Tjáningarfrelsi

Það skal ekki bregðast að í hvert skipti sem málefni eins og t.d. GTA og fleira í þeim dúr ber á góma þá hrúgast inn fólk í athugasemdarkerfið, hér um bil tryllt af bræði - með persónulegt skítkast. Til upplýsinga fyrir þessa einstaklinga þá missir þetta algjörlega marks - ég tek ekki mark á einhverjum nafnlausum einstaklingum út í bæ sem kunna ekki að ræða málin og vita ekki um hvað tjáningarfrelsi snýst. Fólk sem virðir tjáningarfrelsi ræðst ekki að öðrum með kommentum eins og „ef ég mætti drepa einhvern myndi ég drepa þig“ eða upphrópunum um heimsku og annað þess háttar. Tjáningarfrelsi byggir á því að mega ræða skoðanir sínar - þar með talið ofbeldisfulla tölvuleiki eins og GTA. Ef fólk er ósammála því að leikinn megi ræða - þá um að gera að beita sér fyrir takmörkunum á tjáningarfrelsi - eða velja þá leið sem margir hafa valið hér - að sleppa því að ræða málin en fara þess í stað út í persónulegt og ómálefnalegt skítkast. Þetta er kallað þöggun - tilraun til þess að fá fólk til að hætta að tjá sig og er mjög svo andstætt ríkjandi hugmyndum um skoðanafrelsi og tjáningarfrelsi. Endurtekinn málflutningur í þessa veru flokkast líka sem andlegt ofbeldi - svona talandi um þetta GTA spilandi einstaklinga sem myndi aldrei detta í hug að gera nokkuð á annarra hlut...

Þau ykkar sem eruð að tapa ykkur í kommentakerfinu hér ættuð að vita það að svona ómálefnalegheit og skítkast eru í raun aðför að tjáningarfrelsi og skoðanafrelsi einstaklinga. Þau sem hafa þessi gildi í alvörunni í heiðri ræða skoðanir - og eru fær um að ræða málin á þeim nótum. Málflutningur eins og sá sem sést hér í kommentakerfinu er heldur ekki til þess fallinn að styrkja þau rök að tölvuleikir séu skaðlausir, nema síður sé.

Ódýr líkamsrækt í boði

Ódýr líkamsrækt í boði. Byggir á nýju en geysiárangursríku æði þar sem þátttakendur byggja upp þol og styrk með venjubundinni vinnu eins og garðvinnu og almennum heimilisstörfum. Bætir svefn og heilsu. Greiðsla skv samkomulagi. Blóm, runnar og pallaefni fyrirtaks greiðslumátar.

Fæ ekki líftryggingu

Búin að hafa það mjög gott undanfarna viku, takk fyrir. Fórum út úr bænum í helgina og nutum þess að slaka á og lesa um Foucault. Í morgun beið mín það „ánægjulega“ verkefni að tékka á ástæðu þess að okkur var hafnað um líftryggingu af okkar ástkæra tryggingarfyrirtæki - fyrirtækinu sem við erum búin að vera einstaklega trú og trygg - svo trygg að við pössum okkur sérstaklega á að lenda ekki í miklum tjónum. Í allri okkar tjónasögu er ein brotin framrúða og eitt minniháttar vatnstjón. Hins vegar teljumst við ekki nægjanlega góð til að fá líftryggingu. Ástæðan??? Jú, á umsóknareyðublaðinu er eftirfarandi spurning:

Eru foreldrar eða systkini með, eða hafa þau greinst með eftirtalda sjúkdóma fyrir 60 ára aldur: Hjarta- eða æðasjúkdóma, heilablóðfall, háan blóðþrýsting, sykursýki, nýrnasjúkdóma, krabbamein, MS, MND, parkinsonsjúkdóm eða alzheimersjúkdóm? (já, nei)
Ef já, skýrðu nánar

Nú teljum við það ekki vera í okkar verkahring að gefa upp sjúkrasögu annarra. Það er fráleitt að hafa ströng lög um persónuvernd og meðferð heilsufarslegra upplýsinga en leyfa síðan tryggingafélögum að krefja fólk um sjúkrasögu náinna ættingja. Við neituðum því að svara þessari spurningu og fengum synjun af þeirri ástæðu eingöngu. Ég á eftir að skoða þetta nánar en mér skilst að um síðustu áramót hafi lögunum verið breytt á þann hátt að þessir 3. aðilar þurfi nú að gefa samþykki fyrir upplýsingagjöfinni. Þau sem vilja fá líftryggingu, en vilja annaðhvort af prinsippástæðum ekki gefa upp sjúkrasögu 3. aðila eða ef 3. aðili neitar um samþykki, eru sem sagt úti í kuldanum varðandi líftryggingu.

Rök tryggingafélaganna sýnast mér vera tvenn:

1. Þau fá ekki endurtryggingu ef þessar upplýsingar eru ekki veittar.
2. Þau segja að fjölskyldusaga skipti máli varðandi áhættuþættina og þess vegna þurfi þau þessar upplýsingar. Ef fólk svarar spurninginni játandi getur það leitt til synjunnar eða aukaálags á iðgjaldið.

Mér er jafnframt tilkynnt að viðskiptasaga mín við tryggingafélagið skipti engu máli - umsækjendur eru metnir út frá sömu forsendum. Jafnréttið á að gilda. Gott og vel. Raunverulegt jafnrétti fælist í því að líftrygging sé öllum aðgengileg gegn sama iðgjaldi. Ef við eigum öll að sitja við sama borð þá skiptir heilsufarssaga, bæði þess sem tryggir sig og fjölskyldunnar, ekki minnsta máli. Það er jafnrétti í reynd. Beiðnin um upplýsingarnar byggir á því að hægt sé að mismuna fólki. Þar með sitja ekki allir við sama borð. Það er ranglæti.

Ef einhver skyldi ekki hafa tekið eftir því þá er ég alvarlega fúl út í tryggingabransann núna. Að neita fólki um tryggingu á grundvelli þess að vilja ekki gefa upp annarra manna sjúkrasögu finnst mér hreinlega skítlegt - og mér er slétt sama þó til sé lagaheimild sem heimili þetta. Mér finnst þetta einfaldlega rangt.

Nýir tölvuleikir á markað

Ku Klux Klan hefur sent frá sér nýjan tölvuleik. Í tölvuleiknum geta hvítir menn skemmt sér við að drepa svarta karlkyns þræla og nauðgað svörtum kvenkyns þrælum. Sömuleiðis hafa nýnasistar sent frá sér leik þar sem hægt er að smala gyðingum saman í útrýmingabúðir og pynda þá alls kyns vegu. Báðir leikirnir ku vera hin besta skemmtun og alls ekki til marks um fordóma, hatur og fyrirlitningu gagnvart ákveðnum þjóðfélagshópum - ekkert frekar en leikurinn Grand Theft Auto þar sem karlmenn geta skemmt sér við að murka lífið úr konum sér til skemmtunar.

Ku Klux Klan, nýnasistar og karlmenn segja jafnframt í sameiginlegri yfirlýsingu að við lifum á tímum þar sem fordómum og misrétti hefur verið útrýmt og mannréttindi og mannvirðing séu allsráðandi í þessum boring politically correct heimi.

Fortíðin er hér

Iss piss... Ég er viss um að Sigrúnu Stefáns munar ekkert um þennan 90 þúsund kall á mánuði sem Þórhallur Gunnars er með meira í laun en hún fyrir sama starf... Þetta er ekki nema 1.080.000 + einhver lífeyrissjóðsréttindi á ári... Þórhallur er nú fyrirvinna, for crying out loud...

Næsti forseti...?

Alveg afskaplega er ég ánægð með að Clinton skuli ætla að halda áfram í framboði. Að sama skapi fer það hrikalega í taugarnar á mér að henni skuli sífellt sagt að hún eigi að hætta keppni og að hún skuli ekki fá jafn mikið fé og Obama. Það þýðir að þau geta ekki keppt á jafningagrundvelli. Honum er sagt að halda áfram. Henni er sagt að hætta. Það er ausað í hann peningum. Hún fær mun minna - miklu minna.

Það er margt gagnrýnivert við „lýðræðið“ sem við búum við, eða réttara sagt, sem Bandaríkjamenn búa við. Það er ekkert lýðræðislegt við það að eingöngu forríkir einstaklingar, með rétt tengsl og af réttum ættum (og af réttu kyni, kynþætti, kynhneigð...) eigi möguleika á að verða forsetar Bandaríkjanna. Það er svo sannarlega ekki „land of the free“ í því samhengi. Sést vel á því að Bush jr náði kjöri. Eins hefði Hillary örugglega aldrei átt séns nema vegna þess að kallinn hennar var áður forseti. Engu að síður... gott að vita til þess að kona fái nú loksins að vera memm í framboðsslagnum...

ps. „skemmtilegasta“ samsæriskenningin er samt sú að nú fái konan og svarti karlmaðurinn að heyja baráttuna sín á milli svo það líti út fyrir að fólk af öðru kyni og öðrum kynþætti en hvítur karlmaður eigi sjens - en að svo muni nást sátt að lokum um að Al Gore bjóði fram! ;)

Hjólað í vinnuna

Í dag hefst átakið „Hjólað í vinnuna“. Þetta er ágætis átak og umhverfisvænt - hvetur allavega slatta af fólki til að hjóla. Veit samt ekki alveg hversu hrifin ég er af þessu keppniskonsepti - á það til að stuðla að of miklum hópþrýstingi - en ég læt það liggja á milli hluta. Bottom line - þá er ég hrifin af átakinu. Vonandi leiðir það líka til vitundarvakningar um að bæta hjólaleiðir. Það er til dæmis alls ekki auðvelt að hjóla úr Grafarholtinu og niður í bæ. Það þarf annaðhvort að taka stóran krók yfir í Árbæinn eða Grafarholtið til að komast greiða leið.

Grétar ætlar að hjóla! Mega mega duglegur. Kannski ég hjóli með honum af og til sem leið liggur niður í Háskóla. Erfitt fyrir mig að hjóla í vinnuna þegar ég er heima að læra...!

Þótt ég sé hrifin af átakinu þá er eitt sem stingur sérstaklega í augun. Aðalstyrktaraðili átaksins er Rio Tinto Alcan. Mér finnst það jaðra við dónaskap að vera aðalstyrktaraðili svona átaks. Umhverfismál eru mjög umdeild og ég held það sé með sanni hægt að segja að þjóðin skiptist nokkurn veginn í tvennt. Álfyrirtækin eiga ekki upp á pallborðið hjá mörgum umhverfisverndarsinnum og fleirum. Ástæðan ekki endilega að fólk vilji losna akkúrat við Alcan heldur sú græðgi sem álfyrirtækin sýna gagnvart landinu - vilja stækka, stækka, stækka - og byggja ný. Þangað til það er komin þjóðarsátt um að stoppa núna - ekki fleiri álver - þá ætti Alcan, að sjá sóma sinn í því að gefa fólki smá speis. Ekki troða sér inn alls staðar þar sem umhverfisverndarsinnar eru. Álfyrirtækin verða ekki umhverfisvænni þrátt fyrir að vera styrktaraðilar átaks eins og Hjólum í vinnuna. Þetta flokkast bara sem PR, tilraun til að kaupa sér velvild á sviði sem fyrirtækið er harkalega gagnrýnt fyrir. Ef Alcan vill í raun og veru vinna sér inn punkta fyrir umhverfisvernd væri nær að lýsa því yfir að það væri hætt við öll stækkunaráform. Láta bara gott heita.

Aðstandendur átaksins ættu líka að hafna styrktaraðilum eins og Rio Tinto Alcan. Þau ættu að vita sem er að þetta getur sett slæma ímynd á átakið og fælt fólk frá þátttöku - nú eða normaliserað áganginn á íslenska náttúru svo fólk verði sofandi fyrir því hvernig verið er að breyta Íslandi úr hreinu og fallegu landi í Detroit í einni svipan. Óafturkræfar skemmdir á landinu - mengun sem ekki fer í burtu þegar fólk rankar allt í einu við sér og vill fá landið sitt tilbaka.

Eftir sem áður er ég á því að það sé sniðugt að hjóla í vinnuna og hvíla einkabílinn. Kannski væri ráð að efna til hliðarátaks þar sem fólk hjólar - bara ekki í boði Rio Tinto Alcan??? Sá valmöguleiki er í öllu falli í boði eftir að keppninni lýkur!

Til hamingju með megrunarlausa daginn!

Unglingsstúlkur þekkja mörkin - perrarnir ekki

Eruð þið búin að lesa þessa frétt inn á visir.is?

Þar segir lögmaður prestsins Gunnars meðal annars:

"Mín skoðun er að unglingstúlkur eigi afskaplega erfitt með að gera sér grein fyrir hvar mörkin liggja í þessum efnum.

Hann bendir á umræðu um þessi mál undanfarin ár og segir að meðal femínista hafi verið haldið úti háværum umræðum samfara miklum áróðri sem einkennst hefur að miklu leyti að því að karlmenn kunni að vera úlfar í sauðgæru sýni þeir á einhvern hátt umhyggju eða áhuga á viðkomandi.

