Af súkkulaði og súlustöðum

Tilkynningaskyldan - var í Morgunvaktinni á Rás 1 í morgun að fjalla um strippstaði og hvort súludans væri sambærilegt starf við að vinna í banka eða í útvarpi. Vona að þessi umfjöllun á Morgunvaktinni haldi áfram vegna þess að fyrst kom viðtal við Geira í ca 10 mín. Svo kom viðtal við súludansmey, líka í ca 10 mín. Bæði viðtölin afskaplega gagnrýnislaus og virkuðu eins og pjúra markaðssetning á súlustöðum og því sem þar fer fram. Sem mótvægi kom viðtal við mig í morgun - í ca 5 mínútur held ég!!! Vona að Rúna og aðrir sérfræðingar verði kölluð til í framhaldinu.

Annars er það helst að frétta af minni súkkulaðifíkn (sem ég er viss um að margir hafa áhuga á...) að hún er óðum að minnka. Ástæðan? Jú, ég fór að rannsaka barnaþrælkun á kakóbaunabýlum. Niðurstaðan? Algjört ógeð. Nú kaupum við bara lífrænt ræktað súkkulaði á mínu heimili því það er öruggt að engin barnaþrælkun á sér stað við þá framleiðslu eftir því sem mér skilst. Hins vegar hef ég ekki staðist að kaupa mér súkkulaði sósu með ísnum og einstaka sinnum að fá mér ís með dýfu og gotteríi. Svo borða ég líka súkkulaði sem mér er gefið eða í boði annarra. En ég kaupi það ekki sjálf - sem er töluvert stór breyting frá því sem áður var.

Pistillinn minn í Viðskiptablaðinu var um barnaþrælkun í súkkulaðiiðnaðinum. Hér er brot úr pistlinum:

Þrælkuð börn á bak við súkkulaðið okkar
Fyrir nokkrum árum var gerð heimildarmynd um barnaþrælkun á kakóbaunabýlum á Fílabeinsströndinni. Þetta var í fyrsta skipti sem flestir Vesturlandabúar heyrðu af því að hugsanlega séu þrælkuð börn vinnuaflið á bak við hið ljúffenga súkkulaði sem við verðlaunum okkur reglulega með. Viðbrögðin létu ekki á sér standa og neytendur þrýstu á um úrbætur, enda ekki gleðilegt að hugsa um litla þrælkaða drengi við hvern súkkulaðibita. Í Bandaríkjunum var lagt fram frumvarp þess efnis að merkja ætti súkkulaði sem laust við þrælahald að uppfylltum skilyrðum. Frumvarpið var samþykkt í fulltrúadeild þingsins. Við þetta tóku súkkulaðiframleiðendur loksins við sér því þeir vissu að það væri nánast útilokað að sýna fram á að súkkulaðið þeirra væri ekki framleitt með hráefni sem ætti rætur að rekja í þrælahald.
Iðnaður sem áður hafði kosið að hvorki sjá né heyra neitt illt varðandi hráefnið sitt settist niður með stjórnvöldum, félagasamtökum gegn þrælahaldi og fleiri hagsmunaaðilum og gerðu aðgerðaráætlun um hvernig mætti útrýma barnaþrælkun við framleiðslu á þessu vinsæla sælgæti.

Mömmugildra

Nú er Reykjanesbær búinn að tilkynna að í boði séu umönnunarbætur fyrir foreldra sem vilja vera heima með börnum sínum frá því að fæðingarorlofi lýkur og leikskóli tekur við. Auðvitað er rangnefni að segja að um sé að ræða umönnunarbætur fyrir foreldra og nær að segja að þetta sé fyrir mömmur því þrátt fyrir kynblindu í orðalagi er fullvel vitað að það eru mömmurnar sem falla í gildruna. Með því að stimpla sig út af vinnumarkaði í 2 ár eiga þær á hættu að sjálfstraustið minnki þannig að erfiðara verður að fóta sig á vinnumarkaði þegar haldið er þangað aftur. Einnig hækka þær ekki í tekjum á meðan sem þýðir að í framhaldinu þegar kemur að ákvarðanatöku á heimilinu um hvort foreldrið vinnur ekki yfirvinnu, fer í hlutastarf og sinnir börnunum og veikum ættingjum meira þá er mamman sjálfgefið val - út frá fjárhagsástæðum og hefðbundnum kynhlutverkum. Þetta hefur síðan aftur áhrif á lífeyrissjóðsréttindi, veikindaréttindi, bætur ef slys skildi bera að höndum, möguleika á starfsframa og þar fram eftir götum. Þessar "fallegu" fjölskylduvænu lausnir eru ekkert annað heldur en partur af bakslaginu - fortíðarhyggjan sem sér fyrir sér hina umhyggjusömu, heimavinnandi húsmóður á fjólubleiku skýi. Vonandi falla sem fæstar mömmur í gildruna.

DUI

Fór að kveðja Hildi Fjólu á Næsta bar í gærkvöldi. Þar sem leigubílar eru dýrir í Grafarholtið :( borgar sig að fara á bílnum og sleppa bjórnum á hittingum sem þessum. Þegar ég kom neðst í slaufuna sem liggur frá Bústaðarvegi inn á Miklubraut á heimleiðinni sé ég hvar þar stendur lögga sem veifar mér að stoppa. Ég stoppa og skrúfa niður rúðuna og hann segir að ég verði að taka U-beygju, keyra á móti umferð að lögreglubíl með blikkandi ljósum, taka þar aðra U-beygju og keyra aftur upp á Bústaðarveg. Ég fékk að sjálfsögðu sting í magann því svona lagað þýðir venjulega að slys hafi orðið. Í fréttum í dag sé ég svo að um var að ræða 4 bíla árekstur þar sem 7 slösuðust. Sem betur virðast ekki hafa orðið alvarleg slys á fólki en það útilokar samt ekki að einhver af hinum slösuðu gætu þurft að takast á við afleiðingar það sem eftir er. Sagan endar þó ekki hér. Slysstaðurinn var í hættu staddur þegar ölvaður ökumaður virti ekki stöðvunarmerkið frá góðkunningja mínum - löggunni veifandi. Hann náðist á endanum en alls voru 10 ökumenn teknir fyrir ölvunarakstur í nótt.

Nú er töluvert síðan ég var fastagestur í miðbænum en mér fannst ekki skemmtilegt að koma út af Næsta bar rétt fyrir kl. 3 og sjá alla ölvunina. Löngunin til að djamma í miðbænum er einhvern veginn alveg horfinn. Eflaust er það aldurinn sem gerir þetta að verkum en það er bara ekki sjarmerandi að stíga út í nóttina og sjá allt morandi í ölvuðu fólki, þreyttu og aumu í fótunum, skjögrandi um... þá er afskaplega mikill léttir að geta sest beint upp í bíl og keyrt af stað. En það er önnur tilfinning sem hreiðrar líka um sig þegar kona sest undir stýri og heldur heim á leið. Sú tilfinning er tilkomin vegna þess að það er vitað mál að á þessum tíma er slatti af ölvuðum ökumönnum í umferðinni og þeir keyra ekki á 40 á Miklubrautinni, Ártúnsbrekkunni... Ég vona að sett verði fjármagn í hert eftirlit í miðbænum - helst svo strangt að enginn keyri út úr miðbænum án þess að blása í blöðru!

Er fólk að vakna?

Nú er verið að fjalla um í fréttum að strákurinn sem leitaði upp fórnarlamb til að drepa á netinu og stakk hann svo í bakið af því að hann langaði til að prófa að drepa einhvern hafi verið undir áhrifum ofbeldisfullra tölvuleikja og kvikmynda. Ég er ekki hissa. Las fyrir löngu bókina High Tech - Low Touch og þar er einmitt verið að ræða þessi tengls á milli tölvuleikja og ofbeldisfullrar hegðunar. Það var áhugavert að sjá viðtal í fréttum við Húgó Þórisson sálfræðing þar sem fram kom að nú virðast vera að koma fram þau áhrif sem margir óttast og að þarna sé á ferðinni dæmi um einhvern sem er á fullu í að horfa og í framhaldi af því skapist löngunin til að framkvæma. Þetta er nákvæmlega það sama og sumar kenningar um tengsl á milli klámnotkunar og nauðgunar á konum halda fram. Þ.e. að fyrst sækir áhorfandinn í tiltölulega "saklaust" efni. Eftir smá tíma er það ekki nóg og þá er sótt í aðeins harðara efni og svo koll af kolli þangað til efnið er orðið mjög ofbeldisfullt. Að lokum er það ekki nóg og karlana fer að langa til að prófa sjálfir og leita upp fórnarlömb. Ted Bundy lýsti því að svona hefði hann byrjað. Diana Russell er með flottustu kenninguna sem ég hef séð um tengsl á milli kláms og kynferðisofbeldis. Hún er með margþætta kenningu sem gerir ráð fyrir að ekki sé um bein orsaka og afleiðingartengsl að ræða, þ.e. ekki þannig að allir sem horfi á klám leiðist út á braut kynferðisbrota heldur að margir samverkandi þættir komi við sögu. Einnig líkir hún tengslunum við tengslin á milli reykinga og lungnakrabbameins - ekki fá allir reykingamenn lungnakrabbamein en hættan er vissulega til staðar.

Pointið í öllum þessum pælingum er sem sagt sú að með allri þessari ásókn og framleiðslu á ofbeldisfullum tölvuleikjum og klámi er verið að búa til ofbeldismenn.

Hin eina sanna tík

Jæja - þá er búið að skora á mig á femínistapóstlistanum að fara í framboð. Ég þakka að sjálfsögðu traustið og mikið væri nú örugglega gaman að vera forsætisráðherra! :)

*******
En talandi um pólitík. Áskorunin kom á svolítið skemmtilegum tímapunkti því í morgun var ég pallborðsgestur á landsfundi Ungra vinstri grænna. Þau skipulögðu eins og hálfs tíma pallborð um aukinn ójöfnuð í samfélaginu með áherslu á velferðarmál. Pallborðsgestir voru ég, sem fulltrúi Femínistafélagsins, Sabine sem fulltrúi kvenna af erlendum uppruna og Ögmundur - væntanlega sem Vinstri grænn. Katrín Jakobsdóttir stýrði umræðum af miklum skörungsskap eins og hennar var von og vísa. Það er margt jákvætt að taka þátt í svona pallborði - þó kona þurfi að keyra alla leið til Hveragerðis snemma á laugardagsmorgni! En hér eru nokkrir punktar sem ég tók saman í tilefni pallborðsins:

• 
  Ofurlaun - Launaójöfnuður hefur aukist stanslaust hér á landi undanfarinn áratug. Yfirgnæfandi meirihluti þeirra sem eru á ofurlaunum eru karlar. Það þýðir ekki aðeins að meiri völd færist örfáum á hendur og að stéttskipting aukist heldur líka að meiri völd færast hinum karllægu gildum í hendur.
  
• Velferðarkerfið - Ef við skoðum velferðarkerfið þá kemur í ljós að okkur vantar rannsóknir á stöðunni þar. Konur eru fleiri í röðum eldri borgara en karlar, þær eru fleiri á dvalarheimilum, fleiri í hópum tekjulágra og svo framvegis. Hins vegar vantar okkur rannsóknir til að fá að vita nákvæma stöðu en það er alveg ljóst að núna eru konur í hópi aldraðra sem aldrei voru út á vinnumarkaði og njóta þar af leiðandi ekki neinna lífeyrissjóðsgreiðslna heldur fá einungis bætur frá Tryggingastofnun. Þetta er bein afleiðing af kynhlutverkum sem byggðu á fjárhagslegu ósjálfsstæði kvenna.
  
• Áherslur í heilbrigðiskerfi – breyttar áherslur þýðir að meiri umönnun færist yfir á heimilin – með öðrum orðum – á konur – því yfirleitt eru það konur sem axla ábyrgð á umönnun þeirra sem á þurfa að halda – hvort sem um er að ræða aldraða foreldra, veika fjölskyldumeðlimi eða börn. Aukin gjöld í heilbrigðiskerfinu – það segir sig sjálft að þau sem eiga minnstan pening koma verst út úr aukinni gjaldtöku fyrir læknaheimsóknir og lyf.
  
• Fjölskyldustefna – hér má nefna aukna umræðu um afturhvarf til gamalla tíma, háværar raddir sem segja að ekki sé verið að sinna börnunum og aðgerðir eins og Kópavogur var að boða nú í vikunni sem felast í heimgreiðslum til foreldra. Þó um kynblinda aðgerð sé að ræða í orði þá er hún svo sannarlega ekki kynblind á borði. Það er vitað mál að það eru mæðurnar sem munu verða heima – með tilheyrandi afleiðingum á tekjur, starfsþjálfun og starfsmöguleika og það hefur aftur áhrif á ýmis réttindi eins og lífeyrisgreiðslur og veikindaorlof. Það er ekki að ástæðulausu að aðgerðir sem þessar eru kallaðar “mömmugildran” enda getur þessi valkostur haft afdrífaríkar afleiðingar á þau tækifæri og valkosti sem þeim mömmum sem falla í gildruna býðst það sem eftir er ævinnar.

Að sjálfsögðu...!

Smellið á fyrstu myndina til að fá þá næstu og svo koll af kolli...

http://kjosa.is/storastundin/

http://kjosa.is/stefnufesta/

Hittið - mætum við ekki öll?

Undanfarið hafa málefni kvenna af erlendum uppruna verið mikið til umfjöllunar í fjölmiðlum. Hefur þar hæst borið mál tveggja erlendra kvenna sem neitað var um dvalarleyfi hér á landi eftir að hafa komið úr ofbeldisfullum hjónaböndum við íslenska menn. Hnattvæðing og auknir fólksflutningar bera með sér miklar breytingar og ýmis álitaefni koma upp.
Hafa til að mynda vestrænar konur átt möguleika á að bæta stöðu sína í samfélaginu vegna þess að erlendar konur hafa tekið að sér þau störf sem þær unnu áður eins og umönnunarstörf og heimilisstörf? Álita- og siðferðismálin tengd alþjóðavæðingunni eru fjölmörg en fyrsta Hitt Femínistafélags Íslands á þessu starfsári verður helgað þessum spennandi málum.
Hittið verður haldið þriðjudaginn 5. september kl. 20:00 á Thorvaldsen Bar (Bertelstofu). Þar munu feikifróðar konur miðla af visku sinni en það eru
þær:

Silja Bára Ómarsdóttir, forstöðumaður alþjóðamálastofnunar Háskóla Íslands sem mun fjalla um alþjóðavæðinguna og áhrif hennar á stöðu kvenna.

Tatjana Latinovic, formaður Félags kvenna af erlendum uppruna sem kemur til með að fjalla um stöðuna hér á landi og hvernig okkur er að takast að gera Ísland að fjölmenningarsamfélagi.

Margrét Steinarsdóttir, lögfræðingur hjá Alþjóðahúsi sem ætlar að fjalla um lagalegar hliðar og hvernig mál koma til kasta Alþjóðahúss.

