Hvað ef?

Þessi pistill birtist í Viðskiptablaðinu 8. nóv. 06. Staðan miðað við prófkjör er breytt - núna myndi fækka um 3 en ekki 2, eins og segir í pistlinum.

Smá viðbót - var víst búin að setja þennan pistil inn áður - en sýnist að það sé allt í lagi að rifja hann upp m.v. kynjakvótaumræðuna hér fyrir neðan og úrslitin hjá VG!

Hvað ef?
Hvað ef karlmenn þessa lands ákvæðu allt í einu að þeir vildu svipta konur kosningarétti, kjörgengi, fjárhagslegu sjálfstæði eða tækifæra til menntunar? Hvað ef karlmenn þessa lands ákvæðu að þeir vildu skilgreina vændi sem löglega atvinnugrein? Hvað þá? Eins og staðan er í dag er fátt sem gæti stöðvað þá. Valdið er í höndum karla, þeir eru í meirihluta á þingi, í ríkisstjórn og hæstarétti.

Konum fækkar um 2
Ástæðan fyrir því að ég vek athygli á þessu er að núna eru prófkjör og uppstillingar á lista í fullum gangi hjá öllum flokkum enda styttist í kosningar. Í dag eru 23 konur á þingi og 40 karlar. Ef miðað er við að fjöldi þingmanna í hverjum flokki og í hverju kjördæmi verði óbreyttur í næstu kosningum mun konum fækka um tvær miðað við úrslit prófkjara. Úrslit liggja ekki fyrir í öllum kjördæmum né hjá öllum flokkum þannig að þessi staða getur breyst og auðvitað eru allar líkur á að niðurstöður næstu kosninga verði ekki nákvæmlega þær sömu og síðast. Engu að síður er það mynstur sem er að birtast í prófkjörunum áhyggjuefni út frá jafnréttissjónarmiðum.

Á að kenna krökkum frá Vestfjörðum að sauma og krökkum frá Austfjörðum að smíða?
Sumir vilja meina að kyn skiptir ekki máli og að hæfni einstaklinganna séu aðalatriðið. Auðvitað er ekki annað hægt en að taka undir að við eigum að kjósa hæfustu einstaklingana á þing en það væri afar karlrembulegt að halda því fram að ástæðan fyrir skökku kynjahlutfalli á þingi sé vegna þess að karlar séu hæfari en konur. Þar að auki skiptir kynið meira máli en flest annað í þessu lífi. Við eigum að kjósa hæfustu konurnar og hæfustu karlana – í jöfnum kynjahlutföllum. Ef einhver er í vafa um að kyn hafi meiri áhrif á líf einstaklinga heldur en t.d. búseta mega þeir hinir sömu spyrja sig hvort að á fæðingardeildinni sé viðhaft að klæða börn í sitthvora litina eftir búsetu? Hversu margir hafa séð leikfangabæklinga þar sem dótinu er úthlutað til barna eftir búsetu? Bílar fyrir börnin frá Vestmanneyjum, puntudótið fyrir börnin frá Siglufirði, verkfærasettið fyrir börnin frá Vestfjörðum og dúkkurnar fyrir börnin frá Reykjavík. Skyldu margir Vestmanneyingar verða fyrir því að ef þeim skyldi detta í hug að verða leikskólakennarar eða hjúkrunarfræðingar þá sé hlegið að þeim? Eða þeim alltaf hrósað fyrir að vera eldklárir snillingar á meðan krökkunum frá Siglufirði er hrósað fyrir að vera dugleg, stillt og prúð? Er þörf á að setja í lög að Selfyssingar, Reyðfirðingar og Ísfirðingar eigi að fá sömu laun ef þeir vinna hlið við hlið í sama starfi? Er einhvern tímann talað um að hafa mismunandi námsskrá fyrir krakka eftir því hvaðan þau eru af landinu? Kenna öllum krökkum á Vestfjörðum að sauma en krökkunum á Reyðarfirði að smíða? Nei. Þetta er ekki raunin. Samt eru enn til þeir sem vita að búseta hefur töluverð áhrif á fólk en vill afneita þeim áhrifum sem kyn hefur þó sá munur sé mun augljósari í öllu okkar umhverfi.

Karlar á þing fyrir tilstilli kynjakvóta?
Það er sorglegt að fylgjast með hverju prófkjörinu á fætur öðru þar sem konum er hafnað og karlar raða sér í efstu og öruggu sætin. Ekki nóg með að hlutur kynjanna sé kolrangur heldur getur hæglega farið svo í komandi kosningum að einhverjir karlar komist inn fyrir tilstilli kynjakvóta. Ef Vinstrihreyfingin grænt framboð heldur áfram að vera með kynjakvóta fyrir hvert kjördæmi gæti vel farið svo að karlar komist inn fyrir tilstilli kynjakvóta í Reykjavík og þannig skekkt kynjahlutfallið á þingi enn frekar, körlum í vil.

Sigur fyrir hvern að karlar raðist í efstu sætin?
Slæm staða í jafnréttismálum kristallast ekki eingöngu í niðurstöðum prófkjara heldur einnig orðræðunni í kringum þau. Haft er eftir Björgvini G. Sigurðssyni sem vann prófkjör Samfylkingarinnar í suðurkjördæmi “Mér líst afar vel á útkomuna úr prófkjörinu og er viss um að Samfylkingin nær góðum árangri í kosningunum næsta vor. Ég get ekki annað en litið á þessi úrslit sem persónulegan sigur fyrir mig og Samfylkinguna í heild." Jú, jú, persónulegi sigurinn er óumdeildur en er það sigur fyrir Samfylkinguna að karlar röðuðust í þrjú efstu sætin, kona í það fjórða og karl í það fimmta? Samfylkingin er eins og er með fjóra þingmenn í Suðurkjördæmi, þrjá karla og eina konu. Það er borin von að þar verði framför. Svipaða sögu er að segja eftir prófkjör Sjálfstæðisflokksins. Þar gekk Sigurður Kári Kristjánsson meira að segja svo langt að kenna konum um sitt slæma persónulega gengi. Sigurður Kári lenti í 8. sæti prófkjörsins og sagði “Svona spilaðist þetta bara. Það komu nokkrir nýjir inn í þetta prófkjör sem náðu góðum árangri. Ég held að það hafi kannski líka verið pressa á að kjósa konur í sæti ofarlega. Kannski hafa einhverjir liðið fyrir það." Tvær konur og fimm karlar lentu ofar á listanum en hann og honum dettur í hug að konum hafi verið hyglað en ekki körlum? Sjálfstæðisflokkurinn er eins og er með níu þingmenn í Reykjavíkurkjördæmunum og miðað við úrslit prófkjörsins þar sem 2 konur eru meðal níu efstu mun kynjahlutfallið hjá þeim verða óbreytt.

Verða karlarnir góðir?
“Eiga þá stelpur alltaf að þegja / og aðeins vona að strákar túlki þeirra mál?” Þetta er brot úr textanum við lagið “Hvers vegna þegjum við...?” af plötunni Áfram stelpur sem kom út 1975. Það má yfirfæra þennan texta yfir á stöðu kvenna og karla í stjórnmálum. Eiga konur bara að þegja og vera sáttar við að fá að vera memm en ekki sem helmingur valdhafa á Alþingi Íslendinga? Fjölmargar lagagreinar og aðgerðir á vegum stjórnvalda hafa mismunandi áhrif á kynin. Það skiptir máli að konur og karlar hafi sömu völd í samfélaginu. Í dag er Ísland karlaveldi þar sem karlmenn geta gert það sem þeim sýnist og við konurnar erum háðar því að karlarnir ákveði að vera góðir við okkur. Það er ekki ásættanlegt en því miður er ekki mikil von til bjartsýni fyrir komandi alþingiskosningar.

Fórnarlambið

Ég er fórnarlamb og af því tilefni er mér boðið í partý. Spurning hvort ég verð þar í vondum eða góðum félagsskap...

Hvað finnst mér um kynjakvóta VG?

Vegna spurningar í innlegginu á undan... set hér inn póst sem ég sendi á femínistapóstlistann í kvöld. Hann var svar við athugasemd um að Gestur væri að setja fordæmi í þá veru að konur yrðu líka að afsala sér kynjakvótasætum í framtíðinni. Tek fram að ég er ekki áköf kvótakona. Er fylgjandi honum á 5 mínútna fresti... Stærsti gallinn við kynjakvóta er auðvitað að hann útilokar að konur muni nokkurn tíma verða í meirihluta á þingi. Ég spái því að fylgi karlmanna við kynjakvóta eigi eftir að aukast eftir því sem konum fjölgar á þingi!

En hér er pósturinn:
****************
Ég er alls ekki sammála því að þetta sé fordæmisgefandi í hina áttina - ekki á meðan staðan inn á þingi er 2/3 á móti 1/3. Í síðustu viku birtist skýrsla um stöðu Íslands. Staða kvenna í pólitík var sterk - en það var út af því að Vigdís var forseti í 16 ár. Ef miðað er við hlutfall kvenkyns ráðherra erum við í sömu sporum og Afríkuríki, sem er ekki það viðmið sem við höfum hingað til leitast við að bera okkur saman við. Það væri hreinn skandall að láta það berast að hér væru konur karlar í yfirgnæfandi meirihluta á þingi og að af þessum stóra meirihluta væru 1 eða 2 karlar. Það er nefnilega ekki bara VG á höfuðborgarsvæðinu sem er aðalatriðið heldur heildarstaðan á þingi.

Konur geta ennþá þegið sæti fyrir tilstilli kynjakvóta með góðri samvisku á þeirri forsendu að hlutfall kvenna er svo skakkt á þingi.

En frábær úrslit hjá VG og gott fordæmi hjá Gesti. Vonandi verður kjörstjórn á sama máli. Ég á orðið nógu erfitt með að segjast vera Íslendingur eftir að við komumst á lista staðfastra þjóða, Kárahnjúka, ójöfnuð á svip stundu, barn á listanum yfir kynþokkafyllstu konurnar, smánarlega dóma (eða enga) í kynferðisbrotamálum... Ég hreinlega myndi ekki meika karla á þingi vegna kynjakvóta ofan á þetta allt saman!

Loksins gott prófkjör

Frábær úrslit hjá VG um helgina. Loksins kom prófkjör þar sem konum vegnaði vel! Reyndar hefði ég viljað sjá Kristínu Tómas og Andreu Ólafs ná allavega 4. sæti... enda eru þær fyrirmyndarfemínistar.

Lærum af Filippseyjum

Þeir kunna þetta á Filippseyjum. Íslenskt löggjafarvald og dómsstólar ættu kannski að fara í vettvangsferð og læra hvernig þetta er gert? Reyndar eru Filippseyjingar ekki fullnuma enn því þeir sýknuðu hina 3 en þeir eru allavega 40 árum á undan Íslendingum samt sem áður....

Vísir, 04. des. 2006 10:05

40 ára fangelsi fyrir nauðgun
Bandarískur hermaður hefur verið dæmdur í 40 ára fangelsi fyrir að hafa nauðgað filippeyskri konu þann 1. nóvember síðastliðinn. Konan sagði að hún hefði verið ölvuð og að á meðan hefði maðurinn nauðgað henni en hann bar því við að kynmökin hefðu verið með hennar samþykki.

Er þetta talið mikilvægt mál fyrir kvenréttindafólk og á sama tíma er það talið staðfesta sjálfstæði eyjanna gagnvart fyrrum nýlenduveldi sínu, Bandaríkjunum. Höfðu um 100 manns safnast saman fyrir framan dómshúsið til þess að styðja við konuna og var ákaft fagnað þegar dómurinn var kveðinn upp

Moggablogg

Jæja, ég skilaði prófinu mínu í Kyn og fjölmiðlar morgun. Meðal efnis sem ég las fyrir prófið var um netið. Í einni greininni kom fram að meðal þess sem var talinn einn af stærstu kostum netsins í upphafi var hversu auðvelt, ódýrt og aðgengilegt það væri fyrir alla að setja upp eigin netsíðu. Hins vegar hefði þróunin orðið sú að vegna þess hversu stjór og fjársterk sum fjölmiðlafyrirtækin eru þá kostar það orðið ekki undir einni milljón dollara að koma á koppinn vinsælli vefsíðu. Sem sagt ekkert mál að koma einhverju á koppinn en ef síðan á að vera vel sótt og vinsæl þá er eins gott að hafa djúpa vasa.

Mér finnst þetta áhugaverð umræða - hvernig virkar netið í að auka lýðræði og jafnrétti á milli allra hópa? Búin að vera að velta þessu fyrir mér þar sem ein prófspurningin kom inn á þetta atriði. Getur verið að netið nýtist þeim best sem nú þegar hafa völdin? Þar sem þetta er mál málanna akkúrat í augnablikinu ákvað ég að tékka á hverjir væru listaðir upp í "vinsælu bloggunum" á mbl.is. Rak augun í fyrirsögnina þegar ég var að krúsa fréttirnar... og viti menn og konur... tatatata.... vinsælustu bloggin eru karlkyns!


Mér finnst þetta skipta máli í því samhengi að nú er Mogginn einn vinsælasti vefur landsins. Á bak við vefinn standa fjársterkir aðilar - og nokkuð stórt fyrirtæki á íslenskan mælikvarða. Þeir auglýsa hvaða blogg eru vinsæl á vel sótta vefnum sínum. Sem sagt - þeir stýra aðsókn inn á ákveðna vefi. Þarna finnst mér að kynjasjónarhornið eigi að fá að njóta sín og Mogginn eigi að jafna kynjahlutfallið. Það hljóta einhverjar konur að blogga hjá þeim og varla vill Mogginn senda þau skilaboð að þjóðin nenni ekki að hlusta á konur!? Ekki einu sinni eina????? :-o

Aftur og nýbúinn!

Frjálslyndi flokkurinn er að skandalisera enn eina ferðina... Í þetta sinn ákváðu þeir að losa sig við konuna í flokknum - Margréti Sverrisdóttur. Margrét er búin að vera framkvæmdastjóri flokksins og hefur þar að auki lagt á sig ómælda vinnu fyrir flokkinn í hverjum kosningunum á fætur öðrum en sjálfri hefur henni verið skóflað til hliðar. Núna segir formaður flokksins að henni sé sagt upp vegna þess að hún muni leiða annan hvort Reykjavíkurlistann. Það er augljóst að þetta er helbert kjaftæði. Ef það hefði stangast og allt væri í góðu hefði verið rætt við hana og fundin sameiginleg lausn á því hvort og hvenær hún myndi hætta. Í staðinn er henni hent til hliðar - í kjölfarið á því að hún hefur verið eina manneskjan í flokknum sem hefur tjáð sig af viti um hin rasísku ummæli Magnúsar Þórs.