Umfjöllun fjölmiðla jafnt sem það viðhorf sem kvikmyndir túlka varpa afar mismunandi sýn á þessa hluti og út frá mismunandi viðmiði. Því sé afskaplega auðvelt fyrir áhrifagjarna og óharðnaða unglinga að mistúlka hlýju og umhyggju frá öðrum en þeim sem eru bundnir þeim fjölskylduböndum, " segir Sigurður Þ. Jónsson lögmaður séra Gunnars Björnssonar.

**
Það er sem sagt unglingsstúlkum og femínistum að kenna að presturinn situr í súpunni!

Ég er alltaf að komast að því betur og betur hversu sumir álíta sig eiga mikinn eignarétt yfir líkömum kvenna. Kannski áttar lögmaðurinn sig ekki á því að hann hljómar eins og reynslubolti í því að sýna unglingsstúlkum „hlýju og umhyggju“ sem þær kunna bara hreint ekki að meta - nema síður sé? Fjölmiðlar ættu að krefja hann skýringa á því af hverju hann telur það vera á valdsviði fullorðinna karlmanna að skilgreina hvað þeir mega ganga langt gagnvart líkömum unglingsstúlkna.

Svona viðhorf heyra því miður ekki til fortíðarinnar en þau sýna okkur hvað við eigum í raun mikið eftir í baráttunni. Vonandi hefur presturinn nægilega trú til að láta þennan lögfræðing róa og játa syndir sínar, lögfræðingurinn nógu mikinn sans til að draga ummæli sín til baka og kirkjan nógu mikið siðferðisþrek til að segja þessum karlpungum að þeir eigi að gjöra svo vel að virða sjálfsákvörðunarrétt kvenna yfir eigin líkama.

Með blátt blóð í æðum

Í Evrópu eru ennþá 10 konungsríki. Það vekur athygli að 3 þeirra tilheyra Norðurlöndunum. Konungsdæmi er ein mesta andstæða lýðræðis sem til er. Fólk annaðhvort fæðist eða giftist inn í hlutverkin drottning, kóngur, prinsessa og prins. Af hverju ætli haldið sé í þessa gömlu, kostnaðarsömu, ólýðræðislegu hefð?

Þetta eru löndin 10 sem enn eru með kóngafólk:

Belgía
Danmörk
Bretland
Holland
Liechtenstein
Luxemborg
Mónakó
Noregur
Spánn
Svíþjóð

Helv...

Fara þeir ekki til helvítis kristnu mennirnir sem ekki játa syndir sínar?

Heilsa óháð holdarfari

Megrunarlausi dagurinn er á morgun, 6. maí. Auðvitað ættu allir dagar að vera megrunarlausir, enda löngu búið að sýna fram á að megrun virkar ekki en getur hins vegar valdið ýmsum skaða. Allt of margir eru ennþá keyptir inn á þann pakka að megrun sé heilsubót. Þessum hugsunarhætti þarf að breyta því megrun gengur í raun út á að svipta líkamann nauðsynlegri næringu. Í megrun líður líkaminn skort (og sálin jafnvel líka) og það er engum hollt.

Þó maðurinn segist vera skynsemisvera þá er margt í þessum heimi langt í frá skynsamlegt. Eitt af því sem er ekki sérstaklega skynsamlegt er að halda að hægt sé að meta heilsu fólks út frá holdarfari. Í okkar samtíma er ímyndin sú að grannt fólk sé heilsuhraust en feitt fólk sé heilsulaust, nánast á grafarbrúninni ef marka má sumar fréttir. Grönnu fólki eru líka eignaðir ýmsir „jákvæðir“ eiginleikar eins og sjálfsstjórn á meðan feitu fólki er ætlað að það hafi bara engan stjórn á átinu.

Reyndin er sú að við erum margbreytileg í vaxtarlagi frá náttúrunnar hendi. Sumir eru stórir, aðir litlir og margir einhvers staðar þar á milli. Það á við hvort sem mælt er á lengdina eða breiddina. Því fyrr sem við áttum okkur á því og hættum að reyna að steypa öllum í sama mót, því betra.

Fitufordómar eru ornðir svo grasserandi í dag að hver arða af fitu er álitin óæskileg. Þannig er fólk byrjað í megrun þegar það er í raun skítlétt - á neðri mörkum „kjörþyngdar“ (hver bjó þennan mælikvarða til...!) eða jafnvel undir kjörþyngd. Lítil stúlkubörn, allt niður í 6, 7 ára gömul, eru byrjuð að tala um megrun. Þetta er ekki eðlilegt ástand og því þarf að bregðast við.

Stjórnvöld og opinberar stofnanir þurfa líka að bregðast við og hætta að tala um offitu og ofþyngd. Of er of gildishlaðið!!

Hver einasti dagur ætti að vera megrunarlaus. Við ættum hvorki að sukka og svína né líða skort. Hinn gullni meðalvegur er bestur í þessu eins og svo mörgu öðru. Markmiðið er heilsa óháð holdarfari.

Set hér að lokum pælingar af gamla blogginu mínu:

Hér eru tvær „pælingaspurningar“ í tilefni af bók sem ég er að klára að lesa um fitufordóma og kúgun sem feitar konur verða fyrir. Spurningarnar eru:

1. Er siðferðislega rangt að vilja vera mjó/r?

2. Er siðferðislega rangt að vilja vera feit/ur?

„Það breytist ekkert“

kl. 11:30 stundvíslega (ok - næstum því) bárum við Grétar skilti fyrir 1. maí gönguna inn á Kaffi Roma á Rauðarárstíg. Eldri kona á næsta borði leit á okkur vorkunnaraugum og sagði „eruð þið að fara í gönguna?“. Við játtum því. „Það þýðir ekki neitt“ sagði hún þá. „Þið eruð bara að sóa tímanum. Það breytist ekkert hvort sem er“. Við gerðum einhverja tilraun til að malda í móinn og hófumst svo handa við að rífa niður efni í bleika fána. Eftir smá stund hallaði konan sér yfir til okkar og spurði „fáið þið eitthvað borgað fyrir þetta?“. Við svöruðum því neitandi, allt væri þetta nú sjálfboðastarf. Hún var ekki par hrifin af því. Sagði sitt mottó að gera ekki neitt nema fá greiðslu fyrir. Annars væri fólk bara misnotað - og baráttan skilaði hvort eð er engu. Við bentum henni á að baráttan hefði nú skilað konum kosningaréttinum. Hún fussaði og sveiaði yfir því. „Hverju skiptir kosningaréttur?“ Sams konar fólk væri hvort sem er alltaf kosið á þing - týpan sem lofar og lofar öllu fögru en svíkur svo allt. „Það breytist ekkert sama hvað er gert“ var viðkvæðið.

Í ljós kom að konan átti langa sögu af verkalýðsbaráttu að baki. Fór í allar kröfugöngur, vann sjálfboðastarf og þar fram eftir götum, þar til börnin komust á legg. Þá hætti hún. Þetta skipti hvort sem er engu máli. Það breytist ekkert.

**
Stuttu síðar fór konan og ráð Femínistafélagsins birtist smátt og smátt. Við héldum ótrauð áfram við að búa til bleika fána. 200 stk., nánar tiltekið, sem við dreifðum í göngunni. Við trúum því að baráttan borgi sig - en við þurfum nú kannski að setja meira fútt í hana - fleiri þurfa að taka þátt - og sýna þarf samstöðu. Hjúkkurnar núna gott dæmi! (Frábærar - eru algjörlega að slá í gegn).

**
Gangan lukkaðist vel. Góð mæting, gott veður, slagorð, kröfuskilti, bleikir fánar - og alls konar fánar. Við stilltum okkur upp á Ingólfstorgi og settum okkur í stellingar til að hlusta á barátturæður. Verkalýðshreyfingin bauð fram 2 karla á mælendaskrá. Konan fékk að vera fundarstjóri (nú eða -stýra!?). Félag framhaldsskólanema bjargaði heiðri verkalýðshreyfingarinnar og sendi kvenkyns fulltrúa á staðinn.

En verkalýðshreyfingin sá um „skemmtiatriðin“. Á krepputímum þykir víst nauðsynlegt að ráða bara karlmenn í slík verk... gegn greiðslu, geri ég ráð fyrir. Strákarnir í Sprengjuhöllinni voru bráðskemmtilegir, eins og þeirra er von og vísa. Fullkomlega sátt við þá. Hins vegar sá verkalýðshreyfingin af einhverjum ástæðum til að hafa Gísla Einarsson fréttamann á dagskrá með „gamanmál“. Gísli þuldi upp hvern karlrembu„brandarann“ á fætur öðrum. Við konurnar (og jafnréttissinnuðu karlarnir!) sem stóðum á torginu máttum sitja undir „glensi“ um að hann krefðist þess að það væri ekki vaskað upp á hans heimili á meðan enski boltinn er í gangi - og að Ingólfur Arnarson hefði stofnað fyrsta súlustaðinn - og því væri viðeigandi að hafa fundinn á Ingólfstorgi. Þetta er bara brotabrot af karlrembunni. Verkalýðshreyfingin á að vera vandari að virðingu sinni. Þetta er henni til skammar. Og Gísla að sjálfsögðu líka. Það er ekki við hæfi að fá karlrembu til að flytja gamanmál á útifundi þar sem yfirskriftin er „Verjum kjörin“. Hverra kjör? Verkalýðshreyfingin á að baki sögu þar sem hagsmunamálum kvenna hefur verið hent þegar harðnar í ári. Má sem dæmi nefna árið 1926 þegar Dagsbrún fórnaði verkakonum. Laun þeirra voru lækkuð (já lækkuð - ekki hækkuð) um 11% til að halda mætti launum verkakarla óbreyttum.

Hvað er að gerast núna? Í fyrra fékk Verkalýðshreyfingin Baggalút á útifundinn til að syngja um „femínistabeljur sem eflaust súpa hveljur“. Í ár var það Gísli Einarsson að tala um súlustaði og uppvaskið.

Öllu gríni fylgir einhver alvara. Verkalýðshreyfingin þarf að taka sig margfalt á til að vinna gegn kynbundnum launamun og karlrembu. Þetta er ekki mál sem tekið hefur verið á af þeim myndugleika sem þarf. Ofan á það sendir forystan svona karlrembuskilaboð til félagsmanna á sjálfum baráttudegi verkalýðsins.

Er nema von að kona spyrji hvort hin karllæga verkalýðshreyfing sé hæf til að gæta að hagsmunum beggja kynja. Hver er baráttan? Svarið felst kannski í Internationalnum sem sunginn var í restina:

„Bræður! Fylkjum liði í dag“

Skiptir ekki máli

Ef þú átt 9 milljarða skiptir ekki máli þótt þú tapir 8 milljörðum. Hvað þá ef þú átt fleiri...

1. maí ganga

Fulltrúar úr ráði Femínistafélags Íslands verða á Hlemmi kl. 13 á morgun með veifur og borða til að vera með í göngunni. Gangan leggur af stað kl. 13:30 frá Hlemmi og gengur niður á Ingólfstorg þar sem dagskrá hefst kl. 14:10 og lýkur kl. 15:00. Ýmis verkalýðsfélög bjóða upp á kaffi eða mat, við hvetjum femínista til að taka þátt í göngunni, annað hvort með FÍ eða sínu verkalýðsfélagi. Mætum öll í bleiku!

kv,
Ráðið
***

Ávarp Femínistafélags Íslands, 1. maí 2008

Femínistafélag Íslands fagnaði fimm ára afmæli sínu fyrr á árinu. Frá upphafi hefur félagið látið til sín taka á 1. maí, baráttudegi verkalýðsins. Ekki er vanþörf á, því í gegnum tíðina hafa kvennastéttir verið verr launaðar og minna metnar en karlastéttir. Atvinnuþátttaka íslenskra kvenna er með því hæsta sem þekkist. Samt sem áður er mikill munur á atvinnutekjum karla og kvenna. Baráttan fyrir jöfnum launum hefur staðið yfir í meira en 100 ár á Íslandi. Lög um launajafnrétti voru samþykkt hér á landi árið 1961, atvinnurekendur fengu þá sex ára aðlögunartíma en enn sér varla högg á vatni. Nú á árinu gengu loksins í gegn lög sem veita konum aðgang að einu mikilvægasta tækinu í þessari baráttu, en það eru upplýsingar um laun annarra, en með nýjum jafnréttislögum hefur launafólk loks rétt til að tjá sig um kaup og kjör.

Ein stærsta kvennastéttin - kennarar - samdi í vikunni og vonandi verður staðið við þær forsendur samninganna að þessi hópur fái hlutfallslega hærri launahækkun en aðrir. Í núverandi efnahagsástandi er einnig ástæða til þess að fagna því að einungis er samið til eins árs. Aðrar kvennastéttir standa þó í baráttu og nauðsynlegt er að huga að því í kjarasamningum á árinu að vinna gegn launamun kynjanna hjá öllum stéttum.

Nú eru blikur á lofti í efnahagsmálum. Verðbólgan rýkur upp, kaupmáttur rýrnar og talað er um kreppu. Ljóst er að erfiðir tímar eru framundan í íslensku efnahagslífi og mörg heimili munu finna fyrir áhrifunum. Kynin hafa ekki setið við sama borð í gegnum efnhagslægðir og -hæðir í gegnum tíðina. Við upphaf efnahagslægðar er því ekki úr vegi að rifja upp söguna. Með því móti getum við lært af henni og verið vakandi til að láta sömu mistökin ekki henda aftur og aftur.