Á eftir erindunum er opnað fyrir umræður þar sem gefst gott tækifæri til að kryfja málin, segja sitt álit og spyrja áleitinna spurninganna.

Hittið er öllum opið og aðgangur er ókeypis.

Kína - best í heimi?

Í dag komu til okkar í heimsókn 12 kínverskir ferðamenn. Við hjá Femínistafélaginu ásamt KRFÍ tókum á móti þeim á Hallveigarstöðum. Ferðamennirnir leyndu á sér því þarna voru á ferð háttsettir opinberir embættismenn frá Guangdong héraði í Kína, þar af 4 varaborgarstjórar. Mestur tími heimsóknarinnar fór reyndar í að tala um stöðuna á Íslandi en við fengum aðeins að heyra um stöðuna í Kína. Einnig fengum við í hendurnar disk með öllu því jákvæða og góða sem gerst hefur í jafnréttismálum í Guangdong síðustu 10 árin. Og viti menn (og konur!) - það er bara heill hellingur. Það er greinilega hægt að gera mikið á stuttum tíma... ;)

Var að enda við að skrifa pistil um heimsóknina fyrir Viðskiptablaðið. Set kannski meira hingað inn við tækifæri en þar sem klukkan er orðin of margt ætla ég að vera skynsöm og fara að sofa - full innblásturs yfir árangursríkum jafnréttisaðgerðum. Og hey - ef Kína getur gert þetta með alla sína milljarða sem búa þar - hverju getum við þá ekki áorkað á litla Íslandi þar sem aðeins þarf að breyta hugarfari 300.000 manns?

Karlmennskan uppmáluð?

Hinn eini sanni krókódílamaður, Steve Irwin, lést í gær við tökur neðansjávar. Það var stingskata sem varð krókódílamanninum að aldurtila. Þegar við höfðum aðgang að Discovery horfðum við oft á þættina hans. Steve var þekktur fyrir að leggja sjálfan sig í hættu í umgengni við dýr og því verður að segjast eins og er að eftir að hafa horft á þættina hans þá vorum við ekki hissa á þessum endalokum. Það er stundum talað um gjald karlmennskunnar. Karlmennskuímyndin byggir meðal annars á dirfsku og djörfung - en því miður ekki alltaf með happy ending.

Annars konar karlmennsku mátti sjá á sunnudagskvöldið í Kastljósinu. Þar fór Davíð Oddson á kostum og tjáði sig um hin ýmsu mál. Mér finnst afskaplega gaman hvað Davíð er hreinskiptin upp á síðkastið - þó það sé auðvitað engan vegin viðunandi fyrir seðlabankastjóra. En hey - það er hvort sem er ekki viðeigandi að forsætisráðherra hoppi í sæti seðlabankastjóra til að kljást við afleiðingar af eigin gjörðum. Margt af því sem Dabbi sagði hefði ég nú samt alveg viljað að hefði komið í ljós mun fyrr - þegar hann var á atkvæðaveiðum. Þá hefði verið mjög heiðarlegt af honum að tala opinskátt um eigin karlrembu!

Skemmtilegt

Þau sem hafa gaman af skemmtilegum tilvitnunum geta smellt á textann.

Þar má finna ýmislegt - eins og þetta:

Why not choose a less offensive word? "A natural response is to change the word feminist to a word with fewer stigmas attached. But inevitably the same thing will happen to that magical word. Part of the radical connotation of feminism is not due to the word, but to the action. The act of a woman standing up for herself is radical, whether she calls herself a feminist or not."
- Paula Kamen, feminist

Haukur, Chippendales, tikin.is og Femínistafélagið!

Lenti í smá vandræðum fyrir fyrirsögn á þetta innlegg. Ákvað nefnilega að skrifa um Hauk sem skrifaði pistilinn á tíkin.is. Fyrsta sem mér datt í hug var "Haukur og tíkin" og síðan "Haukur á tíkinni". Fínt að endurheimta nafnið tíkin - en það verður að segjast eins og er að stundum er smá vandræðagangur í kringur nafnið...

En allavega - einhvern tímann skammaðist ég út í það hér að Haukur hefði skrifað pistil á tikin.is þar sem hann gerði FÍ upp skoðanir í kringum komu Chippendales. Stend nú enn við það að þær skoðanir sem hann setur fram í pistlinum eru ekki skoðanir FÍ en... komst að því áðan þegar ég fór að fara yfir femínistafélagspóstinn að hann reyndi að hafa samband við okkur. Hann fær nú kredit fyrir það blessaður!

Af hverju er þetta ekki í fréttum?

Úr frétt í Fréttablaðinu 31. mars 2006 (tekið af visir.is):

"Marteinn Jónasson fékk næstþyngsta dóminn, tíu mánaða skilorðsbundið fangelsi og 68,9 milljón króna sekt."

Finnst engum skrýtið að í allri fjölmiðlaumfjölluninni um nýja eigendur Fróða sé ekki minnst á þetta í fréttum?

Síðasti frídagurinn

Um daginn tókst mér að brenna mig þrisvar við að elda einn lítinn kjúkling. Er ekki rökrétt að draga þá ályktun af því að eldamennska sé ekki kvenmannsverk?

Var annars einstaklega heppin í dag. Ákvað að skilja kreditkortið mitt eftir á bílaplaninu fyrir utan Odda og viti menn - það var enn á sínum stað 2 tímum seinna!

Hvað finnst ykkur um uppreisn æru Árna? Ég er enn ekki að skilja af hverju ekki var beðið eftir forsetanum. Það lúkkar einhvern veginn svo hrikalega illa þegar 2 af 3 æruhreinsurum eru háttsett í flokknum hans Árna...

Í dag var annars síðasti dagurinn af fríinu. Mínu lauk eiginlega fyrir viku þegar við komum heim úr Hrísey en við erum samt búin að ná að gera slatta í húsinu þessa vikuna. Þó ekki nóg og vonandi kemur enginn í heimsókn því við erum að endurraða í geymslukössunum - sem þýðir auðvitað að fyrst þurfti að dreifa öllu dótinu í tröppurnar og athuga hvort ekki væri hægt að dúkaleggja gólfið á neðri hæðinni með því. Það tókst ljómandi vel en ekki er það komið inn í geymslu svo aðkoman er falleg!

Og að lokum ein uppljóstrun - Hittið verður í næstu viku! Þriðjudagskvöldið :) Sjáumst þá.

Málefni Álgerðar

Mál Valgerðar Sverrisdóttur hefur valdið mér nokkrum heilabrotum. Hegðun hennar í sambandi við skýrslu Gríms Björnssonar er í engu samræmi við hennar ábyrgð. Auðvitað átti hún að leggja skýrsluna fyrir þingið. Það er allt of ódýrt að segja að niðurstöður hans hafi verið hraktar á fundi með hagsmunaaðilum og því hafi skýrslan ekki komið málinu við. Við fáum víst aldrei að vita hvort að niðurstaðan varðandi Káranhnjúkavirkjun hefði orðið öðruvísi hefðu þingmenn fengið að sjá skýrsluna og efasemdirnar um Kárahnjúkavirkjun áður en þeir greiddu atvkæði með virkuninni. Það er auðvelt að detta ofan í "hvað ef..." og láta sig dreyma.

Í raun finnst mér afglöp hennar það alvarleg að það er ástæða til að íhuga að hún segi af sér. En - og það er alltaf en. Halldór og Dabbi brutu líka gróflega af sér þegar þeir samþykktu Íraksstríðið. Ekki þurftu þeir að segja af sér. Árni Magnússon braut líka af sér. Ekki þurfti hann að segja af sér. Hann hætti að vísu - en af allt öðrum ástæðum. Björn Bjarnason hefur brotið lög. Ekki hefur hann sagt af sér. Valgerður braut ekki lög - en brást trausti og hélt aftur af upplýsingum sem hefðu getað haft úrslitaáhrif. Og þá kemur kynið við sögu. Fyrst karlarnir þurfa ekki að segja af sér, sama hvað þeir gera af sér, af hverju á konan þá að segja af sér? Það er þekkt í gegnum tíðina að konur í stjórnmálum eru dæmdar harðar en karlar og þurfa að segja af sér fyrir minni sakir. Þess vegna hiksta ég á Valgerðar málinu. Tel að þetta sé alveg afsagnarsök - en ekki sú fyrsta í þessari stjórn og þar sem hin afglöpin leiddu ekki til afsagnar finnst mér óhæft að konan sé látin fjúka. Afsökunarbeiðni finnst mér líka of mátlaus. Sem málamiðlun væri ég sátt við að frestað yrði að hleypa vatni á lónið þar til óháðir sérfræðingar hafi gert áhættumat - og að stjórnarandstaðan fái að velja hvaða sérfræðingar eru óháðir... Segir sig svo kannski sjálft en ég stóla líka á að Dóri, Valgerður og Björn Bjarna bjóði sig ekki fram í vor!

Rockstar

Eins og örugglega allir vita þá gengur t-póstur til styrktar Magna í Rockstar eins og eldur um sinu um netið. Þar er fólk hvatt til að vakna fyrr og kjósa, t.d. þau sem vakna kl. 7 gætu allt eins vel vaknað aðeins fyrr og kosið af fullum krafti. Í fyrstu útgáfu póstsins var sagt að kosningin endaði kl. 7 og fólk hvatt til að vakna hálftíma fyrr. Þetta var bara bölvuð vitleysa því kosningin endar kl. 5:50 og því þörf á að vakna dálítið mikið fyrr en venjulega. Þetta hefur þó greinilega verið lagað í seinni póstum.

Annars varð ég fyrir verulegum vonbrigðum þegar Supernova debutaði með Dilönu. Fyrir það fyrsta þá var lagið ekkert til að hrópa húrra fyrir og fyrir það næsta þá eru miðaldra kk rokkarar sem "skreyta" sig með ungum hálfberum kvk dönsurum fátt annað en pathetic... Dilana aftur á móti var dúndurflott eins og alltaf :) Ég eiginlega vona að öll sem mér finnst varið í lendi í öðru sæti... líka Magni. Fagmennskan hefur fengið á víkja líka á fleiri sviðum. Til er hljómsveitin Supernova sem nú stendur í ströngu við að fá að halda nafninu sínu...

En hér er pósturinn:
**********
Sæl veriði

Málið er að nú er strákurinn "okkar" búin að vera 2 vikur í röð í einu af 3 neðstu sætunum þrátt fyrir frábæra frammistöðu, og það eru afar miklar líkur á því að verði hann þar 3ju vikuna sé þetta búið hjá honum. Við viljum öll hjálpa honum að komast lengra, helst í úrslitaþáttinn 13. sept. Til að minnka líkurnar á því að hann verði sendur heim í næstu viku, verða allir þeir sem finnst "alveg frábært hvað honum gengur vel" en hafa aldrei gefið honum atkvæði sitt að taka á sig rögg og kjósa hann. Atkvæðagreiðslan fer fram aðfaranótt miðvikudaga á milli klukkan 02 - 06 um morguninn. Næst verður kosið aðfaranótt 30. ágúst .

Nú er ekki hægt að búast við að fólk almennt vaki alla nóttina til að kjósa hann, en þeir sem á annaðborð vakna um 7 leitið til að fara í vinnu eða skóla, gætu, án þess að leggja mikið á sig, vaknað aðeins fyrr, sest við tölvuna sína, á tæknilandinu Íslandi eru allflestir með tölvu og nettengingu, og kosið á - http://rockstar.msn.com/ - þar er hægt að kjósa eins oft og maður hefur úthald til og kostar ekki neitt.

Sérðu í anda íþróttaáhugamenn, sem hefðu tækifæri til að hjálpa landsliðinu í handbolta t.d. sleppa þvílíku tækifæri til að hjálpa þeim áleiðis !!!!!!!!! Nú erum við Íslendingar vön að styðja heilshugar við bakið á okkar fólki sem er að gera það gott á alþjóðavettvangi - svo gott fólk - brettið upp ermar og hjálpið Magna til að komast í úrslitaþáttinn , nú ef það tekst ekki getum við ekki sagt að við höfum ekki reynt !!!!!!!!!!!!

Með baráttukveðjum
Magna aðdáandi

Einu sinni var

Við höfum nú lokið við að mála alla gluggana á húsinu að utan!!! Tekið er á móti hamingjuóskum í kommentakerfinu. Einn girðingarstaur er líka orðinn fallega mahónílitaður og þá er bara restin eftir - og þakkannturinn. Gaman gaman :)

Annars held ég að fríið mitt sé búið þó ég sé í fríi til 1. sept. Note to self - fara fyrr í frí.... Við erum samt búin að hafa það fínt. Fórum í sumarbústað í Munaðarnesi (þar sem ég náði í kvef. Fórum líka í bústað í Kjósinni. Það var ansi ljúft. Ákváðum að gerast dugleg síðasta daginn og slógum grasið. Kipptum svo grindinni úr grillinu með heim til að þrífa hana. Það vakti mikla hrifningu hjá litla bróður helgina á eftir þegar hann fór í bústaðinn með alla fjölskylduna og uppgötvaði um kvöldmatarleitið að það var engin grind í grillinu.... En þá vorum við komin í gott yfirlæti út í Hrísey þar sem var stjanað þvílíkt við okkur að ég er orðin ennþá meira dekurdýr en ég var - og mátti nú eiginlega ekki við því. Í Hrísey var þvílík bongóblíða að við nenntum eiginlega ekki að gera neitt. Fórum í göngutúra á kvöldin þegar hitastigið var orðið hæfilegt. Skelltum okkur einu sinni á sjóinn. Veiddum ekkert en ég afrekaði að búa til stærsta marblett sem ég hef á ævinni fengið. Hann er mjög fallegur á litinn. Í Hrísey fengum við sólþurrkaðan saltfisk, heimatilbúinn. Þvílíkt góðgæti. Besti saltfiskur sem ég hef fengið og ekki spillir fyrir að við vorum aðeins með puttana í sólþurrkuninni.

Hríseyarferðirnar eru alltaf fyrirtaks jarðtenging. Þar fáum við tengingu við söguna og lífið í gamla daga. Þá föttum við (eina ferðina enn) hvað það er ótrúlega stutt síðan allt var öðruvísi. Einhvern veginn er til dæmis erfitt að ímynda sér hvernig lífið var áður en klósett komu til sögunnar... En það er víst ekki svo langt síðan. Við erum strax byrjuð að hlakka til að fara aftur næsta sumar :)

Chippendales og viðbrögðin

Ákvað að birta hérna pistilinn sem ég skrifaði um komu Chippendales. Hann birtist í Viðskiptablaðinu þann 9. ágúst. Verð að viðurkenna að ég fæ pínkulítið kikk út úr því hvað ég var sannspá um viðbrögð við komu þeirra - og hvernig Chippendales verða fyrirmyndar fulltrúar feðraveldisins. Dregur dálítið úr kikkinu að það var eiginlega algjör "no brainer..." Ef þú vilt sönnun, lestu þá endilega líka þessa pistla:

Ekki sama hvort um Jónu eða Jón er að ræða? eftir Ingunni Guðbrandsdóttur á Deiglunni.