Það er þekkt að konur og karlar fá sitthvora meðferðina. Í pólitík er t.d. talað öðruvísi um konur, þær eru gagnrýndar á persónulegri nótum en karlar, miklu meira er spáð í útlit kvenna og svo eru þær þaggaðar. Þær þurfa líka oftar að segja af sér og fyrir minni syndir en karlarnir - sem sést vel á öllum afsögnum ráðherra á hinum Norðurlöndunum. Nú er Margrét greinilega fyrir körlunum og þá er henni sparkað til hliðar - og ekki einu sinni reynt að fara pent að.

Ég vona að Margrét segi sig úr flokknum og finni sér góðan flokk við hæfi - eða fari bara í sérframboð. Ég er viss um að hún yrði kosin á þing ef hún væri ein á báti! Fengi líklega bara betri kosningu heldur en í fylgitogi með þessum *beep*

Bréfið til Ölgerðarinnar...

Góðan dag.

Ég má til með að senda ykkur póst vegna auglýsingu fyrir Egils Lite sem ég sá á Skjá 1 í gærkvöldi. Auglýsingin samanstendur af skjáskotum af fjölmörgum afturendum, mismunandi mikið klæddum. Ég sé ekki að auglýsingin sé í samræmi við þau gildi sem þið setjið fram á heimasíðu ykkar þar sem segir meðal annars (undir fyrirsögninni Heiðarleiki):

* Hegðun og framkoma okkar styrkir orðspor fyrirtækisins.
* Við virðum viðskiptavini okkar og væntum þess að þeir geri það sama gagnvart okkur.

Mig langar líka til að benda ykkur á 18. grein jafnréttislaga þar sem segir:

18. gr. Auglýsingar.Auglýsandi, og sá sem hannar eða birtir auglýsingu, skal sjá til þess að auglýsingin sé öðru kyninu ekki til minnkunar, lítilsvirðingar eða stríði gegn jafnri stöðu og jafnrétti kynjanna á nokkurn hátt.

Í kjölfarið á þessari auglýsingu frá ykkur höfum við á mínu heimili ákveðið að hætta að versla vörur frá Ölgerðinni. Okkur líkar ekki það viðhorf sem fram kemur í auglýsingunni og teljum hana lítilsvirðandi fyrir Ölgerðina og þá sem að henni standa. Okkur þykir miður að Ölgerðin hafi valið þessa leið þar sem jólablandið hefur verið ómissandi partur af jólahefðinni hingað til. Mest keypta vínið hér hefur verið frá Rosemount sem við sjáum á heimasíðu ykkar að þið eruð með umboð fyrir. Einnig hefur Egils Kristal verið það vatn sem hér hefur verið keypt - enda er Vífilfell á lista yfir þau fyrirtæki sem við sniðgöngum eftir að þau gerðu svipaða auglýsingu og þá sem hér um ræðir, nema að þá voru brjóst í aðalhlutverki í staðinn fyrir bossa.
Ég mun hér eftir beina mínum viðskiptum til aðila sem ekki stunda sömu leiðir í markaðssetningu. Ég tel að það sé hluti af samfélagslegri ábyrgð fyrirtækja að stuðla að auknu jafnrétti og virðingu í okkar samfélagi en að Ölgerðin hafi ákveðið að fara í þveröfuga átt með þessari markaðssetningu.

Með kveðju,
Katrín Anna Guðmundsdóttir
Ps. Ég tel skylt að geta þess að ég er talskona Femínistafélagsins - þó þetta bréf sé ekki sent í nafni félagsins heldur mínu eigin.

Wish me luck!

Jæja, er byrjuð í heimaprófinu fyrir kyn og fjölmiðla. Ætla að byrja á að fara upp, laga kaffi og setjast niður með prófið og lesefnið í rólegheitum. Verð í prófi til hádegis á morgun. Wish me luck!

Meira Boycott

Fyrir nokkrum árum skemmdi Vífilfell fyrir mér jólablandið með því að búa til hallærislegustu og asnalegustu Trópí auglýsingu ever. Ég missti samstundis lyst á Trópí og sendi kvörtunarbréf á markaðsdeildina. Þeirra viðbrögð voru að afsala sér ábyrgð og sendu bréfið á Saga Film og þaðan fékk ég eitthvað lame svar. Eftir það hefur heimilið sniðgengið vörur frá Vífilfelli eftir bestu getu. Það hafði meðal annars þau áhrif að jólablandið hætti að að vera kók, appelsín og malt og varð bara malt og appelsín. Í kvöld sá ég auglýsingu fyrir Egils Lite sem gerir það að verkum að ég hef misst áhugan á að versla við Ölgerðina.... Er ekki búin að senda þeim bréf en það stefnir allt í að jólaöl sé siður sem heyrir sögunni til á þessu heimili - sem er algjör bömmer. Eftir skoðun á heimasíðunni þeirra held ég að það sé tvennt sem ég á eftir að sakna frá þeim:

1. Jólablandið (sem betur fer er ég ekki mikið í gosinu aðra mánuði ársins...).
2. Rosemount vínið - sem er mest keypta vínið á þessu heimili... en ekki vikulegur gestur þannig að við hljótum að lifa það af að þurfa að skipta um tegund...

Fyrirmyndir og annað fólk

Trúi ekki að Herra Ísland keppnin hafi að mestu leyti farið fram hjá mér. Ég sem er svo mikil áhugamanneskja um svona konu og karla sýningar - enda eðlilegasti hlutur í heimi að fólk sem fer í atvinnuviðtal þurfi að spranga um á sundfötum og spariskóm áður en hægt er að ákveða hvort eigi að ráða það í vinnu. Það er svo sem ágætis mælikvarði á hver er líklegastur til að hlýða....

Annars finnst mér ein flottasta fyrirmyndin núna vera Dagný Kristjáns sem þorði að skrifa grein um Latabæ - óskabarn þjóðarinnar - sem var ekki stútfull af h-vítamíni! Mæli með lestrinum í Fréttablaðinu en TMM greinin er lengri og ítarlegri. Ég er bara rétt búin að glugga í þá grein en hlakka til að lesa hana alla :)

Tilkynningaskyldan hvetur svo alla til að lesa 5 bestu og 5 verstu bókatitlana á þessu ári sem birtast í Fréttablaðinu á morgun eða næstu daga (gleymdi að spyrja...). Yours truly er í hópi hinna hæstvirtu álitsgjafa fyrir þennan háalvarlega dóm. Þarf varla að taka fram að farið var rækilega yfir kynjahlutföllin áður en listinn var sendur...

ps. trúi ekki að enginn sé búinn að kommenta á fína endurskinsmerkið sem ég gerði fyrir Umferðarstofu - þau gleymdu óvart að hafa það með!

Prófkjör VG

Prófkjör VG er á laugardaginn. Það verður örugglega góður dagur því þá á mamma mín afmæli :) Það eru margir fyrirmyndarfemínistar að taka þátt í prófkjörinu. Mér telst svo til að það séu 10 konur í framboði en það má kjósa í 12 sæti allt í allt. Ég er að rembast við að vera hlutlaus talskona... hahaha - gengur ekki vel því ein af mínum uppáhalds konum er í framboði. Það er Guðfríður Lilja, skákdrottning með meiru. Hún er auðvitað femínisti, hrikalega klár og frábær í alla staði. Ég fer að gráta ef hún kemst ekki á þing... Svo eru fleiri af mínum uppáhalds femínistum í framboði. Bæði Kristín Tómas og Andrea Ólafs hafa verið ötular í Femínistafélaginu. Eru báðar róttækar, klárar og skemmtilegar. Svo er auðvitað Kolbrún Halldórs sem hefur verið sá þingmaður sem hefur staðið sig einna best í að koma femínískum málum að. Mæli pottþétt með henni í 1. sætið. Katrín Jakobs er líka rosaklár - þó ég viti ekki alveg ennþá hversu mikill femínisti hún er. Hún er allavega með umhverfismálin á hreinu og ég hef dáðst að henni leynt og ljóst síðan ég heyrði hana lýsa því hvernig hún hreinsar tau-kúkableiurnar sem hún notar á barnið sitt í staðinn fyrir pappableiurnar... Svo eru þarna fleiri kjarnakonur sem ég hef heyrt margt gott um en þekki ekki sjálf. Það verður greinilega úr vöndu að ráða hvernig á að velja í sætin...

Dansandi glöð og ánægð...

Búin að laga það sem fór úrskeiðis í uppfærslunni í beta blogger. Bætti inn nokkrum tengiliðum í leiðinni - sem ég er búin að vera lengi á leiðinni að setja á listann...

Nýbúin að senda pistilinn í Viðskiptablaðið. Að sjálfsögðu er hann um 16 daga átakið. Hvað annað? Er nokkuð beinskeytt í pistlinum hvað varðar þátttöku karla í baráttunni gegn kynferðisofbeldi. Reikna með að mörgum þeirra eigi ekki eftir að líka það vel... en ætli ég orði það bara ekki þannig að það þýðir ekkert að pakka karlkyninu inn í bómull þegar kemur að baráttunni gegn kynferðisofbeldi. Þetta kemur þeim við rétt eins og okkur konunum.

Annars var Ingólfur Ásgeir með skemmtilega nálgun á málþinginu á laugardaginn. Þar viðraði hann enn og aftur þá hugmynd sína að kenna ætti börnum dans þar sem bæði kyn fá að stjórna - og vera stjórnað. Á þann hátt læra strákar að vera stjórnað af konum og konur læra að vera við stjórnvölinn. Ég hef nokkrum sinnum minnst á þessa hugmynd hans Ingólfs og yfirleitt eru undirtektir blendnar. Oft heyrist æ, látið nú eitthvað í friði. Mér finnst þetta samt bráðsmellin hugmynd, sérstaklega þar sem ég á mjög erfitt með að láta að stjórn í dansi (ok - líka á öðrum sviðum...). Einnig finnst mér þetta áhugavert í ljósi hugmynda um leiðtoga og hversu kynjað það hugtak er. Sjá til dæmis niðurstöður úr prófkjörum undanfarinna vikna þar sem "eðlilegt" þykir að kjósa karla í fyrsta sætið og konur í besta falli í næstu sæti á eftir. Þannig er kosið eftir kyni en ekki hæfni - rétt eins og í dansinum. Þar er stjórnandinn valinn eftir kyni en ekki eftir hæfni. Er eitthvað vit í því?

Bara að gamni...

Frá konum til karla

Fór á málþingið Frá konum til karla á laugardaginn og á mótmælastöðuna fyrir utan Héraðsdóm Reykjavíkur. Málþingin voru bæði frábær og ég skil ekki af hverju mætingin var ekki meiri. Sérstaklega finnst mér athyglisvert að þetta var auglýst sérstaklega til karla en fáir þeirra létu sjá sig. Það er auðvelt að mæla hvort kynið er að standa sig betur í baráttunni gegn kynferðisofbeldi - og það er ekki strákarnir. Sem betur eru þeir strákar sem láta sig málið varða þó framúrskarandi frábærir :)

Fyrra málþingið var haldið af konum. Fókusinn þar var á sektarkennd og skömm þeirra kvenna sem verða fyrir kynferðisofbeldi og mikil áhersla lögð á að þolendur verða að losna við þessar tilfinningar. Sá sem ber ábyrgð á ofbeldinu er sá sem beitir því. Sú (eða sá) sem fyrir því verður ber ekki ábyrgð á því, hefur ekkert til að vera með samviskubit yfir eða skammast sín fyrir. Sektarkenndin og skömmin eru samfélagslega tilbúin fyrirbæri og tilfinningar þolandans mótast af þeim skilaboðum sem samfélagið sendir henni (honum). Gott dæmi til dæmis fréttaflutningur af nauðgununum fyrir nokkrum vikum. Konur í öllum tilfellum einar á ferð og hún þáði far hjá ókunnugum manni. Ekki má gleyma í sumar þegar einhver bareigandinn lýsti því yfir í fjölmiðlum að konur ættu bara að hætta að þiggja glas af karlmönnum! Á Stígamótum hangir upp á vegg blað sem á standa ýmsar setningar um það sem konur eiga að hætta að gera - listinn endar á því að til að sleppa við nauðganir verði konur einfaldlega að hætta að vera til. Lestur listans setur málið vonandi í samhengi hjá þeim sem vaða í þeirri villu og svíma að það sé á ábyrgð kvenna að loka sig inni, hætta að tala við karlmenn o.s.frv. til að koma í veg fyrir að vera nauðgað. Nær væri að senda út skilaboð til þeirra sem nauðga - og þeirra sem skapa það umhverfi sem nauðganir þrífast í.

En aftur að málþinginu. Seinni hlutinn fjallaði um ábyrgð karla. Karlarnir sem sagt tóku við kyndlinum frá konum og gerðu málið að sínu. Þeir voru auðvitað æði - rétt eins og allar konurnar í málþinginu á undan. Mér fannst samt afar forvitnilegt að hlusta á sálfræðinginn sem vinnur með kynferðisbrotamönnum. Hann var með tilbúinn prófíl af þeim... sem er í andstöðu við skilaboðin sem hafa verið að koma frá Stígamótum um að þetta séu alls konar menn, í öllum stéttum þjóðfélagsins og ekki sé hægt að þekkja þá af útliti og karakter einu saman. Man ekki heildarprófílinn sem kæri sálinn skellti upp en hluti af honum var svona: 80% kynferðisbrotamanna eiga við einhvers konar geðveilu að stríða, 40-80% þeirra hafa sjálfir verið beittir kynferðisofbeldi, þeir eru feimnir og ná yfirleitt betra sambandi við börn en fullorðna. Þekkir þú einhvern svona mann???? Við vorum nokkrar að velta því fyrir okkur hvort það gæti verið að þetta ætti bara við þá menn sem eru sakfelldir - sem kannski segir okkur eitthvað um bias í dómskerfinu? Það er spurning.

Bensínælandi bíll og snilldar rökhugsun

Bíllinn hans Grétar er búinn að láta mig vita að hann kærir sig ekkert sérstaklega um að ég sé að þvælast á honum. Ætlaði að vera voða góð við hann í dag og setja á hann bensín en viðbrögðin voru þau að hann spúaði því yfir mig... Ekki gaman - og ekki vel lyktandi!

Verð að setja hér inn snilldardæmi um rökvísi. Er ekki sagt að karlmenn séu einstaklega góðir í rökhugsun á meðan við konurnar stjórnumst af tilfinningum? Hér er eitt gott dæmi - karlinn með rökin og konan ég sýndi frekar sterk tilfinningaviðbrögð þegar ég las þetta. Þið megið giska á af hvaða sort þau voru...