Gætum þess að nú verði ekki gripið til þess að fórna störfum kvenna og lífsgæðum þeirra fyrir „meiri“ hagsmuni. Tilraunir yfirvalda til að greiða konum smánarlegar upphæðir til að vera heima með börn eru leið til að koma konum út af vinnumarkaðnum, í lengri eða skemmri tíma. Tryggja skal atvinnuöryggi karla á kostnað kvenna - eins og endurspeglast í mótvægisaðgerðum ríkisstjórnarinnar. Á meðan leggur félagsmálaráðherra 116 milljónir í atvinnusköpun kvenna.

Konur krefjast jafnréttis og jafnrar stöðu - yfirvöld verða að veita þeim sama stuðning og atvinnuöryggi og körlum. Konur, stöndum saman í kjarabaráttunni á árinu og alltaf.

1. maí

Konum er oft sagt að launamunur kynjanna sé þeim sjálfum að kenna af þeirri ástæðu að þær sætta sig við lægri laun. Þær eigi einfaldlega að hætta ef þær eru ekki sáttar við kjörin. Sumir ganga svo langt að hvetja konur til að skipta hreinlega um náms- og starfsval. Jamm... þætti gaman að sjá þjóðfélag þar sem engir eru kennararnir, hjúkkurnar, leikskólakennarar, ófaglærðir leiðbeinendur, ræstingafólk, starfsfólk á dvalarheimilum, í fiskvinnslu, sjúkraliðar... og svo mætti lengi áfram telja.

Þjóðfélagið þarf á þessum stéttum að halda og á auðvitað að sjá sóma sinn í því að borga fyrir þau kvensæmandi laun!

Hins vegar má líka færa rök fyrir því að eins og samfélagið er uppbyggt þá ræður sanngirni og réttlæti ekki för. Það sem blívur er oft á tíðum harkan. Eina leiðin til að fá kvensæmandi laun er hugsanlega að láta hart mæta hörðu, fara í verkfall, hætta! Þegar skorturinn er orðinn aðkallandi þá hækka launin. Þannig er það frumskógarlögmálið sem ræður hver fær sæmandi laun og hver ekki... Það er ekki sanngirni, samvinna og réttlát umbun fyrir störf sem eru þjóðarbúinu nauðsynleg sem hefur úrslitaáhrifin. Hjúkrunarkonur og geislafræðingar láta reyna á þessa leið núna. Ég vona að þeim gangi vel og láti ekki undan fyrr en þær fá sínu framgengt. Vona líka að viðsemjendur fari ofan í kjölin á samfélagsgerðinni og íhugi alvarlega hvort þetta eigi alltaf að vera stemningin - að fólk neyðist til að vera í svona baráttu í staðinn fyrir að fá hreinlega sanngjörn laun.

1. maí á morgun. Tækifæri til að fara í kröfugöngu og krefjast sanngjarna launa. Þegar baráttan er veik er hætt við að launin verði lág! Koma svo!

ps. Endilega kíkið á pistilinn hennar Steinunnar Stefáns í Fréttablaðinu í dag. Frábær pistill.

Að bæta gráu ofan á svart

Ég er ein af þeim sem er ekki hrifin af aðgerðarleysi ríkisstjórnarinnar í efnahagsmálum þessa dagana. Tek undir með þeim sem hafa sagt að afnema þurfi stimpilgjöld hið fyrsta. Það er reyndar ekki rétt að tala um aðgerðarleysi... það flokkast alveg undir aðgerð að gefa út yfirlýsingu þess efnis að stimpilgjöld fyrir kaup á fyrstu íbúð verði afnumin í júlí og öll stimpilgjöld á kjörtímabilinu - eins og segir í stjórnarsáttmálanum ef mig minnir rétt. Með þessari „aðgerð“ er í raun verið að frysta fasteignamarkaðinn. Fólki munar um stimpilgjöldin. Þarna er verið að bæta gráu ofan á svart. Fasteignaverð mun fara lækkandi en með þessu þá er hætt við að hann bókstaflega hrynji.

Nú er líka að koma betur og betur í ljós hversu gallað okkar blessaða kerfi er. Nú situr í Davíð í Seðlabankanum að díla við afleiðingar af ákvörðunum sem hann tók og studdi sem forsætisráðherra. Burtséð frá því hversu hæfur eða óhæfur Davíð er, þá á þetta hreinlega ekki að líðast.

ps. óska svo kennurum til hamingju með nýgerða kjarasamninga :) Loksins.

Konur eru Japanir

Hlustaði á viðtalið við Kristínu Péturs og Höllu Tómas í Morgunvaktinni í morgun. Ég hef ofurtrú á þeim stöllum og held þær eigi eftir að breyta fjármálageiranum til hins betra. Það kom fram í viðtalinu að konur hugsa oft lengra fram í tímann en karlar, sem láta þá væntanlega skammtímasjónarmið frekar ráða för í ákvarðanatöku. Þegar ég var í viðskiptafræðinámi var andstæðuparið ekki karlar vs konur heldur Kanar vs Japanir. Þá var það Kaninn sem var í skammtímahugsuninni en Japanir í langtímahugsun.

Samkvæmt þessu ætti eðlishyggjufólk að komast að þeirri niðurstöðu að konur séu Japanir ;)

Okkar á milli frh

í gær var kona viðmælandi í þættinum Okkar á milli á Rás 1. Yes, kærkomið. Í dag var karlmaður.

Kynjahlutföllin eru því:

10 karlar - 83%
2 konur - 17%

2 góðar fréttir

Sú fyrri er að viðskiptavinir Íslandspósts hafa aftur öðlast frelsi til að afþakka fjölpóst. Fjölpóstur eru óumbeðnar, óumhverfisvænar auglýsingar sem geta kostað fyrirhöfn og draslsöfnun. Neytandinn lendir í að þurfa að greiða förgunarkostnað (eða sitja uppi með samviskubit yfir að endurvinna ekki) fyrir auglýsingar sem hann eða hún vildi ekki fá fyrir það fyrsta. Ég hringdi í þjónustuver Íslandspósts og komst að því að „þjónustan“, þ.e. að dreifa fjölpósti ekki á þau heimili sem segja „nei takk“ hefst 15. maí.

Hin góða fréttin er sú að Auður Capital hefur fengið starfsleyfi sem verðbréfafyrirtæki! Til hamingju Halla og Kristín! :)

studningskvedjur

Studningskvedjur til Láru Ómars!

Hvaða skammir?

Hvernig getur eftirfarandi flokkast undir skammir?

Af ruv.is:

Mótmæli: Ráðherra skammaður

Dómsmálaráðherra hafa borist skammarbréf eftir átök lögreglu á Suðurlandsvegi í gær. Þar er hann meðal annars hvattur til að svipta sig lífi. Björn Bjarnason, dómsmálaráðherra fjallar um átökin á bloggsíðu sinni.

Þar birtir hann m.a. þrjú bréf sem honum hafa borist vegna málsins.

Í því fyrsta segir meðal annars: "Ég vona af ollu minu hjarta að þú fáir banvænan og sársaukafullann sjúkdóm og lifir sem lengst í þjáningum, kannski gerir þér grein fyrir hversu mikil mannfýla þú ert undir þeim kringumstæðum, valdasjúkur ofbeldisseggur og geðsjúklingur". Undir skrifar Snorri.

Hilmar Bjarnason er ekki jafn harðorður en segir "sjáðu sóma þinn i því að reka þessa lögreglumenn sem gáfu skipun um þessar aðgerðir. EINIG SKALT ÞÚ SEGJA AF ÞÉR EMBÆTTI NÚ ÞEGAR!!!"

Þriðja bréfið er frá Arnóri Jónssyni,sem segir„Góðan dagin björn gerðu þjóðini greiða og skjótu þig svo við hin getum lifað lifinu þu ert ein stæðst hálfiti Islands".

Ráðherra vildi ekki tjá sig um málið þegar fréttastofa Sjónvarps hafði við hann samband síðdegis.

Þetta er einfaldlega ljótt og ofbeldisfullt - þ.e. úr bréfi 1 og 3. Læt nr 2 liggja á milli hluta. Svona hótanir og mannhatur hafa lítið að gera með skammir.

Forskot með fjölbreytileika

Langar að hvetja fólk til að mæta á þetta málþing í dag:

(af heimasíðu RIKK - www.rikk.hi.is)

Forskot með fjölbreytileika - málþing um jafnrétti

Föstudaginn 25. apríl standa jafnréttisnefnd Háskóla Íslands, jafnréttisnefnd Kennaraháskóla Íslands og Rannsóknastofa í kvenna- og kynjafræðum við Háskóla Íslands fyrir málþingi um jafnrétti í breiðum grundvelli, með yfirskriftinni „Forskot með fjölbreytileika“.

Fjallað verður um jafnréttismál frá ýmsum sjónarhornum, og er markmiðið að skapa samræðu milli fræðafólks í báðum skólum, nemenda, stjórnsýslu, og annarra sem áhuga hafa á jafnréttismálum. Það er stefna Háskóla Íslands að vera ávallt í fararbroddi í jafnréttismálum og liður í því er að skapa og viðhalda umræðu um kynja- og jafnréttismál með margvíslegum hætti.

Á málþinginu verður fjallað um ýmsar þær spurningar sem máli skipta fyrir menntastofnanir sem vilja leggja áherslu á jafnréttismál í sínu starfi og skapa samfélag fjölbreytileikans innan sinna veggja. Þetta verður gert með umræðum í vinnustofum, erindum og pallborðsumræðum.

Kristín Ingólfsdóttir rektor mun setja málþingið og síðan flytja erindi þau Jón Atli Benediktsson, prófessor í verkfræði og þróunarstjóri HÍ, Ólafur Páll Jónsson, lektor í heimspeki og formaður jafnréttisnefndar KHÍ, og Rannveig Traustadóttir, prófessor og forstöðumaður rannsóknaseturs í fötlunarfræðum. Fundarstjóri verður Brynhildur Flóvenz, lektor í lögfræði og formaður jafnréttisnefndar HÍ.

Fjórar vinnustofur, þar sem jafnréttismál verða rædd frá ýmsum hliðum, verða í boði og er allt áhugafólk um jafnréttismál hvatt til að taka þar þátt. Málþinginu lýkur með pallborðsumræðum, en í pallborði verða fulltrúar úr röðum fræðafólks, stjórnsýslu HÍ, nemenda og Jafnréttisstofu.

Málþingið verður í Öskju og hefst það kl. 13 og lýkur með móttöku kl. 17.

Dagská málþingsins (50kb)

Kynjavinklar á forsetaframboðinu

Þó ég hafi nú ekki náð að vaka langt fram á nótt til að sjá úrslitin í Pennsylvaníu vakti ég nógu lengi til að sjá fyrstu tölur. Lokaúrslitin voru nokkurn vegin þau sömu. Útgönguspár gáfu til kynna um 6 prósentustiga mun en tekið var fram að yfirleitt sýndu útgönguspár betri útkomu fyrir Obama heldur en lokaúrslit. Það gekk eftir í þetta sinn líka. Sem betur fer :) Ég vil að Hillary Clinton vinni.

Tvennt sem mér finnst mjög áberandi í þessari kosningabaráttu sem hefur kynjavinkil (þeir eru þó fleiri).

Hann á mun auðveldara með að afla fjár en hún. Þetta er algjörlega í takt við söguna - konur eiga ekki eins auðvelt aðgangi að fjármagni og karlar. Í þetta sinn ætti hún að hafa allt til alls. Hún er heimsþekkt, vel liðin, súpergáfuð, yfirmáta gott tengslanet... allur pakkinn. Hann kemur fram á sjónarsviðið nánast óskrifað blað - með sutta þingreynslu að baki. Samt mokar hann inn mun meira fé en hún. Get ekki varist þeirri hugsun að á bak við hans framboð standi hvítir karlar sem fóru í leit að karlkyns frambjóðanda sem ætti möguleika á að stöðva konuna hana Hillary... Sem er reyndar í takt við suman þann áróður sem hefur verið rekinn fyrir því að kjósa hann... sumir segja nefnilega að viðmiðið ætti að vera hvort hvítir karlar hati minna; svartann karl eða hvíta konu! Niðurstaðan úr þeim pælingum var að hvítu karlarnir myndu frekar sætta sig við karlmann „þótt hann væri svartur“ heldur en konu „þótt hún væri hvít“. Held að Jay Leno, sem er nú ekki í miklu uppáhaldi hjá mér sökum karlrembu, hafi nú samt sagt þetta best: „Það er löngu tímabært að hvítir karlar fái að ráða einhverju í þessu samfélagi!“

Hitt sem er áberandi er krafan um að Clinton hætti í framboði. Hún er að skemma fyrir flokknum, hún á ekkert að vera í þessari baráttu, Clinton farðu heim! Maðurinn hennar var samt ekki útnefndur fyrr en í júní og svo á örugglega við um marga fleiri karlkyns frambjóðendur sem fólk hefur ekki séð ástæðu til að hrekja úr baráttunni. Svo segir fólk að konur hafi minni áhuga á stjórnmálum en karlar... Konur mæta bara allt öðru viðmóti og viðbrögðum í stjórnmálum heldur en karlar. Þeim er líka beinlínis skipað að hætta... eins og sést glögglega á umræðunni í kringum Hillary.