Einn og hálfur tími af hreinum unaði... eftir Hauk Skúlason á Tíkinni.

Fullkomnustu folar heims á Íslandi eftir Erlu Margréti Gunnarsdóttur á heimasíðu Heimdallar.

Hérna kemur svo pistillinn minn:

Jafnrétti á fölskum forsendum
Að horfa á karlmennina í Chippendales strippa er betra en kynlíf. Þessu er haldið fram fullum fetum í frétt sem birtist á visir.is í síðustu viku. Margt fleira áhugavert er hægt að lesa í sömu frétt. Laura Bush, forsetafrú Bandaríkjanna, fór til að mynda á sýningu folanna í Las Vegas á dögunum og svo virðist sem sýningin sé fyrirtaks hjónabandsmarkaður því 11 dansarar úr Chippendales hafa gifst konum sem voru á sýningu hjá þeim. Það ber að taka fram að samkvæmt fréttinni eru ekki neinir aukvisar hér á ferð heldur fullkomnustu karlmenn í heimi.

Folar en ekki menn
Tilefnið af ofangreindum fréttaflutningi er að Chippendales munu halda sýningu á Íslandi nú í ágúst. Ef eitthvað er að marka fréttirnar er um þvílíka himnasendingu að ræða fyrir íslenskar konur, eða hvað? Áhugavert er að bera saman orðræðuna í kringum komu Chippendales við nektarsýningar kvenna. Með hástemmdum lýsingarorðum um ágæti á strippsýningu karla fá margir kærkomin mótrök í umræðuna um súlustaði. Nú er hægt að benda á fréttina á visir.is og segja að karlmenn séu hlutgerðir, um þá sé talað sem fola en ekki menn, þeir séu hér í þeim eina tilgangi að fullnægja kynferðislegum löngunum kvenna og þar fram eftir götum. Nú er ég ekki ein af þeim sem gleðst yfir komu Chippendales heldur þvert á móti því ég tel að jafnrétti felist ekki í því að koma öllum í jafnslæma stöðu. Ég lít samt sem áður ekki á komu Chippendales sömu augum og þann iðnað sem byggir á sölu kvenna.

Auga fyrir auga
Í augum sumra snýst jafnrétti um kynblindu en í raun verður kynblinda á tíðum til þess að misréttið nær að þrífast vegna þess að mismunandi staða kynjanna í þjóðfélaginu er ekki tekin með í myndina. Í því ljósi er vert að skoða orðræðuna í kringum komu Chippendales. Borgaryfirvöld hafa sett alls kyns reglur til að koma í veg fyrir súlustaði í miðbænum. Einkadans er bannaður samkvæmt lögreglusamþykkt og ekki á að veita nýjum stöðum vínveitingarleyfi. Þetta er þverbrotið og nú spretta súlustaðir upp eins og gorkúlur í miðborginni. Á sama tíma eru Chippendales fluttir til landsins undir því yfirskyni að skemmta konum landsins. Aðstandendur sýningarinnar eru ekki af verri endanum en það eru Sena, Vífilfell (Viking Light) og útvarpsstöðin Létt Bylgjan. Sýningin er auglýst í sjónvarpinu og eflaust verður reynt að kynda undir stemninguna með margvíslegum hætti. Chippendales sýningin verður að félagslegum viðburði kvenna til að standa upp á stólum og öskra í tilraun til að ná fram örlitlu jafnrétti með að gera karlmönnum það sem karlar hafa gert konum í gegnum tíðina. Auga fyrir auga, tönn fyrir tönn og því skal stemningin vera sýnileg. Ferðir karlmanna á súlustaði eru hins vegar einkaathöfn framin í skjóli ósýnileika. Viðskiptavinir súlustaða sjást aldrei í umræðunni. Fréttamenn dirfast ekki að sýna karlkyns kúnnann því hann skal njóta friðhelgi og nafnleyndar.

Hjónabandsmarkaður eða strippsýning?
Umgjörðin í kringum sýningu Chippendales ber keim af hefðbundnum hlutverkum og valdatengslum kynjanna. Greinilega er ekki gert ráð fyrir því að konur fái sérstaka ánægju út úr því að stunda kynlíf og aðstandendur og fréttamenn því ekki feimnir við að skella því fram að sýningin sé betri en kynlíf. Einnig er hjónabandi blandað inn í sýninguna og bent á að nokkrir karlanna hafi gifst konum sem þeir hittu á sýningunni. Ekki verður betur séð en þarna eigi að höfða til þeirrar mýtu að æðsti draumur hverrar konu sé að giftast og lifa hamingjusöm til æviloka með hinum eina sanna draumaprinsi. Chippendales dönsurunum er síðan lýst sem fullkomnustu karlmönnum í heimi, kannski til að undirstrika að hver kona geti verið stolt af að kynna einn slíkan fyrir mömmu og pabba sem tilvonandi eiginmann?

Leið til að viðhalda völdum
Koma Chippendales merkir þrennt í mínum huga. Í fyrsta lagi munu þeir verða notaðir sem afsökun feðraveldisins til að viðhalda þeirri kúgun sem konur verða fyrir í gegnum kynlífsiðnaðinn. Í öðru lagi verða þeir notaðir til að ýta undir þá þróun að gera karlmenn í auknum mæli að neysluvöru sem hægt er að græða peninga á að selja aðgang að. Í þriðja lagi geta þeir hugsanlega opnað augu einhverra karlmanna fyrir því hvers vegna það er skaðlegt mannlegu samfélagi að koma fram við fólk sem markaðsvörur en ekki manneskjur og að gera kynlíf að neysluvöru. Í öllu falli er ljóst að koma Chippendales er ekki tengd raunverulegri jafnréttisbaráttu heldur öllu frekar feðraveldi sem veit að það verður að þykjast vilja jafnrétti konum til handa. Leiðin sem feðraveldið velur til að viðhalda völdum sínum er að slá ryki í augu viðmælenda með því að ýta konum í þá átt að taka upp skaðlega hegðun karlaveldisins þótt vitað sé að sú hegðun sé á allt öðrum forsendum og með allt önnur valdatengsl en verslun karla með konur.

For the record

Ég er femínistabelja og það verður að segjast eins og er að maðurinn minn er mjög óheppinn!

Málefnaleg gagnrýni?

Er ekki týpískt að fá kvef loksins þegar ég var komin út úr bænum??? Á degi nr. 1! Mæli ekki með því að sitja hálf upp úr heita pottinum ef hann er of heitur. Gæti þýtt að fólk þurfi að bruna aftur í bæinn í staðinn fyrir að fara út í Hrísey... en Hríseyjarferðin bíður betri tíma. Heilsan að skríða saman og allt í gúddí :)

Mæli með að allir kíki inn á bloggið hjá www.byltingarsinni.blogspot.com og horfi á videoið sem er þar. Alveg óborganlegt. Tær snilld.

Það virðist ekkert lát á fólki sem er mjög umhugað um að gera Femínistafélaginu upp skoðanir. Einn þeirra birtist sem gestapenni inn á www.tikin.is og heitir hann Haukur Skúlason. Því miður veit ég ekki hvernig ég get haft upp á Hauki til að leiðrétta þessa villu og svíma sem hann veður í... en greinina hans er að finna á: http://www.tikin.is/tikin/leitarnidurstodur/frettir/?cat_id=20827&ew_0_a_id=223973. Við Hauk er það helst að segja að áður en hans pistill birtist var ég búin að fara í viðtal um Chippendales á Rás 2, skrifa pistil um komu þeirra í Viðskiptablaðið, blogga um þá og skrifa inn á femínistapóstlistann. Allt sem Haukur skrifar um FÍ ætti því að dæma dautt og ómarktækt og setja spurningamerki við tilgang Hauks. Hvaða hagsmuni hefur hann af því að sverta orðspor FÍ og hvernig dettur honum í hug að gera slíkt án þess að kynna sér málið?

Hef tekið eftir því upp á síðkastið að það poppa upp af og til pistlar á tíkinni sem virðast skrifaðir í þeim eina tilgangi að rakka Femínistafélagið niður. Því miður er gagnrýnin sem birtist í pistlunum sjaldnast byggð á málefnalegum grunni heldur eru félaginu (og félagsfólki) gerðar upp skoðanir trekk í trekk. Mér finnst þessi þróun leiðinleg. Femínistafélagið er þverpólitísk samtök og því í raun óskiljanlegt hvers vegna hver hægri sinnaður einstaklingurinn á fætur öðrum telur það vera sitt hlutverk að stilla FÍ upp sem hverjum öðrum pólitískum andstæðingi. Á þessu eru þó ánægjulegar undantekningar, sem betur fer, t.d. heyrði ég Hönnu Birnu tala vel um Femínistafélagið í viðtali um daginn :) en ég man ekki eftir að hafa séð fjallað á jákvæðum nótum um FÍ á tíkinni. Mér detta þó í hug mörg atvik þar sem það hefði verið vel við hæfi - til dæmis allar aðgerðir FÍ sem miða að því að fá markaðinn til að virka með því að gera hann gagnvirkan á milli neytenda og fyrirtækja. Frelsið og frjálshyggjan eiga töluvert mikið undir því að geta komið á þessari gagnvirkri. Ég vona allavega að þau sem ákveða að skrifa neikvæða pistla um FÍ ákveði að kynna sér málin fyrirfram og grennslast fyrir um hvaða skoðanir við höfum áður en okkur eru gerðar upp skoðanir - sem við alls ekki höfum - og það notað til að sverta félagið. Málefnaleg gagnrýni er hins vegar velkomin - eða allaveg umborin ;)

Mamma mín er femínisti... væri þetta víst í dag!

Andstaðan er efni Viðskiptablaðspistilsins að þessu sinni... Mjög áhugaverð stúdía og uppáhaldsmyndina mína sjáið þið hér!

Fleiri gullkorn

Hér er eitt frá One Angry Girl:

“Ég er ekki femínisti, en...
Ég kann að meta réttinn til að aðstoða við að kjósa mína þjóðkjörnu fulltrúa. Ég nýt þess að geta valið um að vera í buxum eða stuttbuxum ef ég vill. Ég er ánægð með að mér var leyft að læra að lesa og skrifa. Það getur verið mjög hagkvæmt að stjórna hversu mörg börn ég vil eignast. Það er hrikalega gagnlegt að geta opnað bankareikning og eiga eignir á mínu nafni. Mér finnst gott að vita að eiginmaður minn eða kærasti hefur ekki lagalegan rétt til að lemja mig. Það er virkilega flott að eiga sjálf peningana sem ég vinn mér inn.”

Íslenskað af yours truly þar sem ég ætlaði að nota þetta í pistli en hætti svo við...

Hvað hefur femínismi ekki gert?

Sumir hitta beint í mark:

"Feminism has fought no wars. It has killed no opponents. It has set up no concentration camps, starved no enemies, practiced no cruelties. Its battles have been for education, for the vote, for better working conditions.. for safety on the streets... for child care, for social welfare...for rape crisis centers, women's refuges, reforms in the law."

(If someone says) 'Oh, I'm not a feminist,' (I ask) 'Why? What's your problem?'"

- Dale Spender, author of For the Record: The Making & Meaning of Feminist Knowledge, 1985

Gloria Steinem í The L-Word

Horfði á The L-Word í gærkvöldi. Mér skilst að þessir þættir séu ekki í uppáhaldi hjá lesbíum svona almennt, enda stútfullir af staðalímyndum og karllægum forsendum. Ég er á báðum áttum þegar kemur að þáttunum. Að hluta til er þetta stórt skref fram á við; sjónvarpsþáttur um lesbíur þar sem þeim leyfist að sýna hvor annarri blíðuhót. Á hinn bóginn gengur þátturinn fulllangt í ástarsenunum og minnir frekar á "lesbíuklám" sem er framleitt fyrir gagnkynhneigða karlmenn frekar en nokkuð annað. Þetta dregur töluvert úr þeim árangri sem þættirnir gætu annars hafa náð. Nokkurs konar eins og karlaveldið hafi gefið leyfi "já þið megið en bara ef það verður fullt af sætum stelpum að stunda kynlíf sem við getum dundað okkur við að horfa á.... Nennum auðvitað ekki að horfa á einhverjar lesbíur nema þær séu naktar að kyssa hvor aðra..."

Þess vegna varð ég svolítið hissa að sjá Gloriu Steinem í þættinum í gær. Hún lék sjálfa sig snilldarvel, að sjálfsögðu. Þegar leið á þáttinn kom kannski betur í ljós hvers vegna hún var þarna en það var sýnt frá henni í ræðustól - að blammera Bush... Aha pólitískur áróður beint í æð - greinilega femíníski vinkill þáttarins að skína í gegn þarna.

Kárahnjúkar

Það er afar áhugavert að fylgjast með fréttaflutningi af "mótmælum" við Kárahnjúka og umræðum á póstlista náttúrverndarsinna. Ég hitti til dæmis eina stelpu um daginn sem var að lýsa stemningunni upp á Kárahnjúkum þar sem allir voru voða jollý í gönguferðum um svæðið og í jóga og hugleiðslu þess á milli. Af fréttum að dæma eru þetta hins vegar stórhættulegt fólk, víkingasveitin í viðbragðsstöðu, löggan með auka mannafla og mikinn viðbúnað, beitir fólk harðræði við handtökur, lokar leiðum og gerir mat upptækan. Áhrif fjölmiðla sem fjórða valdsins koma berlega í ljós þegar fréttaflutningurinn er skoðaður því allt sem heitir einhver ólæti, viðbúnaður lögreglu og þess háttar er hypað upp og hitt er vart sýnilegt. Toppurinn kannski að segja að engir mótmælendur hafi verið á tónleikum Sigur Rósar... Ætli það hafi þá ekki bara allt verið starfsmenn Landsvirkjunar??? Eða hvað ætli fólkið hafi annars verið að gera á þessum slóðum í skipulögðum gönguferðum???

Skilaboðin eru allavega mjög einhliða - best fyrir þegnana að halda KJ og vera ekki að skipta sér of mikið af... þannig virkar lýðræðið best.

Í fríinu...

Er lítið í tölvunni þessa dagana - er komin í 50% frí og framkvæmdir á húsinu ofarlega á blaði. Fíni sófinn kominn í gagnið eftir að Húsgagnahöllinn sendi loksins mann á þriðjudaginn til að setja hann saman (ég byrjaði að hringja í þau á fimmtudeginum...). En sófinn er frábær og stendur fyrir sínu. Allt annað líf að horfa á sjónvarpið núna :) Gerði heiðarlega tilraun til að horfa á Rockstar í beinni í gærkvöldi. Það mistókst vegna bilunar í gervihnattasambandi við USA. En Magni virðist vera nokkuð safe með að vera ekki sendur heim á næstunni. Annars vorum við að tala um þetta í gærkvöldi í afmæli hjá litla bróður - er ekki hinn raunverulegi sigurveigari sá sem lendir í öðru sæti??? Vill einhver í alvörunni vera í hljómsveit með Tommy Lee?