"Hvers vegna eru nashyrningar í Afríku í útrýmingarhættu, en ekki sauðir á Íslandi? Vegna þess að sauðirnir eru í einkaeigu. Eigendur þeirra hirða um þá, merkja sér þá, girða þá af. Enginn á hins vegar nashyrningana svo að enginn gætir þeirra."

Fréttablaðið 10. nóv 2006, bls. 30. Hannes Hólmsteinn Gissurarson.

16 daga átakið að hefjast

Tíminn er svo fljótur að líða... og nú er 16 daga átakið að byrja á morgun. Hefst með morgunverðarfundi UNIFEM. Á laugardag er svo karlahópur FÍ með ráðstefnu í samvinnu við Stígamót og Bríeti. Endilega að mæta :)

Alla dagskránna er að finna hér.

"Frá Konum til Karla"
Ráðstefna um kynferðisofbeldi
Stígamót, Bríet og Karlahópur Femínistafélagsins munu halda tvenn málþing í tilefni af 16 daga átaki gegn kynbundnu ofbeldi

Tjarnarbíó 25. Nóvember 2006

kl 12:00-13:30 „Þær sem ekki passa sig þær eru sekar"
Konur hlaða táknræna steinvörðu – takið með steina!

kl 14:00-16:00 Málþing um ábyrgð karla í umræðunni um kynferðisofbeldi

kl 16:00-16:30 Tekið þátt í mótmælastöðu við Héraðsdóm Reykjavíkur
Gengið verður að Héraðsdómi Reykjavíkur við Lækjartorg þar sem þögul mótmæli eru í gangi vegna lélegrar nýtingar á refsiramma laganna gagnvart nauðgurum.

kl 17:00-19:00 Lokaspjall
Að mótmælastöðunni lokinni er fólki boðið aftur upp í Tjarnarbíó þar sem samantekt verður gerð á málþingunum tveimur.

Boðið verður upp á veitingar og ljúfa tóna frá trúabdorunum Lay Low og Þóri

Aðgangur ókeypis.

Nánari upplýsingar og ítarlegri dagskrá má finna á http://karlarsegjanei.net/, http://www.stigamot.is og http://www.jaaframstelpur.blogspot.com

Happy IVGLDSW Day!

Happy IVGLDSW Day!

Today is International Very Good Looking, Damn Smart Woman's Day,
So please send this message to someone you think fits this description.

And remember this motto to live by: Life should NOT be a journey to the grave with the intention of arriving safely in an attractive and well preserved body, but rather to skid in sideways, chocolate in one hand, wine in the other, body thoroughly used up, totally worn out and screaming "WOO HOO what a ride!" Have a wonderful day!

To the Girls:

Inside every older person is a younger person -- wondering what the hell happened?
-Cora Harvey Armstrong-

Inside me lives a skinny woman crying to get out. But I can usually shut the bitch up with cookies.
(Unknown)

I refuse to think of them as chin hairs. I think of them as stray eyebrows.
-Janette Barber-

A man's got to do what a man's got to do. A woman must do what he can't.
-Rhonda Hansome-

If you can't be a good example -- then you'll just have to be a horrible warning.
-Catherine-

When women are depressed they either eat or go shopping. Men invade another country.
-Elayne Boosler-

Behind every successful man is a surprised woman.
-Maryon Pearson-

Nobody can make you feel inferior without your permission.
-Eleanor Roosevelt-

Ný frænka og framboð

Ég er búin að eignast splunkunýja frænku :) Megakrútt!

Ég á eftir að uppfæra Excelskjalið mitt góða með niðurstöðum úr framboðum og hvernig staðan lítur út varðandi fjölda kk og kvk. Miðað við úrslitin stefnir í stórskandal í næstu þingkosningum. Held jafnvel að það sé kominn tími til að skora á konur að íhuga sérframboð! Held það sé eina leiðin til að eiga séns í að fjölga konum á þingi næsta vor - eða jafnvel eina leiðin til að standa í stað...

Mikill er máttur femínista...

Be afraid - be very afraid. Datt þetta í hug þegar ég slysaðist (alveg óvart...) inn á malefnin.com. Las þar þráð um fyrrverandi rektor á Bifröst og skilst að það séu þessir helvítis femínistar sem komu því til leiðar að hann varð að segja af sér. Jamm og jæja - í stjórn skólans er ein kona og held að það sé líka ein kona sem varamaður. Hitt eru allt karlar - en helv*#%& femínistarnir hafa samt meiri völd en þeir. Jibbý - er að velta fyrir mér hvernig við getum notað öll þessi völd. Uppástungur?

Believe it or not...

...en ég er lent og ekkert flugslys! ;) Flugið heim gekk bara fínt þó veðrið hafi verið með besta móti. Ég var fegin að ég fékk lítið af fréttum af veðri út. Upplýsti alla í Finnlandi um það að veðrið á Íslandi væri bara ósköp svipað og væri þar - í kringum 0 gráður en kannski aðeins meiri vindur. Segi mér til varnar að ég hreinlega vissi ekki betur...

Er rétt að lenda og ná áttum. Er bíllaus því bíllinn minn er enn á sumardekkjum og lokaður inni af gríðarstórum snjóskafli. Hef því enga afsökun til að vera ekki afkastamikil í dag... Einhverjar hugmyndir að efni fyrir pistil??? Er reyndar að lesa gífurlega áhugaverða bók - en langar að spara efnið úr henni þangað til ég er búin að lesa hana. Bókin heitir Business, not Politics og er um markaðssetningu inn á Gay markaðinn. Mér sýnist að höfundurinn hafi gert svipaða rannsókn og ég ætla að gera fyrir MA ritgerðina mína - nema ég skoða annað sjónarhorn, þ.e. markaðssetningu til barna og unglinga.

Frábærar fréttir með að Sigríður Guðmarsdóttir (presturinn minn hér í Grafarholtinu) vann málið fyrr hæstarétti. Týpísk viðbrögð frá biskupi og einhver sagði að einhver hefði skrifað í blöðin og sagt að það væri dónalegt að lögsækja biskup! Er hann sem sagt hafinn yfir lög? Röksemdarfærsla er stundum svolítið á reiki í þessu samfélagi finnst mér... Sá sem trúir mest á guð má brjóta lögin eins og honum sýnist! Einhvern veginn ekki í þeim kristna anda sem ég hefði búist við...

Kveðja fra Oslo

Ok - pant fá vont veður í fluginu á leiðinni heim! Nú er komin reynsla á þetta með góða verðið og vonda veðrið og það er pottþétt betra og skemmtilegra að fljúga í vondu veðri. 3 flug af 4 búin svo það fer að styttast í heimför...

Sit hér í góðu yfirlæti hjá Sóley í Osló. Loksins komin að heimsækja hana :) Kom í gærkvöldi og hér er búið að vera rosafínt. Ætlum að skella okkur í bíó í kvöld en röltum í bæinn í dag.

Það var rosagaman í Finnlandi. Mikið rosalega er Helsinki falleg borg! Námskeiðið sem ég var á var mjög áhugavert - allt öðruvísi en ég bjóst við en ég hef slatta af efni til að moða úr í framhaldinu. Námskeiðið hét Feminist Approaches to the Analyzis of Visual Cultures. Fyrsta daginn var rætt um arkitektúr, dag 2 um emotionalization og dag 3 um sexualization - hvort það væri allt slæmt eða hvort það leyndust tækifæri inn á milli. Parturinn um emotionalization innihélt mest af nýju efni fyrir mig. Eftir hádegi fyrstu 2 dagana voru workshops þar sem allar kynntu ph.d. verkefnin sín (nema ég með MA verkefnið mitt...). Verkefnin voru mjög fjölbreytt og áhugaverð, allt frá greiningu á the L-Word, pólitíkinni í kringum fæðingar, cyborgs og þar fram eftir götum. Við vorum 6 í mínum hóp og mér finnst verst að geta ekki gengið að því vísu að sjá lokaniðurstöðuna úr hverju verkefni fyrir sig... Hópurinn var mjög fjölbreyttur. Þarna voru konur frá Finnlandi, Noregi, Svíþjóð, Eistlandi, Rússlandi, Póllandi og svo ég Íslandi.

Sé að það er heilmikið að gerast heima. Kona má ekki skreppa burt í nokkra daga án þess að rektor segi af sér, fólk sé að skipuleggja stærri skemmdarverk en Kárahnjúka og þar fram eftir götum. Hvað er í gangi á Íslandi? Stjórnvöld minna á einhvern brjálaðan mass murderer með keðjusög í lélegri c-mynd... plís kjósið eitthvað annað í næstu kosningum!!!

By the way - einhvern tímann var L-Word til umræðu á þessu bloggi en með frekar óræðar niðurstöður. Eftir dvölina í Finnlandi er ég farin að halda töluvert upp á L-Word. Þátturinn er kannski ekki breakthrough í löndum eins og Íslandi en í Póllandi og víðar eru víst hópar af lesbíum sem taka sig saman, downloada þættinum af netinu (því hann er ekki sýndur í Póllandi) og horfa á hann saman, annaðhvort í heimahúsi eða á einhverjum bar. Þar gegnir þátturinn veigamiklu hlutverki í baráttu samkynhneigðra. Það er sem sagt ekki sama inn í hvaða aðstæðum þátturinn er veginn, metinn og gagnrýndur...

ps. KRFÍ er með vefborða inn á mbl.is sem segir: Kjósum konur. Óhætt að mæla með því :) Flott hjá KRFÍ.

Kjósa, kjósa, kjósa

Jæja, þá fer að styttast í væntanlega utanferð... það er að segja ef veðrið á eftir að batna! Búið að fresta fluginu mínu til kl. 12. Það þýðir að ég þarf ekki að vakna kl. 4 í nótt - sem er gott - en á móti kemur að ég missi líklega af upphafi fundarins sem ég er að fara á - sem er mjög vont :(

Fór í kvöld á kosningafund hjá Kristrúnu Heimis. Var búin að samþykkja að tala í 1 mín um hvað ég myndi gera ef ég mætti ráða öllu í einn dag á Íslandi. Var að hugsa um að hætta við upphaflega planið og fá að vera veðurguð í einn dag og hafa gott veður á morgun. En það dugar víst ekki! Hélt mig við upprunalegu áætlunina sem var að fylla ríkisstjórn og þing af femínistum - þannig væri hægt að láta daginn endast miklu lengur :) Gleymdi samt í restina að segja frá því að það væri alveg hægt að vinna í því að láta þetta rætast með því að kjósa femínistana núna í kosningunum ;) Ég ætla að upplýsa að ég kaus Bryndísi Ísfold, Ingibjörgu og Kristrúnu. Segi svo ekki meir - en það var erfitt að geta ekki kosið allar konurnar.

Kjósa svo!

ps. Veit ekki hvenær ég verð næst í tölvupóstsambandi svo það verður bara að koma í ljós hvenær ég næ næst að setja eitthvað skemmtilegt hér inn - eins og t.d. hvernig gekk að fljúga.... :-/

Hvort er betra: Sól og blíða eða rok og rigning?

Mér finnst ekkert sniðugt að spá roki og leiðindaveðri áður en flughrædda konan fer að fljúga. Er einhver til í að hnippa í veðurstofuna og panta sól og blíðu?

Það er af sem áður var - að sitja í flugvél og lesa um flugslys. Útsýnisflug yfir Reykjavík í sól og blíðu með flugstjóra í síðasta fluginu sínu geta rústað svoleiðis skemmtilegheitum. Mæli sem sagt ekki með útsýnisflugum! Come to think of it - kannski er bara minni hætta á útsýnisflugi í roki og rigningu :)

Hvað ef?

Viðskiptablaðið, 8. nóv.

Hvað ef?
Hvað ef karlmenn þessa lands ákvæðu allt í einu að þeir vildu svipta konur kosningarétti, kjörgengi, fjárhagslegu sjálfstæði eða tækifæra til menntunar? Hvað ef karlmenn þessa lands ákvæðu að þeir vildu skilgreina vændi sem löglega atvinnugrein? Hvað þá? Eins og staðan er í dag er fátt sem gæti stöðvað þá. Valdið er í höndum karla, þeir eru í meirihluta á þingi, í ríkisstjórn og hæstarétti.

Konum fækkar um 2
Ástæðan fyrir því að ég vek athygli á þessu er að núna eru prófkjör og uppstillingar á lista í fullum gangi hjá öllum flokkum enda styttist í kosningar. Í dag eru 23 konur á þingi og 40 karlar. Ef miðað er við að fjöldi þingmanna í hverjum flokki og í hverju kjördæmi verði óbreyttur í næstu kosningum mun konum fækka um tvær miðað við úrslit prófkjara. Úrslit liggja ekki fyrir í öllum kjördæmum né hjá öllum flokkum þannig að þessi staða getur breyst og auðvitað eru allar líkur á að niðurstöður næstu kosninga verði ekki nákvæmlega þær sömu og síðast. Engu að síður er það mynstur sem er að birtast í prófkjörunum áhyggjuefni út frá jafnréttissjónarmiðum.

Á að kenna krökkum frá Vestfjörðum að sauma og krökkum frá Austfjörðum að smíða?
Sumir vilja meina að kyn skiptir ekki máli og að hæfni einstaklinganna séu aðalatriðið. Auðvitað er ekki annað hægt en að taka undir að við eigum að kjósa hæfustu einstaklingana á þing en það væri afar karlrembulegt að halda því fram að ástæðan fyrir skökku kynjahlutfalli á þingi sé vegna þess að karlar séu hæfari en konur. Þar að auki skiptir kynið meira máli en flest annað í þessu lífi. Við eigum að kjósa hæfustu konurnar og hæfustu karlana – í jöfnum kynjahlutföllum. Ef einhver er í vafa um að kyn hafi meiri áhrif á líf einstaklinga heldur en t.d. búseta mega þeir hinir sömu spyrja sig hvort að á fæðingardeildinni sé viðhaft að klæða börn í sitthvora litina eftir búsetu? Hversu margir hafa séð leikfangabæklinga þar sem dótinu er úthlutað til barna eftir búsetu? Bílar fyrir börnin frá Vestmanneyjum, puntudótið fyrir börnin frá Siglufirði, verkfærasettið fyrir börnin frá Vestfjörðum og dúkkurnar fyrir börnin frá Reykjavík. Skyldu margir Vestmanneyingar verða fyrir því að ef þeim skyldi detta í hug að verða leikskólakennarar eða hjúkrunarfræðingar þá sé hlegið að þeim? Eða þeim alltaf hrósað fyrir að vera eldklárir snillingar á meðan krökkunum frá Siglufirði er hrósað fyrir að vera dugleg, stillt og prúð? Er þörf á að setja í lög að Selfyssingar, Reyðfirðingar og Ísfirðingar eigi að fá sömu laun ef þeir vinna hlið við hlið í sama starfi? Er einhvern tímann talað um að hafa mismunandi námsskrá fyrir krakka eftir því hvaðan þau eru af landinu? Kenna öllum krökkum á Vestfjörðum að sauma en krökkunum á Reyðarfirði að smíða? Nei. Þetta er ekki raunin. Samt eru enn til þeir sem vita að búseta hefur töluverð áhrif á fólk en vill afneita þeim áhrifum sem kyn hefur þó sá munur sé mun augljósari í öllu okkar umhverfi.