Okkar á milli

Í morgun var aftur karlmaður viðmælandi í þættinum Okkar á milli. Kynjahlutfallið er því orðið 9 á móti 1, eða 90% kk og 10% kvk. Ég á þó von á að þetta breytist. Í gær sendi ég ábendingu á RUV og fékk svar tilbaka þar sem þakkað var fyrir ábendinguna og þessu mun verða kippt í liðinn. Þetta eru fagleg og góð viðbrögð - væri óskandi að sumir tækju þetta til fyrirmyndar. Nefni engin nöfn en fyrsti stafurinn byrjar á Egill Helgason... ;)

11%

Hlutfall kvenna í fjölmiðlum er stundum rætt, þá aðallega vegna þess hversu skakkt kynjahlutfallið er. Rannsóknir leiða oft í ljós að hlutur kvenna er um (og undir) þriðjungi. Rannsóknir hér á landi frá 1999, 2000 og 2005 leiddu í ljós kynjahlutfall sem var í kringum 25% í fréttum og fréttatengdu efni.

Við vöknum oft við Morgunvaktina á morgnanna. Frábær þáttur, vel að merkja! Ég hef nú ekki lagst yfir kynjahlutfallið í þeim þætti en á eftir Morgunvaktinni er þáttur sem heitir Okkar á milli. Undanfarið höfum við hjónaleysin tekið eftir því að það virðast bara vera karlar í þættinum. Síðasta fimmtudag var kona, Halla Helgadóttir, viðmælandi og við rákum upp stór augu, þetta var eitthvað svo út fyrir mynstrið.

Af einskærri forvitni ákvað ég að tékka á hvernig kynjahlutfallið er í þættinum. Á ruv.is er að finna hljóðupptökur fyrir síðustu 2 vikurnar. Þættirnir eru á dagskrá frá mánudegi - fimmtudags og alls eru 9 þættir aðgengilegir á netinu. Kynjahlutfallið er 8 karlar og 1 kona. 89% karlar og 11% konur. Þetta er ekki boðlegt af Ríkisútvarpinu - útvarpi ALLRA landsmanna. RUV hefur ákveðnum skyldum að gegna. Þessi umræða, þ.e.a.s. kynjavinkillinn, er ekki ný af nálinni. RUV ætti að vera löngu búið að koma sér upp úr þessu hjólfari.

Meira frelsi

Hér er pistillinn minn sem birtist í Viðskiptablaðinu í dag:

Meira frelsi
„Síminn er víðsýnn, kröftugur og metnaðarfullur leiðtogi. Traustur og skemmtilegur félagi sem er alltaf til staðar“. Þessa skilgreiningu á persónuleika Símans er að finna á heimasíðu fyrirtækisins, nánar tiltekið í Áttavitanum. Áttavitinn er leiðarvísir Símans til framtíðar. Starfsemi og ímynd Símans eiga að vera í samræmi við þá stefnu, framtíðarsýn og gildi sem skilgreind eru í Áttavitanum. Hann er í raun sá grunnur sem starfsemi Símans byggir á og eins og allir vita er árangursrík stefna ekki innantóm orð á pappír. Þess vegna er ágætt að máta reglulega saman orð og athafnir.

Samfélagsleg ábyrgð
Á mánudaginn tilkynnti Síminn, ásamt samtökunum Heimili og skóli, að fyrirtækið hefði ákveðið að bjóða viðskiptavinum sínum ókeypis netvörn. Markmiðið er að mæta kröfum viðskiptavina Símans um aukið öryggi barna á netinu en með netvörninni geta foreldrar lokað á síður sem innihalda t.d. klám eða fjárhættuspil. Haft er eftir Önnu Björk Bjarnadóttur, framkvæmdastjóra Einstaklingssviðs Símans í viðtali á visir.is að þannig ætli Síminn að leggja sitt af mörkum „til að verja börn og unglinga gegn sumu af því óæskilega efni sem er að finna á Netinu." Hún tiltekur að þetta sé hluti af samfélagslegri ábyrgð Símans. Samfélagsleg ábyrgð er einmitt skilgreind sem eitt af markmiðum Símans í Áttavitanum. Þessi aðgerð er því í samræmi við þau gildi sem Síminn hefur sett sér.

Ávanabindandi póker
Á heimasíðu Símans eru netleikir til sölu. Á forsíðunni eru fjórir tölvuleikir auglýstir og eru tveir þeirra um fjárhættuspil. Öðrum þeirra er lýst á ensku með orðunum „addictive and fun-filled Poker game.“ Við fyrstu sýn er ekki augljóst hvar leikirnir passa inn í Áttavitann en í miðju hans stendur „Síminn auðgar lífið“ og hugsanlega á það best við. Síðan er bara spurning hvort nýja netvörnin nái að verja unga fólkið fyrir netleikjunum sem eru til sölu hjá Símanum.

Markmiðið að koma aftan að fólki
Síminn er mest áberandi þessa dagana vegna nýrrar auglýsingar með Merzedes Club. Þar spranga um fáklæddar konur og massaðir karlmenn. Hlutverkin í takt við þau sem klámvæðingin úthlutar fólki. Í upphafi var lagið kynnt sem kynþokkafyllsta og dýrasta myndband sögunnar. Síðar kom í ljós að lagið er auglýsing Símans. Þessi aðferðarfræði hefur verið gagnrýnd fyrir að stangast hugsanlega á við siðareglur SÍA og lög um eftirlit með óréttmætum viðskiptaháttum og gagnsæi markaðarins en þar segir í 8. grein „ Auglýsingar skulu þannig úr garði gerðar að ekki leiki vafi á að um auglýsingar sé að ræða. Skulu þær skýrt aðgreindar frá öðru efni fjölmiðla.“ Auglýsingin hefur hlotið fjölmiðlaathygli og meðal annars birti visir.is viðtal við Jón Gnarr enn hann ku vera ábyrgur fyrir gerð auglýsingarinnar. Aðspurður um aðferðarfræðina segir Jón að auglýsingin sé á gráu svæði en þar finnist honum skemmtilegast að vera, heila málið sé að koma aftan að fólki. Í því samhengi er viðeigandi að rifja upp nýleg níðskrif Gillzeneggers, einnar aðalstjörnu auglýsingarinnar, um fjórar konur. Þar kallaði hann m.a. eina þingkonu portkonu og um aðra sagði hann að tími væri til kominn að fylla hana eins og hátíðarkalkún í þeim tilgangi að þagga niður í henni.

Áttavitinn er varla upp á punt
Nú má spyrja sig að því hvernig þetta passar við Áttavitann? Er þátttaka í klámvæðingunni og að koma aftan að fólki, svo orð Jóns Gnarr séu notuð, merki um grundvallargildin traust og heilindi? Þá má einnig máta auglýsingaherferðina við framtíðarsýn og persónuleika Símans en hann ætlar sér það hlutverk að leiða okkur inn í framtíðina. Spurningin sem viðskiptavinir Símans hljóta að velta fyrir sér er hvort að þetta sé sú leið sem víðsýnn, kröftugur og metnaðarfullur leiðtogi myndi velja til að koma okkur á samfélagslegan ábyrgan máta á leiðarenda?

Hóprunk hestamanna

Þetta birtist í 24stundum í dag, bls. 12.

Ææ

Verst að ég vissi ekki af hóprúnki hestamanna um daginn. Ég hefði getað mætt með tissjú!

Árið 1885

Árið 1885 birtist neðangreint í Fjallkonunni.

Verst er farið með vinnukonurnar, og er sú meðferð þrældómi líkust. Vinnukonum er ekki goldið nema að fjórða parti eða þriðjungi á við vinnumenn, og væri hægt að sanna með reikningi, hvé óréttlátt það er. Þó vinnukona sinni sömu vinnu og jafnmikið og karlmaðurinn er henni goldið meir en helmingi minna.
Hvergi hér á landi er jafn þrælslega farið með kvenfólk sem í Reykjavík. [...]
Þar eru kvenmenn hafðir í erfiðustu stritvinnu, er einungis er hraustustu karlmanna, og þó þær beri allan daginn sömu þyngd og karlmennirnir, eða beri börur á móti karlmönnum, og vinni því alveg jafnt og þeir, eru þeir, sem vinnuna borga, svo þrællyndir, að þeir gjalda kvenmanninum helmingi minna en karlmanninum.

Heimild: Íslandsdætur

Önnur gáfuð kona

Fréttablaðið í dag, bls. 18

Afrek helgarinnar

Ég er snillingur í að drepa pottablóm. Grétar verður að vera ábyrgur fyrir þessari fjárfestingu...!

Frá gáfaðri konu

We Are The Champions

Gamli skólinn minn vann meistaratitilinn í körfubolta í Bandaríkjunum! Vann síðast árið 1988 - tveim árum áður en ég hóf nám við skólann. Þegar ég var þar komst skólinn einu sinni í 4 liða úrslit og einu sinni í 8 liða úrslit - en tókst ekki að vinna... Tími til kominn á annan sigur. Frábært! Áfram Jayhawks!

„Straujaðu skyrtuna mína“

Merkilegt að fylgjast með hvað kosningabarátta Hillary Clintons og Obama er eins og klippt út úr skólabók... Sama þrástefið endalaust.

Allt í blóði

Horfði á lokaþátt Dexter í gær. Alltaf jafn hissa á Hunts auglýsingunni fyrir þáttinn. Boxari í rauðum stuttbuxum og með boxhanska hefur leikinn með höggi, síðan er það Hunts og Dexter - allt í blóði. Ég efast einhvern veginn um að mörgum Hunts neytendum finnist spennandi tilhugsun um að vera að gæða sér á blóði þegar tómatsósunni er skellt á diskinn. Velti fyrir mér hvaða markaðsfræði er þarna á bak við, tómatsósa = blóð, tómatsósa = blóð, tómatsósa = blóð. Hvað gerist þegar Hunts nær að festa þessa tengingu í sessi? Efast um að salan aukist...

Sjöund

Fór á sýninguna Sjöund í Þjóðminjasafni áðan. Þar leiða saman hesta sína snillingarnir Sóley Stefánsdóttir hönnuður og Gunnar Hersveinn rithöfundur. Sjöund samanstendur af ljóðum Gunnars og hönnun Sóleyjar. Útkoman er einstök - ljóðaumslag sem hægt er að senda í pósti auk þess sem ljóðið er til sem mynd sem hægt er að hengja upp á vegg í staðinn fyrir að loka inni í bók. Sýningin verður opin til 19. apríl í Þjóðminjasafninu. Endilega kíkið við...

Til hamingju Sóley og Gunnar :)

Hvaða leið virkar?

Er þetta rétta leiðin?

Hreint land - fagurt land. Óhreint land - ó...

Hjartað í mér sökk við hlustun á fréttir í morgun. Álver, álver, álver. Þrjú eru yfirdrifið nóg. Ísland er að breytast í Detroit. :´(

Þotuliðið

Ég er nú ekkert brjálæðislega hrifin af einkaþotum en ég á erfitt með að fordæma nýjasta þotuliðið. Þegar ég var tvítug fannst mér það kostur við starf ef því fylgdu ferðalög.Veit að margt fólk deilir þeirri skoðun með mér á þeim aldri. Hins vegar - þegar á reynir - þegar ferðalögin eru orðinn að veruleika og eru stór hluti af starfinu skipta ansi margir um skoðun. Mikil ferðalög í starfi eru ekki hluti af fríðindum heldur þvert á móti - endalaus þeytingur, að búa í ferðatösku, fjarvera frá fjölskyldu o.s.frv. Þar að auki tekur flug á líkamann. Þó svo að ég hafi varla fundið fyrir því að taka 3 vélar heim frá námi í Bandaríkjunum þá er staðan allt önnur í dag... mörgum árum seinna. Nú tekur flugið sinn toll. Þess vegna skil ég vel að fólk kjósi frekar að nota einkaþotu til að fljúga til Rúmeníu í staðinn fyrir að þurfa að dröslast þetta með millilendingu. Millilending tekur meira á en beint flug og let's face it - ef fólk er á endalausum þeytingi þá er allt í lagi að reyna að gera ferðalögin aðeins þægilegri. Svo framarlega sem einkaþotan verður ekki daglegt brauð og áfangastaðirnir eru í meira en eins flugs fjarlægð og hópurinn nægilega stór og og og... ef aðstæður eru þannig.

Virkjum fjármagn kvenna

Er búin að vera ágætlega dugleg undanfarið að kíkja á ráðstefnur og fundi. Í síðustu viku fór ég t.d. á Virkjum fjármagn kvenna og í hádeginu í dag kíkti ég á Ímark fund um rafrænar mælingar.