Náðum að nýta sólardagana 2 til að mála megnið af gluggunum á húsinu. Enn eru eftir 5 litlir gluggar, hringglugginn og 2 stórir gluggar. Vona að það kom sól aftur fljótlega svo við getum klárað. Húsið hálf skondið í augnablikinu með mislitum gluggum! Svo er bara þakkannturinn eftir og að bera á útihurðarnar og þá er viðhaldið búið og framkvæmdir við áframhaldandi byggingu geta haldið áfram... :) Eins og segi alltaf - þetta er 10 ára plan.

Er að reyna að vera í fríi frá öllu öðru en það gengur illa. Allt of margt í gangi og ég vil auðvitað ekki missa af neinu :) Karlahópurinn á leið til Eyja með Nei átakið. Djö... standa þeir sig vel. Svo er auðvitað koma Chippendales sem vekur mikla athygli og umræðu. Svo er tekjublað Frjálsrar verslunar, aukin tekjumunur o.s.frv. o.s.frv. Af nógu að taka!

Svo vona ég að Betan fari að koma í bæinn. Hrikalegt að vera skilin eftir ein og yfirgefin í bænum í langan langan tíma! Sóley reyndar bjargaði málum með því að koma til landsins í júlí en nú er hún farin aftur :( Skil ekki af hverju fyrirmyndarfemínistarnir geti ekki bara verið alltaf á landinu - og í Reykjavík...

1 - 0 fyrir RUV

Af hverju er fólk hissa á ofbeldi í miðborginni? Karlmennskuímyndin er hlaðin ofbeldisdýrkun út í gegn. Sjá meðfylgjandi mynd úr leikfangabæklingi og svo eru það auðvitað blessuðu tölvuleikirnir...

En að öðru. Það verður fróðlegt að sjá hvað löggan gerir við Geira á Goldfinger og co eftir næturævintýrið þeirra. Ég hef þvílíka ofurtrú á yfirvaldinu að ég giska á að ekkert verði að gert frekar en venjulega. Fréttaflutningur NFS af málinu var hlægilegur í besta falli. Svo sem ekkert að efnisinnihaldinu en myndbirtingin sem fylgdi með - hvað hafði hún með fréttina að gera? Nákvæmlega ekkert. Virkaði eins og ein stór auglýsing fyrir súlustaðina. Kredibilitíið beið hnekki... en það er svo sem ekki mikið þegar kemur að fréttum sem tengjast súlustöðum á einhvern hátt. Sé alltaf fyrir mér einhverja miðaldra karla sem pissa næstum á sig af spenningi yfir að sjá hálfbera kona sveifla sér á súlu. Og hvar eru myndirnar af kúnnunum? RUV bjargaði þó kvöldinu með fínni frétt um málið - og myndbirtingu sem hæfði fréttinni. 1 - 0 fyrir þeim!

GARG

Keypti sófa í afmælisgjöf handa mínum heittelskaða. Voða fínan tveggja sæta lazyboy (and -girl) sófa til að vera með fyrir framan sjónvarpið. Í sjálfu sér ekki í frásögur færandi nema vegna þess að við þurfum sjálf að setja bakið á hann. Sendibílstjórinn sagði að þetta væri ekkert mál - bakið myndi bara renna á og svo var lítil sveif sem þurfti að setja niður. Ok - nú erum við búin að reyna og reyna og reyna en ekkert gengur. Það sem öllu verra er - þau hjá Húsgagnahöllinni lofuðu að koma hingað og kíkja á þetta og smella þessu í lag - ég hringdi fyrst kl. 7 í gær. Þá var mér sagt að hringja aftur í dag, sem ég og gerði. Hringdi kl. 11 og þá var mér sagt að innkaupastjórinn myndi koma en örugglega ekki fyrr en eftir hádegi. Nú er kl. rúmlega 7 og hann er ekki kominn og ekki búinn að hringja! Og ég er orðin pissed... vil fara að nota sófann!!!!!

Gott að vera rík?

Hér er linkur á rosafínan pistil eftir Evu Maríu inn á tikin.is http://www.tikin.is/tikin/leitarnidurstodur/frettir/?cat_id=20827&ew_0_a_id=107752.

Fór í viðtalið á RUV áðan - ekki mitt besta. Þarf greinilega að undirbúa mig aðeins öðruvísi - back to the basics eins og kona segir :) En svo er kannski bara gott að vera mistæk... þó ég væri alveg til í að vera það ekki!

Það var bent á það á femínistapóstlistanum hvað það væri óþolandi að karlar skipa alltaf efstu sætin yfir tekjuhæstu einstaklingana. Jamm tek undir það. Þangað til hlutirnir komast í lag læt ég mig dreyma um að vera fáránlega rík. Spáið í hvað ég gæti gert við peningana... myndi ekki kaupa mér snekkju en sé fyrir mér alls kyns skemmtilega auglýsingar - út um allt!!!! Svo ekki sé nú talað um eigin fjölmiðil og fleira gott sem ég myndi fjárfesta í - allt með eitt markmið að leiðarljósi.

Betra að horfa en gera????

Þá eru Chippendales að koma til landsins - fluttir inn af karlmanni og munu eflaust virka sem fínt aliby í umræðunni um súlustaði í framtíðinni... "já en Chippendales komu og þá fóru næstum 1000 konur og öskruðu og görguðu yfir þeim þannig að þetta hlýtur að vera í lagi!" Verður fróðlegt að fylgjast með umræðunni í kringum þetta en "fréttin" um þetta inn á visir.is er í meira lagi undarleg. Þar eru karlarnir ekki fólk heldur folar og þar að auki fullkomnir. Það er sem sagt ekkert verið að fela það að hinn fullkomni karlmaður er kjötstykki en ekki manneskja... skv fréttatilkynningunni. Ekki mér. Ónei... Svo er því líka haldið fram að konur alls staðar að úr heiminum segi að sýningin sé betri en kynlíf. Er þetta ekki áfellisdómur yfir frammistöðu bólfélaga þeirra í rúminu????

Allavega - fer væntanlega í Síðdegisútvarpið á eftir að ræða þetta.

Wonder why?

Hér er brot úr bókinni Doing Leadership Differently eftir Amanda Sinclair (bls 178):

For the few women in leadership roles, there has been no discernible reinforcing relationship between being a leader and being a woman. Indeed, being 'seen' as a woman diminishes one´s leadership. Behaviours which draw attention to sex - such as displays of overt femininity, being pregnant, references to family, wearing colorful or expressive clothes, lobbying for women or adopting explicit feminist stances - typically diminsh a woman's leadership potential in the eyes of observers. This dilemma gives aspiring female leaders an extra handicap and strips them of the potentially reinforcing source of identity and esteem which many male leaders continue to enjoy.

This explains why women, consciously and unconsciously, have used all sorts of strategies to conceal gender and sexuality, to camouflage, to blend in rather than stand out. By dressing in particular ways, by playing along with the jokes, by not supporting other women, by not allowing oneself to be associated with 'women´s issues' or by seeding to minimise one´s absences from the workplace for maternal or family reasons, women have sought to reduce the visibility and the impact of their gender and their sexuality.

But this strategy is self-defeating, as shown in this and other research. Women´s effort to conceal sex expose them to charges of 'trying to hard to be one of the boys'. And the constant effort of concealment deprives women of an important part of identity, a sense of self which rightly should be a central and reinforcing component of their leadership. Nor has the camouflage strategy produced other sought-after outcomes. It has not enabled many more women to assume leadership positions or facilitated a recognition and celebration of range of approaches to leadership among women.

********
Mér finnst afar áhugavert að pæla í svona hlutum.

Á hvalbaki

"Besta mynd ársins heitir Whale Rider. Kvikmyndaformið var fundið upp fyrir svona myndir!" Ain´t it Cool News.

Skil ekki hvernig þessari mynd tókst að fara fram hjá mér á sínum tíma. Mætti segja að þetta væri hin fullkomna mynd ;) Myndin er um unga stúlku, Paikeu, sem er frumbyggi á Nýja-Sjálandi. Feðraveldið er allsráðandi - en Paikea þekkir sitt hlutverk þrátt fyrir að vera stelpa... Myndin er femínísk út í gegn, falleg, sorgleg, róleg, spennandi og allt þar á milli en fyrst og fremst er þetta einstaklega mannleg mynd sem nær að skapa trúverðugar persónur og skilja eftir sig sterk hughrif. Ef einhver vill forvitnast meira um myndina þá er slóðin á heimasíðuna http://www.whaleriderthemovie.com.

Myndin hlaut fjölmörg verðlaun og stelpan sem leikur Paikea var útnefnd til Óskarsverðlauna sem besta leikkona í aðalhlutverki - yngsti leikari sem hefur hlotið þá tilnefningu - og skrýtið að hún skuli ekki hafa unnið. Mæli allavega með þessari mynd næst þegar þið farið út á leigu...

Úr ýmsum áttum

Mæli með Óþekkt síðasta laugardags (hægt að skoða á visir.is - veftv), sérstaklega viðtalinu við Gísla Martein sem var óborganlega fyndið. Gaman að sjá viðsnúning á hefðbundnum spurningum til kvenna - og allir þátttakandur héldu andlitinu í gegnum þetta skemmtilega viðtal :) Það er ekki að ástæðulausu að Óþekktin er uppáhaldssjónvarpsþátturinn minn!

Annars er nóg búið að vera að gera við að heimsækja krakka í vinnuskólanum - og þannig verður það út vikuna. Það er bæði gaman og áhugavert að hitta krakka á þessum aldri og spjalla við þau um jafnréttimál en hóparnir eru eins misjafnir og þeir eru margir. Stundum kem ég svífandi út og hugsa um hvað þetta væri lítið mál að koma á jafnrétti ef krakkarnir fengju almennilega jafnréttisfræðslu í grunnskóla - og stundum hugsa ég um hvað er hrikalega langt í land... Ég vona bara að þetta skilji eftir nokkrar spurningar í kollinum á krökkunum og að þau taki eftir ólíkum hlutum í umhverfinu í framhaldinu. Það er allavega ekki spurning að þetta kveikir slatta af spurningum í mínum kolli.

En jæja - best að drífa sig í labbitúr fyrir háttinn. Hér kemur uppskrift úr matarboði kvöldsins - hrikalega gott og auðvelt að búa til.

* Kjúklingabringur skornar í bita, marineraðar í Satay sósu og síðan steiktar á pönnu.
* Búið til kúskús - maraccoan spices og sultanas (e-ð svoleiðis) - útbúið skv leiðbeiningum á pakka.
* Blandað saman kúskús, spínati, niðurskornum sólþurrkuðum tómötum, fetaosti, ristuðum graskers- og sólblómafræjum, rauðlauk og kjúkling.

Þá er þetta tilbúið. Gott bæði nýtilbúið sem og kælt. Má borða eintómt en ef fólk vill meðlæti er mango chutney og brauð fínt.

Vantar 75 stig til að verða fullkomin kona!

Á skalanum 100 til mínus 100 fæ ég 25 konustig. Ég hreinlega dýrka BBC fyrir sína vönduðu grínþætti um grundvallarmuninn á milli kynja - og prófin þar í kring.

Ef þú vilt prófa: http://www.bbc.co.uk/print/science/humanbody/sex/

Ath - niðurstöður breytast með auknum gáfum. Veit ekki hvort það breytir fólki í meiri konur eða karla...

Veðurmaðurinn ógurlegi

Horfði á mynd sem heitir The Weather Man með Nicolas Cage í aðalhlutverki í gær. Myndin var á topp 10 listanum út á dvd-leigu (er ekki videoleiga orðið úrelt orð???) . Myndin er um hvernig hægt sé að finna tilgang í lífinu í heimi skyndibita. Nokkuð áhugavert efni og passar kannski ágætlega að setja myndina í skyndibitaumgjörð... eða ekki. Myndin var frekar niðurdrepandi og skyndibitaleg - eins og margt sem kemur frá Kristþyrnisskóg (orðabækur yndislegt fyrirbæri). Merkilegt nokk en kameltá var tekin fyrir í myndinni (sælla minninga eftir umræður á póstlistanum) - í samhengi við 12 ára stúlku veðurmannsins ógurlega. Fannst sum atriðin í kringum hana svolítið vafasöm, þ.e. skil að þetta efni geti verið feðrum sem eiga dætur sem eru að komast á kynþroskaaldurinn hugleikið en ef lausnin felst í að þeir fái nánast hjartaáfall og klæði þær upp í stutt pils og háhæluð stígvél til að leysa vandann þá...? Já, þá hvað? En hennar vandamál leysast örugglega öll við að verða snyrtileg og vel til höfð svo henni sé ekki strítt fyrir sjónmengandi áhrif á umhverfið!!!

Segi bara eins og Tommy Lee - þetta var svona ho-hum.

Mæli frekar með The Corporation, Hotel Ruwanda, Vera Drake eða Brokeback Mountain!

Rockstar - taka 2

Ætla alls ekki að gera það að vana að vaka og horfa á Rockstar - sérstaklega ekki þegar ég þarf að vakna upp úr kl. 7. En... fyrst ég endilega þurfti að vaka og átti eftir að slökkva á tölvunni er þá ekki tilvalið að blogga á meðan þetta er enn ferskst í minni? Giska á að Dilana eða Lukas vinni. Kemur einhver annar til greina? Storm á góða spretti - hún tekur sér pláss og er soldill töffari. Mörg hinna fannst mér alveg eins geta hafa verið að syngja í söngleik. Vantar slatta upp á Rockstar performance hjá mörgum hvað varðar sviðsframkomu - þó margar raddirnar séu flottar og öflugar. Magni var mun betri núna en síðast. Eftirminnilegasta mómentið úr þessum þætti er þó frá Alvarez (heitir hún það ekki?). Aðspurð um hvort hún hefði hlustað á tónlist rokkstjarnanna í Supernova sagðist hún hafa heyrt um hana - og toppaði svo með að segja að hún hefði verið með bleiju þegar þeir voru að gefa sitt stuff út. Bráðfyndið!

Besti parturinn af þættinum er þó að þetta er á Mayan. Þar var alltaf geðveikt gaman! :)

Allir á flótta

Á fréttavef RUV er fyrirsögnin:

Flótti yfirvofandi frá ISG?

Ég hélt að um væri að ræða frétt um Samfylkinguna en fannst hálf fáránlegt að klína þessu öllu á Ingibjörgu Sólrúnu eina ferðina enn... Þegar fréttin er skoðuð kemur í ljós að hún kemur hvorki Ingibjörgu Sólrúnu né Samfylkingunni neitt við heldur er fjallað um starfsmenn IGS - sem er allt annað en ISG!