Karlar á þing fyrir tilstilli kynjakvóta?
Það er sorglegt að fylgjast með hverju prófkjörinu á fætur öðru þar sem konum er hafnað og karlar raða sér í efstu og öruggu sætin. Ekki nóg með að hlutur kynjanna sé kolrangur heldur getur hæglega farið svo í komandi kosningum að einhverjir karlar komist inn fyrir tilstilli kynjakvóta. Ef Vinstrihreyfingin grænt framboð heldur áfram að vera með kynjakvóta fyrir hvert kjördæmi gæti vel farið svo að karlar komist inn fyrir tilstilli kynjakvóta í Reykjavík og þannig skekkt kynjahlutfallið á þingi enn frekar, körlum í vil.

Sigur fyrir hvern að karlar raðist í efstu sætin?
Slæm staða í jafnréttismálum kristallast ekki eingöngu í niðurstöðum prófkjara heldur einnig orðræðunni í kringum þau. Haft er eftir Björgvini G. Sigurðssyni sem vann prófkjör Samfylkingarinnar í suðurkjördæmi "Mér líst afar vel á útkomuna úr prófkjörinu og er viss um að Samfylkingin nær góðum árangri í kosningunum næsta vor. Ég get ekki annað en litið á þessi úrslit sem persónulegan sigur fyrir mig og Samfylkinguna í heild." Jú, jú, persónulegi sigurinn er óumdeildur en er það sigur fyrir Samfylkinguna að karlar röðuðust í þrjú efstu sætin, kona í það fjórða og karl í það fimmta? Samfylkingin er eins og er með fjóra þingmenn í Suðurkjördæmi, þrjá karla og eina konu. Það er borin von að þar verði framför. Svipaða sögu er að segja eftir prófkjör Sjálfstæðisflokksins. Þar gekk Sigurður Kári Kristjánsson meira að segja svo langt að kenna konum um sitt slæma persónulega gengi. Sigurður Kári lenti í 8. sæti prófkjörsins og sagði "Svona spilaðist þetta bara. Það komu nokkrir nýjir inn í þetta prófkjör sem náðu góðum árangri. Ég held að það hafi kannski líka verið pressa á að kjósa konur í sæti ofarlega. Kannski hafa einhverjir liðið fyrir það." Tvær konur og fimm karlar lentu ofar á listanum en hann og honum dettur í hug að konum hafi verið hyglað en ekki körlum? Sjálfstæðisflokkurinn er eins og er með níu þingmenn í Reykjavíkurkjördæmunum og miðað við úrslit prófkjörsins þar sem 2 konur eru meðal níu efstu mun kynjahlutfallið hjá þeim verða óbreytt.

Verða karlarnir góðir?
"Eiga þá stelpur alltaf að þegja / og aðeins vona að strákar túlki þeirra mál?" Þetta er brot úr textanum við lagið "Hvers vegna þegjum við...?" af plötunni Áfram stelpur sem kom út 1975. Það má yfirfæra þennan texta yfir á stöðu kvenna og karla í stjórnmálum. Eiga konur bara að þegja og vera sáttar við að fá að vera memm en ekki sem helmingur valdhafa á Alþingi Íslendinga? Fjölmargar lagagreinar og aðgerðir á vegum stjórnvalda hafa mismunandi áhrif á kynin. Það skiptir máli að konur og karlar hafi sömu völd í samfélaginu. Í dag er Ísland karlaveldi þar sem karlmenn geta gert það sem þeim sýnist og við konurnar erum háðar því að karlarnir ákveði að vera góðir við okkur. Það er ekki ásættanlegt en því miður er ekki mikil von til bjartsýni fyrir komandi alþingiskosningar.

Minni á Hittið

PERSÓNUFRELSI - KYNFRELSI – FRIÐHELGI EINKALÍFS- HVERNIG ER REFSAÐ FYRIR BROT?

Hittið 7. nóv kl. 20 á Thorvaldsenbar

Allt of lengi hefur verið litið á kynbundið ofbeldi sem náttúrulögmál á Íslandi. Á allra síðustu vikum hefur þó skapast mikil umræða um þessi mál. Þá er oft litið fram hjá því að um árabil hefur ríkt neyðarástand á Íslandi. Neyðarástand vegna þess að réttarkerfið, löggjöfin og löggæslan hafa verið vanbúin til þess að taka á kynbundnu ofbeldi. Á Alþingi liggur fyrir frumvarp um breytingar á kynferðisbrotakafla almennra hegningarlaga. Á næsta hitti Femínistafélagsins sem haldið verður þriðjudaginn 7. nóvember kl. 20.00 á Thorvaldsenbar (Bertelstofu) skoðum við hvort frumvarpið gangi nógu langt til verndar þeim sem beitt hefur verið kynbundna ofbeldi.

Á hittinu verður einnig fjallað um hugtakið kynfrelsi, hugmyndir samfélagsins um kynhvöt karla annars vegar og kvenna hins vegar og þau tvöföldu skilaboð sem kynin fá um kynlíf, hvað sé leyft, hvað viðurkennt og hvað ekki. Síðast en ekki síst verður fjallað um friðhelgi einkalífs í tengslum við kynfrelsishugtakið.

Dagbjört Ásbjörnsdóttir mannfræðingur og M.A. í kyn- og kynlífsfræðum.Karlar frá Mars og konur frá Venus? Ríkjandi orðræða um kynverund kynjanna.

Atli Gíslason, lögmaður og Jóhanna Katrín Magnúsdóttir, laganemi Mannréttindi og réttarvernd kynfrelsis.

Kyn kyn og meira kyn

Jæja þá fer að styttast í Noregs og Finnlandsför. Fer á föstudaginn... og hef alltof mikið að gera þangað til... En búin að klára sumt. Fór og kaus í prófkjöri Samfylkingarinnar í gær. Vona að ég hafi kosið rétt! Átti í stökustu vandræðum með að gera upp á milli fólksins á listanum og harðneita þess vegna að gefa upp hvað ég kaus! Bíð svo bara með í maganum eftir úrslitum. Eina sem ég gef upp er að ég kaus Ingibjörgu í fyrsta - ekki annað hægt. Varð samt ferlega spæld þegar ég kom heim og sá hana skælbrosandi yfir "sterkum" lista í Suðurkjördæmi. Listinn er karl - karl - karl - kona - karl. Veikur listi að mínu mati út af hörmulegu kynjahlutfalli og hún hefði átt að vera furious!!!

Horfði á myndina Iron Jawed Angels í síðustu viku - var horft á hana í tíma (auðvelt að vera kennari þá...). Mæli með að allir femínistar nær og fjær horfi á þessa mynd. Mæli líka með henni fyrir konur í stjórnmálum sem þurfa smá spark til að koma sér í jafnréttisbaráttu gír. Jafnrétti næst ekki með því að brosa blítt til strákanna og treysta þeim til að fara með öll völd í landinu! Ég reiknaði út hvernig staðan yrði á þingi miðað við þau úrslit prófkjara sem nú liggja fyrir en að öðru leyti óbreyttri stöðu.

Egill - taka 2

Hér kemur svarbréfið mitt til Egils - eftir póstana 4 sem hann sendi. Honum er greinilega mikið niðri fyrir. Kannski ég setji bara bréfið hans hérna líka - þetta sem hann bað mig um að senda inn á póstlistann. Það er opinbert bréf. Djö... væri nú gaman ef einhver færi svo vandlega yfir þáttinn hans með hliðsjón af frambjóðendum, kynjahlutfalli, hversu margir kk og kvk frambjóðendur koma oftar en einu sinni og hversu langan tíma þau fá. Það kom nefnilega innlegg inn á póstlistann til að véfengja aðeins þessa upptalningu hjá honum. Hann ku víst hafa gleymt nokkrum körlum...

Hér er hans bréf:

Sælt veri fólkið

Ég þarf ekki að standa upp til að mótmæla ofbeldi. Ég er á móti morðum en ég er ekki að mótmæla þeim á reglulegum basís.

Ég er alveg á móti nauðgunum. Ég vil að þeim sé fremja slíka glæpi sé komið bak við lás og slá og þeir geymdir þar lengi.

Ég er á móti stríði en ég fer ekki reglulega í mótmælagöngur gegn stríði. Ég beiti ekki sjálfur ofbeldi - finn enga hvöt hjá mér til þess - reyni að ala barnið mitt upp þannig að það fái skömm á ofbeldi.

Ég hef aldrei viljað umgangast ofbeldismenn, forða mér ef ég verð var við eitthvað slíkt.
Ég lifi lífi mínu þannig að ofbeldi á þar engan þátt. Það er besta aðferðin til að vera á móti ofbeldi.

Ekki alls fyrir löngu tók ég þátt í atriði á V-deginum. Ég var beðinn um það - gott og vel. Það var ekkert mál. Þetta er gott málefni. Myndi ábyggilega gera það aftur ef ég væri beðinn um. Væri kannski ekki viss um að það gerði mikið gagn - myndi samt vona það.

Mér finnst hins vegar að Þórunn Sveinbjarnardóttir þingkona hafi komist óheppilega að orði í grein sinni sem bar yfirskriftina "Takið ykkur á strákar". Ég fer ekki ofan af því. Að gera mig að einhvers konar kóara með nauðgunum fyrir vikið er náttúrlega fráleitt.

Það er líka allsendis ómaklegt sem kemur fram í bréfi Önnu Katrínar Guðmundsdóttur að ég hleypi ekki kvenkyns frambjóðendum í þáttinn, þvert á móti. Á sunnudag er 5. þáttur Silfurs Egils á þessum vetri, að honum meðtöldum hafa þá eftirtaldir í prófkjörum komið í þáttinn:

Anna Sigríður Guðnadóttir
Dögg Pálsdóttir
Ragnheiður Elín Árnadóttir
Þórhildur Þorleifsdóttir
Valgerður Bjarnadóttir
Ragnheiður Ríkharsdóttir
Steinunn Valdís Óskarsdóttir
Ingibjörg Sólrún Gísladóttir
Sæunn Stefánsdóttir
Bryndís Ísfold
Ásta Möller
Helga Vala Helgadóttir
Sigríður Andersen
Kristrún Heimisdóttir
Katrín Jakobsdóttir
Guðfinna Bjarnadóttir
Illugi Gunnarsson
Guðlaugur Þór Þórðarson
Gísli Tryggvason
Magnús Norðdahl
Glúmur Baldvinsson
Borgar Þór Einarsson
Paul Nikolov
Árni Páll Árnason
Guðmundur Steingrímsson
Bjarni Harðarson
Ellert Schram
Árni Johnsen
Eins og sjá má eru þetta fleiri konur en karlar, það hefur beinlínis verið meðvituð ákvörðun hjá mér. Ég hef líka heldur miðað við að hleypa í þáttinn frambjóðendum sem sitja ekki á þingi, sækjast eftir sæti fremur en þeim sem eru þar fyrir.

Með bestu kveðju
Egill Helgason

Hér er mitt bréf:

Sæll Egill.

Missti því miður af símtalinu þínu. Ég las pistilinn hennar Þórunnar og ég las pistilinn þinn. Skilaboðin hennar Þórunnar eru skýr. Hún tekur skýrt fram að það sé fjarri því að allir karlmenn séu ofbeldismenn - en skorar á alla karlmenn að hefja upp raust og mótmæla. Allir sæmilega læsir menn sjá hver skilaboðin eru enda fátt að misskilja í þessu: "Takið ykkur á , strákar! Hvort sem þið eruð 16, 46 eða 76 ára gamlir, skora ég á ykkur að mómæla ofbeldi gegn konum hvar sem þið hafið tækifæri til. Það er mikið í húfi fyrir ykkur sjálfa ekki síður en eiginkonur ykkar, mæður og dætur." Minni á í þessu samhengi að rannsóknir sýna að allt að þriðjungi íslenskra kvenna verður fyrir kynferðisofbeldi.

Þess vegna er pistillinn þinn eins ósanngjarn og hann getur verið þar sem þú snýrð út úr og gerir henni upp skoðanir - nokkrum dögum fyrir prófkjör. Ég ætla þér að teljast til sæmilegra læsra manna og tek því þínum pistli sem vísvitandi útúrsnúningum. Ef þú skoðar þau áhrif sem þinn pistill mun hafa þá er hann ekki til þess fallinn að styðja við málstað þeirra sem berjast gegn nauðgunum. Hann er hins vegar til þess fallinn að þagga niður í þeim og breiða út andúð gegn þeim hópi. Þú getur síðan spurt sjálfan þig að því hvaða hópi slíkt er í hag.

Baráttan gegn nauðgunum snýst um að koma ábyrgðinni þangað sem hún á heima - á gerendur. Hún snýst líka um að skoða hvað það er í samfélaginu sem gerir það að verkum að svona glæpir gerast og þrífast. Í því sambandi bendi ég þér á stórgóða grein Guðrúnar Margrétar "Af hverju nauðga karlar?" sem þú getur nálgast hér: http://www.kistan.is/efni.asp?n=2952&f=3&u=43

Það er mjög mikilvægt að karlar taki opinbera afstöðu gegn nauðgunum - og eins er það mikilvægt að karlar taki ekki afstöðu gegn þeim sem berjast gegn nauðgunum. Mér finnst mjög áhugavert að spá í af hverju í ósköpunum þú ert í svo mikilli vörn að þú stekkur upp þegar karlar eru hvattir til að mótmæla ofbeldi - er það ekki sjálfsagt mál að mótmæla? Getur líka íhugað að ástæðan fyrir því að svona margar konur eru að kalla eftir mótmælum karla eru vegna þess að opinberar raddir karla gegn ofbeldi eru svo fáar og svo lágar að þær heyrast varla. Þess vegna er synd og skömm að lesa þinn pistil - þú gætir gert svo miklu betur.

Kær kveðja
Katrín Anna
ps. búin að senda bréfið frá þér inn á póstlistann

Eftir þetta bréf fékk ég þetta frá honum:

VAR ÞETTA KOMIÐ INN Á PÓSTLISTANN? ÉG BAÐ ÞIG UM AÐ SETJA ÞETTA Á PÓSTLISTANN, MÉR FINNST ÞAÐ MIKILVÆGT. KV EGILL - og á eftir fylgdi sama bréfið og áður frá honum, þ.e. opinbera bréfið.

