina... ég fjárfesti því í heilli túpu af bronslit fyrir svo mikið sem 940 kr. Þegar heim var komið var spenningurinn svo mikill að við skelltum okkur beint í að bera þetta á gólfið. Það var gert með pensli og myndast við að ná svona þurrburstunaráferð... Niðurstaðan sú að gólfið varð hálfblettótt og lofaði ekki góðu. Við komumst loks að þeirri niðurstöðu að prófa að setja bara bæsið ofan á þetta - og héldum því áfram að bletta gólfið.... og skiptum svo um skoðun. Sáum að þetta væri bara kolómögulegt og allt ónýtt :( Gripum því til þess drastíska ráðs að ætla að hreinsa þetta af gólfinu með terpentínu, myndast við að fjarlægja öll ummerki og fara mína leið (bæsið góða...). Ákváðum að fórna moppunni okkar í verkið og hófumst svo handa. Grétar hellti vænum slurk af terpentínu á gólfið og ég renndi moppunni yfir til að fjarlægja bronsið. En viti menn og konur - kom ekki bara þessa undurfallega áferð á bronsið :) Við kláruðum því allt gólfið svona - settum vænan slurk af bronsi - helltum terpentínu í næsta nágrenni og moppuðum yfir. Létum þorna yfir nótt og lökkuðum svo 2 umferðir með hálfmöttu lakki. Erum þvílíkt ánægð með gólfið. Það er algjört æði og við ætlum að öllum líkindum að leggja í sama pakka í andyrinu og upp stigann.

Eigum við?

Í staðinn fyrir að fara í framboð væri ég alveg til í að kaupa NFS. Hlýtur að vera hægt að fá stöðina á góðu verði núna... og einhver bankinn hlýtur að vera til í að lána nokkrum konum nokkra peninga. Einhver memm?

Vörusvik!!!

Ætli þau sem keyptu bókina Franskar konur fitna ekki megi skila henni núna?

Af mbl.is:
Tækni & vísindi AFP 19.9.2006 08:02
Þriðjungur Frakka of þungur

Franska þjóðin er að þyngjast og nú svo komið að tæplega þriðjungur þeirra er yfir kjörþyngd eða er að berjast við offitu, samkvæmt nýrri könnun sem unnin var fyrir frönsku heilbrigðisþjónustuna. Samkvæmt henni eru 19,8 milljónir Frakka, af 63 milljónum íbúa, yfir kjörþyngd og 5,9 milljónir eru offitusjúklingar. Hefur offitusjúklingum í Frakklandi fjölgað úr 2,3 milljónum í 5,9 milljónir á níu árum.
Samkvæmt könnuninni eru ákveðnir þjóðfélagshópar í meiri hættu og eru þeir sem eru í láglaunastörfum í mestri hættu.

Að sögn dr. Arnaud Basdevant, næringarfræðings við Parísar spítala, er sem allir aldurshópar séu í hættu og að offitusjúklingarnir verði alltaf yngri og yngri. Mun fleiri konur eru of feitar en karlar í Frakklandi.

Offita er vandamál víða um heim og lítur Alþjóða heilbrigðismálastofnunin (WHO)á offitu alþjóðlegt heilbrigðisvandamál.

Samkvæmt frönsku könnuninni þjáist einn af hverjum fimm íbúum Frakklands af offitu, sem eru með 34.800 evrur, 3,1 milljón króna, í árstekjur eða minna. Aftur á móti er einungis einn af hverjum tuttugu að glíma við offitu sem eru með 63.600 evrur í árslaun eða meira.

Svarta gólfið - ekki töff skiluru!

Við skötuhjúin sem lifum í stórkostlegri synd hér í Grafarholtinu vorum ótrúlega dugleg um helgina. Við sáum fram á það á laugardagsmorguninn að þurfa allavega 2 mánuði til að sortera allt geymsludraslið og koma því haganlega fyrir í bílskúrsgeymslunni. Ekki nóg með að við kláruðum að ganga frá öllu inn í geymslu á laugardaginn (nema dótinu sem á að koma upp - það þekur enn hálfan stigann...) þá kom bróðir hans Grétars líka í heimsókn og tengdi fyrir okkur símann og við náðum að mála fyrstu umferð á gólfið á megnið af rýminu niðri. Það hefði reyndar átt að þýða seinni umferð í gærkvöldi og þá hefði verið hægt að raða húsgögnum þar í lok vikunnar og hefja vinnu í nýrri vinnuaðstöðu nema... liturinn á gólfinu er alveg óvart næstum því svartur. Við erum því að leita nýrra leiða til að hressa upp á gólfið - þær hugmyndir sem eru í gangi eru:

1. Kaupa lakk og bæta út í það hálfþekjandi lit (hér um bil bæsi) og fá þannig líf og fjör í gólfið...
2. Kaupa brons málningu og bursta létt yfir gólfið (í stíl við handriðið) og lakka svo yfir það.

Hafið þið skoðun á málinu eða betri - ódýrar - hugmyndir???? Ef þið eruð með ógisslega flott gólf sem kostaði lítið að gera getið þið líka boðið mér í kaffi til að skoða dýrðina og stela hugmyndinni! :)

Sú yðar sem syndlaus er!

Erla á greinilega skemmtilega vini. Einn þeirra er kominn með ansi sniðuga hringingu á símann sinn - brot úr þessari ræðu hér. Mér fannst þetta svo fyndið að ég varð að setja þetta hér líka... Hver getur líka ekki verið sammála Gunnari!!

Ég er eiginlega komin á þá skoðun að ég þurfi að fá mér nýjan síma.

Enn meira af tölvuleikjum

Ok. Búin að lesa linkinn frá þér Spörri - ágætis grein. Ég fer samt ekki ofan af því að sumir tölvuleikir eru alls ekki barnaefni - og mér sýnist greinahöfundur alveg vera sammála mér í því þó hann geri sitt besta til að fegra ástandið þess á milli. Allavega skammast hann út í að meirihluti leikja sem bannaðir eru fyrir börn séu keypt af foreldrum (með eða án barna sinna).

Annars finnst mér rökin í kringum áhrif kláms og ofbeldisfullra tölvuleikja oft svipa saman. Þeir sem vilja afneita áhrifum benda oft á að ekki finnist bein orskök - afleiðing tengsl á milli. En þó tengslin séu ekki bein þá geta þau samt verið til staðar. Diana Russell útskýrir þetta vel í sinni kenningu - áhrifinum má líkja við t.d. reykingar og lungnakrabbamein. Það fá ekki allir reykingamenn lungnakrabbamein - en sumir fá krabbann sem afleiðing af reykingum. Það sama á við um klámið og ofbeldisfullu tölvuleikina. Hvorugt þarf að vera eini orsakavaldurinn - en sett saman með öðrum breytum þá hefur þetta skelfileg áhrif á suma. Ég held líka að við afneitum áhrifunum of mikið. Okkur finnst þægilegra að tala um að þetta hafi ekki áhrif því þá þarf heldur ekki að neita sér eða börnum eða öðrum um neitt... né díla við það heldur. En það eru nokkur atriði í greininni sem ég hnaut um. T.d. þetta:

If there is a consensus emerging around this research, it is that violent video
games may be one risk factor - when coupled with other more immediate,
real-world influences — which can contribute to anti-social behavior. But no
research has found that video games are a primary factor or that violent video
game play could turn an otherwise normal person into a killer.

Fyrri parturinn svo sem í lagi - en síðasta setningin er umdeild og alls ekki allir á sama máli og þessi gaur. Ég hef líka séð niðurstöður sem sýna aukna hörku í ofbeldi þar sem börn halda að hægt sé að kýla, sparka og gera guð má vita hvað án þess að átta sig á afleiðingunum og talað við fólk sem hefur unnið með börnum og séð þessi áhrif þar. Tölvuleikir (og sjónvarpsefni) er nefnilega oft á tíðum ekki að birta mynd af raunveruleikanum því lifandi persónur og tölvuleikjapersónur þola ofbeldi alls ekki jafnvel eða í sama mæli. Lifandi persónur eiga þar að auki bara eitt líf... Margt annað sem hann talar um stenst heldur ekki - tölvuleikjafíkn er t.d. búin að vera í umræðunni undanfarið og þar eru áhrifin á sósíal lífið neikvæð - enda ekki sami hluturinn að geta haft samskipti í gegnum tölvu og í eigin persónu.

En hvað um það. Öllu frelsi fylgir ábyrgð. Ég sé engan tilgang í að börn séu að leika sér að því að drepa mann og annan, nauðga konum og hoppa í blóðpollum. Það er enginn undirbúningur fyrir lífið fólginn í því - og mér finnst skrýtið þegar það er talað um það sem skaðlegt að börn séu ekki kynnt fyrir þessu á unga aldri... Það er margt skrýtið í kýrhausnum.

Það er leikur að lemja

Birtist áður í Viðskiptablaðinu þann 28. des 2005. Set þetta inn hér í tilefni atburða undanfarinna daga...

Það er leikur að lemja
Tjáningarfrelsið er einn af hornsteinum lýðræðisins og nauðsynlegt er að verja þennan rétt með kjafti og klóm. Stundum finnst mér þó rétturinn til tjáningarfrelsis vera misnotaður í annarlegum tilgangi. Nýlega bárust fréttir af úrskurði alríkisdómara í Bandaríkjunum sem kom í veg fyrir gildistöku laga sem bönnuðu sölu á tölvuleikjum sem innihalda gróft ofbeldi til barna í Kaliforníu. Bannið þykir hugsanlega stangast á við tjáningarfrelsið. Það voru samtök tölvuleikjaframleiðenda og verslunarmanna sem höfðuðu málið á grundvelli tjáningarfrelsinsins, samkvæmt frétt á mbl.is þann 23. desember.

Áhrif ofbeldisfullra tölvuleikja
Á heimasíðu SAFT, samtaka sem vinna að öruggri netnotkun barna og unglinga, er að finna samevrópskt flokkunarkerfi fyrir tölvuleiki. Flokkunarkerfinu er ætlað að auðvelda foreldrum og öðrum að átta sig á innihaldi tölvuleikja og hjálpa þeim þannig að velja réttu tölvuleikina fyrir börnin sín. Flokkunarkerfið er stutt af framleiðendum tölvuleikja og má sjá af merkingum fyrir hvaða aldurshópa leikurinn er ætlaður, hvort hann inniheldur ofbeldi, kynlíf, mismunun, gróft orðbragð, fíkniefni eða geti vakið ótta hjá ungum börnum.