Annars er þetta búinn að vera ágætur dagur. Fór í hádeginu og spjallaði um jafnréttismál við krakka í unglingavinnunni. Var miklu lengur en til stóð - vegna rigningar. Mjög skemmtilegur hópur og alltaf gaman að tala við unglinga sem sjá fáránleikann í hversdagslífinu... þá meina ég auðvitað aðallega í launamun, verkaskiptingu, kynjuðum leikföngum, karlrembulegum auglýsingum, o.s.frv.... Sé alveg fyrir mér hvað við yrðum fljót að ná jafnrétti ef kynjafræði væri kennd einu sinni í viku í 8. , 9. og 10. bekk! Það væri draumur í dós.

Rockstar

Nú eiga allir að kjósa Magna af því að hann er Íslendingur. Enginn segir að það eigi að kjósa hann af því að hann sé hæfastur eða bestur - bara af því að hann er Íslendingur. Hvað segja "ég-er-á-móti-kvóta" fólkið um það? Er það ekki niðurlægjandi fyrir Magna greyið ef hann kemst áfram bara vegna þess að hann er Íslendingur en ekki vegna þess að hann er hæfastur????

Bara spyr. Finnst þessi þáttur annars pínku skemmtilegur... fylgdis með fyrri seríunni! Hef oft spáð í af hverju ég er jákvæðari út í þetta raunveruleikasjónvarp heldur en þætti eins og t.d. Top Model, Swan o.fl. Hallast helst að því að það sem mér finnst jákvætt við þessa þætti er að þarna er alvöru hæfileikafólk að keppa sín á milli. Það sem "vantar" í þessa þætti er niðurlægingin. Dómararnir koma með alvöru komment - stundum slæm og stundum góð en þeir reyna að setja slæmu kommentin fram á kurteisan hátt en setja sig ekki í þær stellingar að gera lítið úr eða niðurlægja. Það er stærsti plúsinn við þáttinn. Sko - það er hægt að gera raunveruleikaþátt án þess að höfða til lægstu hvata :) Fólki finnst gaman að sjá talent að verki!

Ekki það að þátturinn sé gallalaus... en ég ætla að halda göllunum fyrir mig í bili.

Gleði

Í dag er ég líka glöð - Betan á afmæli og Kjarnafæði ætlar að breyta auglýsingunum sínum :)

Samúðarkveðja

Í dag er ég sorgmædd. Í dag fylgir frænka mín bróður sínum til grafar. Á sex árum er hún búin að sjá á eftir 3 sonum sínum, mömmu og núna bróður. Þetta er of mikið. Stundum er lífið of ósanngjarnt.

Many faces of Iceland

Sumt er fyndnara en annað. Var ég nokkuð búin að blogga um auglýsingu Air Iceland í Leifsstöð? Þar getur að líta auglýsingu með textanum: Discover the many faces of Iceland.

And the many faces of Iceland are????? Júmm, ljóshærð ung kona með blá augu. The many faces of Iceland = In Iceland we have 50.814 blonde, blue eyed women! Svona er gott að kynna Ísland ;)

Frami án hjálpardekkja?

Á deiglunni.com - (uppáhalds vefritinu mínu þessa dagana) er grein um frama kvenna í atvinnulífinu. Titill greinarinnar er "Frami án hjálpardekkja". Höfundur er afar þreytt á vinstrisinnuðum femínistum sem vilja eintóm hjálpardekk til að koma sér áfram... Ég er hins vegar orðin afar þreytt á konum sem átta sig ekki á að þetta er ekki hægri/vinstri. Þessi endalausu skrif um frama kvenna og gagnrýni á t.d. umræðuna (eða rússnesku samþykktina) um kvóta á hlutfall kynjanna í stjórnir fyrirtækja er ekki á réttum forsendum. Fyrir það fyrsta þá var ráðstefnan á Bifröst hvorki haldin undir formerkjum femínista né vinstri sinnaðra. Þar voru einmitt fjölmargar konur sem eru framarlega í atvinnulífinu - kvenkyns stjórnendur á öllum aldri og væntanlega úr öllum flokkum.

Það er eitt að vera á móti kvótum - en það er annað að einblína öllum sínum kröftum í að ætla að þau sem séu hlynnt kvótum séu bara vinstrisinnaðir einstaklingar eða að allir vinstrisinnaðir einstaklingar séu hlynntir kvótum. Þegar umræðan er komin á þeim nótum þá er ekki verið að fjalla um málið á málefnalegum grundvelli heldur bara fara ofan í skotgrafir og halda að það séu til svona vinstri/hægri lið sem geti ekki verið sammála um neitt - eða að allir innan vinstri liðsins séu sammála og allir innan hægra liðsins séu sammála.

Tökum kvótann sem dæmi. Er hægri sinnað fólk á móti kvóta almennt? Það hafa ekki heyrst nein mótmæli frá hægra fólkinu um þá kynjakvóta sem eru við líði í samfélaginu.

1. Það er kvóti í eina nefnd á vegum ríkisins - jafnréttisráð. Þar sitja núna slatti af körlum í krafti kyns síns. Hvar eru mótmælin, niðurlægingin, þreytan? Eða er þetta öðruvísi kvóti því jafnréttismál koma körlum jafnmikið við og konum?

2. Fæðingarorlof - þar er kvóti. 3 mánuðir fyrir konur, 3 fyrir karla og 3 sem má skipta. Þetta er samþykkt í tíð hægri stjórnar. Af hverju er þessi kvóti betri en aðrir kvótar?

Svo er líka í lagi að setja hlutina upp eins og þeir eru. Eins og staðan er í atvinnulífinu í dag eru karlar með hjálpardekk, forgjöf og þjófstart. Allt í krafti kyns. Konur eru ekki með nein hjálpardekk, enga forgjöf og þjófstarta ekki í krafti kyns - heldur þvert á móti, þær eru gagnrýndar á öðrum forsendum, metnar á öðrum forsendum og hreinlega stimplaðar út af borðinu vegna kyns - ekki hæfileikaskorts.

Hvar er öll umræðan frá körlunum um hversu niðurlægjandi það sé að þeir séu í sínum stöðum í krafti kyns? Hvar er öll umræðan frá körlum um að þeir þurfi ekki hjálpardekk og vilji útrýma kynjamisrétti því þeir sætti sig bara ekki við að keppa ekki á jafnréttisgrundvelli? Sú umræða er bara ansi lágvær og hreinlega bara fjarverandi úr íslensku atvinnulífi. Samt sem áður eru karlar þar með yfirgnæfandi meirihlutavald sem er ekki tilkomið vegna þess að þeir séu svona margfalt hæfileikaríkari og klárari en konur. Svo keppast sumar konur við að tala um að konur þurfi ekki hjálpardekk... þær komist á sínum eigin forsendum. Jamm - en konur eru ekki með hjálpardekk - en karlarnir eru himinlifandi ánægðir með sín!

Brokeback Mountain

Jæja þá er ég loksins búin að sjá Brokeback Mountain. Er enn harðari á því en áður að það borgar sig ekki að vera með miklar væntingar fyrirfram - það veldur nánast alltaf vonbrigðum... ég var sem sagt ekki eins hrifin af myndinni og ég hélt að ég myndi verða - eða ætti að vera. Fyrir það fyrsta þá fannst mér hún óhemju langdreginn, sérstaklega fyrri helmingurinn. Fyrir það næsta setti ég nokkur spurningamerki við hvernig sambandið á milli kúrekanna hófst. Þegar fyrstu ástarsenunni lauk spurði ég Grétar hvort þetta hefði verið ástarsena eða nauðgun. Er það á hreinu??????? Hafði ekki tíma til að kíkja á þetta aftur þar sem skila þurfti spólunni um leið og áhorfi lauk til að ná fyrir lokun.

Fannst ástarsenurnar líka soldið skrýtnar á köflum - fannst þeir yfirleitt frekar ofbeldisfullir eða harkalegir í kynlífinu/kossum en þegar sýnd var ástúð og kærleikur var það í kúri og þessi háttar - eða allavega stoppað áður en "of" langt var gengið. Það er svona eins og það hafi átt að tryggja að karlmönnum myndi nú örugglega ekki þykja fallegt að sjá 2 karla saman (hvað þá konum...). Svo er auðvitað týpískt að í Hollywood ástarmynd um homma þurfi að sýna konurnar þeirra nánast naktar - til hvers var það?

En auðvitað var margt gott í myndinni líka. Ég sat samt ekki eftir myndina með verk í hjartanu yfir hvað þessar aðstæður eru ömurlegar og hvað mörg líf fara forgörðum vegna fordóma og gagnkynhneigðum yfirráðum. Fannst á köflum að túlkunin næði frekar grunnt og áhorfandanum eftirlátið að fylla of mikið inn í eyðurnar - því það var vel hægt að fylla út í eyðurnar á hómófóbískan hátt á köflum. Eins fannst mér ekki takast að byggja upp þessi sterku tengsl/ást þeirra á milli í fyrri hluta myndarinnar sem gerði það að verkum að ég var frekar lengi að tengjast persónunum og fá samúð með þeim. Þetta fannst mér hins vegar takast mun betur í seinni hlutanum.

Myndin náði samt vel að sýna hvað hommafóbía og fordómar út í samkynhneigð eru mannskemmandi öfl sem vonandi tekst að útrýma. Það er nógu erfitt fyrir fólk að koma út úr skápnum í samfélagi eins og okkar þar sem baráttan er töluvert lengra á veg komin og fordómarnir minni en nánast ómögulegt á svæðum þar sem hommar eru lamdir og drepnir ef upp um þá kemst. Þannig er samt staðan enn sums staðar. Ég var að reyna að rifja upp hvernig þetta var í mínu ástkæra rauða sveitafylki, Kansas. Komst þó að því að ég hefði verið í of vernduðu umhverfi til að geta dæmt um það. Í háskólasamfélaginu voru hommar og lesbíur opinskátt út úr skápnum fjarri fjölskyldu og nágrönnum. Morð og ofbeldi voru fátíð. Ég man ekki eftir neinum hate crimes gegn hommum eða lesbíum - en fór á netið að leita. Fann mér til mikils léttis quote í queer theory prófessor í skólanum sem lýsti campusnum sem opnu og frjálslyndu samfélagi - sem er akkúrat mín upplifun af minni skólagöngu þarna. Tilefnið var þó ekkert skemmtilegt en það var vegna þess að fáni samkynhneigðra var brenndur (hate crime - en eftir minn tíma) og prófessorinn var hissa....

Allavega. Þarna varð ég femínisti, hlynnt réttindum samkynhneigðra og kynntist mörgu sem sneri að margbreytileika. Þótt það hljómi kannski skringilega þá var Kansas miklu betri uppspretta lærdóms fyrir þessa hluti heldur en Ísland. Ástæðan einfaldlega sú að í 26þús manna háskóla í miðríkjum Bandaríkjanna er fólk frá öllum heimshlutum, af mismunandi kynhneigðum, kynþáttum, með mismunandi trúarbrögð o.s.frv. Þangað koma líka alls kyns fáráðlingar. Ég sé enn eftir að hafa ekki farið á fyrirlesturinn með Ku Klux Klan... damn! Til samanburðar get ég sagt að á Íslandi hafði ég hitt einn svartan mann fram að tvítugu og kynnst einum homma! Jamm, litla verndaða, einsleita Ísland... Og ég veit ekki til þess að Klanið hafi nokkurn tímann komið hingað með fyrirlestur...!

En þó að háskólasamfélagið hafi iðað af margbreytileika, fjölbreytileika og frjálslyndi þá verður það sama seint sagt um Kansas. Eftir að hafa googlað minn fyrrum heimabæ komst ég að því að staðan hefur langt í frá batnað - og örugglega bara versnað eftir Bush og co. Sennilega myndi Brokeback Mountain passað vel inn í suma litlu sveitabæina í Kansas (bara ekki Lawrence!!! :-þ), og víðar. Því miður. Bandaríkjunum sárvantar góðan forseta - demókrata. Það vantar líka fleiri myndir eins og Brokeback Mountain - bara ekki eins langdregnar!

Orkuveituauglýsingarpistillinn (örlítið breyttur)

Dýrustu auglýsingamistök Íslandssögunnar
Dýrasta auglýsing Íslandssögunnar var frumsýnd á dögunum. Það var Orkuveita Reykjavíkur sem hratt af stað ímyndarherferð sem ætlað er að sýna landsmönnum hvað fyrirtækið hefur upp á að bjóða og hvetja okkur til að njóta þess til hins ítrasta. Markaðsfræðingurinn ég sit hins vegar gapandi yfir fortíðarhyggjunni og kynhlutverkum sem birtast í auglýsingunni. Hlutverk kynjanna eru í æpandi mótsögn við alla jafnréttisbaráttu undanfarin 100 ár.

Glamúr eftirstríðsáranna
Í aðalhlutverkum auglýsingarinnar eru faðir og sonur. Þemað er sótt í eftirstríðsárin í Bandaríkjunum, árin sem Hollywood fjöldaframleiddi hverja glamúrmyndina á fætur annarri með dansandi og syngjandi hamingjusömum stórstjörnum á borð við Fred Astair. Þetta eru jafnframt árin sem eru þekkt fyrir áróður stjórnvalda í að koma konum aftur inn á heimilin til að losa um störf fyrir karlana sem sneru stríðshrjáðir heim. Búin var til glamúrmynd af hinni yfirmáta hamingjusömu húsmóður og konum statt og stöðugt talin trú um að göfugasta markmið þeirra í lífinu væri að giftast, eignast börn og hlúa að heimilinu. Samhliða þessu hlutverki áttu þær að vera fínar og sætar. Playboy var stofnað á þessum árum og fegurðarsamkeppnir voru vinsælar. Síðustu árþúsundin á undan höfðu konur mátt þola að líkamar þeirra væru lagaleg eign karlmanna, annaðhvort feðra, eiginmanna eða þrælahaldara. Þegar lagalegur yfirráðaréttur fékkst hófust önnur öfl handa við að svipta konum líkömum sínum á nýjan hátt.

"Ímynd konunnar er hönnuð til að skjalla hann"
Afleiðingin af þessum "glamúrárum" var að konur spurðu sig hvort þetta væri allt og sumt sem lífið hefði upp á að bjóða, enda hafði konum fækkað í háskólanámi og barneignir rokið upp í samræmi við úthlutuð kvenhlutverk. Í framhaldinu skrifaði Simone de Beauvoir bókina The Second Sex, Betty Friedan skrifaði Feminine Mystique um vandamálið sem átti sér ekkert nafn og Íslandsvinurinn Germain Greer skrifaði Kvengeldingin. Annarri bylgju femínismans var hrundið af stað. Rauðsokkurnar mættu á svæðið sem svar kvenna við misréttinu. Hér á Íslandi birtust Rauðsokkurnar fyrst í 1. maí göngunni 1970 undir slagorðinu "manneskja ekki markaðsvara." Hlutverki kvenna var lýst á eftirfarandi hátt af heimspekingnum John Berger: "Karlar horfa á konur. Konur horfa á að horft sé á þær. Þetta ákveður ekki aðeins samband karla við konur heldur sambönd kvenna við sjálfar sig." Hann skrifaði líka: "Konur eru sýndar á allt annan hátt en karlar, ekki vegna þess að hið kvenlega er öðruvísi heldur en hið karllæga, heldur vegna þess að ávallt er gert ráð fyrir að hinn "fullkomni" áhorfandi sé karlkyns, og ímynd konunnar er hönnuð til að skjalla hann." Með þetta í huga er áhugavert að skoða Orkuveituauglýsinguna.