Ætli hann hafi vísvitandi öskrað eða bara óvart? Eins og sjá má er Egill ekki í uppáhaldi í dag. Vill einhver veðja um hvort ég poppi upp í pistli hjá honum sem source of all evil?

Egill Helga hvetur karla til að mótmæla ekki naugðunum

Þórunn Sveinbjarnardóttir skrifaði pistil um nauðganir þar sem hún hvetur karlmenn til að taka sig á og mótmæla nauðgunum. Hún segir:


"Karlar geta hins vegar ekki lengur setið hjá og látið konur einar um að mótmæla ofbeldinu. Sem betur fer hefur karlahópur Femínistafélagsins og Jafningjafræðslan gengið fram fyrir skjöldu og konfronterað karlana en meira þarf til.

Takið ykkur á , strákar! Hvort sem þið eruð 16, 46 eða 76 ára gamlir, skora ég á ykkur að mómæla ofbeldi gegn konum hvar sem þið hafið tækifæri til. Það er mikið í húfi fyrir ykkur sjálfa ekki síður en eiginkonur ykkar, mæður og dætur."

Þetta er meira en karlvinurinn mikli Egill Helgason þolir. Hann þolir reyndar ekki ofbeldi en svei Þórunni fyrir að hvetja karlmenn til að mótmæla ofbeldinu. Það er nú fulllangt gengið að mati Egils því honum koma þessi mál bara hreint ekki við. Egill er þar með ekki bara að halda sig við það að hleypa hér um bil eingöngu karlkyns frambjóðendum að í þáttinn sinn og hafa þannig áhrif á kynjahlutfall á þingi heldur fer hann fram fyrir skjöldu og reynir að draga úr fylgi við kvenkyns frambjóðanda. Ekki er heldur hægt að skilja pistil Egils þannig en sem hvatningu til karlmanna um að láta sig ofbeldismál engu varða - þetta er greinilega "kvennamál".

Hér eru orð Egils sjálfs:

"Þórunn Sveinbjarnardóttir skrifar á vef Samfylkingarinnar grein undir yfirskriftinni Takið ykkur á strákar. Hún beinir orðum sínum til okkar karlmanna - sem hóps - við verðum að taka okkur á varðandi nauðganir, segir hún.

Nú skil ég ekki alveg hvað þingkonan er að fara. Hvað á ég sammerkt með þeim mönnum sem nauðga annað en að ég er af sama kyni og þeir? Segjum nú að morðalda gangi yfir Reykjavík, myndi þá einhver hvetja mig til að "taka mig á"

Ég vil hafa skikkanlegt og friðsamlegt samfélag eins og flest fólk, karlar og konur. Ég þoli ekki ofbeldi. Ég beiti konur ekki ofbeldi. Og mér finnst hallærislegt að vera settur í sama flokk og ofbeldismenn, bara af því ég er karl."

Ok Egill - við náum skilaboðunum. Það er þinn réttur að halda áfram á sömu braut að draga úr þeim sem berjast gegn ofbeldi og skilja út á hvað málið gengur. Mundu bara að þar með ertu ekki hlutlaus heldur búinn að taka afstöðu.

Við vonum svo bara að aðrir karlmenn séu ekki svona viðkvæmir eins og Egill og þori að taka sig á og mótmæla ofbeldi!

Árin 628 á alþingi

Varð óvænt þess heiðurs aðnjótandi að minnst var á mig á Alþingi okkar Íslendinga í dag :) Því miður átti ég heiðurinn ekki skilið - en mér var eignað að hafa reiknað út að miðað við þann gír sem við erum í núna verður launajafnrétti fyrir sömu störf ekki komið á fyrr en eftir 628 ár. Það er atvinnu- og stjórnmálahópur Femínistafélagsins sem á heiðurinn af þessari tölu og kem ég því hér með á framfæri. Hef grun um að nafnið mitt blandist inn í þetta út af þessum pistli sem birtist í Viðskiptablaðinu 25. okt síðastliðinn:

628 ár í launajafnrétti
Þegar ég skrifa þennan pistil er eitt ár liðið frá Kvennafrídeginum 2005. Eitt ár frá því að 60.000 konur víðs vegar um landið lögðu niður vinnu kl. 14:08 og kröfðust þeirra sjálfsögðu mannréttinda að fá sömu laun og karlar fyrir sína vinnu. Eitt ár síðan ég stóð á Ingólfstorgi og hélt ræðu um hvað þyrfti að gera til að ná fram jafnrétti. Eitt ár frá því að ég var svo stressuð að ég rauk út úr húsi í óðagoti til að verða ekki of sein niður í bæ og skildi dyrnar eftir galopnar.

Hver græðir á launamun?
Baráttan fyrir launajafnrétti hefur varað í yfir 100 ár. Samt miðar okkur lítið miða áfram. Frá því 1994 hefur launamunur kynjanna minnkað úr 16% í 15,7%. Hverjum finnst þetta ásættanlegt? Miðað við tilvitnun í Hannes G. Sigurðsson, aðstoðarframkvæmdastjóra SA á forsíðu Morgunblaðsins 20. október virðast hann vera sáttur við núverandi stöðu og reynir sitt besta til að afneita staðreyndum. Ef hann er trúverðugur talsmaður atvinnurekenda má túlka það sem svo að atvinnurekendur séu þeir sem álíta sig vera að græða á launamun kynjanna. Allavega virðast þeir ekki tilbúnir til að gera neitt til að leiðrétta hann heldur eru alsælir með að komast upp með að brjóta lög á hverjum degi.

Ekki hægt að tala um háleit markmið
Árið 1961 fengu atvinnurekendur sex ára aðlögunartíma til að leiðrétta launamun kynjanna. Því miður hafa stjórnvöld ekki lagt mikið á sig til að tryggja að atvinnurekendur framfylgi þeim lögum. Í fyrra sendi þáverandi félagsmálaráðherra yfirmáta kurteist bréf til atvinnurekenda þar sem þeim var vinsamlega bent á að það væri vinsælt ef þeir myndu náðarsamlegast muna eftir jafnréttislögum og kannski íhuga að draga úr launamun kynjanna. Núverandi ráðherra jafnréttismála er það nýr í starfi að enn er hægt að binda vonir við að hann grípi til róttækra aðgerða. Hann virðist þó vera á því róli að semja við atvinnurekendur um að draga hægt og rólega úr launamun og semja þannig við þá um að áframhaldandi friðhelgi frá armi laganna. Í hvaða öðrum brotaflokki tíðkast það að semja við lögbrjótanna á þann hátt að gefa þeim formlegt leyfi til að halda áfram að brjóta lögin, bara örlítið minna?

Hægvirkari en snigillinn
Atvinnu- og stjórnmálahópur Femínistafélagsins reiknaði út að miðað við núverandi hraða við að minnka launamun kynjanna munu karlar og konur njóta sömu launa fyrir sömu störf eftir 628 ár. Þessum útreikningi fylgdi áskorun á atvinnurekendur að leiðrétta launamuninn. Konur hafa gert allt sem í þeirra valdi stendur til að ná fram sanngjörnum launum með sanngjörnum aðferðum. Konur hafa tekið kröfuna um aukna menntun alvarlega svo ekki er hægt að tala um að karlkynið sé betur menntað í dag. Konur hafa sótt ótal námskeið, beðið um launahækkanir og ítrekað sýnt kröfuna um að fá sanngjörn laun í verki. Sum stéttarfélögin hafa unnið að launajafnrétti kynjanna en þau virðast öll hafa valið mjúku leiðina. Auglýsingaherferðir, námskeið í hvernig á að bera sig að í atvinnuviðtölum og hvatning til kvenna um að biðja um launahækkun einu sinni á ári eru sýnilegustu leiðirnar.

Launaleynd eykur launamisrétti kynjanna
Á allt þetta er greinilega ekki hlustað og því miður hafa fæstar aðgerðir beinst gegn atvinnurekendum sjálfum, þrátt fyrir að lagalega skyldan hvíli á þeirra herðum og þeir hafi aðgang að öllum upplýsingum um laun kynjanna hjá sínum fyrirtækjum. Atvinnurekendur geta sótt upplýsingar og fræðslu til Jafnréttisstofu og eins er hægt að leita til Félagsvísindastofnunnar Háskóla Íslands og ráðgjafarfyrirtækja til að reikna út launamun. Atvinnurekendur virðast ekki vera áfjáðir í að styðja aðgerðir eða leiðir sem geta dregið úr launamun. Launaleynd er til dæmis viðtekin venja hér á landi og flestir atvinnurekendur sem ég hef heyrt frá vilja halda henni. Launamunur kynjanna er hins vegar meiri hjá fyrirtækjum þar sem launaleynd ríkir, eins og fram kom í nýafstaðinni könnun sem Félagsmálaráðuneytið lét gera. Þar segir:
“Flestir töldu að launaleynd ýtti undir mismunun en 75% svarenda í Gallupvagni töldu launaleynd hafa mikil áhrif á launamun kynjanna. Niðurstöður launakönnunarinnar benda til þess að heldur meiri munur sé á launum karla og kvenna þar sem launaleynd er fyrir hendi eftir að tekið hefur verið tillit til annarra þátta.” (bls. 11)

Komum í kapp
Spurningin er hversu mikið frumkvæði ætla atvinnurekendur að hafa til að leiðrétta launamuninn? Er verið að bíða eftir að konur fari í hart og fari einfaldlega í verkfall? Sjálf verð ég hlynntari verkfalli með hverri launakönnuninni sem birtist. Það er ekki ásættanlegt að bíða í 628 ár í viðbót eftir launajafnrétti. Það er búið að þrautreyna mjúku leiðirnar. Það er búið að höfða til sanngirni, það er búið að setja lög og konur hafa uppfyllt allar kröfur sem gerðar hafa verið á þær. Því miður efast ég um að samstaða náist um kvennaverkfall akkúrat í augnablikinu en ég held að það sé vel þess virði að koma hugmyndinni í loftið og sjá til hvort hún öðlast ekki meiri vinsældir með tímanum. Kannski er líka ágætt að fara í kapp. Hvort ætli komi á undan – kvennaverkfall eða aðgerðir atvinnurekenda sjálfra til að gerast löghlýðnir borgarar?

Í rétta skapinu

Er með hausverk og hann greinilega hefur þau áhrif á mig að ég er í skapi til að rífast. Nú er bara að velja rétta fightinginn.... ;)

Veit samt ekki hvað ég á að nenna að standa í miklu stappi á póstlistanum út af þeim "gjörningi" í LHÍ þegar þrír fullklæddir karlkynsnemendur á fyrsta ári tóku sig til og klipptu hár og skapahár af nakinni skólasystur hennar og enduðu svo með pompi og prakt á því að einn þeirra sprændi yfir hana. Rektor og aðrir sem málið er skylt vilja ekki tjá sig um málið!

Af frænkum og prófkjörum

Fór áðan inn í Íslendingabók til að athuga hvort hugsanlegt væri að 2 fyrirmyndarfemínistar væru frænkur mínar. Við uppgötvuðum nefnilega að við áttum sameiginlega frænku og því var smá von í gangi. Því miður þá eignaðist ég ekki 2 frábærar frænkur á einu bretti því við reyndumst ekki vera skyldari en Íslendingar svona almennt eru - þ.e. frá sautjánhundurð og súrkál. Ég hugga mig þó við að eiga þó aðra femínistafrænku og ákvað að stela smá af blogginu hennar í tilefni af prófkjörsúrslitum:

Ég tók upp vasareikninn minn um helgina og fór að reikna. Ekki fylgi
vinstriflokka á 19. öld eins og ég ætti að vera að gera skólalega séð heldur
gengi kvenna og karla í prófkjöri Sjálfstæðisflokksins í Rvk. um helgina.

7 karlar af þeim 11 sem buðu sig fram komust á topp 103 konur af þeim 7 sem buðu sig fram komust á topp 10Karlar sóttust að meðaltali eftir sæti nr. 4,4
Karlar komust að meðaltali í sæti nr.3,1Konur sóttust að meðaltali eftir sæti nr. 5,5.

Konur komust að meðaltali í sæti nr. 6,7.Svo má athuga hvaða lærdóm við getum dregið af þessu og gaukað að þeimkonum sem fara í prófkjör eftir 4 ár:

Til að fá jafn hlutfall karla og kvenna þurfa 11,6 konur að bjóða sig fram á móti 7,8 körlumKonurnar þyrftu að meðaltali að bjóða sig fram í 4. sæti en karlarnirí 7. sæti.

Muna það næst!

I've made up my mind...

Jæja. Ég hef alltaf verið á báðum áttum varðandi kynjakvóta en nú er ég búin að komast að afdráttarlausri niðurstöðu! Ég lít ennþá á kynjakvóta sem síðasta úrræði en eins og kynjakvóti er praktíseraður núna innan flokkana myndi ég frekar vilja sjá hann aflagðan. Af hverju? Jú, mér sýnist að kynjakvótinn í núverandi mynd sé að tryggja körlum áframhaldandi meirihluta á þingi. Ég heyrði smá brot úr Silfri Egils um helgina þar sem Einar Mar var í viðtali að tala um fylgi kynjanna við flokkana. Karlar styðja Sjálfstæðisflokkinn í meira mæli en konur og konur styðja frekar vinstri flokkana. Vinstri flokkarnir, þ.e. VG og Samfylkingin eru með nokkurs konar kynjakvóta í einhverri mynd. En... reyndin virðist sú að þar sem konur aðhyllast frekar þessa flokka er ofgnót af konum í framboði fyrir þessa flokka í sumum kjördæmum og á öðrum stöðum er kynjakvótinn ekki þannig að hann tryggi konum aðgang að þingi, sbr NV kjördæmið þar sem eingöngu er tryggt að bæði kyn séu í fyrstu 3 sætum listans - sem dugar skammt þegar konan sem situr á þingi hlýtur ekki kosningu nema í 3. sætið! Í öðrum flokkum gæti kynjakvótinn orðið til þess að mjög frambærilegar konur komist ekki að, þ.e. að þær þurfi að eftirláta sitt sæti til karla. Á meðan eru flokkar eins og Sjálfstæðisflokkurinn ekki með kynjakvóta og þar eru karlarnir kosnir í miklum meirihluta. Þannig leiðir kynjakvótinn í raun til þess að konur komast aldrei í jafna stöðu á þingi.

Sem sagt - mín niðurstaða er sú að ef við ætlum að hafa kynjakvóta þá verða þeir að gilda yfir alla flokka og þingið í heild, ekki einstaka lista þar sem konur eru í meirihluta eða svo fá þingsæti að hann dugar ekki til neins þar sem karlar eru hvort eð er í efsta sætinu - sem er kannski eina sætið sem nær kosningu inn á þing!