Virkjum fjármagn kvenna var samstarfsverkefni FKA, SA, Iðnaðarráðuneytisins og Viðskiptaráðuneytisins. Þátttaka kvenna var framúrskarandi góð - um 300 konur mættu. Karlarnir mættu taka sig á þó mér hafi skilist á Þórönnu Jónsdóttur fundarstýru að það væri um 600% aukning í þátttöku karla síðan ráðstefnan Virkjum kraft kvenna var haldin. Þá mættu 3 karlar - núna 18! Flestir höfðu þeir eitthvað hlutverk á ráðstefnunni þannig að enn vantar greinilega mikið upp á að karlar sýni þessum málaflokki lið - eða hreinlega þori að mæta á svona ráðstefnur. Erindin voru mjög fróðleg og skemmtileg. Miklar kjarnakonur þarna á ferð. Það kom mér ánægjulega á óvart að sjá að andrúmsloftið virðist vera að breytast í orðræðunni. Hingað til hefur verið algjört tabú fyrir konur sem náð hafa langt að segja að kyn skipti máli. Nú brá svo við að þrjár af aðalsprautunum fjölluðu um það og sögðu líka að þær vildu ekki lengur starfa samkvæmt leikreglum karla á þessum vettvangi.

Ég sá að Markaðurinn í Fréttablaðinu fjallaði um ráðstefnuna í blaði dagsins í dag. Athyglisvert er að skoða nálgunina þar. Það helsta sem er dregið út úr erindi Karin Forseke er að konur skorti sjálfstraust til að starfa í fjármálaheiminum. Þetta er algjörlega slitið úr samhengi og í raun slæm tilraun til að varpa ábyrgðinni yfir kynjaskekkjunni alfarið yfir á konur. Það kom nefnilega skýrt fram í máli Karin að þetta væri algjör karlaheimur þar sem leikreglurnar væru þeirra. Hún sagði líka að hún hefði bara spilað með og verið það naive að hún hafi ekki áttað sig á hversu miklu máli kyn skiptir fyrr en hún var komin á fimmtugsaldur. Staðan hjá henni í dag er þannig að hún skipti um starfsvettvang - af því að henni hugnaðist ekki þessi karlaleikur. Hún sagði líka að hún væri mikill femínisti... Svona getur fréttaflutningur skipt öllu máli - hvaða sögu er ákveðið að segja?

Í dag fór ég svo á Ímark fund um rafrænar mælingar. Það var áhugavert... nú gengur viss hópur af fólki um með lítil tæki sem mælir nákvæmlega áhorf á sjónvarp og hlustun á útvarp. Með þessari tækni er hægt að sjá í hversu miklum mæli horft er á auglýsingar en enn vantar mælingu á tengingu á áhorfi og kaupum. Slíkt er víst komið erlendis - þar sem fólk gengur um með mælitækið og skannar jafnframt inn allt sem það kaupir. Markaðsfræðingur í mér er afar hrifinn af þessari tækni - manneskjunni í mér óar hins vegar við öllum þessum persónuupplýsingum og að það sem fólk sækir í skuli hafa öll þessi áhrif því eins og Þórhallur Gunnarsson (sem fylgir með á „hreyfimyndinni“) hjá RUV sagði - þegar það voru dagbókarvikur þá jókst umfjöllun um klám og ofbeldi...

Hvað myndir þú gera?

Femínistar „lenda í því“ að standa frammi fyrir ótrúlegustu siðferðisspurningum. Hér er ein sem dæmi: Í gær var ég veislustýra á Afmælishitti Femínistafélagsins. Eins og mín er von og vísa var ég orðin alltof sein hérna heima en átti enn eftir að gera tvennt - og hafði bara tíma fyrir eitt. Spurningin sem ég þurfti að svara var þá:

Hvort á ég að borða kvöldmat eða mála mig?

Hvað myndir þú gera? Hvað heldurðu að ég hafi gert? ;)

Síðasti í afmæli

Jæja þá er 5 ára afmælið hér um bil búið. Endaði á frábærri aðgerð fyrir utan Héraðsdóm Reykjavíkur - afraksturinn má sjá á myndinni! Takið sérstaklega eftir klórbrúsanum vinstra megin við borðann! Mikið fjölmenni mætti fyrir utan Héraðsdóm enda er langskemmtilegast að fá aktivismann beint í æð :)

Hittið heppnaðist ljómandi vel. Fjöldinn allur af femínistum sem mættu og fullt af skemmtilegum erindum og umræðum - að ógleymdri stuttmyndinni Brjótum upp formið sem er tær snilld! Nánari fréttir af því verða inn á nýju heimasíðu Femínistafélagsins von bráðar...

1. apríl

Hvaða framtíð á Femínistafélag Íslands? 5 ára afmælishitt félagsins er tilvalinn vettvangur til að velta þessu fyrir sér.

Staður: Bertelstofa - Thorvaldsen bar
Stund: 1. apríl kl. 20:00

Dagskrá

Þorgerður Einarsdóttir - ein af ljósmæðrum félagsins, Íris Ellenberger - sigurvegari stuttmyndakeppninnar og Kristín Tómasdóttir hjá Femínísku fréttastofunni ávarpa afmælisbarnið.

Sýnd verður stuttmyndin „Brjótum upp formið“ sem vann stuttmyndakeppnina. Hugmyndabankinn verður á staðnum. Rifjuð verða upp atriði úr starfi félagsins í máli og myndum og að sjálfsögðu verða heitar umræður um hvert beri að stefna.

Leikkonurnar Vala Þórsdóttir og Kolbrún Erna Pétursdóttir flytja okkur femínísk skilaboð frá valinkunnum femínistum.

Veislustýra verður Katrín Anna Guðmundsdóttir fyrrum talskona félagsins.

Hittumst á Hittinu!

**
Og svo er komin ný heimasíða - www.feministinn.is :)

Betra - er mér sagt

Fór á árshátíð á Hótel Glymi um helgina. Það var ljómandi skemmtilegt. Hótelið kom skemmtilega á óvart. Mjög hlýlegt og fallegt. Okkur er sagt að við höfum fengið besta herbergið - hrútakofann #23 - og auðvitað trúum við því þó við höfum ekki séð hin herbergin! Þar er að finna aragrúa af listaverkum af hrútum - flottustu hrútalistaverk sem ég hef séð. Maturinn var góður, tónlistinn á eftir misgóð... ;) en ég held það sé óumdeilt að við stóðum okkur best í dansinum! Dönsuðum allavega lang mest.

Ég lærði eitt nýtt um helgina - málshátt. Eflaust myndi hann sóma sér vel í málsháttardagbók frá Odda. Hann hljómar svona:

„Betra er að vera undirgefinn en yfirgefinn“

Skemmtilegt ;)

Sama kúgunin

Það stóð til að halda fyrirlestur í tilefni af frönsku vikunni þar sem m.a. átti að ræða um hið alræmda slæðubann sumra Vesturlanda. Þegar umræða um slæðubann ber á góma hef ég ávallt komist að þeirri niðurstöðu að Vesturlandabúum sé ekki stætt á að banna slæður en leyfa á sama tíma alla þá kúgun sem Vestrænar konur búa við. Ég myndi vilja sjá fjallað um þetta samhliða. Að hylja konur eða berstrípa þær – þetta er sitthvor hliðin á sama peningnum. Sama kúgunin, mismunandi birtingarmynd. Í báðum tilfellum er verið að afmennska konuna – breyta henni í hlut. Ef annað er leyft – af hverju þá ekki bæði? Eða ef annað er bannað – af hverju ekki þá bæði? Mér finnst eitthvað skjóta svo skökku við að banna konu að hylja sig á almannafæri af því það er kúgun en leyfa sömu konu í nafni frelsis að liggja allsber upp á barborði á meðan karlmenn sleikja af henni salt og sítrónu og fiska tekílastaup upp úr naflanum á henni.

Mannhelt?

Las í fréttum ad gera ætti húsin á Hverfisgötu mannheld. Ég er ekki alveg med á hreinu í hvada tilgangi - nema til ad heimilislausir hafi ekki í thau hús ad venda. Vid thurfum alltaf ad gera rád fyrir ad einhverjir fúnkeri ekki í samfélagsgerdinni og geti ekki haldid heimili. Vid ættum ad sjá sóma okkar í thví ad thau hafi adgang ad mat, húsaskjóli og félagslegri adstod. Ég hreinlega skil ekki af hverju thetta er ekki til stadar. Úrrædin eru nefnilega ekki dýr...

Mr. Earl Guðmundsdóttir

Já það er gott að vera kona - þó ekki væri nema vegna þess að það er hér um bil ómögulegt að falla fyrir svikahröppum sem lofa þér háum arfi eftir látinn ættingja... einhvern sem hét Mr. Earl Guðmundsdóttir!

Fríblöð og fleira í þeim dúr

Mér skilst að það sé alveg gagnslaust að setja á miða á hurðina hjá sér þar sem á stendur:

Engin fríblöð takk.
Engan auglýsingapóst takk.
Enga reikninga takk.

Á þessu heimili safnast stórir haugar af óumbeðnu efni sem hægt er að nálgast á netinu ef fólk vill. Af hlýst fyrirhöfn, tilkostnaður og drasl. Ég er á því að þeir sem standa að dreifingu fríblaða eigi að bera kostnað af förgun þeirra. Einnig er aumt að á tímum frelsis *LOL* þá sé ekkert frelsi til að hafna!

Gleðilega páska

Vona að þið hafið það öll gott um páskana! :) Heyrumst og sjáumst hress og spræk eftir páska.

Andfemínismi - er í lagi að hata femínista?

Karlakvöld Karlahóps Femínistafélags Íslands

*Andfemínismi - er í lagi að hata femínista?*

Grand Rokk
18. mars
kl. 20:00

Í dag, þriðjudag, verður Karlahópur Femínistafélags Íslands með karlakvöld undir yfirskriftinni:

*Andfemínismi - er í lagi að hata femínista?*

Rætt verður hvernig umræðan í jafnréttismálum hefur þróast undanfarin ár. Fjallað verður um hvernig andúð gegn femínistum birtist í
jafnréttisumræðunni og hvernig hún virðist sífellt verða öfgafyllri í opinberri umræðu. Er þetta eitthvað nýtt? Er umræðan öfgafyllri? Og er allt í lagi að hata femínista? Einnig verður rætt um hvort að þetta sé meinlaust og hvort og þá hvernig eigi að bregðast við þessu.

Erindi flytja:
* Sóley Tómasdóttir varaborgarfulltrúi,
* Katrín Oddsdóttir sérfræðingur í mannréttindum og
* Atli Gíslason alþingismaður.

Fundarstýra er Magga Pé.

Karlakvöldið er hluti af 5 ára afmælisdagskrá Femínistafélags Íslands.

Verið velkomin!
Femínistafélag Íslands

Tími málshátta

Fólk sem segir að eitthvað sé ekki hægt, ætti ekki að trufla hina sem eru að framkvæma það. -Óþekktur höfundur

Dómskerfið

Dómurinn þar sem móður var gert að greiða um 10 m í skaðabætur vegna þess að dóttir hennar skellti hurð á kennara finnst mér afar furðulegt. Ég vona að málinu verði áfrýjað.

Ég er síst á því að bæturnar séu of háar - umræddur kennari var dæmd 25% öryrki út af atvikinu og á bæturnar algjörlega skilið. Hins vegar finnst mér tvennt furðulegt við dóminn:

1. Af hverju dekkar slysatrygging skólans ekki atvikið? Tjón sem kennarar verða fyrir í vinnu ætti að flokkast sem vinnuslys.
2. Fyrst foreldrar eru dregnir til ábyrgðar - Af hverju er móðirin ein ábyrg - á barnið ekki föður?

Ég held það væri ráð að rífa okkar dómskerfi í tætlur og byggja upp á nýtt á nútímalegum grunni.

Ég mæli ekki með...

Veikindum

Til hamingju með daginn! :)

Til hamingju með daginn! Í dag er Femínistafélag Íslands 5 ára - en mér líður næstum eins og það hafi verið stofnað í gær. Tíminn er svo fljótur að líða. Tilvist Femínistafélagsins umturnaði mínu lífi því þar fann ég loksins vettvang til að beita mér fyrir mínum hjartans málum. Takk fyrir það :)

Við ætlum að sjálfsögðu að halda upp á afmælið. Svona byrjum við - og svo kemur meira seinna. Afmælishátíðin stendur alveg til 1. apríl en þá var framhaldsstofnfundur félagsins haldinn.
***

Í kvöld, föstudag hefst afmælishátíð Femínistafélags Íslands með femínískri mínútumyndakeppni í Norræna húsinu. Katrín Anna Guðmundsdóttir fyrrverandi talskona Femínistafélagsins setur hátíðina og hefst hún kl. 20:30. Að lokinni kvikmyndasýningu verða skemmtiatriði og léttar veitingar.

Á þriðjudagskvöld (18. mars) verður karlahópur Femínistafélagsins með dagskrá á Grand rokk undir yfirskriftinni "Andfemínismi: Er í lagi að hata femínista?". Það hefst kl. 20.00,

Hvað er vændi?