Framtak sem þetta er af hinu góða. Rannsókn SAFT leiddi í ljós að um 40% foreldra á Íslandi hafa litla þekkingu á tölvuleikjum barna sinna. Jafnframt kom í ljós að börn eyða miklum tíma í tölvuleiki, mörg þeirra kaupa leiki sem ekki er ætlaður fyrir þeirra aldurshóp eða athuga ekki aldursmerkingar. Okkur vantar tilfinnanlega rannsóknir á áhrifum tölvuleikja á börn og unglinga en til eru nokkur dæmi um ofbeldisverk barna og unglinga sem talin eru eiga rætur sínar að rekja til ofbeldisfullra tölvuleikja. Einnig eru til rannsóknir sem sýna fram á að ítrekuð notkun á ofbeldisfullum tölvuleikjum getur leitt til árásagjarnra hugsana, tilfinninga og hegðunar. Það er því ansi kærulaust að ætla að allt það ofbeldi og mannfyrirlitning sem finnst í mörgum tölvuleikjum hafi ekki áhrif. Við sem manneskjur drekkum sífellt í okkur skilaboð úr umhverfinu og myndum okkur skoðanir og viðhorf út frá því. Einstaklingar sem ekki hafa náð fullorðinsaldri hafa ekki þroska til að meta öll þau skilaboð sem þau fá á eigin spýtur. Það er auðvelt að segja að foreldrar eigi einfaldlega að fylgjast með gerðum barna sinna og tala við þau um það sem fyrir augu ber en það er mun erfiðara í framkvæmd í okkar hraða þjóðfélagi.

Stjórnarskrárvarinn réttur til að meiða
Merkingar SAFT eru af hinu góða því þær miðla þekkingu en þær ganga skemur en tilraunin til lagasetningar í Kaliforníu þar sem leggja átti bann við sölu á tölvuleikjunum. Ég hallast að þeirri skoðun að báðar aðgerðir saman væru æskilegasta lausnin. Mér er lífsins ómögulegt að skilja hvernig bann á ofbeldisfullum tölvuleikjum til barna getur stangast á við tjáningarfrelsið. Á hvern hátt? Það er ekki verið að banna fyrirtækjum að hanna, framleiða eða selja ofbeldisfulla tölvuleiki. Frelsið til að tjá sig er því til staðar. Einungis er um að ræða bann við sölu á þessu efni til barna og unglinga, einstaklinga sem lagalega séð eru á ábyrgð foreldra og samfélags. Sama hvað fólki finnst um forsjárhyggju almennt þá er það hlutverk foreldra og samfélagsins að beita forsjárhyggju við uppeldi í þeim tilgangi að vernda börn og undirbúa þau fyrir að standa á eigin fótum sem fullorðnir einstaklingar. Að halda að börnum skaðlegum tölvuleikjum sem gera það að verkum að þau fá ranghugmyndir um hlutverk sitt í samfélaginu, hvernig koma á fram við annað fólk og hvað er rétt og rangt getur ekki átt að vera réttur sem varinn er af stjórnarskránni. Fyrirtæki sem framleiða og selja vörur í þeim eina tilgangi að græða peninga án nokkurrar samfélagslegrar ábyrgðar eða siðferðiskenndar eiga ekki að hafa óheftan aðgang að börnum og unglingum undir þeim formerkjum að þarna sé tjáningarfrelsið að verki. Samtök tölvuleikjaframleiðanda í Bandaríkjunum halda því fram að verið sé að grípa fram fyrir hendur foreldra með því að banna sölu leikja þeirra til barna. Þvert á móti styðja lögin við hlutverk foreldra sem uppalanda því með þeim geta börnin ekki farið á bak við foreldra sína og keypt leikina sjálf. Foreldrarnir geta eftir sem áður keypt leikina handa börnum sínum ef þeir kjósa svo.

Að verja skoðanir annarra fram í rauðan dauðann
Tölvuleikjaframleiðendur halda því fram að tölvuleikir séu tjáningarform, rétt eins og bækur, kvikmyndir og tónlist. Það er ekki rökrétt að halda því fram að tölvuleikir séu tjáningarleið en halda því fram á sama tíma að þeir hafi ekkert að segja. Þess vegna eigum við að kynna okkur hvað tölvuleikir segja við börn og unglinga og hafa skoðun á því. Það er til lítils að ætla að verja skoðanir annarra fram í rauðan dauðann en á sama tíma afsala sér réttinum til að hafa skoðun sjálfur.

Partý í Smáralindinni

Allur gærdagurinn fór í að taka backup af gögnunum mínum og defragmentera harða diskinn!! Var víst ekki vanþörf á því 38% fælanna voru fragmentaðir - en enduðu í 0% sem er akkúrat eins og það á að vera. :) Ég ætla rétt að vona að tölvan mín verði hraðvirkari eftir þetta. Hún var orðin svo hægvirk að ég var alvarlega farin að íhuga að henda henni á hauganna og fá mér nýja - sem ég hef engan veginn efni á.

Ég tók backup á geisladiska - hefur hingað til virkað fínt og ég hef ekki þurft nema 2 diska til að bakka allt upp. Nú notaði ég 5 diska og sleppti sumu - gögnin greinilega hrannast upp - veit einhver um ódýra og góða backup lausn fyrir heimatölvur?

********
Hann Magni "okkar" Ásgeirsson fær móttöku í Smáralindinni fyrir vel unnin störf í þágu þjóðarinnar. Það er eins gott að slíkt sé ekki einvörðungu frátekið fyrir fólk sem... - og nú megið þið botna sjálf ;)

Reykjanes rokkar

http://www.landvernd.is/page3.asp?ID=1757

Mannréttindanefnd stendur sig í stykkinu

Þá er mannréttindanefnd Reykjavíkurborgar búin að álykta þess efnis að Orkuveituauglýsingin brýtur gegn mannréttindastefnu Reykjavíkurborgar. Verð að hrósa mannréttindanefnd fyrir að standa undir nafni. :)

Ég skrifaði pistil á sínum tíma um málið. Hann er hér ef einhver vill rifja hann upp.

Viðbrögð kallsins frá Orkuveitunni við ályktun mannréttindanefndar voru frekar lame. "já en hann var að ryksuga og það voru 3 konur sem komu að auglýsingunni frá Orkuveitunni." Þetta ristir afskaplega grunnt og greinilegt að gaurinn er ekki að fatta þetta. Þess má geta að hugmyndin og útfærslan að auglýsingunni kom frá auglýsingastofunni en ekki frá konunum 3 hjá OR.

Pólitík

Svona stend ég í pólitík skv prófi sem ég tók...

Svona standa nokkrir leiðtogar heimsins... ég er nokkuð sátt við skoðanabræður mína!

Prófið er hér ef þú vilt prófa!

Rifrildi

Stundum dett ég í þá gryfju að rífast við fólk sem ég þekki ekki og veit að orðaskipti eru gjörsamlega tilgangslaus. Árangurinn er pirringur, tímasóun og ennþá meiri rígur. Skynsamlegt... eða hitt þó.
**********
Kannski ég ætti að taka áskorun Andreu og bjóða mig fram fyrir Sjálfstæðisflokkinn? Það væri örugglega gaman!

Af súkkulaði og súlustöðum

Tilkynningaskyldan - var í Morgunvaktinni á Rás 1 í morgun að fjalla um strippstaði og hvort súludans væri sambærilegt starf við að vinna í banka eða í útvarpi. Vona að þessi umfjöllun á Morgunvaktinni haldi áfram vegna þess að fyrst kom viðtal við Geira í ca 10 mín. Svo kom viðtal við súludansmey, líka í ca 10 mín. Bæði viðtölin afskaplega gagnrýnislaus og virkuðu eins og pjúra markaðssetning á súlustöðum og því sem þar fer fram. Sem mótvægi kom viðtal við mig í morgun - í ca 5 mínútur held ég!!! Vona að Rúna og aðrir sérfræðingar verði kölluð til í framhaldinu.

Annars er það helst að frétta af minni súkkulaðifíkn (sem ég er viss um að margir hafa áhuga á...) að hún er óðum að minnka. Ástæðan? Jú, ég fór að rannsaka barnaþrælkun á kakóbaunabýlum. Niðurstaðan? Algjört ógeð. Nú kaupum við bara lífrænt ræktað súkkulaði á mínu heimili því það er öruggt að engin barnaþrælkun á sér stað við þá framleiðslu eftir því sem mér skilst. Hins vegar hef ég ekki staðist að kaupa mér súkkulaði sósu með ísnum og einstaka sinnum að fá mér ís með dýfu og gotteríi. Svo borða ég líka súkkulaði sem mér er gefið eða í boði annarra. En ég kaupi það ekki sjálf - sem er töluvert stór breyting frá því sem áður var.

Pistillinn minn í Viðskiptablaðinu var um barnaþrælkun í súkkulaðiiðnaðinum. Hér er brot úr pistlinum:

Þrælkuð börn á bak við súkkulaðið okkar
Fyrir nokkrum árum var gerð heimildarmynd um barnaþrælkun á kakóbaunabýlum á Fílabeinsströndinni. Þetta var í fyrsta skipti sem flestir Vesturlandabúar heyrðu af því að hugsanlega séu þrælkuð börn vinnuaflið á bak við hið ljúffenga súkkulaði sem við verðlaunum okkur reglulega með. Viðbrögðin létu ekki á sér standa og neytendur þrýstu á um úrbætur, enda ekki gleðilegt að hugsa um litla þrælkaða drengi við hvern súkkulaðibita. Í Bandaríkjunum var lagt fram frumvarp þess efnis að merkja ætti súkkulaði sem laust við þrælahald að uppfylltum skilyrðum. Frumvarpið var samþykkt í fulltrúadeild þingsins. Við þetta tóku súkkulaðiframleiðendur loksins við sér því þeir vissu að það væri nánast útilokað að sýna fram á að súkkulaðið þeirra væri ekki framleitt með hráefni sem ætti rætur að rekja í þrælahald.
Iðnaður sem áður hafði kosið að hvorki sjá né heyra neitt illt varðandi hráefnið sitt settist niður með stjórnvöldum, félagasamtökum gegn þrælahaldi og fleiri hagsmunaaðilum og gerðu aðgerðaráætlun um hvernig mætti útrýma barnaþrælkun við framleiðslu á þessu vinsæla sælgæti.

Mömmugildra

Nú er Reykjanesbær búinn að tilkynna að í boði séu umönnunarbætur fyrir foreldra sem vilja vera heima með börnum sínum frá því að fæðingarorlofi lýkur og leikskóli tekur við. Auðvitað er rangnefni að segja að um sé að ræða umönnunarbætur fyrir foreldra og nær að segja að þetta sé fyrir mömmur því þrátt fyrir kynblindu í orðalagi er fullvel vitað að það eru mömmurnar sem falla í gildruna. Með því að stimpla sig út af vinnumarkaði í 2 ár eiga þær á hættu að sjálfstraustið minnki þannig að erfiðara verður að fóta sig á vinnumarkaði þegar haldið er þangað aftur. Einnig hækka þær ekki í tekjum á meðan sem þýðir að í framhaldinu þegar kemur að ákvarðanatöku á heimilinu um hvort foreldrið vinnur ekki yfirvinnu, fer í hlutastarf og sinnir börnunum og veikum ættingjum meira þá er mamman sjálfgefið val - út frá fjárhagsástæðum og hefðbundnum kynhlutverkum. Þetta hefur síðan aftur áhrif á lífeyrissjóðsréttindi, veikindaréttindi, bætur ef slys skildi bera að höndum, möguleika á starfsframa og þar fram eftir götum. Þessar "fallegu" fjölskylduvænu lausnir eru ekkert annað heldur en partur af bakslaginu - fortíðarhyggjan sem sér fyrir sér hina umhyggjusömu, heimavinnandi húsmóður á fjólubleiku skýi. Vonandi falla sem fæstar mömmur í gildruna.