Haustþingið

Jæja.... ákvað af einhverri furðulegri ástæðu að ná mér í tveggja daga sjálfssköpuð veikindi og missa þar með af 2 merkisviðburðum sem mig langaði á. Sit núna og hlusta á beina útsendingu frá haustþingi Framtíðarlandsins. Þar er greinilega rífandi stemning :) Mig langar að vera þar en hlusta í staðinn á beina útsendingu frá þinginu. Getið kíkt á www.framtidarlandid.is til að sjá hvernig á að tengjast!

Ætlar þú að kjósa?

Prófkjörin eru að hefjast, vei, vei, vei. Ætlar þú að kjósa? Það var verið að benda mér á að svo gæti farið í Norð-vestur kjördæmi að engin kona kæmist á þing!!! Smá sjens að Samfylkingin komi konu inn en það er líka sjens að karlarnir fái það góða kosningu að þeir verði í 2 fyrstu sætunum - sem eru þau sæti sem eru nokkuð örugg inn á þing. Skilst að enn verri sögu sé að segja úr hinum flokkunum, að konur eigi bara ekki möguleika á þingsæti. Arg og garg - hvar er þetta helv#%"& lýðræði? Verst að ég get ekki kosið þar.

Annars er þetta búinn að vera skemmtilegur dagur. Fundurinn með handhöfum Bleiku steinanna var vel lukkaður. Sama marki brenndur og allir aðrir Bleiku steina fundir - það mættu fáir en fundurinn gríðargóður. Algjör synd að það láti ekki fleiri sjá sig því þessir fundir eru alltaf vel þess virði. Fór í Smáralindina áðan til að kaupa mér föt. Var gífurlega dugleg og fjárfesti í einu pari af skóm, kjól og gallabuxum! Sjaldan sem ég er svona dugleg enda fátt leiðinlegra en að versla föt... en gaman þegar það er búið.

Prófkjörsfundurinn í gær var líka vel lukkaður - og fámennur að sama skapi. Ætli þetta sé einkenni góðra funda? Eva María var einstaklega góð í að tala um fjölskyldu málin. Vona að það heyrist meira í henni með þau mál á opinberum vettvangi. Svo er alltaf hægt að velkjast um það hversu hlutlaus talskona Femínistafélagsins á að vera í að lýsa yfir stuðningi við einstaka frambjóðendur. Ég segi enn og aftur - ég er afskaplega þverpólitísk - en ég styð femínista í öllum flokkum og Bryndís er femínisti! Ég er reyndar ekki nógu vel að mér til að geta greint út and-femínistana. Eina sem ég er algjörlega viss um að er andfemínisti - og ég mun ekki kjósa - er Sigríður Andersen. Bendi öllum sem vilja mótmæla því að ég styðji ekki allar konur í framboði á grein eftir hana á www.tikin.is. Þó ég geri ekki endilega kröfu um að konur í framboði séu femínistar til að ég geti kosið þær - þá geri ég kröfu um að þær vinni ekki leynt og ljóst gegn jafnrétti kynjanna. En ég mun að sjálfsögðu ekki taka karl sem er jafnslæmur eða verri framyfir hana.

Þó ég styðji ekki Sigríði er ekki þar með sagt að hún eigi ekki flokkssystur sem gott er að kjósa. Ég t.d. ætla að kjósa Guðfinnu Bjarnadóttur, Ástu Möller og fleiri í hennar flokki. Sömuleiðis fannst mér gífurlega fínt að fá símtal frá manni á kosningaskrifstofu Daggar Pálsdóttur sem minnti mig á að kjósa hana - og á eftir því fylgdi "ert þú kannski konan sem var að brillera í Kastljósinu áðan?" Þetta kalla ég að taka eftir - og kunna að fiska atkvæði ;)

Bleikir steinar

Morgunverðarfundurinn með handhöfum bleika steinsins er í fyrramálið. Eins skrýtið og það nú er hafa fyrri fundir með handhöfunum verið frekar lítið sóttir. Samt hafa þetta alltaf verið rosalega góðir fundir sem ég hefði engan veginn viljað missa af. Nú sjáum við til hvernig þetta verður í fyrramálið! Endilega mættu ef þú hefur tök á. Staður og stund: kl. 8, föstudagur 27. sept, Blómasal Hótel Loftleiða. Kostar ekkert inn en svangir gestar geta keypt morgunmat á 1500!

Nú er ég að græja mig fyrir framboðsfundinn með Bryndísi. Fyrsti framboðsfundurinn minn! Gaman, gaman. Veit ekki alveg hvernig ég að koma því frá mér á 10 mín sem ég vil sjá gerast í jafnréttismálum.

Þó Femínistafélagið sé ekki með mikið af viðburðum í Femínisavikunni sem þarf að mæta á þá er ég búin að vera á fullu öll kvöld vikunnar. Kíkti á afmæli kynjafræðinnar á þriðjudaginn. Það var meiriháttar gaman. Missti því miður af flestum erindunum :( - sem ég frétti að hefðu verið ógisslega skemmtileg - en ég náði hinum frábæru tónlistaratriðum og að hitta alla skemmtilegu femínistana :) Í gær var það svo Kastljósið. Hringdu í mig kl. rúmlega 4 til að athuga hvort ég gæti ekki mætt til þeirra um kvöldið. Ég sagði auðvitað já - því konur mega ekki segja nei við viðtölum. Vinsamlegast leggið það á minnið og notið næst þegar þið heyrið einhvern verja skort á kvenkynsviðmælendum í fjölmiðlum á þeirri forsendu að konur séu ekki fáanlegar í viðtöl. Við segjum sko víst já - meira að segja þó fyrirvarinn sé stuttur. Það vildi mér til happs að ég er nýbúin að vera kenna í Inngangi að kynjafræði um kven- og karlímyndir í samtímamenningu plús að vera með erindi á Konunni. Þetta var því frekar ferskt í kollinum. Linkur á viðtalið er inn á Femínistavikuheimasíðunni (sjá hér fyrir neðan). Þar er líka linkur á viðtal við Steinunni og Hjálmar.

Ég ætlaði að setja með mynd með vísun á heimasíðuna sem staðalímyndahópur setti upp með kynjuðu fréttunum. En myndakerfið í blogger er greinilega í kaffi þessa stundina svo myndin verður að koma seinna. Linkurinn er www.stadalryni.blogspot.com. Mæli með henni - og fundinum í fyrramálið :)

Ég á framboðsfundi

Ok ég fór ekki í framboð en ég fæ samt að tala á framboðsfundi, sjá hér: http://www.bryndisisfold.com/

Ætla að tala eins og ég sé í framboði. Sjá hvernig fílingur það er ;)

Til hamingju með daginn

Þá er Femínistavikan formlega hafin :) Yes! Verð í bleiku skapi það sem eftir er vikunnar. Smellið á myndina til að skoða vikuna.

Búið að vera frekar mikið að gera og það skýrir fáar færslur undanfarið. Á eftir að blogga um hvernig var á Konunni á laugardaginn!!! Í stuttu máli þá verð ég að segja eins og er að ég er hálf klofin út af þessari sýningu. Markaðssetningin gekk allt of mikið út á tísku og förðun sýnist mér. Veit að það fældi fullt af konum frá, allavega hafa margar lýst því yfir við mig að þeim hafi litist afskaplega vel á kynninguna í byrjun en svo hafi þetta leiðst út í of mikla útlitsdýrkun. Ég get svo sem tekið undir það en... Ég fór þarna á laugardaginn þar sem ég var með erindið. Byrjaði á að mæta rétt fyrir 9 í útvarpsviðtal hjá Erlu á Rás 2. Við vorum 4 í viðtali. Auk mín var Aðalheiður hjá Kaffitár, Þorbjörg sem er með grunnreglurnar 10 og Selma sem var stílisti fyrir sýninguna. Þetta var meiriháttar gaman og ég hefði alveg getað setið með þeim í marga klukkutíma í viðbót að fjalla um hin og þessi málefni. En ég varð víst að drífa mig heim og græja mig fyrir erindið mitt. Það mættu um 20 á fyrirlesturinn minn. Mættu 40 á fyrirlesturinn á undan og eftir - sem voru báðir tengdir sjálfsstyrkingu. Ég fór á fyrirlesturinn sem var á eftir mínum. Missti reyndar af byrjuninni en var viðstödd seinni hlutann. Líkaði ágætlega það sem ég heyrði en varð samt sorgmædd yfir hversu margar konur þurfa á þessu að halda. Það er greinilegt að sífellt er verið að ráðast á sjálfsmynd kvenna í þessu samfélagi með tilheyrandi afleiðingum. Þess vegna borgar baráttan sig! Reyna að stöðva þetta brjálæði.

Stemningin á sýningunni var líka ágæt. Mér fannst gaman að kíkja á Heimilisiðnaðarskólann, sjá íslenska hönnun og svo fannst mér afskaplega krúttlegt fyrirtækið sem selur allt til brjóstsykursgerðar í gegnum netverslun. Hins vegar líkar mér ekki að aðgreina kynin alltaf hreint - en mér líkar kvennasamstaðan og andrúmsloftið sem skapast í góðra kvenna hópi. Jamm svona er þetta - eilíf togstreita. Mér skilst að sýningin eigi að verða að föstum viðburði og ég vona að næstu sýningar verði þverskurður af konum, þ.e. fjölbreyttari flóra.

Að lokum - er ekki kominn tími til að allar konur fari í langt verkfall og neiti að gera nokkurn skapaðan hlut þar til búið verður að útrýma launamun kynjanna? Mér finnst það...

Myrkrið er yndislegt

Ég væri til í svona myrkvun á höfuðborginni aftur fljótlega. Síðast voru engar stjörnur - sem var bömmer - en engu að síður var gott og friðsælt að fara út í myrkrið. Undanfarið hafa oft verið stjörnubjart og í hvert skipti hugsa ég "oh hvað það væri frábært ef allt væri slökkt núna." Síðast voru okkar nágrannar (og við auðvitað) dugleg að slökkva öll ljós.
Anyways - datt þetta bara sí svona í hug því ég er þreytt og vantar smá dekur. Held það sé ekki arfavitlaus hugmynd að skipta súkkulaðinu út sem dekri og setja stjörnurnar inn í staðinn.

Spennandi framundan

Á laugardaginn ætla ég að hætta mér inn á óþekkt svæði og spyrja hvenær kvenleikinn týndist á sýningunni Konan! Verður örugglega ógisslega gaman - þ.e.a.s. ef ég næ að skrifa erindið mitt fyrir laugardaginn ;)

Þann 24. hefst svo Femínistavika Femínistafélagasins. Vei. Byrjum á að hvetja allar konur til að biðja um launahækkun og alla atvinnurekendur að jafna launin.

Þann 29. er svo haustþing Framtíðarlandsins. Verður megaflott!

Annars er helst í fréttum að ég var fundarstjóri á kynningu á niðurstöðum úr rannsókn á klámnotkun unglinga. Margt áhugavert sem þar kom fram. Hefði samt gjarnan viljað hafa endað fundinn áður en spurningin um hvort klám gæti ekki dregið úr barnamisnotkun kom úr salnum. Ef einhver er í vafa þá er svarið nei.

Kæra dagbók

Sá í fréttum á RUV áðan að allir Bretar eru hvattir til að halda vefdagbók í dag. Ákvað að vera memm þó ég sé ekki bresk svo hér kemur fyrri partur dags.

Vaknaði við útvarpið á slaginu kl. 7. Náði nú samt að dorma í gegnum Morgunvaktina til rúmlega 8 en þá fór ég á fætur, fékk mér lýsi og drakk þennan dýrindis Smoothie sem Grétar gerði handa okkur. Gluggaði í Fréttablaðinu á meðan og sá að eina ferðina enn eru konur hér um bil fjarverandi af forsíðunni. Efst í vinstra horninu sést glitta í pínkulitla mynd af Sigríði Andersen sem segir að líkamsrækt sé lykillinn að velgengni. Ég vitlaus - hélt það væri menntun, gáfur, dugnaður, tengslanet, aðgangur að fjármagni og svo framvegis.... Ákvað í snarhasti að fjölmiðlar yrðu teknir fyrir í pistli dagsins, nánar tiltekið Fréttablaðið. Dundaði mér sem sagt í morgun við að telja og greina forsíðumyndir Fréttablaðsins síðustu viku. Náði að skila pistlinum rétt fyrir 2 en þá var ég búin að afreka að hella upp á kaffi, snara í mig hádegismat, spjalla í hálftíma við Betu kláru í símann og rölta um lóðina með bróðir hennar mömmu sem var svo vænn að lána mér laufryksuguna sína svo ég gæti gert tilraun til að fjarlægja steininguna af lóðinni. Framundan er svo kennsla í Hagnýtum jafnréttisfræðum hjá HÍ, ráðsfundur og halda áfram að undirbúa kennslu fyrir morgundaginn. Sé svo líka fram á að þurfa að redda nýrri mynd fyrir Konuna - en þar verð ég með erindið "Hvenær týndist kvenleikinn?" á laugardaginn. Myndin sem ég sendi er víst ekki í nógu góðum gæðum.

Eitt meiriháttar afrek það sem af er degi! Náði að skila 2 hugleiðingum fyrir dagbókina sem Salka ætlar að gefa út :)

Vona að það verði ekki fleira að frétta af mér í dag.

Ef ég væri gamblari...

Fjölmiðlar eru mér afar hugleiknir þessa dagana. Skilaði pistlinum í Viðskiptablaðið í hádeginu en hann fjallar einmitt um 100% karla sem álitsgjafa og fjarveru kvenna úr fjölmiðlum. Á póstlistanum eru síðan miklar umræður um Sunnudagskastljósið þar sem margir höfðu búist við að Eva María færi á kostum. Í staðinn hefur hún sýnt á sér mjög svo andlega gagnkynhneigða hlið og rætt við 5 karla og 1 konu, mörgum til mikilla vonbrigða. Ég játa að ég er svekkt því ég hlakkaði til að fá Evu Maríu aftur á skjáinn - en ekki undir þessum formerkjum. Miðað við þessa þróun held ég að það væri næstum óhætt að veðja á að næsti kvenkynsviðmælandinn verði fyrrverandi fegurðardrottningin sem var að skila af sér kórónunni í Póllandi!

Fréttir helgarinnar

Tvennt stórmerkilegt í Fréttablaðinu um helgina. Á laugardaginn var fjallað um "pole fitness" sem snýst um konur sem taka þátt í klámvæðinginni og eru óðar og uppvægar að gangast upp í því hlutverki að vera kynlífshjálpartæki fyrir karla. Það þykir víst efla sjálfstraustið til muna...