Hvað er verið að selja í vændi? Er það aðgangur að líkömum kvenna, kynlíf eða eitthvað allt annað? Ég get ekki kvittað upp á verið sé að selja aðgang að líkömum kvenna eingöngu. Líkami og sál verða aldrei aðskilin. Sálin verður ekki eftir heima á meðan líkaminn er í vændinu. Ég á í sömu vandræðum með kynlífstenginguna. Vændi snýst ekki um að stunda kynlíf með einstaklingum sem fólki langar til að stunda kynlíf með heldur þvert á móti. Vændi snýst um að stunda kynlíf með einstaklingum sem fólki langar ekki til að stunda kynlíf með - þess vegna kemur greiðslan inn í myndina. Þegar einn einstaklingur kaupir sér kynferðislegan aðgang að annarri manneskju sem ekki langar til að stunda kynlíf með honum - hvað flokkast það þá sem? Mín niðurstaða er sú að vændi er í raun sala á kynferðisofbeldi, það er verið að selja nauðgun. Afleiðingarnar eru einmitt svipaðar og í öðru kynferðisofbeldi.

Veröld sem ég vil

Ef þú veist ekki hvert þú ert að fara gætir þú endað einhvers staðar allt annars staðar. Það skiptir máli að hafa framtíðarsýn og vita hvert beri að stefna. Þetta er það sem ég vil:

Siðmenntað samfélag
Jafnrétti
Frelsi

Vændi samræmist engu af þessu. Þess vegna mun ég alltaf berjast gegn vændi með kjafti og klóm. Það samræmist ekki þeim mannlegu gildum sem við viljum tileinka okkur. Það er ekki flóknara en það!

Afsakið á meðan ég æli

Útvarpsstjóri er karlmaður.
Ritstjóri Kastljóssins er karlmaður.
Aðstoðarritstjóri Kastljóssins er karlmaður.

Enginn þeirra flokkast sem femínisti. Ætti þá að koma á óvart að tveim dögum eftir alþjóðlegan baráttudag kvenna draga þeir upp hamingjusömu hóruna til að réttlæta vændi? Nei, kannski ætti það ekki að koma á óvart en það fær samt magann í mér til að snúast á hvolf. Um helgina opnuðu danskir karlmenn heimasíðu til að berjast gegn vændi. Kastljós körlunum finnst meiri gæði falin í því að markaðssetja sölu kvenna. Og já - spyrillinn var karlmaður líka. Greinilegt að hann er ekki heldur femínisti, spurningarnar voru slíkar. Af hverju var ekki spurt út í ofbeldið sem vitað er að vændiskonur verða fyrir í miklum mæli? Af hverju var ekki spurt í hversu hátt hlutfall karla sem kaupa sér konur eru giftir menn? Af hverju ekki að spyrja hana út í hversu fjölskylduvænt vændi er í raun og veru? Neibb, ekki orði á það minnst. Rétt aðeins tæpt á mansali, en þar við sat. Hamingjusama vændiskonan var nú samt ekki hamingjusamari en það að hún vildi ekki koma fram undir nafni og ekki í mynd - barnanna sinna vegna. Hún fullyrti líka að enginn af hennar aðstandendum kæmi að vændissölunni - hún væri í þessu sjálfsstætt. Samt byrjaði hún á þessu sem leik, gift konan. Kom maðurinn hennar þar hvergi nærri? Ákvað hún það alveg upp á eigin spýtur? Hún sagði líka að femínistar hefðu ekki fyrir því að spyrja vændiskonurnar sjálfar hvað þeim finndist. Það er einfaldlega rangt og hér á Íslandi er meira að segja einn sem gerði rannsókn sína í Danmörku - og tók þá viðtöl við fjölmargar danskar vændiskonur. Þeirra saga var ekki sú sama og sögð var í Kastljósinu í kvöld en auðvitað voru strákarnir í Kastljósinu ekki að skoða það. Já, það er margt sem ekki passar en sárast af öllu er að sjá herferð sumra fyrir því að konur gangi kaupum og sölum eins og hver annar búfénaður, nú eða þrælar í gamla daga. Kastljóssmenn setur niður við þetta. Stórlega. Mér finnst þeir í sama flokki og þeir sem réttlættu þrælahald hér til forna. Þetta er ekki veröld sem ég vil og mér blöskrar að ég skuli í alvöru verða að sætta mig við að vera neydd til að borga afnotagjöld fyrir svona kvennakúgun.

Spurning. Ef hægt er að finna sáttan þræl - er þá þrælahald réttlætanlegt?

Hrósið fær

Manuela Ósk fyrir að tala opinberlega um afleiðingar konusýninga. Ég hef lengi beðið eftir því að einhver fegurðardrottninganna rjúfi þögnina sem umlykur þessa hlið á keppninni. Mantran um styrkingu sjálfsmyndar er endurtekin í sífellu en fáar þora að tjá sig um neikvæðu afleiðingar þess að vera metnar eftir útlitinu. Nú hefur Manúel Ósk rofið þögnina og óskandi að fleiri fylgi í kjölfarið og standi með henni. Konusýningar hafa þó ekki eingöngu áhrif á þátttakendur heldur líka á samfélagið - og hvernig konur og stúlkur eru metnar - bæði af konum og körlum, stúlkum og drengjum. Slagorðið sem rauðsokkurnar birtust með þann 1. maí 1970 „manneskja ekki markaðsvara“ er í fullu gildi.

8. mars

Ég fór á fundinn sem Utanríkisráðuneytið og Háskóli Íslands héldu sameiginlega í hádeginu í gær. Það var alveg hreint ágætis fundur. Þar var meðal gesta utanríkisráðherra Líberíu - Olubanke King-Akerele. Það var mjög gaman að hlusta á hana og ég hefði gjarnan viljað heyra meira frá henni og þeirra baráttu. Ingibjörg Sólrún Gísladóttir flutti einnig mjög gott erindi. Hún fjallaði m.a. um að það er öðruvísi að vera á fundi þar sem eru bara konur eða fundi þar sem meirihlutinn er karlar og síðan kannski örfáar konur. Hún nefnid fund hennar, Olubanke og Ellen Johnson-Sirleaf, forseta Liberíu sem dæmi. Myndin hér til vinstri er einmitt frá þeim fundi og er birt í Framkvæmdaáætlun utanríkisráðuneytisins um áætlun 1325 - sem má nálgast hér. Kristín Ingólfsdóttir rektor og Joanne Sandler, aðalframkvæmdastýra UNIFEM í New York voru líka góðar. Samstaða kvenna var þemað... og að konur geta breytt heiminum með baráttunni. Tek undir það!!! :) Að sjálfsögðu. Ég hikstaði nú samt aðeins þegar Joanne Sandler kynnti samstarfssamning UNIFEM og Avon - sérstaklega eftir að ég skoðaði heimasíðu Avon og sá þar UNIFEM armbandið selt undir auglýsingu um „Reshape, repair and recontour your eyes“... passar eitthvað svo illa við kvennabaráttu að segja konum á sama tíma að þær séu svo stórkostlega gallaðar að þær þurfi að kaupa krem til að breyta sér... annars séu þær hreinlega ekki nógu góðar fyrir mannlegt samfélag!

En anyways (varð bara að létta þessu af mér), fundurinn var góður og Margrét Pálmadóttir sló aldeilis í gegn þegar hún mætti með þrjá kóra í restina og hífði stemninguna rækilega upp. Mér skilst að Olubanke hafi hrifist svo af að hún vilji ólm að Margrét komi til Líberíu á næsta ári en þar er verið að skipuleggja magnaðan fund fyrir 8. mars 2009 (ef einhver skyldi vilja fara - nótera hjá sér!). Myndin hér til hægri er einmitt af Margréti og hluta af kórnum. Lengst til vinstri sést glitta í Olubanke og Ingibjörgu Sólrúnu. Því miður tók ég ekki þátt í meiru af dagskránni í gær en á föstudaginn fór ég í opið hús hjá Stígamótum og það var yndislegt. Fyrir utan að þar fékk ég heitt kakó og vöfflur þá er eitthvað svo gott að koma í Stígamót. Í húsinu hvílir kraftur og orka allra þeirra kvenna sem dag hvern berjast gegn alvarlegustu og verstu glæpum sem framdir eru gegn konum - en ná samt að halda sönsum í gegnum þetta allt og virkja kraftinn til góðra verka. Hjá þeim fékk ég Zontarósina - sem seld er til styrktar Stígamótum svo þær geti fært þjónustu sína í auknum mæli út á landsbyggðina.

Þó 8. mars sé liðinn heldur baráttan áfram. Einn dagur dugar víst ekki til og af nógu er að taka. Beta er búin að blogga heilmikið um heimilisofbeldi undanfarna daga og við þurfum að bretta upp ermarnar og gera eitthvað í þessu. Okkur vantar réttarkerfi sem dugar - það er ekki nóg að lögin séu til á pappír (þó það sé nauðsynlegt og ósköp gott!). Lögunum þarf líka að framfylgja, brotamenn þurfa að fá dóma og dómarnir þurfa að vera í samræmi við brotin. Best af öllu væri þó að fá brotin burt!

Við lifum á tímum mesta þrælahalds í sögunni

Nútímamaðurinn stærir sig af stöðugri framþróun, siðmenntuðu samfélagi og auknum gáfum umfram forfeðurna. Ekkert af þessu stenst nánari skoðun, en er kannski skiljanlegt viðhorf sbr við það að manneskjan hefur ríka þörf fyrir að upplifa sig góða, skynsama og siðmenntaða. Gallinn er sá að manneskjan hefur að sama skapi til að réttlæta allt sem ekki fellur undir þessi skilyrði og snúa því einhvern veginn upp í að uppfylla skilyrðin. Þannig verður ofbeldisfullt, gróft klám þar sem konur eru niðurlægðar, beittar ofbeldi og kallaðar hórur og druslur bara merki um kynlífsfantasíur karla... :-| og algjörlega er litið fram hjá öllu sem heitir valdbeiting og kúgun.

Í dag kemur út bók um þrælahald nútímans. Á meðan okkar samtími hristir hausinn yfir þrælahaldi forfeðranna og afgreiðir forfeðurna á þeirri forsendu að þeir hafi hreinlega ekki vitað betur - ekki búnir að taka þessum siðferðislegu stökkbreytingum sem sumir virðast halda að hafi átt sér genetískt stað í kringum 1980 á gjörvöllu mannkyninu... err... meina á vesturlöndunum! Í bókinni er áætlað að fjöldi þræla í dag sé í kringum 27 milljónir, sem þýðir hreinlega að við lifum á tímum mesta þrælahalds í sögunni. Reyndar er erfitt að áætla nákvæmar tölur en þær áætlanir sem ég hef séð eru frá 12 milljónum og upp í 27 milljónir. En viti menn (og konur). Maðurinn hefur ótrúlegan hæfileika til að líta fram hjá þessu öllu og réttlæta. Maðurinn heldur fast í fullyrðingar um framþróun, siðmenntun og auknar gáfur en er samt engu betur í stakk búinn til að berjast gegn þessu en forfeðurnir. Hér á landi eru t.d. eintómar réttlætingar í kringum mansal og margir sem trúa því í alvörunni að Ísland sé eina landið í heiminum þar sem þrælahalda viðgengst ekki! Í alvöru!

Ég veit að það verður hlegið að okkur í sögubókum framtíðarinnar. Við verðum kynslóðin sem hafði nánast allt - tæknina, olíuna, samgöngumátann, peningana, nægan mat til að fæða allan heiminn - en við erum jafnframt þau sem erum á hellisbúastiginu varðandi hvernig á að umgangast allar þessar breytingar sem hafa orðið á lífskjörum mannkynsins. Þar af leiðandi erum við á álíka siðferðislegu stigi og hellisbúinn... við vitum hreinlega ekki betur! Eða þykjumst allavega ekki vita betur - það er svo auðvelt að snúa grænu hliðinni upp.

„Konurnar heim“

Dagur B. Eggertsson hitti naglann á höfuðið með því að gefa fyrirhuguðum heimgreiðslum nafnið „konurnar heim“. Ég hef áður skrifað um að svona greiðslur eru ekkert annað en handaflsaðgerð til að koma konunum inn á heimilin - með greiðslum sem er langt undir lágmarkslaunum. Stjórnvöld eiga ekkert með slík afskipti. Svona greiðslur eiga sér heiti í femínismanum. Þær eru kallaðar mömmugildra, eða mommy trap upp á enskuna.

Í opinberri orðræðu eru alls kyns aðgerðir til að stuðla að jafnrétti slegnar út af borðinu á þeirri forsendu að þetta eigi nú bara allt að koma af sjálfu sér, eða að sagt sé að konur þurfi nú enga aðstoð, forgjöf eða hvað þetta er nú allt kallað. Sömu stjórnvöld víla ekki fyrir sér handaflsaðgerð eins og þá að greiða konum smánarlegar greiðslur til að vera heima í stað þess að veita þá grundvallarþjónustu sem vitað er að er nauðsynleg til að bæði kyn eigi möguleika á að vera úti á vinnumarkaði - og vera fjárhagslega sjálfstæð. Smánargreiðsla sem er vel undir lágmarkslaunum er ekki til þess fallin að stuðla að fjárhagslegu sjálfstæðu, auk þess sem hún hefur hamlandi áhrif á möguleika og stöðu á vinnumarkaði.