DUI

Fór að kveðja Hildi Fjólu á Næsta bar í gærkvöldi. Þar sem leigubílar eru dýrir í Grafarholtið :( borgar sig að fara á bílnum og sleppa bjórnum á hittingum sem þessum. Þegar ég kom neðst í slaufuna sem liggur frá Bústaðarvegi inn á Miklubraut á heimleiðinni sé ég hvar þar stendur lögga sem veifar mér að stoppa. Ég stoppa og skrúfa niður rúðuna og hann segir að ég verði að taka U-beygju, keyra á móti umferð að lögreglubíl með blikkandi ljósum, taka þar aðra U-beygju og keyra aftur upp á Bústaðarveg. Ég fékk að sjálfsögðu sting í magann því svona lagað þýðir venjulega að slys hafi orðið. Í fréttum í dag sé ég svo að um var að ræða 4 bíla árekstur þar sem 7 slösuðust. Sem betur virðast ekki hafa orðið alvarleg slys á fólki en það útilokar samt ekki að einhver af hinum slösuðu gætu þurft að takast á við afleiðingar það sem eftir er. Sagan endar þó ekki hér. Slysstaðurinn var í hættu staddur þegar ölvaður ökumaður virti ekki stöðvunarmerkið frá góðkunningja mínum - löggunni veifandi. Hann náðist á endanum en alls voru 10 ökumenn teknir fyrir ölvunarakstur í nótt.

Nú er töluvert síðan ég var fastagestur í miðbænum en mér fannst ekki skemmtilegt að koma út af Næsta bar rétt fyrir kl. 3 og sjá alla ölvunina. Löngunin til að djamma í miðbænum er einhvern veginn alveg horfinn. Eflaust er það aldurinn sem gerir þetta að verkum en það er bara ekki sjarmerandi að stíga út í nóttina og sjá allt morandi í ölvuðu fólki, þreyttu og aumu í fótunum, skjögrandi um... þá er afskaplega mikill léttir að geta sest beint upp í bíl og keyrt af stað. En það er önnur tilfinning sem hreiðrar líka um sig þegar kona sest undir stýri og heldur heim á leið. Sú tilfinning er tilkomin vegna þess að það er vitað mál að á þessum tíma er slatti af ölvuðum ökumönnum í umferðinni og þeir keyra ekki á 40 á Miklubrautinni, Ártúnsbrekkunni... Ég vona að sett verði fjármagn í hert eftirlit í miðbænum - helst svo strangt að enginn keyri út úr miðbænum án þess að blása í blöðru!

Er fólk að vakna?

Nú er verið að fjalla um í fréttum að strákurinn sem leitaði upp fórnarlamb til að drepa á netinu og stakk hann svo í bakið af því að hann langaði til að prófa að drepa einhvern hafi verið undir áhrifum ofbeldisfullra tölvuleikja og kvikmynda. Ég er ekki hissa. Las fyrir löngu bókina High Tech - Low Touch og þar er einmitt verið að ræða þessi tengls á milli tölvuleikja og ofbeldisfullrar hegðunar. Það var áhugavert að sjá viðtal í fréttum við Húgó Þórisson sálfræðing þar sem fram kom að nú virðast vera að koma fram þau áhrif sem margir óttast og að þarna sé á ferðinni dæmi um einhvern sem er á fullu í að horfa og í framhaldi af því skapist löngunin til að framkvæma. Þetta er nákvæmlega það sama og sumar kenningar um tengsl á milli klámnotkunar og nauðgunar á konum halda fram. Þ.e. að fyrst sækir áhorfandinn í tiltölulega "saklaust" efni. Eftir smá tíma er það ekki nóg og þá er sótt í aðeins harðara efni og svo koll af kolli þangað til efnið er orðið mjög ofbeldisfullt. Að lokum er það ekki nóg og karlana fer að langa til að prófa sjálfir og leita upp fórnarlömb. Ted Bundy lýsti því að svona hefði hann byrjað. Diana Russell er með flottustu kenninguna sem ég hef séð um tengsl á milli kláms og kynferðisofbeldis. Hún er með margþætta kenningu sem gerir ráð fyrir að ekki sé um bein orsaka og afleiðingartengsl að ræða, þ.e. ekki þannig að allir sem horfi á klám leiðist út á braut kynferðisbrota heldur að margir samverkandi þættir komi við sögu. Einnig líkir hún tengslunum við tengslin á milli reykinga og lungnakrabbameins - ekki fá allir reykingamenn lungnakrabbamein en hættan er vissulega til staðar.

Pointið í öllum þessum pælingum er sem sagt sú að með allri þessari ásókn og framleiðslu á ofbeldisfullum tölvuleikjum og klámi er verið að búa til ofbeldismenn.

Hin eina sanna tík

Jæja - þá er búið að skora á mig á femínistapóstlistanum að fara í framboð. Ég þakka að sjálfsögðu traustið og mikið væri nú örugglega gaman að vera forsætisráðherra! :)

*******
En talandi um pólitík. Áskorunin kom á svolítið skemmtilegum tímapunkti því í morgun var ég pallborðsgestur á landsfundi Ungra vinstri grænna. Þau skipulögðu eins og hálfs tíma pallborð um aukinn ójöfnuð í samfélaginu með áherslu á velferðarmál. Pallborðsgestir voru ég, sem fulltrúi Femínistafélagsins, Sabine sem fulltrúi kvenna af erlendum uppruna og Ögmundur - væntanlega sem Vinstri grænn. Katrín Jakobsdóttir stýrði umræðum af miklum skörungsskap eins og hennar var von og vísa. Það er margt jákvætt að taka þátt í svona pallborði - þó kona þurfi að keyra alla leið til Hveragerðis snemma á laugardagsmorgni! En hér eru nokkrir punktar sem ég tók saman í tilefni pallborðsins:

• 
  Ofurlaun - Launaójöfnuður hefur aukist stanslaust hér á landi undanfarinn áratug. Yfirgnæfandi meirihluti þeirra sem eru á ofurlaunum eru karlar. Það þýðir ekki aðeins að meiri völd færist örfáum á hendur og að stéttskipting aukist heldur líka að meiri völd færast hinum karllægu gildum í hendur.
  
• Velferðarkerfið - Ef við skoðum velferðarkerfið þá kemur í ljós að okkur vantar rannsóknir á stöðunni þar. Konur eru fleiri í röðum eldri borgara en karlar, þær eru fleiri á dvalarheimilum, fleiri í hópum tekjulágra og svo framvegis. Hins vegar vantar okkur rannsóknir til að fá að vita nákvæma stöðu en það er alveg ljóst að núna eru konur í hópi aldraðra sem aldrei voru út á vinnumarkaði og njóta þar af leiðandi ekki neinna lífeyrissjóðsgreiðslna heldur fá einungis bætur frá Tryggingastofnun. Þetta er bein afleiðing af kynhlutverkum sem byggðu á fjárhagslegu ósjálfsstæði kvenna.
  
• Áherslur í heilbrigðiskerfi – breyttar áherslur þýðir að meiri umönnun færist yfir á heimilin – með öðrum orðum – á konur – því yfirleitt eru það konur sem axla ábyrgð á umönnun þeirra sem á þurfa að halda – hvort sem um er að ræða aldraða foreldra, veika fjölskyldumeðlimi eða börn. Aukin gjöld í heilbrigðiskerfinu – það segir sig sjálft að þau sem eiga minnstan pening koma verst út úr aukinni gjaldtöku fyrir læknaheimsóknir og lyf.
  
• Fjölskyldustefna – hér má nefna aukna umræðu um afturhvarf til gamalla tíma, háværar raddir sem segja að ekki sé verið að sinna börnunum og aðgerðir eins og Kópavogur var að boða nú í vikunni sem felast í heimgreiðslum til foreldra. Þó um kynblinda aðgerð sé að ræða í orði þá er hún svo sannarlega ekki kynblind á borði. Það er vitað mál að það eru mæðurnar sem munu verða heima – með tilheyrandi afleiðingum á tekjur, starfsþjálfun og starfsmöguleika og það hefur aftur áhrif á ýmis réttindi eins og lífeyrisgreiðslur og veikindaorlof. Það er ekki að ástæðulausu að aðgerðir sem þessar eru kallaðar “mömmugildran” enda getur þessi valkostur haft afdrífaríkar afleiðingar á þau tækifæri og valkosti sem þeim mömmum sem falla í gildruna býðst það sem eftir er ævinnar.

Að sjálfsögðu...!

Smellið á fyrstu myndina til að fá þá næstu og svo koll af kolli...

http://kjosa.is/storastundin/

http://kjosa.is/stefnufesta/

Hittið - mætum við ekki öll?

Undanfarið hafa málefni kvenna af erlendum uppruna verið mikið til umfjöllunar í fjölmiðlum. Hefur þar hæst borið mál tveggja erlendra kvenna sem neitað var um dvalarleyfi hér á landi eftir að hafa komið úr ofbeldisfullum hjónaböndum við íslenska menn. Hnattvæðing og auknir fólksflutningar bera með sér miklar breytingar og ýmis álitaefni koma upp.
Hafa til að mynda vestrænar konur átt möguleika á að bæta stöðu sína í samfélaginu vegna þess að erlendar konur hafa tekið að sér þau störf sem þær unnu áður eins og umönnunarstörf og heimilisstörf? Álita- og siðferðismálin tengd alþjóðavæðingunni eru fjölmörg en fyrsta Hitt Femínistafélags Íslands á þessu starfsári verður helgað þessum spennandi málum.
Hittið verður haldið þriðjudaginn 5. september kl. 20:00 á Thorvaldsen Bar (Bertelstofu). Þar munu feikifróðar konur miðla af visku sinni en það eru
þær:

Silja Bára Ómarsdóttir, forstöðumaður alþjóðamálastofnunar Háskóla Íslands sem mun fjalla um alþjóðavæðinguna og áhrif hennar á stöðu kvenna.

Tatjana Latinovic, formaður Félags kvenna af erlendum uppruna sem kemur til með að fjalla um stöðuna hér á landi og hvernig okkur er að takast að gera Ísland að fjölmenningarsamfélagi.

Margrét Steinarsdóttir, lögfræðingur hjá Alþjóðahúsi sem ætlar að fjalla um lagalegar hliðar og hvernig mál koma til kasta Alþjóðahúss.

Á eftir erindunum er opnað fyrir umræður þar sem gefst gott tækifæri til að kryfja málin, segja sitt álit og spyrja áleitinna spurninganna.

Hittið er öllum opið og aðgangur er ókeypis.

Kína - best í heimi?

Í dag komu til okkar í heimsókn 12 kínverskir ferðamenn. Við hjá Femínistafélaginu ásamt KRFÍ tókum á móti þeim á Hallveigarstöðum. Ferðamennirnir leyndu á sér því þarna voru á ferð háttsettir opinberir embættismenn frá Guangdong héraði í Kína, þar af 4 varaborgarstjórar. Mestur tími heimsóknarinnar fór reyndar í að tala um stöðuna á Íslandi en við fengum aðeins að heyra um stöðuna í Kína. Einnig fengum við í hendurnar disk með öllu því jákvæða og góða sem gerst hefur í jafnréttismálum í Guangdong síðustu 10 árin. Og viti menn (og konur!) - það er bara heill hellingur. Það er greinilega hægt að gera mikið á stuttum tíma... ;)

Var að enda við að skrifa pistil um heimsóknina fyrir Viðskiptablaðið. Set kannski meira hingað inn við tækifæri en þar sem klukkan er orðin of margt ætla ég að vera skynsöm og fara að sofa - full innblásturs yfir árangursríkum jafnréttisaðgerðum. Og hey - ef Kína getur gert þetta með alla sína milljarða sem búa þar - hverju getum við þá ekki áorkað á litla Íslandi þar sem aðeins þarf að breyta hugarfari 300.000 manns?