Hundraðþúsund hlutir til að horfa á
Í upphafi auglýsingarinnar er pabbinn að ryksuga og sonurinn spyr hvernig rafmagnið verður til. Pabbinn svífur um gólf og útskýrir fyrir drengnum að rafmagnið komi úr fjöllunum. Það sem á eftir kemur er nánast farsakennt:
*******
Pabbinn syngur “Ljósið leiðir myndir inn í sjónvarpið” og á meðan sjáum við 4 fáklæddar konur í hlutverki kórdansara (chorus girls) hlaupa inn á skjáinn og stilla sér upp. Næst syngur pabbinn “Er ég kalla síðan fram á tölvuskjá” og við sjáum sömu konur frá öðru sjónarhorni. Toppurinn er þegar pabbinn syngur “Ég fæ hundrað þúsund hluti til að horfa á” á meðan fjöldi kvenna svífur yfir skjáinn, fyrst ein og ein en síðan í hóp. Ekki er annað hægt en að skilja mynd og texta saman á þann hátt að konurnar séu hlutir sem Orkuveitan gerir pabbanum kleift að horfa á í hundraðþúsundatali í gegnum sjónvarp og tölvur. Að þessu loknu birtist pabbinn sigurreifur með útbreiddan faðminn fyrir framan Hallgrímskirkju syngjandi “Svona viljum við hafa það. Ekkert vesen og allt í góðu lagi.”
*******
Eiginkonan og móðirin er hvergi nærstödd í auglýsingunni. Í staðinn er pabbinn sáttur við að vera umkringdur fáklæddum, brosandi konum. Hann syngur hástöfum "Svona viljum við hafa það. Ekkert vesen og allt í góðu lagi." Í einum hluta auglýsingarinnar eru konurnar 2, sitthvorumegin við hann. Hann er með 2 í takinu, alvörukarlmaður – eða svo segir klisjan. Hápunktur auglýsingarinnar er í lokin þegar pabbinn og sonurinn eru úti í náttúrunni með fáklæddu konurnar skoppandi í kringum þá. Hverirnir gjósa með hvítum hvelli og minna óneitanlega á hið alræmda "money shot" eða sáðlátið ómissandi í klámmyndunum.

Ryksugan sýnilega framförin í jafnréttismálum
Orkuveituauglýsingin er full af þekktum táknum feðraveldisins. Vísindin eru karlanna. Konurnar eru skrautmunir; hlutir til að horfa á, gleðja og þjóna en hafa enga eftirsóknarverða vitsmuni. Í auglýsingunni er reðurtákn, sáðlát og allur pakkinn. Allt nema jafnrétti. Markaðsfólk Orkuveitunnar segir þó að ekkert af þessu sé meðvitað eða markmiðið með auglýsingunni. Þó eru fullklæddir karlmenn og fáklæddar konur aðalsmerki klámvæðingarinnar sem mikil umræða er um í dag. Þrátt fyrir góða viðleitni reyndist mér ekki unnt að lesa jákvæð tákn út úr auglýsingunni. Jafnréttið er ekki til staðar. Hlutleysið ekki heldur. Það er hægt að hrósa leikurum og dönsurum fyrir góða frammistöðu í hlutverkum sínum en hlutverkunum er úthlutað af feðraveldinu sem erfist greinilega í beinan karllegg frá föður til sonar. Eina sýnilega framförin í jafnréttismálum er að pabbinn lærði að ryksuga. Allt þetta – óvart – í dýrustu auglýsingu Íslandssögunnar.

Vantar í pistilinn minn

Böö það vantar inn í pistilinn minn í Viðskiptablaðinu í dag! Var með greiningu á Orkuveituauglýsingunni - dýrustu auglýsingu Íslandssögunnar. Soldið spæld að það skuli vanta því það vantar djúsí hlutann... þennan:

*****
Texti: Ljósið leiðir myndir inn í sjónvarpið.
Mynd: Inn á sjónvarpsskjáinn hlaupa 4 fáklæddar konur í hlutverki kórdansara (chorus girls) a la Las Vegas stíl.
*****
Texti: Er ég kalla síðan fram á tölvuskjá.
Mynd: Annað sjónarhorn á fáklæddu konurnar.
*****
Texti: Ég fæ hundraðþúsund hluti til að horfa á.
Mynd: Fjöldi kvenna svífur yfir skjáinn, fyrst ein og ein og síðan í hóp – greinilega hlutirnir sem vísað er til.
*****
Texti: Svona viljum við hafa það. Ekkert vesen og allt í góðu lagi.
Mynd: Pabbinn með útbreiddan faðminn fyrir framan Hallgrímskirkju. Ekki er annað hægt en að sjá kirkjuna sem reðurtákn í beinu framhaldi af textanum og myndefninu á undan.
*****

Þessi síðasti hluti er reyndar með - sem texti undir mynd.

Til hamingju með daginn

Til hamingju með daginn!

Enn af HM

Þó svo að ég hafi einu sinni orðið heimsmeistari í fótbolta og verið í fótboltaóeirðum í kringum HM í Frakklandi þá þykir mér sífellt minna varið í þessa keppni. Ástæðan? Fyrst allt vændið og mansalið og afspyrnuléleg viðbrögð KSÍ, FIFA og stjórnvalda. Nú þetta:

NFS, 26. Júní 2006 22:13
Fátæk börn í boltagerð
Áætlað er að þúsundir barna frá fátækum þorpum í kringum höfuðborg Indlands, Nýju-Delhí, vinni fjölskyldum sínum inn aukatekjur með því að handsauma fótbolta. Börnin sem fréttamenn AP-fréttastofunnar hittu á ferð sinni á dögunum voru allt niður í 10 ára gömul og unnu í átta tíma á dag til að öngla saman smáaurum fyrir fjölskyldur sínar. Hvert barn getur klárað að meðaltali tvo bolta á dag og fær fyrir það rétt rúmar ellefu krónur íslenskar.
Ekkert eftirlit er með vinnu barnanna eða aðbúnaði þeirra en þeim er hætt við sýkingum í skurði sem þau verða fyrir við saumavinnuna.
Alþjóðaknattspyrnusambandið segir alla fótbolta sem notaðir eru í keppnum á vegum samtakanna koma frá framleiðendum sem hafna og fordæma barnaþrælkun. Barnaverndarsamtök á Indlandi segja hins vegar að þar sé enginn opinber eftirlitsaðili sem fylgist með því að börn séu ekki notuð við framleiðslu boltanna, loforð fótboltafyrirtækjanna um að börn vinni ekki við saumaskapinn séu því ekki endilega mikils virði.

Sammála

Bls 18 í Fréttablaðinu í dag:

Femínistar standa fyrir öflugustu hugmyndafræðilegu umræðunni á Íslandi um þessar mundir.... Einn áhugaverðasti þátturinn á NFS þessar vikurnar er þátturinn Óþekkt. Þáttastjórnendurnir, Kristín Tómasdóttir og Alfífa Ketilsdóttir, horfa á samfélagið gagnrýnum femínískum augum. Hressandi umræða á laugardagsmorgnum...

Er nokkuð hægt að vera of sammála????

Maður vikunnar

Ég hef móttekið fjölmargar kvartanir yfir einokun á fjölmiðlaplássi undanfarið. Ráðlegg öllum að hringja í blöðin og kvarta ;) Var samt að vona að Fréttablaðið myndi hafa konu vikunnar en verð víst að sætta mig við að vera maður... í þetta skiptið! Allt næstum satt og rétt sem þarna kemur fram - ég er náttla ógisslega klár og skemmtileg og sanngjörn og réttlát og flink... líka góð að baka og elda. Veit samt ekki alveg hvort ég standi undir titlinum að vera mikil húsmóðir í mér bara fyrir að geta búið til eitthvað gott í gogginn. Ætli ég reyni ekki að bæta upp restina í dag með því að vera hrikalega dugleg að þvo og þrífa! Hef líka pínku áhyggjur af því að nú verði mér boðið í fullt af útilegum - ég sem fer helst alls ekki inn í tjald - nema í mikilli neyð og það hefur ekki gerst í meira en 10 ár. Svo er afar ósanngjarnt að segja að ég sé stundum dálítið þrjósk. Hið rétta er að ég er oft ansi mikið þrjósk....

En það er nú pínku gaman að vera maður vikunnar :)

Eintómir karlmenn

Hvernig er það með nýju ráðherrana - ætla þau öll að ráða bara karlmenn sem aðstoðarmenn? Félagsmálaráðherra, utanríkisráðherra og umhverfismálaráðherra réðu öll karlmenn :(

Ekkert lambakjöt á diskinn minn...

Var að enda við að senda þennan póst á Kjarnafæði. Ætli þeir svari?

Góðan dag.

Mig langar til að þakka ykkur fyrir auglýsinguna sem birtist í Blaðinu þann 16. júní síðastliðinn. Það er alltaf ánægjulegt þegar fyrirtæki sýna sitt rétta andlit og gildismat í auglýsingum. Það verður einhvern veginn svo miklu auðveldara fyrir okkur neytendur að velja vörur við hæfi þegar slíkar upplýsingar eru tiltækar. Í framhaldi af því langar mig einnig til að segja að gildismat Kjarnafæðis er mér alls ekki að skapi og gjörólíkt mínu eigin. Ég lít á konur sem manneskjur en ekki markaðsvörur - og þaðan af síður sem lambakjöt, eins og Kjarnafæði augljóslega gerir. Einnig finnst mér ógeðfellt þegar vísanir í Lolítur eða barnaklám eru viðhafðar í auglýsingum, svo sem með því að nota sleikjóa í kynferðislegum tilgangi.
Af þessum ástæðum hef ég ákveðið að versla ekki neinar vörur sem merktar eru Kjarnafæði í framtíðinni.

Kveðja
Katrín Anna

Ps. Tek fram að ég er talskona Femínistafélagsins þó að þessi póstur sé í mínu eigin nafni en ekki fyrir hönd félagsins.

Hvað er í gangi?

Veit ekki hvaða lægð er í gangi í sambandi við skriftir þessa dagana. Samt er nóg að gerast til að skrifa um. Til dæmis hvað það var gaman að sjá allt þetta bleika á 19. júní. Fór t.d. á Oliver í hádeginu og á borði rétt hjá sat ungur maður með bleikt bindi. Ég er harðákveðin í því að það var ekki tilviljun heldur valið í tilefni dagsinsin! Á NFS var áberandi hvað margt af fréttafólkinu var í bleiku - bæði kk og kvk. Stóðu sig best af þeim sem við afhentum Bleiku steinana.

Svo er líka hitt og þetta til að kvarta yfir. T.d. auglýsing frá Kjarnafæði sem birtist í Blaðinu fyrir viku. Heilsíðuauglýsing þar sem auglýst er lambakjöt og ekki verður betur séð heldur en að þeir hafi valið þá leið að tengja lambakjöt við unga ljóshærða konu með tilvísunum í klámið. Stelpan er með sleikjó - bein vísun í Lolitu syndromið (ullabjakkkkkk) og síðan er textinn á þann veg að ekki fer á milli mála að stelpan er bara hlutur - kjötstykki - en ekki manneskja. Þoli ekki svona auglýsingar og Kjarnafæði komið á svarta listann. Sá listi er nú smátt og smátt að lengjast... Ætti eiginlega að taka hann saman bráðum!

HA?

Á Deiglunni er núna pistill um jafnrétti og femínisma. Þar segir meðal annars:

Á Íslandi er femínismi oft tengdur aðgerðum félaga á borð við Femínistafélag Íslands. Hefur það m.a. að markmiði sínu að auka femíníska og gagnrýna umræðu á öllum sviðum þjóðlífsins ásamt því að vinna að jafnrétti kynjanna. (Ok - so far so good) Að mati þeirra eru jákvæð mismunun og kynjakvótar til þess fallin að ná markmiði um jafnrétti. Þá hefur hugmyndum verið skotið á loft sem lúta að því að minnka möguleika karla til setu í stjórnum fyrirtækja til að ná fram jafnrétti. Sú umræða snýst í raun um misréttisbaráttu en ekki jafnréttisbaráttu.

HA???? Hefur fólk ekkert fyrir því að kynna sér málin? Aldrei myndi mér detta í hug að skrifa svona um önnur félög án þess að tékka á heimildum og vera viss um að ég færi með rétt mál. Þetta er svo langt út fyrir allt sem félagið hefur gert að það er með ólíkindum að manneskjan skuli láta þetta frá sér.... Búin að senda henni póst og biðja hana annaðhvort um að lagfæra þetta eða finna staðfestar heimildir fyrir því sem hún skrifaði - sem hún mun auðvitað ekki finna.

Afrekaskrá: 3 kökur og 1 brauð

Málum bæinn bleikan tókst ljómandi vel í gær :) Alltaf gaman þegar vel tekst til. Taldi saman að ég fór í 11 viðtöl í gær - og þá eru ekki meðtaldar afhendingar á Bleika steininum, en sjálf sá ég þó bara um að afhenda 1. Þetta er fullmikið af hinu góða þó það sé kannski ágætt að klára þetta bara af á einum degi og vera þá búin með kvótann - eða næstum því. Fer í Ísland í bítið í fyrramálið að tala um afskurð af fúsum og frjálsum vilja.

Stóð svo við það sem ég lofaði í Fréttablaðinu - bakaði 3 kökur og 1 brauð handa mínum heittelskaða í tilefni dagsins. Hann átti það nú líka alveg skilið... svona einu sinni. ;)

Málsháttur dagsins: Oft veltir lítil þúfa þungum steini.

Málum bæinn bleikan er í dag

Svaðalega var ég sammála forsetanum um konurnar sem voru sæmdar Fálkaorðunni. Tími til kominn að svona stór hópur femínista fengju orður á sama tíma!!! :) Finnst líka svolítið skondið að fylgjast með kynjahlutfallinu. Forsetinn var harðlega gagnrýndur í fyrra fyrir að útnefna næstum bara karlmenn 2 dögum áður en konur fögnuð 90 ára kosningarétti. Núna passaði hann sig betur - en samt er eins og það sé í gangi regla um karlarnir skuli alltaf vera fleiri. Nú var hlutfallið sem sagt eins jafnt og hægt var miðað við að karlarnir væru fleiri - 6 kk og 5 kvk.

Rúna, Margrét, Magga Pála, Ahn Dao og Þórhildur - innilega til hamingju :)

ps. ok fyrirsögnin kemur þessu innleggi ekki við en vildi bara minna á daginn!