Nú munu örugglega einhverjir segja að greiðslurnar séu ekki kynbundnar, séu jafnt fyrir konur og karla. Já, í orði en ekki á borði. Reynslan hefur sýnt okkur að það eru konurnar sem fara inn á heimilin, ekki feðurnir. Fyrirvinnuhugtakið er svo nátengt karlmennskuímyndinni á meðan móðurímyndin er nátengd kvenímyndinni. Það er ekki um jafnræði að ræða í pressu varðandi kynhlutverk. Auk þess er staða á vinnumarkaði skekkt - karlar eru með hærri laun og því finnst mörgum lógískt að aðilinn sem er með lægri laun verði heima...

Launaður vinnutími karla er lengri en launaður vinnutími kvenna. Ef stjórnvöld vilja beita handaflsaðgerðum væri nær að aðgerðirnar miðuðu að því að stytta launaðan vinnutíma karla og stuðla að því að þeir axli aukna ábyrgð á heimilisstörfum. Aðgerðin „pabbarnir heim“ væri því mun nærtækari aðgerð í jafnréttisátt heldur en aðgerðin „konurnar heim“ - sem er ekkert annað en bakslag og framlag stjórnvalda til áframhaldandi misréttis.

ps. læt fylgja með mynd úr amerískri aðgerð!

You - only bitter

Maskaraauglysingin frá L'oreal med Penelope Cruz í adalhlutverki var bönnud í einhverju útlandinu. Man ekki hvada landi, en einhverju skrytnu sem leyfir ekki ad notud séu fölsk augnahár til ad ljúga til um áhrif hins auglysta naskara! Já greinilega til skrytin lönd! Vid erum nú ekki svona pikkí hér og fáum thví ad njóta thess ad sjá Penelope blakta augnhárunum fölsku og segja okkur med hinum fallega spænska hreim "It's you - only bitter"

Bleikfjöll

Litla þriggja ára frænka mín var á leið í Bláfjöll um helgina. Þegar hún komst að því hvert ferðinni var heitið þverneitaði hún og sagðist ekki ætla í nein Bláfjöll. Hún ætlaði í Bleikfjöll. Og þangað fór hún!

Fiðrildavikan hafin

Í dag hefst fiðrildavika UNIFEM. Fiðrildavikan er til styrktar baráttu gegn kynferðislegu ofbeldi. Sjá allt um málið á www.unifem.is - endilega að taka þátt :)

Draumurinn um feðraveldið

„Hobbý eru ekki bara stráka“ Svona hljómar fyrirsögn í 24 stundum í dag. Þar er Arnaldur Haukur Ólafsson í viðtali af tilefni opnunnar á nýrri verslun með hobbývörur. Hann segir: „Billjardborð, fótboltaspil eða aðrar svona græjur eru líklega ein fjölskylduvænsta fjárfesting sem dellufólk getur ráðist í. Í stað þess að kaupa vélsleða, mótorhjól eða rándýra stangveiði þar sem þú ferð út af heimilinu til að sinna áhugamálinu ertu að þjappa fjölskyldunni saman og gera eitthvað með henni.“

Svo mörg voru þau orð og þetta hljómar afskaplega vel - alveg þangað til Fréttablaðið er skoðað. Þar á bls 12 er auglýsing frá umræddri verslun. Hún sýnir mynd af vatnsgeiddurm karlmanni að spila billjard. Myndin er í svarthvítu og ýtir þannig undir hugmyndir um gamla tíma. Og slagorðið? Jú, að sjálfsögðu:

ERT ÞÚ HÚSBÓNDI Í ÞÍNU HERBERGI?

Hobbýið er sem sagt ekki fjölskylduvænna en þetta - endurvakning á úreltum gildum feðraveldisins, sem því miður lifa svo afskaplega vel í okkar samfélagi. Kannski þau séu ekki eins úrelt og margur heldur? Pierre Bourdieu sagði að það eina sem hefði breyst væri að völd karla væru ekki lengur óvéfengd. Í auglýsingu dagsins sjáum við í það minnsta að krafan er sú að karlar séu húsbóndar. Það þýðir að þeir eigi að ráða - og fjölskyldan, konur og börn, geta bara gjört svo vel að hlýða! Væntanlega með því að spila þá leiki sem húsbóndanum þóknast! Skyldi auglýsingin eiga að vísa í leyndan draum karlmanna um... feðraveldi í stað jafnréttis?

Uppskrift að góðum morgni

Ef þú átt erfitt með að fara snemma á fætur þá get ég mælt með góðri leið til að byrja daginn... og þetta er reyndar líka góð leið fyrir fólk sem á auðvelt með að fara snemma á fætur! En svona er uppskriftin:

1. Byrja á því að senda hugskeyti svo manni sé boðið að koma og halda fyrirlestur hjá Rotary í Hafnarfirði kl. 7 að morgni!
2. Panta gott veður og snjó.
3. Stilla 3 vekjaraklukkur og fara svo á fætur um leið og fréttir kl. 6 eru búnar.
4. Fara út að skafa bílinn í góða veðrinu og bruna svo inn í Hafnarfjörð. Njóta þess að það eru hér um bil engir bílar á götunum.
5. Spjalla um femínisma í klukkutíma við hresst Rotary fólk! :) Kemur blóðinu af stað að ræða svona mikilvægt málefni.
6. Skafa bílinn aftur áður en haldið er í bæinn. Njóta veðurblíðunnar og ferskleikans sem fylgir snjónum!
7. Keyra í rólegheitum og njóta þess að nú er bíll við bíll og róleg umferð...

Ég er sem sagt glaðvöknuð - fyrir löngu og alsæl með byrjun dagsins. Elska svona snjóaveður og elska að tala um femínisma í góðum hópi!

Life is beautiful, eins og einhver sagði. Er ekki frá því að hægt væri að leysa lífsgátuna ef allir myndu byrja daginn svona ;)

Innheimta á skuld

Mér finnst eiginlega að tiltekinn maður skuldi mér og 4 öðrum femínistum 300þús skv nýföllnum dómi héraðsdóms í umtöluðu meiðyrðamáli... Geri fastlega ráð fyrir að hann leggi þetta inn á reikninginn minn fljótlega! ;)

Speki dagsins - taka 2

Speki dagsins

Ef maðurinn væri skynsemisvera lifðum við í fullkomnum heimi.

Hvar?

Hvar er hægt ad kaupa erlenda thætti og tónlist til nidurhals?

Teiknimyndapersónur

Búin að finna fyrirtaks leið til að búa til persónur í teiknimyndaseríu. Eina afurðina má sjá hér. Nú er bara að finna skemmtilegan texta með :) Geri það seinna... ekki af því að ég er löt heldur af því að ég þarf að fara að læra! Það er víst í forgang.

Flugvöllurinn

Heyrði í útvarpinu áðan að sýningin með verðlaunatillögunni fyrir nýtt skipulag í Vatnsmýrinni verður sett upp í Háskólatorgi. Lucky me - mig langar nefnilega til að sjá hana og er stundum að þvælast upp í Háskólatorgi... Annars er ég á því að það eigi ekki að færa flugvöllinn. Skil ekki af hverju verið er að skoða Hólmsheiðina ennþá. Hún hentar ekki fyrir flugvöll svo þetta er eins og að henda peningunum út um gluggann. Þar er vindasamt auk þess sem hún er rúmlega 100 metrum yfir sjávarmál. Heyrði að skýjalag væri ca 165 m yfir sjávarmál þannig að allar aðstæður eru mun erfiðari heldur en á núverandi flugvelli. Ég er líka á því að flugvöllurinn eigi að vera miðsvæðis. Annaðhvort þarf að finna mun betra svæði en nú er verið að tala um eða þá að flugvöllurinn á bara að fá að sitja sem fastast. Nær væri að takmarka umferð um hann og láta einungis innanlandsflug, sjúkraflug og gæsluflug fara þar í gegn. Einkaþoturnar ættu að fara til Keflavíkur. Sömuleiðis Grænlands- og Færeyjaflugið. Ef mikið ónæði er af fluginu er líka hægt að senda flugnemana til Keflavíkur.

Athugasemdir

Á eftir að blogga um fundinn sem ég fór á hjá Samfylkingunni á miðvikudaginn. Var boðið þangað til að tala um manneklu í kvennastéttum og áhrifum á jafnrétti kynjanna og efnahaginn. Mjög skemmtilegur fundur, enda finnst mér alltaf gott að fá að tala um mitt hjartans mál!

Sé líka að nauðsynlegt er að tiltaka það hér að kommentum frá andfemínískum karlrembum verður eytt út... geri kröfu um málefnalega umræðu og kurteisi. Það ætti ekki að vera neinum ofviða. Tek hins vegar ekki í mál að leyfa einhverjum skemmdarvörgum að vaða hér uppi í þeim tilgangi að afhjúpa sitt hatur á kvenfólki - þó reyndar mér finnist ágætt að fá þau viðhorf upp á borðið. Sumir átta sig þá á af hverju enn er þörf fyrir baráttuna. Fátt aflar okkur meira fylgis, ef út í það er farið. En ég nenni engan veginn að hafa þennan dónaskap á mínu bloggi. Þeir sem eru andvígir jafnréttisbaráttunni geta bara gjört svo vel að vera kurteisir í athugasemdum sínum!

Landslidsthjálfari

Kemur ekki til greina ad ráda konu sem thjálfara karlalandslidsins í handbolta?

Stadsetning

Mogginn hefur ákvedid ad koma til móts vid bloggara sem ekki vilja auglysingar á blogginu sínu med thví ad bjóda theim ad greida fyrir auglysingaleysi. Gott hjá Mogganum ad bjóda valkost. Mér finnst thetta samt dyrt, 3600 á ári, og vel frekar ad vera á fríkeypis bloggi... Ætla sem sagt ad halda áfram ad vera hér.

iPhone í hnattvæddum heimi

Aldrei þessu vant fjallaði pistillinn minn í Viðskiptablaðinu ekki um jafnrétti heldur tækni, nánar tiltekið iPhone. Hér er pistillinn sem birtist í Viðskiptablaðinu í dag:

iPhone í hnattvæddum heimi
Apple setti iPhone á markað í Bandaríkjunum þann 29. júní 2007. Segja má að um hálfgerða byltingu á símamarkaði hafi verið að ræða, en iPhone sameinar í eitt tæki síma, þráðlausa nettengingu og iPod spilara. iPhone prýða að auki tækninýjungar eins og fjölsnertiskjár. Apple seldi 3,7 milljón iPhone síma á síðasta ári. Afar áhugavert er að rýna í markaðsstefnu og markaðssetningu á iPhone og viðbrögð neytenda við læstum síma.

Eitt símafyrirtæki í hverju landi
Apple gerði einkasölusamning við AT&T símafyrirtækið í Bandaríkjunum. Samningurinn er til 5 ára og þýðir að símar sem seldir eru í Bandaríkjunum virka eingöngu með símkorti frá AT&T. Til að virkja símann þurfa neytendur að skuldbinda sig í 2 ár hjá AT&T. Apple fær hluta af tekjum AT&T og eftir yfirlegu yfir ársskýrslu Apple hafa sérfræðingar áætlað að Apple fái frá 10 – 18 USD á mánuði fyrir hvern símasamning, sem er hærra en þekkist fyrir aðra einkasölusamninga. Apple hefur farið svipaða leið við markaðssetningu á símanum í Evrópu og gert einkasölusamninga við fyrirtæki í Bretlandi, Frakklandi og Þýskalandi. Frönsk lög heimila hins vegar ekki læsingu á símanum og því er hægt að fá ólæstan síma á hærra verði í Frakklandi.

Hakkarar af hugsjón
Aðdáendur iPhone hafa ekki tekið markaðsstefnu Apple þegjandi og hljóðalaust. Tvö mál hafa verið höfðuð í Bandaríkjunum þar sem því er haldið fram að um einokunartilburði sé að ræða. Vodafone í Þýskalandi fór í mál en tapaði. En neytendur í hnattvæddum heimi deyja ekki ráðalausir. Fjölmargir hakkarar hafa unnið hörðum höndum að því að aflæsa símana með góðum árangri. Sumir hakkaranna eru drifnir áfram af þeirri hugsjón að markaðsstefna Apple sé í ætt við einokun eða í það minnsta samkeppnishamlandi tilburði þar sem neytendur geti ekki valið sér símafyrirtæki eftir eigin höfði heldur eru neyddir í viðskipti við eitt tiltekið símafyrirtæki.

Hátt hlutfall hakkaðra síma
Mismunur á seldum símum hjá Apple og skráðum samningum hjá símafyrirtækjunum með einkasölusamninga á síðasta ári var 1,4 milljón eintök eða hátt í 40%. Ekki er búist við að allir símarnir séu hakkaðir en áætlað er að um 25% af heildarfjöldanum séu aflæstir. Margir þeirra eru fluttir til landa þar sem iPhone hefur enn ekki verið markaðssettur, svo sem Íslands og Kína. Svo virðist sem Apple hafi tekist frábærlega að skapa eftirvæntingu fyrir vöruna og hefur uppfyllt væntingar neytenda um gæði símans. Á hinn bóginn er markaðsstefnan algjörlega úr takt við það sem búast mætti við af framsýnu fyrirtæki í hnattvæddum heimi. Ekki nóg með að síminn sé spyrtur saman við eitt símafyrirtæki í hverju landi, heldur er hann enn einungis fáanlegur í fáum löndum og læst er á hugbúnað frá þriðja aðila, þ.e. einungis er hægt að nota símann með hugbúnaði frá Apple. Hakkarar hafa reyndar einnig fundið leið fram hjá þessu.