Á sunnudaginn var síðan yfirlit yfir helstu álitsgjafa þjóðarinnar. Þeir eru víst allir karlkyns. Verður einhver ennþá pissed þegar sagt er að hér ríkir karlaveldi?

ps. Hér er kvótið í mig um pole fitnessið:

Súludansiðnaðurinn byggir á hlutgervingu kvenna þar sem konur eru smættaðar niður í kynlífshjálpartæki sem karlar geta keypt sér aðgang að. Þessu hlutverki er síðan hampað í gegnum aðra miðla þannig að svo virðist sem það eftirsóknarverðasta sem konur hafi fram að færa sé að vera fáklæddar í eggjandi stellingum án nokkurra vitsmunalegra eiginleika. Með alla þessa pressu er ekki skrýtið að sumum konum finnist skemmtilegt eða spennandi að uppfylla hlutverkið og öðlast þannig samþykki sem eftirsóknarverðar verur. Við viljum jú öll vera dýrkuð og dáð. Vandamálið við súludans er hins vegar að hann byggir ekki á kynfrelsi og viðurkenningu á kynhvöt kvenna heldur þátttöku í kúgun sem heldur konum niðri á öllum sviðum. Ef konur vilja í raun og sann öðlast kynfrelsi þá er lausnin ekki fólgin í að vera þátttakendur í einum ljótasta iðnaði sem til er, iðnaði sem lítur á konuna sem söluvöru aðgengilega fyrir alla. Það eru til ótalmargar betri leiðir til að halda sér í formi og dansa sem felast ekki í að læra að bugta sig og beygja eins og undirgefnar og þægar konur.

Gaman og ekki gaman

Ég er ennþá undir áhrifum eftir Hittið á þriðjudaginn. Hrikalega var þetta gaman. Það var hrein unun að sitja út í sal og hlusta á þær Rúnu, Þorgerði, Kristínu, Gyðu og Steinunni viðra sínar skoðanir á stefnu, áherslum og aðgerðum. Hittið varð allt öðruvísi en ég og fleiri bjuggumst við - en ég held miklu skemmtilegra. Eins og svo oft áður eru engin einhlít svör eða ein uppskrift en svakalega tókst þeim að fá heilabúið til að synda af stað og spá og spekúlera í framtíðinni. Ef einhver heldur að baráttan sé leiðinleg - think again! Fátt er eins gefandi og spennandi og að brjóta heilann um hvað þarf til að fá þá veröld sem við viljum. Ég skrifaði allt samviskusamlega niður og nú er bara að vinna úr öllu þessu...

Svo er fleira gaman í gangi. Sóley er á landinu :) Veit ekki hvort ég næ að hitta hana eitthvað meira áður en hún fer út en ég er hvort sem er á leiðinni að heimsækja hana fljótlega... ætla að droppa við hjá henni á leiðinni heim frá Finnlandi.

Svo er líka sitthvað leiðinlegt í gangi. Nenni ekki að blogga um það :( Er samt orðin ansi heit fyrir breytingum á heilbrigðiskerfinu - en ekkert einkavæðingarkjaftæði samt. Það alversta sem við gætum gert er að einkavæða heilbrigðiskerfið.

Ertu búin að skrá þig?

Bríet 150 ára

Bríet Bjarnhéðinsdóttir átti 150 ára fæðingarafmæli í síðustu viku. Sem betur fer skellti ég mér á Bríetarþingið sem haldið var á föstudaginn. Það var hrikalega skemmtilegt og fróðlegt - fyrir utan að það vantaði hlé. Keypti bókinna Strá í hreiðrið sem fjallar um Bríeti. Er aðeins búin að glugga í bókina um helgina. Það er alveg magnað að lesa um æviskeið hennar og hvernig hún upplifði hlutina.
Bríet áttaði sig snemma á kynjamisrétti. Það sá hún bæði í því að stelpur fengu ekki að mennta sig í sama mæli og strákar og eins í verkaskiptingu á heimilinu. Þar sést glöggt að það voru ekki karlmennirnir sem unnu lengstan vinnudag - því þó þeir púluðu og strituðu allan liðlangan daginn þá gátu þeir komið heim og hvílt sig á kvöldin og á sunnudögum. En þá puðuðu stelpurnar líka. Þurftu til dæmis að draga af karlmönnunum stígvélin og sokkana.
Þar sem Bríet var mjög fróðleiksþyrst var hún dugleg að útvega sér bækur til að lesa. Hún kenndi í smá tíma - fyrir mun minni laun og meiri vinnuskyldi en karlmaðurinn sem var ráðinn á eftir henni í starfið. Okkur hefur miðað fram á við á mörgum þessum sviðum - sérstaklega hvað varðar lagalegt jafnrétti en það er merkilegt hvað við erum enn að glíma við mörg af sömu vandamálum, s.s. launamun og verkaskiptingu. Textar Bríetar eru sérlega skemmtilegir og sumt af því er hægt að nota í baráttunni enn þann dag í dag - óbreytt! Mér skilst að Kvennablaðið (sem Bríet gaf út) sé aðgengilegt á www.timarit.is - ætla að skoða það í nánustu framtíð.

Eins gott...

Í dag var mælt með að allir yrðu í svörtu í tilefni þess að byrjað var að hleypa vatni í Hálsalón. Í dag var líka fjallað um nauðgunartilraun í Big brother sem "kynlífsskandall". Síðan hvenær er nauðgun kynlíf? Í Fréttablaðinu í dag voru vændisauglýsingar (sem og aðra daga) og á Skjá 1 auglýsingar frá stað sem selur konur. Hvar er valfrelsið og jafnréttið? Eins sem virðist vera til staðar er bræðralagið. Ég mæli með að það verði lagt niður og systkynalag tekið upp í staðinn! Og by the way - það sáust engar stjörnur. Eins gott að ég var í svörtu í dag.

Ég verð að læra dönsku!!!!

Hvað gerir kona þegar hún kemst að því kl. rúmlega 6 að hópurinn sem hún ætlar að halda kynningu um Femínistafélagið á ensku fyrir er ekki sérlega sleipur í enskunni? Jú, hún hringir í karlmann til að bjarga sér!!!! Gísli talar ljómandi góða dönsku svo þetta reddaðist nú allt. Reyndar var móttakan í gær bara ansi skemmtileg. 15 Danir sem vinna að því að samþætta jafnréttissjónarmið á sínum vinnustað mættu galvösk á Hallveigarstaði. Þar var Þorbjörg Inga með kynningu á Hallveigarstöðum og KRFÍ, Gísli með kynningu á FÍ og Hrönn kynnti verkefnið Stöðvum barnaklám á netinu. Forsprakki Danana hélt síðan stutta kynningu á þeim og ástæðunni fyrir því að koma til Íslands. Rauðvín og ostar rann ljúflega ofan í gesti á meðan og á eftir voru fjörlegar umræður. Þess á milli barst röddin hans Ómars inn um gluggann því útifundurinn var á sama tíma. Ég vona að ég hafi náð að halda andlitinu þegar ein konan sagði við mig að það væri synd að þetta tvennt væri á sama tíma! Já, reyndar en það er líka gaman að hitta ykkur.... :) Sem það reyndar var. Þau voru líka ánægð með kvöldið. Voru ánægð með að hafa afslappað og óformlegt andrúmsloft en fá fullt af upplýsingum í leiðinni. Ég held þó að við hápunktur ferðarinnar hjá þeim hafi verið að fá að hitta frú Vigdísi - enda er hún ein af 3 góðum ástæðum fyrir því að þau völdu að koma til Íslands að kynna sér jafnréttisbaráttuna.

Göngum lengra - hættum við!

http://kjosa.is/gongum-lengra/

Ég vona að þið ætlið öll að mæta í gönguna. Ég verð að taka á móti dönskum hópi jafnréttisfulltrúa í kvöld svo ég get ekki verið dropi eða sandkorn í göngunni :( Væruð þið nokkuð til í að kippa með ykkur staðgengli fyrir mig??? :)

Vei....

Ég er komin með vinnuaðstöðu :)

Ofbeldi án refsingar

Fréttablaðið í dag - eftir yours truly:

Ofbeldi án refsingar

Björn Bjarnason dómsmálaráðherra hefur kynnt í ríkisstjórn frumvarp um breytingar á kynferðisbrotakafla hegningarlaga. Meðal breytinga er að refsiákvæði um að stunda vændi er afnumið og lagt er bann við að auglýsa vændi. Báðar breytingarnar eru spor í rétta átt en það vantar mikilvægasta skrefið sem er að gera kaup á vændi refsivert. Skoðanir fólks eru skiptar um hvaða leið er best að fara, hvort sem fólk er hlynnt vændi eða ekki. Því miður líta sumir enn svo á að vændi eigi að flokkast með frjálsum viðskiptum manna á milli en slík afstaða viðheldur völdum karlmanna yfir konum. Þau sem eru andsnúin vændi greinir líka á um leiðir en kvennahreyfingin hér á landi hefur sameinast um afdráttarlausa afstöðu, að fara sænsku leiðina.

Meirihluti þeirra sem eru seld í vændi og mansal eru konur en flestir kaupenda eru karlar. Kynjavinkillinn er skýr þar sem karlmönnum er í raun tryggður aðgangur að líkömum kvenna og þeirra karla sem lenda neðst í valdapíramídanum. Afleiðingar vændis eru svipaðar afleiðingum kynferðisofbeldis og skömmin og niðurlægingin er hvergi meiri en hjá þeim sem eru í vændi. Þessar manneskjur þarfnast félagslegra úrræða til að komast út úr erfiðum aðstæðum. Rétt eins og við refsum fólki ekki fyrir sjálfsmorðstilraunir eða aðrar sjálfsmeiðingar heldur réttum þeim hjálparhönd þurfum við koma eins fram við þau sem eru í vændi. Hvað varðar kaupendur er staðan allt önnur. Hver einasti kaupandi á að vita að hann er að skaða aðra manneskju og beita hana ofbeldi. Kaupandinn á að vita um háa tíðni kynferðisofbeldis í fortíð vændiskvenna, tenginguna við fíkniefni, neyð og mansal. Hann á einnig að vita að ef svo ólíklega vill til að hann lendi á hinni hamingjusömu hóru að þá tryggir hann með kaupunum að hamingjan endist ekki lengi þar sem afleiðingarnar verða á endanum eins og í öðru kynferðisofbeldi. Það er því með ólíkindum að samfélag sem kallar sinn samtíma upplýsingaöld nýtir ekki þá þekkingu sem til er með því að gera kaup á vændi refsivert.

Dramatísk framkvæmdasaga...

Ég er viss um að það er allsherjarsamsæri að eina hádegisviðal NFS í vikunni sem ekki er aðgengilegt á VefTV er viðtalið við yours truly þar sem vændi er viðfangsefnið... aha! Brot úr viðtalinu er hins vegar í kvöldfréttum á fimmtudaginn - sem önnur frétt reyndar - þvert á allar samsæriskenningar.

Vikan annars búin að vera fín. Ég á góða vini (eins og Erla) en á mánudaginn var ég að bruna upp Ártúnsbrekkuna klukkan hálf-átta þegar Betan hringir og býður mér á Pina Bausch, sem átti að byrja hálftíma seinna. Ég auðvitað þáði það og sá ekki eftir því. Sýningin var æðisleg og auðvitað mun skemmtilegra að hún er ádeila og inniheldur boðskap. Á efri árum kann ég mun betur að meta svoleiðis heldur en innihaldslausa skemmtun... Við komumst samt að þeirri niðurstöðu að sýningin hafi ekki verið eins róttæk og margir bjuggust við.

Svarta gólfinu var síðan bjargað í vikunni :) :) :) :) :) Mér til mikils léttis... Þar sem Valla Matt ætlar að hætta með Veggfóður er ég viss um að dyggir lesendur bloggsins kunna að meta ítarlegar lýsingar á framkvæmdum á mínu heimili. Björgunaraðgerðir fóru sem sagt svona fram:

Grétar fékk að ráða og hann vildi prófa bronsleiðina frekar en bæsleiðina... ég fjárfesti því í heilli túpu af bronslit fyrir svo mikið sem 940 kr. Þegar heim var komið var spenningurinn svo mikill að við skelltum okkur beint í að bera þetta á gólfið. Það var gert með pensli og myndast við að ná svona þurrburstunaráferð... Niðurstaðan sú að gólfið varð hálfblettótt og lofaði ekki góðu. Við komumst loks að þeirri niðurstöðu að prófa að setja bara bæsið ofan á þetta - og héldum því áfram að bletta gólfið.... og skiptum svo um skoðun. Sáum að þetta væri bara kolómögulegt og allt ónýtt :( Gripum því til þess drastíska ráðs að ætla að hreinsa þetta af gólfinu með terpentínu, myndast við að fjarlægja öll ummerki og fara mína leið (bæsið góða...). Ákváðum að fórna moppunni okkar í verkið og hófumst svo handa. Grétar hellti vænum slurk af terpentínu á gólfið og ég renndi moppunni yfir til að fjarlægja bronsið. En viti menn og konur - kom ekki bara þessa undurfallega áferð á bronsið :) Við kláruðum því allt gólfið svona - settum vænan slurk af bronsi - helltum terpentínu í næsta nágrenni og moppuðum yfir. Létum þorna yfir nótt og lökkuðum svo 2 umferðir með hálfmöttu lakki. Erum þvílíkt ánægð með gólfið. Það er algjört æði og við ætlum að öllum líkindum að leggja í sama pakka í andyrinu og upp stigann.

Eigum við?

Í staðinn fyrir að fara í framboð væri ég alveg til í að kaupa NFS. Hlýtur að vera hægt að fá stöðina á góðu verði núna... og einhver bankinn hlýtur að vera til í að lána nokkrum konum nokkra peninga. Einhver memm?

Vörusvik!!!

Ætli þau sem keyptu bókina Franskar konur fitna ekki megi skila henni núna?

Af mbl.is:
Tækni & vísindi AFP 19.9.2006 08:02
Þriðjungur Frakka of þungur

Franska þjóðin er að þyngjast og nú svo komið að tæplega þriðjungur þeirra er yfir kjörþyngd eða er að berjast við offitu, samkvæmt nýrri könnun sem unnin var fyrir frönsku heilbrigðisþjónustuna. Samkvæmt henni eru 19,8 milljónir Frakka, af 63 milljónum íbúa, yfir kjörþyngd og 5,9 milljónir eru offitusjúklingar. Hefur offitusjúklingum í Frakklandi fjölgað úr 2,3 milljónum í 5,9 milljónir á níu árum.
Samkvæmt könnuninni eru ákveðnir þjóðfélagshópar í meiri hættu og eru þeir sem eru í láglaunastörfum í mestri hættu.