Karlmennskan uppmáluð?

Hinn eini sanni krókódílamaður, Steve Irwin, lést í gær við tökur neðansjávar. Það var stingskata sem varð krókódílamanninum að aldurtila. Þegar við höfðum aðgang að Discovery horfðum við oft á þættina hans. Steve var þekktur fyrir að leggja sjálfan sig í hættu í umgengni við dýr og því verður að segjast eins og er að eftir að hafa horft á þættina hans þá vorum við ekki hissa á þessum endalokum. Það er stundum talað um gjald karlmennskunnar. Karlmennskuímyndin byggir meðal annars á dirfsku og djörfung - en því miður ekki alltaf með happy ending.

Annars konar karlmennsku mátti sjá á sunnudagskvöldið í Kastljósinu. Þar fór Davíð Oddson á kostum og tjáði sig um hin ýmsu mál. Mér finnst afskaplega gaman hvað Davíð er hreinskiptin upp á síðkastið - þó það sé auðvitað engan vegin viðunandi fyrir seðlabankastjóra. En hey - það er hvort sem er ekki viðeigandi að forsætisráðherra hoppi í sæti seðlabankastjóra til að kljást við afleiðingar af eigin gjörðum. Margt af því sem Dabbi sagði hefði ég nú samt alveg viljað að hefði komið í ljós mun fyrr - þegar hann var á atkvæðaveiðum. Þá hefði verið mjög heiðarlegt af honum að tala opinskátt um eigin karlrembu!

Skemmtilegt

Þau sem hafa gaman af skemmtilegum tilvitnunum geta smellt á textann.

Þar má finna ýmislegt - eins og þetta:

Why not choose a less offensive word? "A natural response is to change the word feminist to a word with fewer stigmas attached. But inevitably the same thing will happen to that magical word. Part of the radical connotation of feminism is not due to the word, but to the action. The act of a woman standing up for herself is radical, whether she calls herself a feminist or not."
- Paula Kamen, feminist

Haukur, Chippendales, tikin.is og Femínistafélagið!

Lenti í smá vandræðum fyrir fyrirsögn á þetta innlegg. Ákvað nefnilega að skrifa um Hauk sem skrifaði pistilinn á tíkin.is. Fyrsta sem mér datt í hug var "Haukur og tíkin" og síðan "Haukur á tíkinni". Fínt að endurheimta nafnið tíkin - en það verður að segjast eins og er að stundum er smá vandræðagangur í kringur nafnið...

En allavega - einhvern tímann skammaðist ég út í það hér að Haukur hefði skrifað pistil á tikin.is þar sem hann gerði FÍ upp skoðanir í kringum komu Chippendales. Stend nú enn við það að þær skoðanir sem hann setur fram í pistlinum eru ekki skoðanir FÍ en... komst að því áðan þegar ég fór að fara yfir femínistafélagspóstinn að hann reyndi að hafa samband við okkur. Hann fær nú kredit fyrir það blessaður!

Af hverju er þetta ekki í fréttum?

Úr frétt í Fréttablaðinu 31. mars 2006 (tekið af visir.is):

"Marteinn Jónasson fékk næstþyngsta dóminn, tíu mánaða skilorðsbundið fangelsi og 68,9 milljón króna sekt."

Finnst engum skrýtið að í allri fjölmiðlaumfjölluninni um nýja eigendur Fróða sé ekki minnst á þetta í fréttum?

Síðasti frídagurinn

Um daginn tókst mér að brenna mig þrisvar við að elda einn lítinn kjúkling. Er ekki rökrétt að draga þá ályktun af því að eldamennska sé ekki kvenmannsverk?

Var annars einstaklega heppin í dag. Ákvað að skilja kreditkortið mitt eftir á bílaplaninu fyrir utan Odda og viti menn - það var enn á sínum stað 2 tímum seinna!

Hvað finnst ykkur um uppreisn æru Árna? Ég er enn ekki að skilja af hverju ekki var beðið eftir forsetanum. Það lúkkar einhvern veginn svo hrikalega illa þegar 2 af 3 æruhreinsurum eru háttsett í flokknum hans Árna...

Í dag var annars síðasti dagurinn af fríinu. Mínu lauk eiginlega fyrir viku þegar við komum heim úr Hrísey en við erum samt búin að ná að gera slatta í húsinu þessa vikuna. Þó ekki nóg og vonandi kemur enginn í heimsókn því við erum að endurraða í geymslukössunum - sem þýðir auðvitað að fyrst þurfti að dreifa öllu dótinu í tröppurnar og athuga hvort ekki væri hægt að dúkaleggja gólfið á neðri hæðinni með því. Það tókst ljómandi vel en ekki er það komið inn í geymslu svo aðkoman er falleg!

Og að lokum ein uppljóstrun - Hittið verður í næstu viku! Þriðjudagskvöldið :) Sjáumst þá.

Málefni Álgerðar

Mál Valgerðar Sverrisdóttur hefur valdið mér nokkrum heilabrotum. Hegðun hennar í sambandi við skýrslu Gríms Björnssonar er í engu samræmi við hennar ábyrgð. Auðvitað átti hún að leggja skýrsluna fyrir þingið. Það er allt of ódýrt að segja að niðurstöður hans hafi verið hraktar á fundi með hagsmunaaðilum og því hafi skýrslan ekki komið málinu við. Við fáum víst aldrei að vita hvort að niðurstaðan varðandi Káranhnjúkavirkjun hefði orðið öðruvísi hefðu þingmenn fengið að sjá skýrsluna og efasemdirnar um Kárahnjúkavirkjun áður en þeir greiddu atvkæði með virkuninni. Það er auðvelt að detta ofan í "hvað ef..." og láta sig dreyma.

Í raun finnst mér afglöp hennar það alvarleg að það er ástæða til að íhuga að hún segi af sér. En - og það er alltaf en. Halldór og Dabbi brutu líka gróflega af sér þegar þeir samþykktu Íraksstríðið. Ekki þurftu þeir að segja af sér. Árni Magnússon braut líka af sér. Ekki þurfti hann að segja af sér. Hann hætti að vísu - en af allt öðrum ástæðum. Björn Bjarnason hefur brotið lög. Ekki hefur hann sagt af sér. Valgerður braut ekki lög - en brást trausti og hélt aftur af upplýsingum sem hefðu getað haft úrslitaáhrif. Og þá kemur kynið við sögu. Fyrst karlarnir þurfa ekki að segja af sér, sama hvað þeir gera af sér, af hverju á konan þá að segja af sér? Það er þekkt í gegnum tíðina að konur í stjórnmálum eru dæmdar harðar en karlar og þurfa að segja af sér fyrir minni sakir. Þess vegna hiksta ég á Valgerðar málinu. Tel að þetta sé alveg afsagnarsök - en ekki sú fyrsta í þessari stjórn og þar sem hin afglöpin leiddu ekki til afsagnar finnst mér óhæft að konan sé látin fjúka. Afsökunarbeiðni finnst mér líka of mátlaus. Sem málamiðlun væri ég sátt við að frestað yrði að hleypa vatni á lónið þar til óháðir sérfræðingar hafi gert áhættumat - og að stjórnarandstaðan fái að velja hvaða sérfræðingar eru óháðir... Segir sig svo kannski sjálft en ég stóla líka á að Dóri, Valgerður og Björn Bjarna bjóði sig ekki fram í vor!

Rockstar

Eins og örugglega allir vita þá gengur t-póstur til styrktar Magna í Rockstar eins og eldur um sinu um netið. Þar er fólk hvatt til að vakna fyrr og kjósa, t.d. þau sem vakna kl. 7 gætu allt eins vel vaknað aðeins fyrr og kosið af fullum krafti. Í fyrstu útgáfu póstsins var sagt að kosningin endaði kl. 7 og fólk hvatt til að vakna hálftíma fyrr. Þetta var bara bölvuð vitleysa því kosningin endar kl. 5:50 og því þörf á að vakna dálítið mikið fyrr en venjulega. Þetta hefur þó greinilega verið lagað í seinni póstum.

Annars varð ég fyrir verulegum vonbrigðum þegar Supernova debutaði með Dilönu. Fyrir það fyrsta þá var lagið ekkert til að hrópa húrra fyrir og fyrir það næsta þá eru miðaldra kk rokkarar sem "skreyta" sig með ungum hálfberum kvk dönsurum fátt annað en pathetic... Dilana aftur á móti var dúndurflott eins og alltaf :) Ég eiginlega vona að öll sem mér finnst varið í lendi í öðru sæti... líka Magni. Fagmennskan hefur fengið á víkja líka á fleiri sviðum. Til er hljómsveitin Supernova sem nú stendur í ströngu við að fá að halda nafninu sínu...

En hér er pósturinn:
**********
Sæl veriði

Málið er að nú er strákurinn "okkar" búin að vera 2 vikur í röð í einu af 3 neðstu sætunum þrátt fyrir frábæra frammistöðu, og það eru afar miklar líkur á því að verði hann þar 3ju vikuna sé þetta búið hjá honum. Við viljum öll hjálpa honum að komast lengra, helst í úrslitaþáttinn 13. sept. Til að minnka líkurnar á því að hann verði sendur heim í næstu viku, verða allir þeir sem finnst "alveg frábært hvað honum gengur vel" en hafa aldrei gefið honum atkvæði sitt að taka á sig rögg og kjósa hann. Atkvæðagreiðslan fer fram aðfaranótt miðvikudaga á milli klukkan 02 - 06 um morguninn. Næst verður kosið aðfaranótt 30. ágúst .

Nú er ekki hægt að búast við að fólk almennt vaki alla nóttina til að kjósa hann, en þeir sem á annaðborð vakna um 7 leitið til að fara í vinnu eða skóla, gætu, án þess að leggja mikið á sig, vaknað aðeins fyrr, sest við tölvuna sína, á tæknilandinu Íslandi eru allflestir með tölvu og nettengingu, og kosið á - http://rockstar.msn.com/ - þar er hægt að kjósa eins oft og maður hefur úthald til og kostar ekki neitt.

Sérðu í anda íþróttaáhugamenn, sem hefðu tækifæri til að hjálpa landsliðinu í handbolta t.d. sleppa þvílíku tækifæri til að hjálpa þeim áleiðis !!!!!!!!! Nú erum við Íslendingar vön að styðja heilshugar við bakið á okkar fólki sem er að gera það gott á alþjóðavettvangi - svo gott fólk - brettið upp ermar og hjálpið Magna til að komast í úrslitaþáttinn , nú ef það tekst ekki getum við ekki sagt að við höfum ekki reynt !!!!!!!!!!!!