Löglegt að aflæsa
Ákvörðun Apple um að gera einkasamning við AT&T verður örlítið skiljanlegri í ljósi þess að flestir farsímar í Bandaríkjunum eru læstir. Neytendur geta keypt þá á lægra verði gegn langtímasamningi við símafyrirtækið. Hins vegar virðist vera löglegt að hakka símana til að aflæsa þá. Í það minnsta hefur aflæsing síma verið undanskilin höfundarréttarlögum í Bandaríkjunum þó ekki hafi reynt á hvort hakkarar megi dreifa upplýsingum um hvernig aflæsa á símana. Umræðan um læsta síma hefur breyst í kjölfar iPhone og ljóst er að neytendur láta fátt stoppa sig þegar byltingarkennd tækninýjung sem þeir vilja ólmir eignast er kynnt til sögunnar. Framtíðin verður síðan að leiða í ljós hvaða áhrif markaðsstefna Apple hefur á ímynd fyrirtækisins og samkeppnisforskot til lengri tíma litið.

Hlutverk fjölmiðla

Mér finnst áhugavert að ræða hlutverk fjölmiðla í tilefni af danska skopmyndamálinu. Þegar jafnrétti kynjanna ber á góma við fjölmiðla hef ég oftar en einu sinni og oftar en tvisvar fengið að heyra að það sé ekki hlutverk fjölmiðla að vera í réttindabaráttu heldur að flytja fréttir. Þetta hefur oft verið sagt út af hlutfalli kynjanna í fjölmiðlum - mál sem ég kalla ekki hluta af réttindabaráttu af hálfu fjölmiðla heldur einfaldlega hluta af hversu faglegir fjölmiðlar eru. Þeirra hlutverk er að flytja fréttir af öllum, ekki bara helmingi mannskyns (hlutföll kynjanna í fjölmiðlum eru ca 75/25).

Nú bregður svo við í danska skopmyndamálinu að fjölmiðlar ákveða að fara í réttindabaráttu. Svo á að heita sem að þetta sé í nafni málfrelsis. Í mínum huga er þetta þó meira í átt við stríðsyfirlýsingu heldur en baráttu fyrir málfrelsi. Öll eigum við eitthvað sem er okkur heilagt. Það er bara mismunandi hvað það er. Mér finnst ágætt að líkja þessu við þegar Harry Bretaprins mætti í nasistabúningi á grímuball. Svoleiðis gera menn ekki á vesturlöndum. Það er eitthvað sem er okkur heilagt, enda fékk Harry prins skömm í hattinn fyrir. Miðað við viðbrögð fjölmiðla nú hefði Harry prins átt að segja að hann hefði málfrelsi og mæta síðan í nasistabúningnum reglulega - bara til að berjast fyrir málfrelsinu! Gáfulegt? Nei, svo sannarlega ekki. Það má ekki gleymast að þó hér ríki málfrelsi þá þýðir það ekki að orðin (eða aðgerðirnar) séu innantóm og án merkingar. Fólk og fjölmiðlar þurfa líka að íhuga hvað verið er að segja. Rétt eins og búningurinn hans Harrys var hluti af tjáningu þá eru viðbrögð fjölmiðla nú hluti af tjáningu. Það er ekki bara verið að segja „við höfum málfrelsi“ heldur er líka verið að segja „okkur er skítsama um þína trú og það sem er þér heilagt - við áskiljum okkur rétt til að gera grín að því og þar með að gera lítið úr þér“. Fyrirfram var vitað að slík yfirlýsing jafngilti stríðsyfirlýsingu og myndi hafa ýmis áhrif í för með sér fyrir Danmörk og danska ríkisborgara. Og þá kemur að spurningunni - hafa fjölmiðlar þennan rétt? Er það ekki stjórnvalda að ákveða hvort farið sé í stríð eða ekki? Mega fjölmiðlar fara í stríð, ekki í þágu þess að flytja fréttir, heldur í þágu einhvers málefnins sem þeir kjósa að berjast fyrir á sínum eigin forsendum óháð öllu öðru?

Annars væri gaman að gera lista yfir það sem er okkur Vesturlandabúum heilagt. Þrjú atriði sem mér detta í hug: fánar, bókabrennur og nasistabúningar. Eitthvað fleira?

iPhone

iPhone er med flottari græjum og flottasti sími sem ég hef séd. Hins vegar skil ég ekki stefnuna sem Apple tók vardandi markadssetningu á símanum. Apple hefur lagt mikid á sig til ad byggja upp flotta ímynd af framsynu fyrirtæki sem er med puttann á púlsinum. Nú bregdur svo vid ad Apple velur leid sem er gjörsamlega á skjön vid thad althjódaumhverfi sem vid búum í. Einokunarsamningar fara ekki vel í markhóp Apple og ég er sannfærd um ad fyrirtækid mun tapa stórt á thessu til langs tíma litid. Tækniforskotid endist ekki endalaust og samkeppnisadilar munu bjóda svipada sími ádur en langt um lídur. En græjan er flott...

Thetta er skrifad á iPhone.

Besti frambjóðandinn!

Ég held með Hillary - ekki bara af því að það er tímabært að kona verði forseti Bandaríkjanna heldur einnig vegna þess að ég og hún eigum flest sameiginlegt um málefnin! Krossa svo fingur að McCain vinni ekki... við erum 7% sammála og mér sýnist á þessu prófi að það sé aðeins eitt sem þessi 7% standa fyrir. Við erum sammála um að ekki eigi að binda í stjórnarskrá Bandaríkjanna að hjónaband eigi eingöngu að vera á milli karls og konu!

	Hillary Clinton Score: 66
-- Take the Quiz! --

Clinton: 66
Obama: 59
Gravel: 55
Paul: 20
Romney: 12
McCain: 7
Huckabee: 2

Karlakvóti

Í gær var tilkynnt um styrki til eflingar atvinnumála kvenna. Ekki er að því að spyrja að sumum finnst þetta hin mesta fásinna og telja að þetta sé mismunun á grundvelli kyns þar sem karlar fá ekki þessa styrki. Eins og svo oft áður er gott að skoða málið nánar. Við búum ekki í samfélagi jafnréttis. Það ætti að vera öllum ljóst... og öll tölfræði sýnir okkur þetta svart á hvítu. Konur og karlar eru alin upp á mismunandi hátt, ólík viðhorf eru til kynjanna og þar af leiðandi ólíkar væntingar. Karlar hafa mun meiri völd en konur en það sem er sérstaklega vert að vekja athygli á er að karlar eru viðmiðið í samfélaginu, sbr að ef sagt er að í kvöld verði landsleikur í handbolta velkist enginn í vafa um að þarna er átt við landsleik í karlahandbolta. Konur eru frávikið sem er nefnt - landsleikur í kvennahandbolta.

Nú nýlega voru kynntar til sögunnar mótvægisaðgerðir ríkisstjórnarinnar vegna kvótaskerðingar. Fjölmargar konur og karlar missa vinnuna vegna kvótaskerðingarinnar en mótvægisaðgerðirnar miða að mestu leyti að því að skapa ný störf fyrir karla. Áætlað er að aðgerðirnar skapi 500 - 600 ný störf, mestmegnis karlastörf. Mótvægisaðgerðirnar eru hins vegar ekki kallaðar „mótvægisaðgerðir fyrir karla“. Misréttið er því falið, gert ósýnilegt. Hins vegar er kynið dregið sérstaklega fram í þeim mótvægisaðgerðum við misréttið þar sem Jóhanna Sigurðardóttir félagsmálaráðherra veitir styrki til eflingar atvinnumálum kvenna. Munurinn á fjárhæðum er gígantískur. Konur fá tæpar 16 milljónir. Karlarnir fá 10,5 milljarða. Konurnar fá sem svarar 0,15% af því fjármagni sem karlarnir fá... Konurnar eiga reyndar von á 50 milljónum í viðbót. Þá eru þær komnar með 0,6% af því fjármagni sem karlmennirnar fá. Já - lífið er svo sannarlega réttlátt og full ástæða til að kvarta yfir styrkjum til atvinnumála kvenna!

Hér má lesa frétt á mbl.is þar sem fram kemur að mótvægisaðgerðirnar gagnist fyrst og fremst karlmönnum.

Fæðingarorlofssjóður - nýja frumvarpið

Er enn að venjast gamla blogginu mínu upp á nýtt... viðurkenni að ég er bara ferlega spæld út í mbl.is fyrir þessar fjárans auglýsingar. Prinsippsins vegna get ég ekki verið þar áfram en hefði svo gjarnan viljað sleppa þessu veseni, sérstaklega vegna þess að ég var nýbyrjuð að blogga aftur og akkúrat í augnablikinu finnst mér súpergóð hugmynd að halda áfram í bloggpásu :)

En... ætla samt að segja að það er flott hjá Jóhönnu að leggja fram frumvarp um breytingar á fæðingarorlofslögunum. Í fljótu bragði sínast mér breytingarnar vera til batnaðar. Eflaust eiga einhverjir hnökrar eftir að koma í ljós en vonandi sem fæstir. Það er löngu tímabært að breyta útreikningi, tveggja ára tímabil er allt of langur tími, auk þess sem það er hreinlega letjandi fyrir ungt fólk að eignast börn. Ekki að mér finnist að ríkið eigi að skipta sér af barneignum en fæðingarorlofssjóður einn og sér er auðvitað „afskipti“ og hann hefur áhrif - og þá er eins gott að þau áhrif séu minimal í þá veru að foreldrar plani ekki barneignir of mikið út frá hvenær þau hafi haft góðar tekjur nægjanlega lengi til að fá nægjanlegar greiðslur úr sjóðnum. Yfirfærslan á réttindum sýnist mér líka vera gott mál.

Nú er bara spurningin um hvenær orlofið verður lengt! Hér er svo linkur á helstu breytingar.

„Blaðamannafundurinn“

Held að ekkert toppi dramað sem er í gangi í borginni núna, ekki einu sinni gubbupestin sem ég nældi mér í um helgina!

Þessi blaðamannafundur áðan var með ólíkindum. Einhver ætti að gauka að Vilhjálmi að fá sér PR mann... (eða skipta um). Maður í óvinsælli stöðu heldur ekki blaðamannafund þar sem hann lætur fjölmiðla bíða í eina og hálfa klukkustund til að tilkynna að hann ætli ekki að gera neitt. Þetta eru örugglega ekki ráð frá Dabba því það var jú hann sem sagði „svona gera menn ekki“! Annars bíð ég líka spennt eftir því að vonarstirnin í flokknum finni símana sína og byrji að svara í þá. Ég held að það sé fínt að rifja upp núna að það reynist yfirleitt farsælast að fylgja sínum prinsippum! Ég held líka að þessi órói út af því hver eigi að taka við af Vilhjálmi sé ofsögum sagt - Hanna Birna er næst á listanum og hún er sú sem minnstur styr stendur um (þó Gísli Marteinn sé líka fínn... það er ekki málið). Hanna Birna hefur sýnt og sannað að hún er öflugur leiðtogi og er verðugur fjórði borgarstjóri þessa kjörtímabils... sem reyndar hljómar ekki mjög kræsilega og kannski er styrinn út af því - enginn vill taka við!

Aftur á blogspot

Ætli sé ekki best að byrja á sama stað og Moggabloggið endar. Þar sem ég er ekki til í að blogga ókeypis með auglýsendur á síðunni þá færði ég mig aftur yfir á blogspot...

Ástæður fyrir því að ég vil ekki vera með auglýsingar á blogginu:

1. Sumar auglýsingar viðhalda kynhlutverkum sem byggja á misrétti.
2. Sum fyrirtæki eiga sér þannig sögu varðandi auglýsingar að ég vil ekki auglýsa þau.
3. Ég er ekki ókeypis auglýsingaskilti og er ekki til í að auglýsa hvað sem er, fyrir hvern sem er án þess að hafa nokkra stjórn á því sjálf - og skil þar að auki ekki af hverju ég á að vera í því hlutverki að auglýsa fyrirtæki ókeypis... Ekki beint mín hugmynd um „góðgerðarstarfsemi“.

Að því sögðu þá skil ég vel að Mogginn skuli vilja fá tekjur af blogginu. Ég hef hins vegar litið svo á að hagkvæmasta lausnin fyrir Moggann og bloggara væri að bloggarar fái frítt svæði hjá Mogganum. Á móti kæmi að bloggið eykur umferð um mbl.is og þar af leiðandi er hægt að selja plássið þar á hærra verði auk þess sem auðveldara er að fá auglýsendur til að auglýsa þar. Einnig væru auglýsingar á blog.is síðunni - sem er viðbótarauglýsingapláss. Þessu til viðbótar birtir Mogginn efni úr bloggum, sem getur þá bæði verið hagur Moggans og bloggarans. Mogginn fær ókeypis efni í blaðið og bloggarinn fær birtingu.