Að sögn dr. Arnaud Basdevant, næringarfræðings við Parísar spítala, er sem allir aldurshópar séu í hættu og að offitusjúklingarnir verði alltaf yngri og yngri. Mun fleiri konur eru of feitar en karlar í Frakklandi.

Offita er vandamál víða um heim og lítur Alþjóða heilbrigðismálastofnunin (WHO)á offitu alþjóðlegt heilbrigðisvandamál.

Samkvæmt frönsku könnuninni þjáist einn af hverjum fimm íbúum Frakklands af offitu, sem eru með 34.800 evrur, 3,1 milljón króna, í árstekjur eða minna. Aftur á móti er einungis einn af hverjum tuttugu að glíma við offitu sem eru með 63.600 evrur í árslaun eða meira.

Svarta gólfið - ekki töff skiluru!

Við skötuhjúin sem lifum í stórkostlegri synd hér í Grafarholtinu vorum ótrúlega dugleg um helgina. Við sáum fram á það á laugardagsmorguninn að þurfa allavega 2 mánuði til að sortera allt geymsludraslið og koma því haganlega fyrir í bílskúrsgeymslunni. Ekki nóg með að við kláruðum að ganga frá öllu inn í geymslu á laugardaginn (nema dótinu sem á að koma upp - það þekur enn hálfan stigann...) þá kom bróðir hans Grétars líka í heimsókn og tengdi fyrir okkur símann og við náðum að mála fyrstu umferð á gólfið á megnið af rýminu niðri. Það hefði reyndar átt að þýða seinni umferð í gærkvöldi og þá hefði verið hægt að raða húsgögnum þar í lok vikunnar og hefja vinnu í nýrri vinnuaðstöðu nema... liturinn á gólfinu er alveg óvart næstum því svartur. Við erum því að leita nýrra leiða til að hressa upp á gólfið - þær hugmyndir sem eru í gangi eru:

1. Kaupa lakk og bæta út í það hálfþekjandi lit (hér um bil bæsi) og fá þannig líf og fjör í gólfið...
2. Kaupa brons málningu og bursta létt yfir gólfið (í stíl við handriðið) og lakka svo yfir það.

Hafið þið skoðun á málinu eða betri - ódýrar - hugmyndir???? Ef þið eruð með ógisslega flott gólf sem kostaði lítið að gera getið þið líka boðið mér í kaffi til að skoða dýrðina og stela hugmyndinni! :)

Sú yðar sem syndlaus er!

Erla á greinilega skemmtilega vini. Einn þeirra er kominn með ansi sniðuga hringingu á símann sinn - brot úr þessari ræðu hér. Mér fannst þetta svo fyndið að ég varð að setja þetta hér líka... Hver getur líka ekki verið sammála Gunnari!!

Ég er eiginlega komin á þá skoðun að ég þurfi að fá mér nýjan síma.

Enn meira af tölvuleikjum

Ok. Búin að lesa linkinn frá þér Spörri - ágætis grein. Ég fer samt ekki ofan af því að sumir tölvuleikir eru alls ekki barnaefni - og mér sýnist greinahöfundur alveg vera sammála mér í því þó hann geri sitt besta til að fegra ástandið þess á milli. Allavega skammast hann út í að meirihluti leikja sem bannaðir eru fyrir börn séu keypt af foreldrum (með eða án barna sinna).

Annars finnst mér rökin í kringum áhrif kláms og ofbeldisfullra tölvuleikja oft svipa saman. Þeir sem vilja afneita áhrifum benda oft á að ekki finnist bein orskök - afleiðing tengsl á milli. En þó tengslin séu ekki bein þá geta þau samt verið til staðar. Diana Russell útskýrir þetta vel í sinni kenningu - áhrifinum má líkja við t.d. reykingar og lungnakrabbamein. Það fá ekki allir reykingamenn lungnakrabbamein - en sumir fá krabbann sem afleiðing af reykingum. Það sama á við um klámið og ofbeldisfullu tölvuleikina. Hvorugt þarf að vera eini orsakavaldurinn - en sett saman með öðrum breytum þá hefur þetta skelfileg áhrif á suma. Ég held líka að við afneitum áhrifunum of mikið. Okkur finnst þægilegra að tala um að þetta hafi ekki áhrif því þá þarf heldur ekki að neita sér eða börnum eða öðrum um neitt... né díla við það heldur. En það eru nokkur atriði í greininni sem ég hnaut um. T.d. þetta:

If there is a consensus emerging around this research, it is that violent video
games may be one risk factor - when coupled with other more immediate,
real-world influences — which can contribute to anti-social behavior. But no
research has found that video games are a primary factor or that violent video
game play could turn an otherwise normal person into a killer.

Fyrri parturinn svo sem í lagi - en síðasta setningin er umdeild og alls ekki allir á sama máli og þessi gaur. Ég hef líka séð niðurstöður sem sýna aukna hörku í ofbeldi þar sem börn halda að hægt sé að kýla, sparka og gera guð má vita hvað án þess að átta sig á afleiðingunum og talað við fólk sem hefur unnið með börnum og séð þessi áhrif þar. Tölvuleikir (og sjónvarpsefni) er nefnilega oft á tíðum ekki að birta mynd af raunveruleikanum því lifandi persónur og tölvuleikjapersónur þola ofbeldi alls ekki jafnvel eða í sama mæli. Lifandi persónur eiga þar að auki bara eitt líf... Margt annað sem hann talar um stenst heldur ekki - tölvuleikjafíkn er t.d. búin að vera í umræðunni undanfarið og þar eru áhrifin á sósíal lífið neikvæð - enda ekki sami hluturinn að geta haft samskipti í gegnum tölvu og í eigin persónu.

En hvað um það. Öllu frelsi fylgir ábyrgð. Ég sé engan tilgang í að börn séu að leika sér að því að drepa mann og annan, nauðga konum og hoppa í blóðpollum. Það er enginn undirbúningur fyrir lífið fólginn í því - og mér finnst skrýtið þegar það er talað um það sem skaðlegt að börn séu ekki kynnt fyrir þessu á unga aldri... Það er margt skrýtið í kýrhausnum.

Það er leikur að lemja

Birtist áður í Viðskiptablaðinu þann 28. des 2005. Set þetta inn hér í tilefni atburða undanfarinna daga...

Það er leikur að lemja
Tjáningarfrelsið er einn af hornsteinum lýðræðisins og nauðsynlegt er að verja þennan rétt með kjafti og klóm. Stundum finnst mér þó rétturinn til tjáningarfrelsis vera misnotaður í annarlegum tilgangi. Nýlega bárust fréttir af úrskurði alríkisdómara í Bandaríkjunum sem kom í veg fyrir gildistöku laga sem bönnuðu sölu á tölvuleikjum sem innihalda gróft ofbeldi til barna í Kaliforníu. Bannið þykir hugsanlega stangast á við tjáningarfrelsið. Það voru samtök tölvuleikjaframleiðenda og verslunarmanna sem höfðuðu málið á grundvelli tjáningarfrelsinsins, samkvæmt frétt á mbl.is þann 23. desember.

Áhrif ofbeldisfullra tölvuleikja
Á heimasíðu SAFT, samtaka sem vinna að öruggri netnotkun barna og unglinga, er að finna samevrópskt flokkunarkerfi fyrir tölvuleiki. Flokkunarkerfinu er ætlað að auðvelda foreldrum og öðrum að átta sig á innihaldi tölvuleikja og hjálpa þeim þannig að velja réttu tölvuleikina fyrir börnin sín. Flokkunarkerfið er stutt af framleiðendum tölvuleikja og má sjá af merkingum fyrir hvaða aldurshópa leikurinn er ætlaður, hvort hann inniheldur ofbeldi, kynlíf, mismunun, gróft orðbragð, fíkniefni eða geti vakið ótta hjá ungum börnum.

Framtak sem þetta er af hinu góða. Rannsókn SAFT leiddi í ljós að um 40% foreldra á Íslandi hafa litla þekkingu á tölvuleikjum barna sinna. Jafnframt kom í ljós að börn eyða miklum tíma í tölvuleiki, mörg þeirra kaupa leiki sem ekki er ætlaður fyrir þeirra aldurshóp eða athuga ekki aldursmerkingar. Okkur vantar tilfinnanlega rannsóknir á áhrifum tölvuleikja á börn og unglinga en til eru nokkur dæmi um ofbeldisverk barna og unglinga sem talin eru eiga rætur sínar að rekja til ofbeldisfullra tölvuleikja. Einnig eru til rannsóknir sem sýna fram á að ítrekuð notkun á ofbeldisfullum tölvuleikjum getur leitt til árásagjarnra hugsana, tilfinninga og hegðunar. Það er því ansi kærulaust að ætla að allt það ofbeldi og mannfyrirlitning sem finnst í mörgum tölvuleikjum hafi ekki áhrif. Við sem manneskjur drekkum sífellt í okkur skilaboð úr umhverfinu og myndum okkur skoðanir og viðhorf út frá því. Einstaklingar sem ekki hafa náð fullorðinsaldri hafa ekki þroska til að meta öll þau skilaboð sem þau fá á eigin spýtur. Það er auðvelt að segja að foreldrar eigi einfaldlega að fylgjast með gerðum barna sinna og tala við þau um það sem fyrir augu ber en það er mun erfiðara í framkvæmd í okkar hraða þjóðfélagi.

Stjórnarskrárvarinn réttur til að meiða
Merkingar SAFT eru af hinu góða því þær miðla þekkingu en þær ganga skemur en tilraunin til lagasetningar í Kaliforníu þar sem leggja átti bann við sölu á tölvuleikjunum. Ég hallast að þeirri skoðun að báðar aðgerðir saman væru æskilegasta lausnin. Mér er lífsins ómögulegt að skilja hvernig bann á ofbeldisfullum tölvuleikjum til barna getur stangast á við tjáningarfrelsið. Á hvern hátt? Það er ekki verið að banna fyrirtækjum að hanna, framleiða eða selja ofbeldisfulla tölvuleiki. Frelsið til að tjá sig er því til staðar. Einungis er um að ræða bann við sölu á þessu efni til barna og unglinga, einstaklinga sem lagalega séð eru á ábyrgð foreldra og samfélags. Sama hvað fólki finnst um forsjárhyggju almennt þá er það hlutverk foreldra og samfélagsins að beita forsjárhyggju við uppeldi í þeim tilgangi að vernda börn og undirbúa þau fyrir að standa á eigin fótum sem fullorðnir einstaklingar. Að halda að börnum skaðlegum tölvuleikjum sem gera það að verkum að þau fá ranghugmyndir um hlutverk sitt í samfélaginu, hvernig koma á fram við annað fólk og hvað er rétt og rangt getur ekki átt að vera réttur sem varinn er af stjórnarskránni. Fyrirtæki sem framleiða og selja vörur í þeim eina tilgangi að græða peninga án nokkurrar samfélagslegrar ábyrgðar eða siðferðiskenndar eiga ekki að hafa óheftan aðgang að börnum og unglingum undir þeim formerkjum að þarna sé tjáningarfrelsið að verki. Samtök tölvuleikjaframleiðanda í Bandaríkjunum halda því fram að verið sé að grípa fram fyrir hendur foreldra með því að banna sölu leikja þeirra til barna. Þvert á móti styðja lögin við hlutverk foreldra sem uppalanda því með þeim geta börnin ekki farið á bak við foreldra sína og keypt leikina sjálf. Foreldrarnir geta eftir sem áður keypt leikina handa börnum sínum ef þeir kjósa svo.

Að verja skoðanir annarra fram í rauðan dauðann
Tölvuleikjaframleiðendur halda því fram að tölvuleikir séu tjáningarform, rétt eins og bækur, kvikmyndir og tónlist. Það er ekki rökrétt að halda því fram að tölvuleikir séu tjáningarleið en halda því fram á sama tíma að þeir hafi ekkert að segja. Þess vegna eigum við að kynna okkur hvað tölvuleikir segja við börn og unglinga og hafa skoðun á því. Það er til lítils að ætla að verja skoðanir annarra fram í rauðan dauðann en á sama tíma afsala sér réttinum til að hafa skoðun sjálfur.

Partý í Smáralindinni

Allur gærdagurinn fór í að taka backup af gögnunum mínum og defragmentera harða diskinn!! Var víst ekki vanþörf á því 38% fælanna voru fragmentaðir - en enduðu í 0% sem er akkúrat eins og það á að vera. :) Ég ætla rétt að vona að tölvan mín verði hraðvirkari eftir þetta. Hún var orðin svo hægvirk að ég var alvarlega farin að íhuga að henda henni á hauganna og fá mér nýja - sem ég hef engan veginn efni á.

Ég tók backup á geisladiska - hefur hingað til virkað fínt og ég hef ekki þurft nema 2 diska til að bakka allt upp. Nú notaði ég 5 diska og sleppti sumu - gögnin greinilega hrannast upp - veit einhver um ódýra og góða backup lausn fyrir heimatölvur?

********
Hann Magni "okkar" Ásgeirsson fær móttöku í Smáralindinni fyrir vel unnin störf í þágu þjóðarinnar. Það er eins gott að slíkt sé ekki einvörðungu frátekið fyrir fólk sem... - og nú megið þið botna sjálf ;)

Reykjanes rokkar

http://www.landvernd.is/page3.asp?ID=1757

Mannréttindanefnd stendur sig í stykkinu

Þá er mannréttindanefnd Reykjavíkurborgar búin að álykta þess efnis að Orkuveituauglýsingin brýtur gegn mannréttindastefnu Reykjavíkurborgar. Verð að hrósa mannréttindanefnd fyrir að standa undir nafni. :)

Ég skrifaði pistil á sínum tíma um málið. Hann er hér ef einhver vill rifja hann upp.

Viðbrögð kallsins frá Orkuveitunni við ályktun mannréttindanefndar voru frekar lame. "já en hann var að ryksuga og það voru 3 konur sem komu að auglýsingunni frá Orkuveitunni." Þetta ristir afskaplega grunnt og greinilegt að gaurinn er ekki að fatta þetta. Þess má geta að hugmyndin og útfærslan að auglýsingunni kom frá auglýsingastofunni en ekki frá konunum 3 hjá OR.

Pólitík

Svona stend ég í pólitík skv prófi sem ég tók...

Svona standa nokkrir leiðtogar heimsins... ég er nokkuð sátt við skoðanabræður mína!

Prófið er hér ef þú vilt prófa!

Rifrildi

Stundum dett ég í þá gryfju að rífast við fólk sem ég þekki ekki og veit að orðaskipti eru gjörsamlega tilgangslaus. Árangurinn er pirringur, tímasóun og ennþá meiri rígur. Skynsamlegt... eða hitt þó.
**********
Kannski ég ætti að taka áskorun Andreu og bjóða mig fram fyrir Sjálfstæðisflokkinn? Það væri örugglega gaman!