Special delivery

Í gær fékk ég símtal frá starfsmanni Olís. Hann sagði mér að hjá þeim væri 19. júní bleikur. Svo sendi hann mér Olís dagatalið í pósti. Þar er 19. júní bleikur. Mér finnst það flott. :)

Framtíðarlandið

Þetta er málið á morgun - hægt að skrá sig sem stofnfélaga á www.framtidarlandid.is. Ég er búin að því... :)

Félag um framtíð Íslands stofnað 17. júní

Framtíðarlandið – félag áhugafólks um framtíð Íslands, verður stofnað í Austurbæ 17. júní kl.12.00.

Frumkvæðið að stofnun félagsins kemur frá fólki af ólíkum sviðum þjóðlífsins sem telur að nú sé þörf á afli sem getur komið sterkt inn í umræðuna, upplýst, gagnrýnt og varpað fram nýjum hugmyndum – vettvangi til að hafa áhrif á framtíðarmynd Íslands sem liggur nú á teikniborðinu.

Félagið verður þverpólitískt, með víðtækri þátttöku frumkvöðla, fræðimanna, viðskiptafólks, listamanna og fólks af öllum sviðum atvinnulífsins, félag sem getur þrýst á stjórnvöld með kraftmiklum hætti.

Undanfarin ár hefur Ísland stefnt eins og eftir sjálfstýringu í eina átt þar sem farsæld og fjölbreytni í atvinnulífi hefur verið sett til hliðar fyrir einhæfa stóriðju, þenslu og óþarfa eyðileggingu náttúruverðmæta. Með samtakamætti getum við haft raunveruleg áhrif svo sveigt sé af rangri leið áður en tekist hefur að mála okkur út í horn og ræna okkur um leið þeim ótal spennandi kostum sem eðlilegt væri að stæðu til boða.

Við viljum virkja allt það jákvæða fólk sem vill að Ísland verði mannvænt, vistvænt, skapandi og skemmtileg land. Við viljum verða vettvangur fyrir alla sem eru í vafa um að framtíðaráform stjórnvalda séu landi og þjóð fyrir bestu, hvort sem það eru þeir sem vilja standa vörð um náttúruna, þeir sem hafa menntað sig og langar að starfa hér, þeir sem hafa starfað í sveltum atvinnugreinum, þeir sem eru með snjalla viðskiptahugmynd eða bara þeir sem voru að vakna upp við vondan draum. Fyrir alla sem eiga sér draum.


Fundurinn mun standa tæpa klukkustund og þar munu tala þau Þóra Ellen Þórhallsdóttir, doktor í grasafræði, Reynir Harðarson deildarstjóri hjá CCP, Ósk Vilhjálmsdóttir myndlistarkona og ferðafrömuður auk leikkvennanna Maríu Ellingsen og Margrétar Vilhjálmsdóttur sem kynna dagskrána.

Úr ýmsum áttum

Viðskiptablaðinu var dreift frítt með Mogganum á miðvikudaginn þannig að rektorspistillinn fékk víst meiri útbreiðslu en ég bjóst við... Í sjálfu sér er ég mjög ánægð með að þessi pistill skyldi hafa farið í svona góða dreifingu vegna þess að þetta mál er hrikalegt. Þarna er kona sem er gróflega brotið á bara vegna þess að hún er kona. Ég fæ samt ónotatilfinningu í mallann yfir að gagnrýna konu sem er í þeirri stöðu að vera fyrsta konan í embætti svona harkalega. Konur standa oft frammi fyrir því að vera gagnrýndar harðar heldur en karlar í sömu stöðu. Línan þarna á milli er ekki auðveld því að auðvitað eiga konur ekki að vera með free-card heldur og geta gert það sem þeim dettur í hug án þess að vera gagnrýndar. Kynjakerfið virkar þannig að bæði karlar og konur taka þátt í að viðhalda því og því þarf að breyta. Konur sem viðhalda kynjakerfinu og brjóta á öðrum konum verða að vera tilbúnar til að taka því - og við hin þurfum að passa að gagnrýnin verði sambærileg og ef karlar ættu í hlut. Ég er svo sem að gagnrýna "gamla góða Villa" og Björn Inga fyrir lélegan hlut kvenna í borgarstjórn þannig að balancinn er svona nokkurn veginn til staðar - þó skotið í Blaðinu í dag hafi alls ekki verið fast.

Undirbúningur fyrir 19. júní er í fullum gír. Nú er verið að skipuleggja afhendingu á bleiku steinunum!!! Spennó, spennó hver fær steinana í ár :) Mér finnst þeir fara á góða staði.

Svo er ég búin að komast að því að veðrið í London er betra en hér! Þegar við komum út var svona 23-24°C - sem er með því allra þægilegasta. Svo hitnaði reyndar þegar leið á vikuna og seinni hluta vikunnar var 28-29 stiga hiti. Samt afskaplega þægilegt nema í lestunum, þar var alltof heitt, sérstaklega á rush hour. En kona finnur hvernig streitan líður í burtu í svona þægilegum hita, löngunin í súkkulaði hverfur og þörfin fyrir hreyfingu eykst. Enda var ég endurnærð eftir vikuna :)

Gott að vita um London:

Silver Moon bókabúðin er á 3. hæð í bókabúðinni Foyles á Charing Cross Road (hægt að fara úr lestinni á Tottenham Court Road eða Leicester Square). Í Silver Moon er hægt að kaupa alls konar femínískar bækur. Algjört æði.

Women's Library er á Old Castle Road (lestarstöð Aldgate East, fara til hægri frá lestarstöðinni og gatan er þar rétt hjá). Bókasafnið auðvitað frábært en það þarf að gefa sér tíma til að grúska. Á fyrstu hæðinni eru síðan oft sýningar í gangi. Ég sá sýningu um alls kyns femínískar mótmælaaðgerðir. Mjög skemmtileg.

Ef þú þarft að fara til læknis þá er walk in clinic á Victoria Station. Held það sé á Waterloo Station líka. Algjör lifesafer!

Karlaveldi Íslands

Var að senda þetta innan á femínistapóstlistann - í tilefni umræðu um skref "áfram" í jafnréttisátt:

Konur voru 4 í ríkisstjórn fyrir nýjustu breytingar þannig að þar er engin framför - nema þessu sé skipt upp á milli flokka, þá fækkar kvenráðherrum Sjálfstæðisflokks um einn en Framsókn bætir einum kvenráðherra við á móti. Í borgarstjórn verður kona forseti borgarstjórnar en á móti kemur að karl verður borgarstjóri í stað konu. Var að hlusta á fréttir nú rétt í þessu. Af 8 nefndum fá Framsókn formennsku í 2 nefndum og konur fá formennsku í 2 nefndum líka. Konur eru 3 í meirihluta borgarstjórnar, Framsókn er með 1 fulltrúa í borgarstjórn. Jöfn bítti? Karlarnir 2 í forsvari lýstu yfir ánægju með þennan hlut kvenna (nema hvað...) og sögðu að enn ætti eftir að skipa í fullt af nefndum. Hlutfall kvenna í sumum nefndum er einnig afburða lélegt. Sjá nánar frétt á mbl.is


Í stjórnir Orkuveitunnar og Faxaflóahafnar voru bara kosnir karlar.

***************

Á morgun verður afbragðspistill í Viðskiptablaðinu um frækilegar ráðningar Háskóla Íslands þar sem kyn ræður för. Á morgun verð ég líka í Ísland í bítið að ræða um klámvæðinguna en danskir unglingar eru helteknir af klámi - nema hvað í vöggu klámvæðingarinnar! Verð líka á RUV rétt fyrir hálf-tvö að ræða um vændi og mansal á HM. Sem sagt busy fjölmiðladagur á morgun. Get svoleiðis svarið að ég hef bloggað áður um hversu skrýtið það er stundum þegar allt lendir á sama deginum - og ekki einu sinni um sama málefnið.

****************

En aðeins um Háskóla Íslands málið - ég skil ekki að konan skuli leyfa sér að fara í fjölmiðla og tala um að kennsla á grunnámskeiðum vegi meira en rannsóknarreynsla og kennsla á framhaldsstigi. Jú, gæti skilið þetta hæfnismat ef verið væri að ráða stundakennara - en ekki dósent í karladeild í karlafagi þar sem sárlega vantar konur. Síðasta hálmstráið notað til að viðhalda karlaklúbbnum - það er svo gaman að vera einkynjaður klúbbur...

****************

Á eftir að blogga um ráðstefnuna á Bifröst, London og örugglega eitthvað fleira.

Afsakið hlé

Hef ekki verið svona léleg við að blogga frá upphafi... en fyrst var einhver lágdeyða í gangi og svo fór ég bara í frí. Var voða gott en nú er víst kominn tími til að halda áfram þar sem frá var horfið. Byrja á tilraunastarfsemi vegna 19. júní - málum bæinn bleikan.

Jæja - tilraunastarfsemi lokið. Verð að taka út linkinn því hann veldur því að allir tenglarnir detta neðst á síðuna. En ef þið viljið setja 19. júní borða á vefsíðuna ykkur kíkið þá neðarlega á þessa síðu:

19. júní síða frá 2004

Kosningaáróður - hvað er yfir mörkin!

Óleyfilegur kosningaáróður og kosningaspjöll telst:

Að bera á mann fé eða fríðindi til að hafa áhrif á hvort hann greiðir atkvæði eða hvernig hann greiðir atkvæði...

Af vefnum www.kosningar.is.

***********

Ég er búin að heyra eina óstaðfesta sögu um að einn flokkurinn hafi borið fé í fólk til að fá það á kjörstað til að kjósa flokkinn. Gef ekki upp hvaða flokk er um að ræða þar sem þetta er óstaðfest - en vona að þetta sé ekki rétt. Ef þetta er rétt vona ég að þar til gerð yfirvöld muni rannsaka málið og komast að réttri niðurstöðu.

Ég veit líka um eitt framboð sem bauð fólki frítt í bíó í boði framboðsins. Er það ólglegt sbr ákvæðið hér fyrir ofan? Veit allavega að mér finnst það ansi sorglegt ef við eigum að kjósa okkar lýðræðislegu kjörnu fulltrúa á grundvelli þess hver býður í bíó eða einhvað skylt sem kemur málefnunum minna en ekkert við!

*************

En öllu ánægjulegri fréttir - vorum að enda við að klára að lakka gluggana í bílskúrnum og geymslunni. Þá á bara eftir að pússa, bæsa og lakka einn glugga í öllu húsinu!!! :) Hér ríkir mikil gleði með það...

Kosningar

Jæja þá styttist í kosningar. Einn dagur eftir! Er næstum búin að ákveða hvað ég ætla að kjósa... en ekki alveg. Það væri auðveldara að vera ekki þverpólitísk ;)

Horfði á borgarafundinn á NFS fyrir Reykjavík með öðru auganu í gær. Alltaf fer það jafnmikið í taugarnar á mér þegar ég horfi á þessa þætti og þetta eru eintómir karlar með körlum. Svandís hjá Vinstri grænum var eina konan. Allir spyrlarnir á NFS voru karlar - og svo hefur það verið allan tímann. Svandís kom með athugasemd á þetta - mjög flotta - og benti þeim á að sjónvarpsstöð með metnað sem vill gera góða hluti getur ekki verið með eintóma karla sem spyrla. Sigmundur Ernir fór alveg með það í viðbrögðum. Fyrstu viðbrögð hjá honum voru að bjóðast til að fara!!! Það fjölgar ekki konunum í hópi spyrla... ætti að vera augljóst. Síðan skammaði hann Svandísi fyrir að Vinstri grænir væru með Árna Þór í 2. sæti og spurði af hverju þau væru ekki með konu í því sæti. Svandís svaraði og sagði að þetta væri þeirra fléttulisti. Augljóst einmitt að þetta er til fyrirmyndar því lögð er áhersla á mikilvægi beggja kynja. Þá benti Sigmundur á sjálfan sig og Egil og sagði: "Þetta er okkar fléttulisti". Það var nefnilega það. Fléttulisti NFS er sem sagt karl, karl, karl, karl, karl, karl, karl.... sá um daginn frétt á NFS um hárgreiðslustofu sem var með fléttunámskeið fyrir pabba. Held að Sigmundur Ernir ætti að skella sér á eitt slíkt námskeið og læra að flétta! ;)

Annars er annað sem ég er ekki nógu hrifin af. Fyrir ca viku síðan leit út fyrir miðað við skoðanakannir að konur gætu orðið í meirihluta í borgarstjórn, 8 á móti 7 körlum. Núna lítur út fyrir að staðan geti orðið 5 konur og 10 karlar. Konur rétt 1/3. Þetta er alveg fatalt! Hvað í andsk. þarf til að konur komist að? Nú er ekki hægt að segja að það sé ekki möguleiki á að kjósa konur. Þær eru í slatta af baráttusætum.

Íslandsvinir ganga

Íslandsvinir ganga á laugardaginn. Sjá allt um það hér: http://www.islandsvinir.org/

Upplýsingaskyldan:
Verð í viðtali á NFS í þættinum sem byrjar kl 12:30 á laugardag. Umræðuefni - kosningarnar!

Bíllinn minn er ónýtur :´-(

Var tilkynnt á föstudag að það væri galli í bílnum mínum - víst þekkt vandamál í þessari tegund... sem þýðir að það þarf að skipta um vél í bílnum! Vonandi tekur umboðið vel í að skipta fríkeypis fyrst þeir eru að selja gallaða bíla og sleppa því að innkalla þá. Lágmark að bílar endist fram yfir 50þús km!!!

Það virðist vera að nú sé allsherjarsamsæri í gangi gegn bílnum mínum, þessari elsku sem hefur engum gert mein! Í gær var ég að fara í virðulegt kvöldverðarboð hjá hafmeyjunni bjarna ármannssyni... og viti menn... bakkaði út úr stæðinu og yfir járnbita sem borgarstarfsmenn skildu eftir óvarinn í útkeyrslunni. Járnbiti sem stendur beint upp úr malbikinu - pikkfastur og sperrtur út í loftið. Ekki bílvænn og nú er eitt dekkið ónýtt.

En að öðru - Gísli Marteinn frambjóðandi var leynigestur hafmeyjunnar. Átti að stoppa við í 5 - 10 mínútur en endaði á að staldra við í yfir klukkutíma og útskýra jafnréttisstefnu sína... það var bara nokkuð gaman en mig er farið að dauðlanga til að taka debat um femínismann innan frjálshyggjunnar... þ.e. challenga rökin innan frjálshyggjunnar því eins og allir vita - nema frjálshyggjumenn - geta femínismi og frjálshyggja farið prýðisvel saman!

Akkúrat

Við berum ekki aðeins ábyrgð á því sem við gerum heldur einnig því sem við látum ógert.

- Moliére

Sýnishorn

Í hádeginu settist ég út á svalir í sól og blíðu. Núna er haglél.