Með baráttukveðjum
Magna aðdáandi

Einu sinni var

Við höfum nú lokið við að mála alla gluggana á húsinu að utan!!! Tekið er á móti hamingjuóskum í kommentakerfinu. Einn girðingarstaur er líka orðinn fallega mahónílitaður og þá er bara restin eftir - og þakkannturinn. Gaman gaman :)

Annars held ég að fríið mitt sé búið þó ég sé í fríi til 1. sept. Note to self - fara fyrr í frí.... Við erum samt búin að hafa það fínt. Fórum í sumarbústað í Munaðarnesi (þar sem ég náði í kvef. Fórum líka í bústað í Kjósinni. Það var ansi ljúft. Ákváðum að gerast dugleg síðasta daginn og slógum grasið. Kipptum svo grindinni úr grillinu með heim til að þrífa hana. Það vakti mikla hrifningu hjá litla bróður helgina á eftir þegar hann fór í bústaðinn með alla fjölskylduna og uppgötvaði um kvöldmatarleitið að það var engin grind í grillinu.... En þá vorum við komin í gott yfirlæti út í Hrísey þar sem var stjanað þvílíkt við okkur að ég er orðin ennþá meira dekurdýr en ég var - og mátti nú eiginlega ekki við því. Í Hrísey var þvílík bongóblíða að við nenntum eiginlega ekki að gera neitt. Fórum í göngutúra á kvöldin þegar hitastigið var orðið hæfilegt. Skelltum okkur einu sinni á sjóinn. Veiddum ekkert en ég afrekaði að búa til stærsta marblett sem ég hef á ævinni fengið. Hann er mjög fallegur á litinn. Í Hrísey fengum við sólþurrkaðan saltfisk, heimatilbúinn. Þvílíkt góðgæti. Besti saltfiskur sem ég hef fengið og ekki spillir fyrir að við vorum aðeins með puttana í sólþurrkuninni.

Hríseyarferðirnar eru alltaf fyrirtaks jarðtenging. Þar fáum við tengingu við söguna og lífið í gamla daga. Þá föttum við (eina ferðina enn) hvað það er ótrúlega stutt síðan allt var öðruvísi. Einhvern veginn er til dæmis erfitt að ímynda sér hvernig lífið var áður en klósett komu til sögunnar... En það er víst ekki svo langt síðan. Við erum strax byrjuð að hlakka til að fara aftur næsta sumar :)

Chippendales og viðbrögðin

Ákvað að birta hérna pistilinn sem ég skrifaði um komu Chippendales. Hann birtist í Viðskiptablaðinu þann 9. ágúst. Verð að viðurkenna að ég fæ pínkulítið kikk út úr því hvað ég var sannspá um viðbrögð við komu þeirra - og hvernig Chippendales verða fyrirmyndar fulltrúar feðraveldisins. Dregur dálítið úr kikkinu að það var eiginlega algjör "no brainer..." Ef þú vilt sönnun, lestu þá endilega líka þessa pistla:

Ekki sama hvort um Jónu eða Jón er að ræða? eftir Ingunni Guðbrandsdóttur á Deiglunni.

Einn og hálfur tími af hreinum unaði... eftir Hauk Skúlason á Tíkinni.

Fullkomnustu folar heims á Íslandi eftir Erlu Margréti Gunnarsdóttur á heimasíðu Heimdallar.

Hérna kemur svo pistillinn minn:

Jafnrétti á fölskum forsendum
Að horfa á karlmennina í Chippendales strippa er betra en kynlíf. Þessu er haldið fram fullum fetum í frétt sem birtist á visir.is í síðustu viku. Margt fleira áhugavert er hægt að lesa í sömu frétt. Laura Bush, forsetafrú Bandaríkjanna, fór til að mynda á sýningu folanna í Las Vegas á dögunum og svo virðist sem sýningin sé fyrirtaks hjónabandsmarkaður því 11 dansarar úr Chippendales hafa gifst konum sem voru á sýningu hjá þeim. Það ber að taka fram að samkvæmt fréttinni eru ekki neinir aukvisar hér á ferð heldur fullkomnustu karlmenn í heimi.

Folar en ekki menn
Tilefnið af ofangreindum fréttaflutningi er að Chippendales munu halda sýningu á Íslandi nú í ágúst. Ef eitthvað er að marka fréttirnar er um þvílíka himnasendingu að ræða fyrir íslenskar konur, eða hvað? Áhugavert er að bera saman orðræðuna í kringum komu Chippendales við nektarsýningar kvenna. Með hástemmdum lýsingarorðum um ágæti á strippsýningu karla fá margir kærkomin mótrök í umræðuna um súlustaði. Nú er hægt að benda á fréttina á visir.is og segja að karlmenn séu hlutgerðir, um þá sé talað sem fola en ekki menn, þeir séu hér í þeim eina tilgangi að fullnægja kynferðislegum löngunum kvenna og þar fram eftir götum. Nú er ég ekki ein af þeim sem gleðst yfir komu Chippendales heldur þvert á móti því ég tel að jafnrétti felist ekki í því að koma öllum í jafnslæma stöðu. Ég lít samt sem áður ekki á komu Chippendales sömu augum og þann iðnað sem byggir á sölu kvenna.

Auga fyrir auga
Í augum sumra snýst jafnrétti um kynblindu en í raun verður kynblinda á tíðum til þess að misréttið nær að þrífast vegna þess að mismunandi staða kynjanna í þjóðfélaginu er ekki tekin með í myndina. Í því ljósi er vert að skoða orðræðuna í kringum komu Chippendales. Borgaryfirvöld hafa sett alls kyns reglur til að koma í veg fyrir súlustaði í miðbænum. Einkadans er bannaður samkvæmt lögreglusamþykkt og ekki á að veita nýjum stöðum vínveitingarleyfi. Þetta er þverbrotið og nú spretta súlustaðir upp eins og gorkúlur í miðborginni. Á sama tíma eru Chippendales fluttir til landsins undir því yfirskyni að skemmta konum landsins. Aðstandendur sýningarinnar eru ekki af verri endanum en það eru Sena, Vífilfell (Viking Light) og útvarpsstöðin Létt Bylgjan. Sýningin er auglýst í sjónvarpinu og eflaust verður reynt að kynda undir stemninguna með margvíslegum hætti. Chippendales sýningin verður að félagslegum viðburði kvenna til að standa upp á stólum og öskra í tilraun til að ná fram örlitlu jafnrétti með að gera karlmönnum það sem karlar hafa gert konum í gegnum tíðina. Auga fyrir auga, tönn fyrir tönn og því skal stemningin vera sýnileg. Ferðir karlmanna á súlustaði eru hins vegar einkaathöfn framin í skjóli ósýnileika. Viðskiptavinir súlustaða sjást aldrei í umræðunni. Fréttamenn dirfast ekki að sýna karlkyns kúnnann því hann skal njóta friðhelgi og nafnleyndar.

Hjónabandsmarkaður eða strippsýning?
Umgjörðin í kringum sýningu Chippendales ber keim af hefðbundnum hlutverkum og valdatengslum kynjanna. Greinilega er ekki gert ráð fyrir því að konur fái sérstaka ánægju út úr því að stunda kynlíf og aðstandendur og fréttamenn því ekki feimnir við að skella því fram að sýningin sé betri en kynlíf. Einnig er hjónabandi blandað inn í sýninguna og bent á að nokkrir karlanna hafi gifst konum sem þeir hittu á sýningunni. Ekki verður betur séð en þarna eigi að höfða til þeirrar mýtu að æðsti draumur hverrar konu sé að giftast og lifa hamingjusöm til æviloka með hinum eina sanna draumaprinsi. Chippendales dönsurunum er síðan lýst sem fullkomnustu karlmönnum í heimi, kannski til að undirstrika að hver kona geti verið stolt af að kynna einn slíkan fyrir mömmu og pabba sem tilvonandi eiginmann?

Leið til að viðhalda völdum
Koma Chippendales merkir þrennt í mínum huga. Í fyrsta lagi munu þeir verða notaðir sem afsökun feðraveldisins til að viðhalda þeirri kúgun sem konur verða fyrir í gegnum kynlífsiðnaðinn. Í öðru lagi verða þeir notaðir til að ýta undir þá þróun að gera karlmenn í auknum mæli að neysluvöru sem hægt er að græða peninga á að selja aðgang að. Í þriðja lagi geta þeir hugsanlega opnað augu einhverra karlmanna fyrir því hvers vegna það er skaðlegt mannlegu samfélagi að koma fram við fólk sem markaðsvörur en ekki manneskjur og að gera kynlíf að neysluvöru. Í öllu falli er ljóst að koma Chippendales er ekki tengd raunverulegri jafnréttisbaráttu heldur öllu frekar feðraveldi sem veit að það verður að þykjast vilja jafnrétti konum til handa. Leiðin sem feðraveldið velur til að viðhalda völdum sínum er að slá ryki í augu viðmælenda með því að ýta konum í þá átt að taka upp skaðlega hegðun karlaveldisins þótt vitað sé að sú hegðun sé á allt öðrum forsendum og með allt önnur valdatengsl en verslun karla með konur.

For the record

Ég er femínistabelja og það verður að segjast eins og er að maðurinn minn er mjög óheppinn!

Málefnaleg gagnrýni?

Er ekki týpískt að fá kvef loksins þegar ég var komin út úr bænum??? Á degi nr. 1! Mæli ekki með því að sitja hálf upp úr heita pottinum ef hann er of heitur. Gæti þýtt að fólk þurfi að bruna aftur í bæinn í staðinn fyrir að fara út í Hrísey... en Hríseyjarferðin bíður betri tíma. Heilsan að skríða saman og allt í gúddí :)

Mæli með að allir kíki inn á bloggið hjá www.byltingarsinni.blogspot.com og horfi á videoið sem er þar. Alveg óborganlegt. Tær snilld.

Það virðist ekkert lát á fólki sem er mjög umhugað um að gera Femínistafélaginu upp skoðanir. Einn þeirra birtist sem gestapenni inn á www.tikin.is og heitir hann Haukur Skúlason. Því miður veit ég ekki hvernig ég get haft upp á Hauki til að leiðrétta þessa villu og svíma sem hann veður í... en greinina hans er að finna á: http://www.tikin.is/tikin/leitarnidurstodur/frettir/?cat_id=20827&ew_0_a_id=223973. Við Hauk er það helst að segja að áður en hans pistill birtist var ég búin að fara í viðtal um Chippendales á Rás 2, skrifa pistil um komu þeirra í Viðskiptablaðið, blogga um þá og skrifa inn á femínistapóstlistann. Allt sem Haukur skrifar um FÍ ætti því að dæma dautt og ómarktækt og setja spurningamerki við tilgang Hauks. Hvaða hagsmuni hefur hann af því að sverta orðspor FÍ og hvernig dettur honum í hug að gera slíkt án þess að kynna sér málið?

Hef tekið eftir því upp á síðkastið að það poppa upp af og til pistlar á tíkinni sem virðast skrifaðir í þeim eina tilgangi að rakka Femínistafélagið niður. Því miður er gagnrýnin sem birtist í pistlunum sjaldnast byggð á málefnalegum grunni heldur eru félaginu (og félagsfólki) gerðar upp skoðanir trekk í trekk. Mér finnst þessi þróun leiðinleg. Femínistafélagið er þverpólitísk samtök og því í raun óskiljanlegt hvers vegna hver hægri sinnaður einstaklingurinn á fætur öðrum telur það vera sitt hlutverk að stilla FÍ upp sem hverjum öðrum pólitískum andstæðingi. Á þessu eru þó ánægjulegar undantekningar, sem betur fer, t.d. heyrði ég Hönnu Birnu tala vel um Femínistafélagið í viðtali um daginn :) en ég man ekki eftir að hafa séð fjallað á jákvæðum nótum um FÍ á tíkinni. Mér detta þó í hug mörg atvik þar sem það hefði verið vel við hæfi - til dæmis allar aðgerðir FÍ sem miða að því að fá markaðinn til að virka með því að gera hann gagnvirkan á milli neytenda og fyrirtækja. Frelsið og frjálshyggjan eiga töluvert mikið undir því að geta komið á þessari gagnvirkri. Ég vona allavega að þau sem ákveða að skrifa neikvæða pistla um FÍ ákveði að kynna sér málin fyrirfram og grennslast fyrir um hvaða skoðanir við höfum áður en okkur eru gerðar upp skoðanir - sem við alls ekki höfum - og það notað til að sverta félagið. Málefnaleg gagnrýni er hins vegar velkomin - eða allaveg umborin ;)

Mamma mín er femínisti... væri þetta víst í dag!

Andstaðan er efni Viðskiptablaðspistilsins að þessu sinni... Mjög áhugaverð stúdía og uppáhaldsmyndina mína sjáið þið hér!

Fleiri gullkorn

Hér er eitt frá One Angry Girl:

“Ég er ekki femínisti, en...
Ég kann að meta réttinn til að aðstoða við að kjósa mína þjóðkjörnu fulltrúa. Ég nýt þess að geta valið um að vera í buxum eða stuttbuxum ef ég vill. Ég er ánægð með að mér var leyft að læra að lesa og skrifa. Það getur verið mjög hagkvæmt að stjórna hversu mörg börn ég vil eignast. Það er hrikalega gagnlegt að geta opnað bankareikning og eiga eignir á mínu nafni. Mér finnst gott að vita að eiginmaður minn eða kærasti hefur ekki lagalegan rétt til að lemja mig. Það er virkilega flott að eiga sjálf peningana sem ég vinn mér inn.”

Íslenskað af yours truly þar sem ég ætlaði að nota þetta í pistli en hætti svo við...

Hvað hefur femínismi ekki gert?

Sumir hitta beint í mark:

"Feminism has fought no wars. It has killed no opponents. It has set up no concentration camps, starved no enemies, practiced no cruelties. Its battles have been for education, for the vote, for better working conditions.. for safety on the streets... for child care, for social welfare...for rape crisis centers, women's refuges, reforms in the law."

(If someone says) 'Oh, I'm not a feminist,' (I ask) 'Why? What's your problem?'"

- Dale Spender, author of For the Record: The Making & Meaning of Feminist Knowledge, 1985

Gloria Steinem í The L-Word

Horfði á The L-Word í gærkvöldi. Mér skilst að þessir þættir séu ekki í uppáhaldi hjá lesbíum svona almennt, enda stútfullir af staðalímyndum og karllægum forsendum. Ég er á báðum áttum þegar kemur að þáttunum. Að hluta til er þetta stórt skref fram á við; sjónvarpsþáttur um lesbíur þar sem þeim leyfist að sýna hvor annarri blíðuhót. Á hinn bóginn gengur þátturinn fulllangt í ástarsenunum og minnir frekar á "lesbíuklám" sem er framleitt fyrir gagnkynhneigða karlmenn frekar en nokkuð annað. Þetta dregur töluvert úr þeim árangri sem þættirnir gætu annars hafa náð. Nokkurs konar eins og karlaveldið hafi gefið leyfi "já þið megið en bara ef það verður fullt af sætum stelpum að stunda kynlíf sem við getum dundað okkur við að horfa á.... Nennum auðvitað ekki að horfa á einhverjar lesbíur nema þær séu naktar að kyssa hvor aðra..."

Þess vegna varð ég svolítið hissa að sjá Gloriu Steinem í þættinum í gær. Hún lék sjálfa sig snilldarvel, að sjálfsögðu. Þegar leið á þáttinn kom kannski betur í ljós hvers vegna hún var þarna en það var sýnt frá henni í ræðustól - að blammera Bush... Aha pólitískur áróður beint í æð - greinilega femíníski vinkill þáttarins að skína í gegn þarna.

Kárahnjúkar

Það er afar áhugavert að fylgjast með fréttaflutningi af "mótmælum" við Kárahnjúka og umræðum á póstlista náttúrverndarsinna. Ég hitti til dæmis eina stelpu um daginn sem var að lýsa stemningunni upp á Kárahnjúkum þar sem allir voru voða jollý í gönguferðum um svæðið og í jóga og hugleiðslu þess á milli. Af fréttum að dæma eru þetta hins vegar stórhættulegt fólk, víkingasveitin í viðbragðsstöðu, löggan með auka mannafla og mikinn viðbúnað, beitir fólk harðræði við handtökur, lokar leiðum og gerir mat upptækan. Áhrif fjölmiðla sem fjórða valdsins koma berlega í ljós þegar fréttaflutningurinn er skoðaður því allt sem heitir einhver ólæti, viðbúnaður lögreglu og þess háttar er hypað upp og hitt er vart sýnilegt. Toppurinn kannski að segja að engir mótmælendur hafi verið á tónleikum Sigur Rósar... Ætli það hafi þá ekki bara allt verið starfsmenn Landsvirkjunar??? Eða hvað ætli fólkið hafi annars verið að gera á þessum slóðum í skipulögðum gönguferðum???

Skilaboðin eru allavega mjög einhliða - best fyrir þegnana að halda KJ og vera ekki að skipta sér of mikið af... þannig virkar lýðræðið best.

Í fríinu...

Er lítið í tölvunni þessa dagana - er komin í 50% frí og framkvæmdir á húsinu ofarlega á blaði. Fíni sófinn kominn í gagnið eftir að Húsgagnahöllinn sendi loksins mann á þriðjudaginn til að setja hann saman (ég byrjaði að hringja í þau á fimmtudeginum...). En sófinn er frábær og stendur fyrir sínu. Allt annað líf að horfa á sjónvarpið núna :) Gerði heiðarlega tilraun til að horfa á Rockstar í beinni í gærkvöldi. Það mistókst vegna bilunar í gervihnattasambandi við USA. En Magni virðist vera nokkuð safe með að vera ekki sendur heim á næstunni. Annars vorum við að tala um þetta í gærkvöldi í afmæli hjá litla bróður - er ekki hinn raunverulegi sigurveigari sá sem lendir í öðru sæti??? Vill einhver í alvörunni vera í hljómsveit með Tommy Lee?

Náðum að nýta sólardagana 2 til að mála megnið af gluggunum á húsinu. Enn eru eftir 5 litlir gluggar, hringglugginn og 2 stórir gluggar. Vona að það kom sól aftur fljótlega svo við getum klárað. Húsið hálf skondið í augnablikinu með mislitum gluggum! Svo er bara þakkannturinn eftir og að bera á útihurðarnar og þá er viðhaldið búið og framkvæmdir við áframhaldandi byggingu geta haldið áfram... :) Eins og segi alltaf - þetta er 10 ára plan.

Er að reyna að vera í fríi frá öllu öðru en það gengur illa. Allt of margt í gangi og ég vil auðvitað ekki missa af neinu :) Karlahópurinn á leið til Eyja með Nei átakið. Djö... standa þeir sig vel. Svo er auðvitað koma Chippendales sem vekur mikla athygli og umræðu. Svo er tekjublað Frjálsrar verslunar, aukin tekjumunur o.s.frv. o.s.frv. Af nógu að taka!

Svo vona ég að Betan fari að koma í bæinn. Hrikalegt að vera skilin eftir ein og yfirgefin í bænum í langan langan tíma! Sóley reyndar bjargaði málum með því að koma til landsins í júlí en nú er hún farin aftur :( Skil ekki af hverju fyrirmyndarfemínistarnir geti ekki bara verið alltaf á landinu - og í Reykjavík...

1 - 0 fyrir RUV

Af hverju er fólk hissa á ofbeldi í miðborginni? Karlmennskuímyndin er hlaðin ofbeldisdýrkun út í gegn. Sjá meðfylgjandi mynd úr leikfangabæklingi og svo eru það auðvitað blessuðu tölvuleikirnir...

En að öðru. Það verður fróðlegt að sjá hvað löggan gerir við Geira á Goldfinger og co eftir næturævintýrið þeirra. Ég hef þvílíka ofurtrú á yfirvaldinu að ég giska á að ekkert verði að gert frekar en venjulega. Fréttaflutningur NFS af málinu var hlægilegur í besta falli. Svo sem ekkert að efnisinnihaldinu en myndbirtingin sem fylgdi með - hvað hafði hún með fréttina að gera? Nákvæmlega ekkert. Virkaði eins og ein stór auglýsing fyrir súlustaðina. Kredibilitíið beið hnekki... en það er svo sem ekki mikið þegar kemur að fréttum sem tengjast súlustöðum á einhvern hátt. Sé alltaf fyrir mér einhverja miðaldra karla sem pissa næstum á sig af spenningi yfir að sjá hálfbera kona sveifla sér á súlu. Og hvar eru myndirnar af kúnnunum? RUV bjargaði þó kvöldinu með fínni frétt um málið - og myndbirtingu sem hæfði fréttinni. 1 - 0 fyrir þeim!

GARG

Keypti sófa í afmælisgjöf handa mínum heittelskaða. Voða fínan tveggja sæta lazyboy (and -girl) sófa til að vera með fyrir framan sjónvarpið. Í sjálfu sér ekki í frásögur færandi nema vegna þess að við þurfum sjálf að setja bakið á hann. Sendibílstjórinn sagði að þetta væri ekkert mál - bakið myndi bara renna á og svo var lítil sveif sem þurfti að setja niður. Ok - nú erum við búin að reyna og reyna og reyna en ekkert gengur. Það sem öllu verra er - þau hjá Húsgagnahöllinni lofuðu að koma hingað og kíkja á þetta og smella þessu í lag - ég hringdi fyrst kl. 7 í gær. Þá var mér sagt að hringja aftur í dag, sem ég og gerði. Hringdi kl. 11 og þá var mér sagt að innkaupastjórinn myndi koma en örugglega ekki fyrr en eftir hádegi. Nú er kl. rúmlega 7 og hann er ekki kominn og ekki búinn að hringja! Og ég er orðin pissed... vil fara að nota sófann!!!!!

Gott að vera rík?

Hér er linkur á rosafínan pistil eftir Evu Maríu inn á tikin.is http://www.tikin.is/tikin/leitarnidurstodur/frettir/?cat_id=20827&ew_0_a_id=107752.

Fór í viðtalið á RUV áðan - ekki mitt besta. Þarf greinilega að undirbúa mig aðeins öðruvísi - back to the basics eins og kona segir :) En svo er kannski bara gott að vera mistæk... þó ég væri alveg til í að vera það ekki!