Kosningavefur

Er búin að sitja í marga klukkutíma fyrir framan skjáinn að búa til kosningavef Femínistafélagsins. Herlegheitin - sem eru komin - er hægt að skoða með því að fara á www.feministinn.is og smella þar á myndina fyrir kosningavefinn. Smá fontafyllerí í gangi, soooorrý... Síðan er enn í vinnslu. Ef þið eruð með efni sem má setja inn endilega meilið það til mín - þarf að vera tengt sveitarstjórnarkosningunum og jafnrétti! Endilega hrúgið samt ekki á mig grilljón hugmyndum sem ég þarf sjálf að fara í geðveika vinnu til að búa til eða finna... enginn tími í slíkt - en mun með glöðu geði koma tilbúnu efni inn á vefinn :)

Sendi eftirfarandi spurningar inn á póstlistann. Megið endilega svara þeim - og svörin gætu lent á vefnum...

Hvers vegna skiptir máli að kjósa?
Hvers vegna skiptir kyn máli í pólitík?

Tími til hvers?

Það er eitthvað skrýtið við auglýsingu Sjálfstæðisflokksins inn á mbl.is. Fyrst kemur bleik mynd - af lítilli stelpur með textanum: Tími til að lifa. Svo kemur blá mynd - af gamalli konu og textanum: Tími til að leysa málin. Einhvern veginn var heilinn á mér búinn að búa til textann: Tími til að deyja - áður en ég las textann á auglýsingunni. Var eitthvað svo rökrétt framhald - tími til að lifa, tími til að deyja...

En hvað um það. Er búin að gera upp hug minn varðandi bleika litinn í kosningaauglýsingum. Finnst það bara aldeilis frábært að flokkarnir séu að nota bleika litinn. Það er algjört breikthrough að Sjálfstæðisflokkurinn sé farinn að nota bleika litinn samhliða bláa litnum. Einnig er Björn Ingi í bleikri peysu í einni Sjónvarpsauglýsingunni. Svandís Svavars var með bleikan trefil í sjónvarpsviðtali... kannski það sé aðeins öðruvísi því það er ekki auglýsing - og kannski tilviljun - en í auglýsingunum er bleiki liturinn enginn tilviljun. Markmið Femínistafélagsins með því að nota bleika litinn er að hann öðlist sama sess og blái liturinn - að bleiki liturinn verði notaður jafn mikið og njóti sömu virðingar. Þetta er skref í þá átt. Hef líka heyrt af því undanfarið að strákar séu byrjaðir að ganga í bleiku. Einn frændi minn á víst bleika strigaskó :). Svo frétti ég af öðrum með bleika derhúfu - reyndar með Playboymerkinu á :( sem er algjör bömmer... þarf bara að ná því af.

Lenti óvart í súpunni

Á fyrsta karlmennskukvöldi karlahóps Femínistafélagsins var Sigurjón Kjartansson með erindi um karlmennsku og húmor. Sigurjón talaði mikið um hvernig Íslendingar lenda alltaf í hinu og þessu... menn lenda óvart í því að skilja, lenda óvart í því að keyra fullir - eða lenda óvart í því að keyra fullir á ljósastaur, lenda óvart í því að stinga af og lenda óvart í því að löggan nær þeim. Svona orðar Geir H. Haarde það allavega - aumingja Eyþór - lenti í því að vera tekinn! Reyndar var ég ánæðg með það í útvarpinu í morgun að ein fréttakonan gekk á Geir með þetta orðalag - og hann umorðaði. En hefur Eyþór tekið á málinu með myndarskap og ég veit ekki hvað og hvað eins og utanríkisráðherra heldur fram??? Mér finnst það ekki... finnst algjör óþarfi að hefja manninn upp til skýjanna fyrir að hafa lagt líf og limi annarra í hætti með ólöglegu athæfi. Það kallast ekki að axla ábyrgð að stinga af en sitja nauðugur viljugur í súpunni af því að löggan náði kauða! Held líka að korters fundur hefði átt að duga til að komast að niðurstöðu í málinu... hvaða álitamál voru á dagskrá?

Djöfull er ég fegin að ég datt ekki í það...

Var barnapía í rúman sólahring - barnið svo stillt að ég var næstum farin að hafa áhyggjur - hún passaði sig meira að segja á því að kúka ekkert á meðan hún var í pössun svo það var ekki einu sinni kúkableia! Samt er hún algjör skæruliði, kjörkuð og skemmtileg :)

Skaust aðeins í útskriftarpartý eftir að hún var sofnuð - engar áhyggjur samt, skildi hana ekki eftir eina - hin barnapían var heima. Þegar ég var að skutla vinkonu minni heim eftir húllumhæið stóð konugrey út á miðri götu - illa klædd og í annarlegu ástandi að húkka sér far. Vantaði far niður í bæ því henni var skítkalt og kallinn hafði stungið af. Við vorum samt ekki á leiðinni í bæinn - bentum henni á næstu gatnamót þar sem hver leigubíllinn á fætur öðrum átti leið hjá - með gult ljós á toppnum. Á leiðinni tilbaka kíkti ég aftur eftir henni en hún var horfin. Vona að löggan í löggubílnum sem ég keyrði fram hjá hafi pikkað hana upp og keyrt hana heim. Hlýtur eiginlega að vera... hennar kvöld hefur þá endað betur heldur en hjá Eyþóri Arnalds - er það ekki hámark heimskunnar að keyra fullur, vefja bílnum utan um ljósastaur og stinga af rétt fyrir kosningar????

Ms Muscle

Konur eru líka sterkar - og þess vegna var minn Mr Muscle endurskírður og heitir nú Ms Muscle...

En talandi um vöðva - ég fór í Laugar um daginn í fyrsta skipti. Þessi stöð er á svarta listanum hjá mér því þau hafa sent frá sér margar auglýsingar í gegnum tíðina sem mér finnst fáránlega hallærislegar auk þess sem heimsklassa ofurhetjur með faldar myndavélar í búningsklefum fara í alveg sérkategoríu... En - allavega - þurfti að fara aðeins þarna inn um daginn og þar vöktu 2 styttur athygli. Önnur er af konu, hin karli. Báðar stytturnar eru af nöktum, skornum líkömum og báðar eru í einhverjum skrýtnum stellingum. Konan er eins og hún sé að koma í mark í maraþoni en karlinn stendur og er fjötraður. Skrýtnast af öllu er að stytturnar skuli vera staðsettar í líkamsræktarstöð. Þetta eru ekki fallegar styttur og þær minna á þræla, sérstaklega karlstyttann því hann er jú í fjötrum. Það mætti næstum halda að stytturnar væru þarna sem áminning um að stöðin er fyrir þræla útlitsdýrkuninnar... fólkið sem er í fjötrum við að ná einhverri absúrd líkamsímynd í ætt við stytturnar... eða bara djókur eigendanna sem græða á tá og fingri á þrælunum?????

Dipló ég þarf samt að bæta því við að auðvitað er hollt að hreyfa sig passlega!

Út, út, út í góða veðrið

Það er ekki fallega gert að sýna fullt af virðulegum, góðum konum klám. Samt gerðist ég sek um akkúrat það á laugardaginn... vona að þær fyrirgefi mér! Fór líka í þáttinn Vikulokinn, á dagskrá megrunarlausa dagsins, í heimboð til Sigrúnar upphafsmanneskju megrunarlausa dagsins og í grill hjá Sif ráðskonu... sumir dagar eru meira busý en aðrir en þetta var dúndur góður dagur! Var þó með hálfgert samviskubit yfir að borða ekki sushi. Sif var heilan dag að útbúa þetta svaðalega girnilega sushi og fékk svo í heimsókn mig - sem borða ekkert hrátt - grænmetisætu og eina sem hafði aldrei borðað sushi. Sem betur fór mætti Ásta fyrir rest á svæðið og hún elskar sushi... þannig að við sluppum fyrir horn! Grænmetis sushiið var nú samt alveg ágætt á bragðið - þótt það væri sea weed á því en ég hef ekki verið mikill aðdáandi þess hingað til.

Núna kom Grétar snemma heim úr vinnunni og ætlar að halda áfram að vinna hérna heima. Fjarvinna er yndisleg. Ég ætla nú samt að spilla honum eins og virðulegu konunum - reyndar ekki með því að sýna honum klám heldur draga hann út í göngutúr í góða veðrinu :) Það er hvort sem er enginn vinnufriður hérna. Trommarinn í næsta húsi á annaðhvort vini eða þá að hann er að reyna að læra á gítar/bassa eða álíka hljóðfæri... einhver sagði um daginn að ástandið yrði fyrst slæmt þegar það væri komið heilt bílskúrsband í næsta hús en ekki bara trommari. Er að spá í hvort að sú stund sé að renna upp....

Kvennahreyfingin ber af

Spurning:
Hver getur litið fram hjá þeim grófu mannréttindabrotum sem verið er að fremja á konum í tengslum við HM 2006?

Svar:
Karlarnir hjá KSÍ, FIFA og ofbeldismenn sem kaupa vændi

Hverjum á eftir að fá svar frá?
Fótboltaunnendum
Stjórnvöldum
Styrktaraðilum

Hver er nú þegar búin að bregðast við?
Kvennahreyfingin! Flottust að venju... :)

Skemmtilegar og klárar konur

Skellti mér á Happy Hour FKA áðan. Það var rosagaman. Skil ekki af hverju ég hef ekki farið fyrr. Heimurinn er fullur af skemmtilegum og klárum konum! :)

Loksins, loksins

Loksins er ég orðin að staðalímynd! Geri fastlega ráð fyrir að það þýði 10.000 manna móttöku í Smáralind, hamingjuóskir frá forsætisráðherra fyrir hönd allrar þjóðarinnar og að foreldrar eigi sér enga ósk heitari en að dætur þeirra verði alveg eins og ég... :)

Iceland - to die for!

Ónefndur maður hér í borg liggur undir grun um ólöglegt athæfi og eru málaferli í gangi gegn honum. Þar sem um þjóðþekktan mann er að ræða hefði kona haldið að honum væri annt um að sýna og sanna að hann væri með siðferðið í lagi. Og til hvaða ráða er gripið? Jú, fara í ólöglegan kappakstur um heiminn í almennri umferð og leggja þar með fullt af fólki í lífshættu. Enda síðan geimið í partý hjá hinum háaldraða sílíkonuh(p)erra.

Síðan er það vinur hans sem lætur fyrirtækið "sitt" taka þátt með því að ferja keppendur á milli landa. Einmitt líka fyrirtæki sem þarf að sýna og sanna samfélagslega ábyrgð eftir að hafa markaðssett íslenskar konur á svona glæsilegan hátt á erlendri grundu. Nú er búið að skipta um fókus og þar sem hraðakstur hefur verið mikið í umræðunni hér á landi og nokkur banaslys orðið vegna hans hér á landi það sem af er þessu ári þá ákveður stjórnarformaðurinn að hans næsta mission sé að vera ungmennum góð fyrirmynd... Ætli við eigum ekki von á því í sumar að einhver krakkakjánar eða kallakjánar á valdatrippi fari í kappastur hringinn í kringum landið? Okkar þjóðvegir bera það alveg - ein akrein í hvora átt, þungaflutningar og kappakstur! Sé alveg fyrir mér nýtt slagorð í markaðssetningu fyrir Ísland: Iceland - to die for!

Í lýsisklemmu

Ok. Það er ekkert mál að sleppa því að borða KFC - borða þar aldrei hvort sem er og finnst maturinn þar frekar vondur. Ekkert mál að sleppa L'oreal vörum því nú er ég að reyna að kaupa umhverfisvænar snyrtivörur (get nú samt helst fyrirgefið þessu fyrirtæki - skil alveg þeirra þátttöku). Ekkert mál að sleppa því að versla við TASK því ég er nú ekki svo oft að kaupa mér tölvudót þessa dagana þar sem ég er fátækur húsbyggjandi. En lýsi... það er nú önnur saga. Byrjaði að taka lýsi í lok janúar í kjölfar mesta veikindaárs í minni 36 ára sögu! Lýsi og smoothie í morgunmata hafa svínvirkað - ekki fengið flensu síðan. Enginn hiti, kvef, hausverkur og gubbupest í einum pakka! Ekki get ég farið að hætta á lýsinu og átt það á hættu að þetta dúkki upp aftur???! Vá hvað ég er spæld með Lýsi :(

ps. ef það skyldi hafa farið fram hjá ykkur þá eru þetta styrktaraðilarnir að Leiðinni að titlinum - sjónvarpsþætti um keppendurna í konusýningunni 2006! Í þætti kvöldsins fengum við að vita allt um ástarmál stúlknanna - hvort þær væru heppnar í ástum og hvort einhver væri í sigtinu! Nú er að skýrast hvers vegna krafa er gerð um að þær séu ógiftar!

Fallegt

http://www.inca.is/show/

FIFA, HM, vændi og mansal

Eftirfarandi fréttatilkynning er inn á vef FIFA um vændi og mansal á HM 2006. Ekki er að finna orð um málið á heimasíðu heimsmeistarakeppninnar sjálfrar og þetta er það eina sem FIFA hefur um málið að segja. Meira um málið í Viðskiptablaðinu á morgun...

FIFA has no power to take legal action against human trafficking and forced prostitution Zurich, 13 April 2006 - FIFA condemns any human rights violations, particularly in terms of human trafficking and forced prostitution. However, in response to various demands for FIFA to intervene in such practices with regard to the 2006 FIFA World Cup Germany™, FIFA wishes to make it clear that, legally, it has no power to do so and that as world football's governing body, it cannot be responsible for such matters.

FIFA President Joseph S. Blatter firmly rejects accusations that by adopting a "passive stance", FIFA is part of human trafficking practices: "FIFA places great importance on respecting human life and the physical integrity of human beings. Prostitution and trafficking of women, however, does not fall within the sphere of responsibility of an international sports federation, but in that of the authorities and the law-makers of any given country.

"As a global sports organisation, FIFA is obliged to comply with international and national law. With regard to its competitions, FIFA's main task is to make sure that its competitions are organised in accordance with the law's sporting and technical standards and regulations.
"In terms of its social responsibility, FIFA has developed special campaigns with various UN bodies and non-governmental organisations over the years, and has decided to dedicate the 2006 FIFA World Cup Germany™ to the rights of children, to peace and to the fight against discrimination," concluded Blatter.

Forvitin bleik

Femínistafélagið hlaut jafnréttisverðlaun Reykjavíkurborgar í dag! :) Fyrstu verðlaun sem FÍ fær á 3ja ára ferli. Tími til kominn segi ég nú bara - hógvær að venju... Ég er himinlifandi með verðlaunin. Finnst æðislegt að félagið fái viðurkenningu fyrir allt það starf sem búið er að inna af hendi - í sjálfboðavinnu nota bene. Það er ekkert sjálfsagt mál en drifkrafturinn að baki hugsjón þeirra sem dreymir um samfélag jafnréttis og vita að með risastóru samstilltu átaki og baráttu er hægt að ná markmiðinu.

Ég játa líka að það gladdi mitt litla hjarta að vera tilnefnd sem einstaklingur :) Hefði samt ekki viljað fá verðlaunin því félagið átti þau margfalt meira skilið. En... er dáldið forvitin að fá að vita hver tilnefndi mig. Vitið þið það? Ef já plís sendið mér meil eða skrifið í kommentakerfið ;)