Það var bent á það á femínistapóstlistanum hvað það væri óþolandi að karlar skipa alltaf efstu sætin yfir tekjuhæstu einstaklingana. Jamm tek undir það. Þangað til hlutirnir komast í lag læt ég mig dreyma um að vera fáránlega rík. Spáið í hvað ég gæti gert við peningana... myndi ekki kaupa mér snekkju en sé fyrir mér alls kyns skemmtilega auglýsingar - út um allt!!!! Svo ekki sé nú talað um eigin fjölmiðil og fleira gott sem ég myndi fjárfesta í - allt með eitt markmið að leiðarljósi.

Betra að horfa en gera????

Þá eru Chippendales að koma til landsins - fluttir inn af karlmanni og munu eflaust virka sem fínt aliby í umræðunni um súlustaði í framtíðinni... "já en Chippendales komu og þá fóru næstum 1000 konur og öskruðu og görguðu yfir þeim þannig að þetta hlýtur að vera í lagi!" Verður fróðlegt að fylgjast með umræðunni í kringum þetta en "fréttin" um þetta inn á visir.is er í meira lagi undarleg. Þar eru karlarnir ekki fólk heldur folar og þar að auki fullkomnir. Það er sem sagt ekkert verið að fela það að hinn fullkomni karlmaður er kjötstykki en ekki manneskja... skv fréttatilkynningunni. Ekki mér. Ónei... Svo er því líka haldið fram að konur alls staðar að úr heiminum segi að sýningin sé betri en kynlíf. Er þetta ekki áfellisdómur yfir frammistöðu bólfélaga þeirra í rúminu????

Allavega - fer væntanlega í Síðdegisútvarpið á eftir að ræða þetta.

Wonder why?

Hér er brot úr bókinni Doing Leadership Differently eftir Amanda Sinclair (bls 178):

For the few women in leadership roles, there has been no discernible reinforcing relationship between being a leader and being a woman. Indeed, being 'seen' as a woman diminishes one´s leadership. Behaviours which draw attention to sex - such as displays of overt femininity, being pregnant, references to family, wearing colorful or expressive clothes, lobbying for women or adopting explicit feminist stances - typically diminsh a woman's leadership potential in the eyes of observers. This dilemma gives aspiring female leaders an extra handicap and strips them of the potentially reinforcing source of identity and esteem which many male leaders continue to enjoy.

This explains why women, consciously and unconsciously, have used all sorts of strategies to conceal gender and sexuality, to camouflage, to blend in rather than stand out. By dressing in particular ways, by playing along with the jokes, by not supporting other women, by not allowing oneself to be associated with 'women´s issues' or by seeding to minimise one´s absences from the workplace for maternal or family reasons, women have sought to reduce the visibility and the impact of their gender and their sexuality.

But this strategy is self-defeating, as shown in this and other research. Women´s effort to conceal sex expose them to charges of 'trying to hard to be one of the boys'. And the constant effort of concealment deprives women of an important part of identity, a sense of self which rightly should be a central and reinforcing component of their leadership. Nor has the camouflage strategy produced other sought-after outcomes. It has not enabled many more women to assume leadership positions or facilitated a recognition and celebration of range of approaches to leadership among women.

********
Mér finnst afar áhugavert að pæla í svona hlutum.

Á hvalbaki

"Besta mynd ársins heitir Whale Rider. Kvikmyndaformið var fundið upp fyrir svona myndir!" Ain´t it Cool News.

Skil ekki hvernig þessari mynd tókst að fara fram hjá mér á sínum tíma. Mætti segja að þetta væri hin fullkomna mynd ;) Myndin er um unga stúlku, Paikeu, sem er frumbyggi á Nýja-Sjálandi. Feðraveldið er allsráðandi - en Paikea þekkir sitt hlutverk þrátt fyrir að vera stelpa... Myndin er femínísk út í gegn, falleg, sorgleg, róleg, spennandi og allt þar á milli en fyrst og fremst er þetta einstaklega mannleg mynd sem nær að skapa trúverðugar persónur og skilja eftir sig sterk hughrif. Ef einhver vill forvitnast meira um myndina þá er slóðin á heimasíðuna http://www.whaleriderthemovie.com.

Myndin hlaut fjölmörg verðlaun og stelpan sem leikur Paikea var útnefnd til Óskarsverðlauna sem besta leikkona í aðalhlutverki - yngsti leikari sem hefur hlotið þá tilnefningu - og skrýtið að hún skuli ekki hafa unnið. Mæli allavega með þessari mynd næst þegar þið farið út á leigu...

Úr ýmsum áttum

Mæli með Óþekkt síðasta laugardags (hægt að skoða á visir.is - veftv), sérstaklega viðtalinu við Gísla Martein sem var óborganlega fyndið. Gaman að sjá viðsnúning á hefðbundnum spurningum til kvenna - og allir þátttakandur héldu andlitinu í gegnum þetta skemmtilega viðtal :) Það er ekki að ástæðulausu að Óþekktin er uppáhaldssjónvarpsþátturinn minn!

Annars er nóg búið að vera að gera við að heimsækja krakka í vinnuskólanum - og þannig verður það út vikuna. Það er bæði gaman og áhugavert að hitta krakka á þessum aldri og spjalla við þau um jafnréttimál en hóparnir eru eins misjafnir og þeir eru margir. Stundum kem ég svífandi út og hugsa um hvað þetta væri lítið mál að koma á jafnrétti ef krakkarnir fengju almennilega jafnréttisfræðslu í grunnskóla - og stundum hugsa ég um hvað er hrikalega langt í land... Ég vona bara að þetta skilji eftir nokkrar spurningar í kollinum á krökkunum og að þau taki eftir ólíkum hlutum í umhverfinu í framhaldinu. Það er allavega ekki spurning að þetta kveikir slatta af spurningum í mínum kolli.

En jæja - best að drífa sig í labbitúr fyrir háttinn. Hér kemur uppskrift úr matarboði kvöldsins - hrikalega gott og auðvelt að búa til.

* Kjúklingabringur skornar í bita, marineraðar í Satay sósu og síðan steiktar á pönnu.
* Búið til kúskús - maraccoan spices og sultanas (e-ð svoleiðis) - útbúið skv leiðbeiningum á pakka.
* Blandað saman kúskús, spínati, niðurskornum sólþurrkuðum tómötum, fetaosti, ristuðum graskers- og sólblómafræjum, rauðlauk og kjúkling.

Þá er þetta tilbúið. Gott bæði nýtilbúið sem og kælt. Má borða eintómt en ef fólk vill meðlæti er mango chutney og brauð fínt.

Vantar 75 stig til að verða fullkomin kona!

Á skalanum 100 til mínus 100 fæ ég 25 konustig. Ég hreinlega dýrka BBC fyrir sína vönduðu grínþætti um grundvallarmuninn á milli kynja - og prófin þar í kring.

Ef þú vilt prófa: http://www.bbc.co.uk/print/science/humanbody/sex/

Ath - niðurstöður breytast með auknum gáfum. Veit ekki hvort það breytir fólki í meiri konur eða karla...

Veðurmaðurinn ógurlegi

Horfði á mynd sem heitir The Weather Man með Nicolas Cage í aðalhlutverki í gær. Myndin var á topp 10 listanum út á dvd-leigu (er ekki videoleiga orðið úrelt orð???) . Myndin er um hvernig hægt sé að finna tilgang í lífinu í heimi skyndibita. Nokkuð áhugavert efni og passar kannski ágætlega að setja myndina í skyndibitaumgjörð... eða ekki. Myndin var frekar niðurdrepandi og skyndibitaleg - eins og margt sem kemur frá Kristþyrnisskóg (orðabækur yndislegt fyrirbæri). Merkilegt nokk en kameltá var tekin fyrir í myndinni (sælla minninga eftir umræður á póstlistanum) - í samhengi við 12 ára stúlku veðurmannsins ógurlega. Fannst sum atriðin í kringum hana svolítið vafasöm, þ.e. skil að þetta efni geti verið feðrum sem eiga dætur sem eru að komast á kynþroskaaldurinn hugleikið en ef lausnin felst í að þeir fái nánast hjartaáfall og klæði þær upp í stutt pils og háhæluð stígvél til að leysa vandann þá...? Já, þá hvað? En hennar vandamál leysast örugglega öll við að verða snyrtileg og vel til höfð svo henni sé ekki strítt fyrir sjónmengandi áhrif á umhverfið!!!

Segi bara eins og Tommy Lee - þetta var svona ho-hum.

Mæli frekar með The Corporation, Hotel Ruwanda, Vera Drake eða Brokeback Mountain!

Rockstar - taka 2

Ætla alls ekki að gera það að vana að vaka og horfa á Rockstar - sérstaklega ekki þegar ég þarf að vakna upp úr kl. 7. En... fyrst ég endilega þurfti að vaka og átti eftir að slökkva á tölvunni er þá ekki tilvalið að blogga á meðan þetta er enn ferskst í minni? Giska á að Dilana eða Lukas vinni. Kemur einhver annar til greina? Storm á góða spretti - hún tekur sér pláss og er soldill töffari. Mörg hinna fannst mér alveg eins geta hafa verið að syngja í söngleik. Vantar slatta upp á Rockstar performance hjá mörgum hvað varðar sviðsframkomu - þó margar raddirnar séu flottar og öflugar. Magni var mun betri núna en síðast. Eftirminnilegasta mómentið úr þessum þætti er þó frá Alvarez (heitir hún það ekki?). Aðspurð um hvort hún hefði hlustað á tónlist rokkstjarnanna í Supernova sagðist hún hafa heyrt um hana - og toppaði svo með að segja að hún hefði verið með bleiju þegar þeir voru að gefa sitt stuff út. Bráðfyndið!

Besti parturinn af þættinum er þó að þetta er á Mayan. Þar var alltaf geðveikt gaman! :)

Allir á flótta

Á fréttavef RUV er fyrirsögnin:

Flótti yfirvofandi frá ISG?

Ég hélt að um væri að ræða frétt um Samfylkinguna en fannst hálf fáránlegt að klína þessu öllu á Ingibjörgu Sólrúnu eina ferðina enn... Þegar fréttin er skoðuð kemur í ljós að hún kemur hvorki Ingibjörgu Sólrúnu né Samfylkingunni neitt við heldur er fjallað um starfsmenn IGS - sem er allt annað en ISG!

Annars er þetta búinn að vera ágætur dagur. Fór í hádeginu og spjallaði um jafnréttismál við krakka í unglingavinnunni. Var miklu lengur en til stóð - vegna rigningar. Mjög skemmtilegur hópur og alltaf gaman að tala við unglinga sem sjá fáránleikann í hversdagslífinu... þá meina ég auðvitað aðallega í launamun, verkaskiptingu, kynjuðum leikföngum, karlrembulegum auglýsingum, o.s.frv.... Sé alveg fyrir mér hvað við yrðum fljót að ná jafnrétti ef kynjafræði væri kennd einu sinni í viku í 8. , 9. og 10. bekk! Það væri draumur í dós.

Rockstar

Nú eiga allir að kjósa Magna af því að hann er Íslendingur. Enginn segir að það eigi að kjósa hann af því að hann sé hæfastur eða bestur - bara af því að hann er Íslendingur. Hvað segja "ég-er-á-móti-kvóta" fólkið um það? Er það ekki niðurlægjandi fyrir Magna greyið ef hann kemst áfram bara vegna þess að hann er Íslendingur en ekki vegna þess að hann er hæfastur????

Bara spyr. Finnst þessi þáttur annars pínku skemmtilegur... fylgdis með fyrri seríunni! Hef oft spáð í af hverju ég er jákvæðari út í þetta raunveruleikasjónvarp heldur en þætti eins og t.d. Top Model, Swan o.fl. Hallast helst að því að það sem mér finnst jákvætt við þessa þætti er að þarna er alvöru hæfileikafólk að keppa sín á milli. Það sem "vantar" í þessa þætti er niðurlægingin. Dómararnir koma með alvöru komment - stundum slæm og stundum góð en þeir reyna að setja slæmu kommentin fram á kurteisan hátt en setja sig ekki í þær stellingar að gera lítið úr eða niðurlægja. Það er stærsti plúsinn við þáttinn. Sko - það er hægt að gera raunveruleikaþátt án þess að höfða til lægstu hvata :) Fólki finnst gaman að sjá talent að verki!

Ekki það að þátturinn sé gallalaus... en ég ætla að halda göllunum fyrir mig í bili.

Gleði

Í dag er ég líka glöð - Betan á afmæli og Kjarnafæði ætlar að breyta auglýsingunum sínum :)

Samúðarkveðja

Í dag er ég sorgmædd. Í dag fylgir frænka mín bróður sínum til grafar. Á sex árum er hún búin að sjá á eftir 3 sonum sínum, mömmu og núna bróður. Þetta er of mikið. Stundum er lífið of ósanngjarnt.

Many faces of Iceland

Sumt er fyndnara en annað. Var ég nokkuð búin að blogga um auglýsingu Air Iceland í Leifsstöð? Þar getur að líta auglýsingu með textanum: Discover the many faces of Iceland.

And the many faces of Iceland are????? Júmm, ljóshærð ung kona með blá augu. The many faces of Iceland = In Iceland we have 50.814 blonde, blue eyed women! Svona er gott að kynna Ísland ;)

Frami án hjálpardekkja?

Á deiglunni.com - (uppáhalds vefritinu mínu þessa dagana) er grein um frama kvenna í atvinnulífinu. Titill greinarinnar er "Frami án hjálpardekkja". Höfundur er afar þreytt á vinstrisinnuðum femínistum sem vilja eintóm hjálpardekk til að koma sér áfram... Ég er hins vegar orðin afar þreytt á konum sem átta sig ekki á að þetta er ekki hægri/vinstri. Þessi endalausu skrif um frama kvenna og gagnrýni á t.d. umræðuna (eða rússnesku samþykktina) um kvóta á hlutfall kynjanna í stjórnir fyrirtækja er ekki á réttum forsendum. Fyrir það fyrsta þá var ráðstefnan á Bifröst hvorki haldin undir formerkjum femínista né vinstri sinnaðra. Þar voru einmitt fjölmargar konur sem eru framarlega í atvinnulífinu - kvenkyns stjórnendur á öllum aldri og væntanlega úr öllum flokkum.

Það er eitt að vera á móti kvótum - en það er annað að einblína öllum sínum kröftum í að ætla að þau sem séu hlynnt kvótum séu bara vinstrisinnaðir einstaklingar eða að allir vinstrisinnaðir einstaklingar séu hlynntir kvótum. Þegar umræðan er komin á þeim nótum þá er ekki verið að fjalla um málið á málefnalegum grundvelli heldur bara fara ofan í skotgrafir og halda að það séu til svona vinstri/hægri lið sem geti ekki verið sammála um neitt - eða að allir innan vinstri liðsins séu sammála og allir innan hægra liðsins séu sammála.

Tökum kvótann sem dæmi. Er hægri sinnað fólk á móti kvóta almennt? Það hafa ekki heyrst nein mótmæli frá hægra fólkinu um þá kynjakvóta sem eru við líði í samfélaginu.

1. Það er kvóti í eina nefnd á vegum ríkisins - jafnréttisráð. Þar sitja núna slatti af körlum í krafti kyns síns. Hvar eru mótmælin, niðurlægingin, þreytan? Eða er þetta öðruvísi kvóti því jafnréttismál koma körlum jafnmikið við og konum?

2. Fæðingarorlof - þar er kvóti. 3 mánuðir fyrir konur, 3 fyrir karla og 3 sem má skipta. Þetta er samþykkt í tíð hægri stjórnar. Af hverju er þessi kvóti betri en aðrir kvótar?

Svo er líka í lagi að setja hlutina upp eins og þeir eru. Eins og staðan er í atvinnulífinu í dag eru karlar með hjálpardekk, forgjöf og þjófstart. Allt í krafti kyns. Konur eru ekki með nein hjálpardekk, enga forgjöf og þjófstarta ekki í krafti kyns - heldur þvert á móti, þær eru gagnrýndar á öðrum forsendum, metnar á öðrum forsendum og hreinlega stimplaðar út af borðinu vegna kyns - ekki hæfileikaskorts.

Hvar er öll umræðan frá körlunum um hversu niðurlægjandi það sé að þeir séu í sínum stöðum í krafti kyns? Hvar er öll umræðan frá körlum um að þeir þurfi ekki hjálpardekk og vilji útrýma kynjamisrétti því þeir sætti sig bara ekki við að keppa ekki á jafnréttisgrundvelli? Sú umræða er bara ansi lágvær og hreinlega bara fjarverandi úr íslensku atvinnulífi. Samt sem áður eru karlar þar með yfirgnæfandi meirihlutavald sem er ekki tilkomið vegna þess að þeir séu svona margfalt hæfileikaríkari og klárari en konur. Svo keppast sumar konur við að tala um að konur þurfi ekki hjálpardekk... þær komist á sínum eigin forsendum. Jamm - en konur eru ekki með hjálpardekk - en karlarnir eru himinlifandi ánægðir með sín!

Brokeback Mountain

Jæja þá er ég loksins búin að sjá Brokeback Mountain. Er enn harðari á því en áður að það borgar sig ekki að vera með miklar væntingar fyrirfram - það veldur nánast alltaf vonbrigðum... ég var sem sagt ekki eins hrifin af myndinni og ég hélt að ég myndi verða - eða ætti að vera. Fyrir það fyrsta þá fannst mér hún óhemju langdreginn, sérstaklega fyrri helmingurinn. Fyrir það næsta setti ég nokkur spurningamerki við hvernig sambandið á milli kúrekanna hófst. Þegar fyrstu ástarsenunni lauk spurði ég Grétar hvort þetta hefði verið ástarsena eða nauðgun. Er það á hreinu??????? Hafði ekki tíma til að kíkja á þetta aftur þar sem skila þurfti spólunni um leið og áhorfi lauk til að ná fyrir lokun.

Fannst ástarsenurnar líka soldið skrýtnar á köflum - fannst þeir yfirleitt frekar ofbeldisfullir eða harkalegir í kynlífinu/kossum en þegar sýnd var ástúð og kærleikur var það í kúri og þessi háttar - eða allavega stoppað áður en "of" langt var gengið. Það er svona eins og það hafi átt að tryggja að karlmönnum myndi nú örugglega ekki þykja fallegt að sjá 2 karla saman (hvað þá konum...). Svo er auðvitað týpískt að í Hollywood ástarmynd um homma þurfi að sýna konurnar þeirra nánast naktar - til hvers var það?

En auðvitað var margt gott í myndinni líka. Ég sat samt ekki eftir myndina með verk í hjartanu yfir hvað þessar aðstæður eru ömurlegar og hvað mörg líf fara forgörðum vegna fordóma og gagnkynhneigðum yfirráðum. Fannst á köflum að túlkunin næði frekar grunnt og áhorfandanum eftirlátið að fylla of mikið inn í eyðurnar - því það var vel hægt að fylla út í eyðurnar á hómófóbískan hátt á köflum. Eins fannst mér ekki takast að byggja upp þessi sterku tengsl/ást þeirra á milli í fyrri hluta myndarinnar sem gerði það að verkum að ég var frekar lengi að tengjast persónunum og fá samúð með þeim. Þetta fannst mér hins vegar takast mun betur í seinni hlutanum.

Myndin náði samt vel að sýna hvað hommafóbía og fordómar út í samkynhneigð eru mannskemmandi öfl sem vonandi tekst að útrýma. Það er nógu erfitt fyrir fólk að koma út úr skápnum í samfélagi eins og okkar þar sem baráttan er töluvert lengra á veg komin og fordómarnir minni en nánast ómögulegt á svæðum þar sem hommar eru lamdir og drepnir ef upp um þá kemst. Þannig er samt staðan enn sums staðar. Ég var að reyna að rifja upp hvernig þetta var í mínu ástkæra rauða sveitafylki, Kansas. Komst þó að því að ég hefði verið í of vernduðu umhverfi til að geta dæmt um það. Í háskólasamfélaginu voru hommar og lesbíur opinskátt út úr skápnum fjarri fjölskyldu og nágrönnum. Morð og ofbeldi voru fátíð. Ég man ekki eftir neinum hate crimes gegn hommum eða lesbíum - en fór á netið að leita. Fann mér til mikils léttis quote í queer theory prófessor í skólanum sem lýsti campusnum sem opnu og frjálslyndu samfélagi - sem er akkúrat mín upplifun af minni skólagöngu þarna. Tilefnið var þó ekkert skemmtilegt en það var vegna þess að fáni samkynhneigðra var brenndur (hate crime - en eftir minn tíma) og prófessorinn var hissa....

Allavega. Þarna varð ég femínisti, hlynnt réttindum samkynhneigðra og kynntist mörgu sem sneri að margbreytileika. Þótt það hljómi kannski skringilega þá var Kansas miklu betri uppspretta lærdóms fyrir þessa hluti heldur en Ísland. Ástæðan einfaldlega sú að í 26þús manna háskóla í miðríkjum Bandaríkjanna er fólk frá öllum heimshlutum, af mismunandi kynhneigðum, kynþáttum, með mismunandi trúarbrögð o.s.frv. Þangað koma líka alls kyns fáráðlingar. Ég sé enn eftir að hafa ekki farið á fyrirlesturinn með Ku Klux Klan... damn! Til samanburðar get ég sagt að á Íslandi hafði ég hitt einn svartan mann fram að tvítugu og kynnst einum homma! Jamm, litla verndaða, einsleita Ísland... Og ég veit ekki til þess að Klanið hafi nokkurn tímann komið hingað með fyrirlestur...!

En þó að háskólasamfélagið hafi iðað af margbreytileika, fjölbreytileika og frjálslyndi þá verður það sama seint sagt um Kansas. Eftir að hafa googlað minn fyrrum heimabæ komst ég að því að staðan hefur langt í frá batnað - og örugglega bara versnað eftir Bush og co. Sennilega myndi Brokeback Mountain passað vel inn í suma litlu sveitabæina í Kansas (bara ekki Lawrence!!! :-þ), og víðar. Því miður. Bandaríkjunum sárvantar góðan forseta - demókrata. Það vantar líka fleiri myndir eins og Brokeback Mountain - bara ekki eins langdregnar!